الهلال منذ انشائه في عام 1930م واطلاعه بدوره الوطني في حركة الاستقلال بعد ان صار هو القبلة لكل الزعماء من الاحزاب المختلفة عندما اغلق المستعمر نادي الخريجين التف كل الزعماء تقريباً حول الهلال وحازوا على عضويته ومارسوا السياسة من خلاله، فأقاموا الندوات والمسرحيات والفرق الموسيقية وخلافه، بدايةً من الزعيم الخالد اسماعيل الازهرى ومبارك زروق وحسن عوض ونصرالدين السيد وزعماء الانصار والختمية والاحزاب الاخرى. خلال الثلاثة عقود الاخيرة وصل الهلال نهائي كأس افريقيا مرتين (1987 و1992م)، ووصل لدور المجموعات اكثر من ثلاث مرات والآن تأهل لدور المجموعات في تونس الثورة وهزم الارض والجمهور والتحكيم. فيما يلي شرح بطريقة العكننة على ما جرى عبر قصيدة الحقيبة: 1/ أفكر فيه وأتأمل اراه اتجلى واتجمل هلالى الهل واتكمل واضح ده هلالابي بيتغزل في الهلال 2/ تفاصيل قولى والمجمل سأصبر ياخي كيف اعمل قريب يومداك وماطول مضت ايام ويا حليلها بقت احلام وتتأول (ديل المريخاب بعد طلوعهم من التصفيات الاولى لكأس افريقيا). 3/ اذا قلب الفتى اتحمل مصائب الدهر وآلامه ارى الصبر الجميل اجمل (عين العقل . الزموا الصبر) 4/ حبيبي دمعي يتسلسل فصول في رواية تتمثل اقيف في مواقف استبسل واشوف ظلم الحبيب حالاً اقيف مى مواقف اتوسل (المريخاب يتحاورون مع الحكم قبل الخروج) 5/ تذكر عهدنا الأول صحى الايام بتتدول (المريخاب يتناجون مع كأس سيكافا) ضربنا اللون بأجمل قوون: سر تفوق اولاد الهلال ذلك الشعار الاحمر المخطط الذي ارتداه لاعبو الافريقي وهم لا يدرون ان اولاد الهلال لمن يشوفوا الاحمر بتهيجوا وان ضرب اللون اكثر من مضمون وحلاته القوون السبب لجماعة جنون: بأجمل قون ضربنا اللون يا سادومبا اديتم بمبة ولعت النار وحرقت طلمبة وبسطت الناس ولونت الكون قال ذو الأزرق العاتي: اربعة نجضوا بالسموم والصيف قيل من هم يا مازج الكحلي بالابيض قال: فريق في بلده احتكر الوصيف وفي افريقيا مرق زي ما دخل نضيف واداري مشى لأهله كدارى في الريف وحسن مغلوب بلعوه حبوب علشان عنده نزيف قيل ثم من يا ذا الازرق قال: ادارى فصيح جنو تصريح زي السبلوقة في الخريف قال الأحمراني: يا جنا حدكم هنا في تونس الثورة دي نهاية المشوار والجولة حتجونا سريع والفرصة تضيع لا قوة لا حوله لكن أولادنا كان ليهم رأى لعبوا رجال وستروا الحال وحياهم رأس الدولة الافريقي ركب التونسية: قالوا في تونس ما حنقبل الا بالخماسية ونشوفها لايف عصرية خاب الرجاء المرتجى وفازت الكحلية والافريقي ركب التونسية وزاد للجماعة الحزن والأسية المريخاب زعلانين اكثر من التوانسة: انا لاقيت بعد الكورة الكثير من من المريخاب زعلانين اكثر من التوانسة، كيف الهلال يدرن في تونس وكيف يجيب القوون الاول وكيف وكيف، غايتو جنس حقد!. الافريقي يريد دق الحكام: الافريقي التونسي بعد اتطق طق رايح جاي فشة مغسته في الحكام وعدلوا شعار ثورتهم «الشعب يريد تغيير النظام» الى «الافريقي يريد دق الحكام» وهاك يا خبط الحكم بالله اسرع من كاكي، (هاك المرسون ده). لقد هرمنا لقد هُزمنا: الاخوة التوانسة وثورتهم العظيمة التى قادت الشعوب العربية للوقوف في وجه الحكام الظلمة وظهر في اوائل الانتفاضة ذلك الشيخ الكبير الذي حيّ الشباب وقال «لقد هرمنا لقد هرمنا» وهو يتحسس شيب رأسه وبعد جندلة الهلال للافريقي التونسي نقول له «لقد هرمنا لقد هزمنا» مع تحياتي لزين الدين بن على. هدايا الحلقة: 1/ صعيدى قال عايز يختبر الصدى قال ليه انا مين قال ليه الصدى انت حمار!. 2/ مدرس العلوم سأل الطالب ما فائدة الاذن؟ التلميذ قال ليه علشان تمسك النضارة ما تقع!. 3/ واحد قال لصاحبه شايف المرة التخينة الهناك ديك بتضرب راجلها كل يوم بالشبشب، قال ليه انت عرفت كيف؟ قال ليه ما انا راجلها!. 4/ الزبون لصاحب المطعم اهنئكم على نظافة مطعمكم، الجرسون وكيف عرفت ذلك؟ الزبون لأن الأكل كله صابون!. 5/ واحد زوجته خرساء كانوا راكبين القطر فحدث تصادم قطهرم مع قطر آخر انفكت عقدت المرة وبقت تتكلم الزوج رفع قضية تعويض على السكة حديد!. 6/ الزبون للجرسون: اين التخفيض الهائل الذي اعلنتم عنه؟ قال ليه التخفيض في كمية الأكل مش في السعر!. 7/ الزوجة قالت لزوجها الليلة لقيت راجل ما عنده اى ذوق من شافنى بدأ في اساءتى وتهديدي. زوجها قال ليه وين قابلتي هذا الرجل؟ قالت ليه صدمته بعربيتي في الشارع!. 8/ الجرسون جاب طلب اللحمة للزبون وهو ممسك اللحمة بيده، الزبون قال ليه بقرف: انت مجنون تمسك اللحمة بيدك؟ الجرسون دايرها تقع في الواطة تانى؟. 9/ واحد سأل صديقه ما هو السبب الرئيسي للطلاق؟ قال ليه الزواج!. بمناسبة اسبوع المرور: 10/ واحد قال لصحابه: تصور عيني حمراء من امبارح وما قادر امشى، قال ليه خلاص لو بقت خضراء امشى!. خاتمة: دخول المجموعات انجاز دولي نريد من الابطال السير في طريق البطولة الخارجية وهم قادرون على ذلك. تحت شعار: « يافراس شعب الهلال يريد احراز الكأس». مع تحياتي.
