· اذا كان مجلس ادارة نادي الهلال (المنتخب) قد تعرض الي (توسنامي) استقالات جعلت (شرعيته) تتعرض للقيل والقال – فان لجنة تسيير المريخ هناك تتعرض الي ما هو اسوأ من ذلك ...لكن طبعا (شينة) اللوردات دائما مقبولة ...وجميلة ..وما في زول بقدر يقول فيها حاجة. · تابعوا الفضائح لاحقا..واتفرجوا على هذا الذي يحدث في (اللوردات). · تغلطوا انتوا يا لوردات ...يجيكم (اعلام المريخ) بالاعذار. · زي واحد كدا ..قال السنة دي زرعنا (بطاطيس)...لمن جينا للحصاد ..حصدنا (بصل). · عارفين ليه؟. · عشان الحكومة دي ادخلت في اي شيء ..تزرع حاجة وتحصد حاجة تانية. · زي حكاية قطن المحور الوراثي ..هسع دا قطن وإلا (ورثة). · عندنا (نخلة) من كترة الجبايات بقيت تشيل (حُنبك). · خلت (البلح) عديل كدا ...النخلة مسكينة ..(الجبايات) كترت عليها...قلبت (حُنبك)..زي (جدادة) ود رحمة الله ..شفعو (الشواطين) ديل من النقة والانتظار اليومي للبيضة ..الجدادة المسكينة من النقة الكتيرة بقت تبيض في الاخر (محريب). · طبعا ما في اي علاقة بين البيض والمحريب ..لكن دي انا ما مسؤليتي ولا قضيتي ...عاوزني اخليها تبيض بالعافية (عنب). · زي علاقة زول (اشتر) مشى يزور نسابتو. · لقى ليك (صورة) بتاعة (فيل) معلقة في الديوان..قال للحاج (ابو البنت) دا ابوك ..في علاقة شبه كبيرة بينك والصورة. · الصراعات الان في القطاع الرياضي في المريخ (حدث ولا حرج)...غرفة الملابس في استاد المريخ تكاد ان تكون (ميدان التحرير)..شتائم وسباب واعتصامات واشتباكات لا حصر لها ولا عدد. · غاب الاحترام وغاب التقدير ...وهذه اجواء كفيلة بأن تغيب بعدها اي شيء له قيمة ..الانتصارات والبطولات ..وغياب الروح والقيّم تلقائيا يعني غياب (الانتصار). · محمد موسي زعلان من خالد احمد المصطفى ..وابراهومة مختلف مع الكوكي (ابراهومة المدرب)...ابراهومة التاني ماشيين عليه...عبدالصمد اطاح بي مجاهد احمد محمد وشال الكوكي برة. · انتوا عبدالصمد دا (سيسي) جديد وإلا شنو؟. · ابراهومة المسعودية رئيس القطاع الرياضي قاعد ساي ما بعمل اي حاجة...(غير انو بكف اكمام الجلابية) في اجتماعات مجلس المريخ..هذا ما قاله عبدالصمد محمد عثمان – فقد نشرت عدد من المواقع والكثير من الصحف هذه التصريحات. · نجيكم بالتفاصيل المملة ..عشان ما تقولوا الزول دا بتكلم ساكت...بس الكلام دا ما يطلع من العمود دا. · نشر لنائب رئيس القطاع الرياضي بالمريخ عبد الصمد محمد عثمانقوله : (ان ابراهومة لا يفعل شيئا ولا يعرف شيئا عن الفريق وتدريباته وانه اكذوبة (اي ابراهومة) حسب قوله مبينا ان تجربة ابراهومة اكدت خطا الاعتماد على قدامي اللاعبين الذين وصفهم بالفاشلين اداريا وقال عبد الصمد حسب افادات مصادر مقربة منه ان ابراهومة المسعودية عندما يحضر الى الاجتماعات لا يفعل شيئا غير كف جلابيته الى كتفه ذاكرا انه يتعامل بعشوائية وانه متاثر ببئته القروية). · انت يا عبدالصمد عاوز يعمل شنو؟. · ابراهومة مع (لورداتكم) ديل والله ما بقدر يعمل حاجة غير انو يكفكف اكمام الجلابية. · الكفكفة دي ذاتها كتيرة. · والله كتر خيرو. · لا عندو مزرعة دواجن ...ولا توكيل غاز ..يعمل شنو عليكم الله غير (الكفكفة). · تكفيف اكمام الجلابية في حد ذاتو شيء ما شوية ..الزمن دا. · في اولياء امور في بيوتهم اكتفوا بي (كفكفة) الجلاليب...بقى ما عندهم اي اضافة تانية. · لكن يا ابراهومة انت كمان ما تبالغ ..يعني ما تعمل (الكفكفة) ظاهرة الي حد انك بتكفكف الجلابية للكتف. · دا يا ربي تأثير بالسيول والفيضانات. · الكفكفة حد الكتف دي ..والله ما في ليها داعي ..ناس عبدالصمد ما برضوا الكلام دا. · ديل كفة واحدة بتجهجهم. · الكلام دا يا جماعة ما قلتوا انا ...الكلام دا قالوا نائب ابراهومة شخصيا في القطاع الرياضي السيد عبدالصمد. · انتوا عبدالصمد دا (لورد) وإلا متلب ساكت. · لورد بي شريط واحد. · غايتو (اللوردات) ديل عندهم جنس حركات. · هسع عليكم الكلام دا من لجنة شعبية بطلع ...خلى لجنة تسيير مكونة من مجموعة من (اللوردات). · لورداتكم ديل ..الظاهر كدا لوردتهم دي (اعدادي) ساكت. · دي لوردية (امية). · ما معقول البحصل دا. · والله يلم فيكم مهند الطاهر يفرتكم – لورد ...لورد. · لمن تفهموا حاجة. · اي لورد فيكم يمشي ليه على حتة. · والله فريق النسور ما يلمكم. · قاصد يا جماعة (الاحتياطي المركزي) ما يلقطكم. · قالوا ليك في مباريات فريق النسور ..الحكم لو صفر مخالفة على فريق النسور كابتن فريق النسور بجيه جاري ..ويقول ليه : (بنجيب ليك تلات تسعات). · الحكم طوالي يتراجع. · هسع النسور خلي ..كمل لينا موضوع اللوردات ديل. · الحاصل شنو في العرضة جنوب. · الكوكي يفتح في ابراهومة ...(ابراهيم حسين)..ويقول انه بعمل في الحاجات دي عشان يبقى المدرب العام. · وعبدالصمد يفتح في ابراهومة المسعودية. · مالكم عليهم (الابراهومات) ديل. · شنو اي واحد فيكم قصد ليه (ابراهومة) وفتح فيه. · واضح يا ناس المريخ ان اللورد عبدالصمد هذا ...لورد بتاع مشاكل ساكت ...وثبت انه ما عندو اي حاجة. · وهو قد اطاح اولا بالقدال مجاهد احمد محمد ...وقت كان مجاهد (قدال). · واطاح عبدالصمد ب (الكوكي). · والظاهر كدا انو عاوز يطيح برضو ب (ابراهومة المسعودية). · الزول دا لورد (اطاحات). · دا يا جماعة اسمو لورد الطحونة. · لورد سحاب. · عبدالصمد هذا قال قول غير جميل في حق ابراهومة المسعودية اللاعب الكبير والذي لعب للمريخ وقدم تاريخ رائع في سجلات المريخ. · نعرف ان اللاعب الذي كان جيدا وممتازا في الملاعب لا يعني ذلك انه اداري ناجح. · نعرف ذلك. · ولكن ما نعرفه ايضا ان اللاعب الذي قدم عصارة جهده وعرقه ودمه في الملاعب يجب ان يحترم ويلزم ان يجد التقدير. · لا يقعل ان يقول عبدالصمد عن ابراهومة انه طلع اكذوبة. · انت يا زول ابراهومة دا قايلو شنو؟. · قالوا ليك هو (خبيز). · وإلا بطارية عربية ..عشان تقول طلع اكذوبة. · صاحبكم ما فاضل ليه إلا يقول طلع (ماسورة). · طلع وارغو يعني. · فشل ابراهومة المسعودية (ادرايا) يا جماعة ...لا يعني ان يخرج عبدالصمد هذا (عمر يوم واحد في المريخ) ليهاجم ابراهومة بهذه القسوة وتلك الصورة (الغجرية) السخيفة. · نحن الكلام دا ما بنرضه. · بالامس اتهم الكوكي جماهير المريخ ووصفهم بالجهل كما قال الكابتن محمد موسي ...وها هو عبدالصمد يخرج الان ويتحدث بصورة سخيفة جدا عن ابراهومة المسعودية الذي قال عنه انه لا يفعل شيء غير انه بكف الجلابية في الاجتماعات الي الكتف. · عليكم الله في زول بكفكف الجلابية لو ما عندو رأي. · انت يا عبدالصد يا لورد قايل الكفكفة دي ساكت. · ما في زول بكفكف من غير ما يكون قاعد ليه في رأي. · اسوأ من هذا ان اللورد عبدالصمد (عمر يوم واحد في المريخ)... قال عن ابراهومة المسعودية (انه يتعامل بعشوائية وانه متاثر ببئته القروية). · هذه اساءة لكل القري ..في السودان. · القروية مالها يا لورد؟. · القروية على الاقل فيها الاحتفاظ بالقيّم والمباديء والمثل ..وفيها الكثير من ثوابت الشهامة والمرووة. · عبدالصمد اللورد (عمر يوم) هذا ..ما عاجباه (قروية) ابراهومة واعتبر تعامله هذا تعامل عشوائي. · بالله عليكم في سخف اكتر من هذا. · يعني انتوا يا عبدالصمد عاوزين تخلوا المريخ دا مريخ (ناس الخرطوم). · اي زول جاء من (قرية) ما يدخل المريخ. · وكأن عبدالصمد لا يعلم ان السيد جمال الوالي جاء من قرية (فداسي)..واضافت فداسي لجمال الوالي الكثير ..وقدمته للخرطوم بهذا الاسم والمكانة. · القري مالها؟. · عيبها لي. · انت يا عبدالصمد جيت من وين؟. · البلد دي دخلتها في (علبة ساردين). · دخلتها مع قوات الاممالمتحدة. · ممكن عبدالصمد دا عادي تاني يقول ليك اللاعب دا ما يدخل كشوفات المريخ عشان جاء من قرية. · او هذا اللاعب (قروي) بعكسها في السما ..لا بد من ان يطلع من تشكيلة المريخ. · ديل (الكفكفة) ما عاجباهم. · واضح ان الامور وصلت الي منعطف خطير في المريخ ..وثبت ان الغرف المغلقة في المريخ يحدث فيها مثل هذه الاشياء وتلك الخلافات التى تؤكد ضحالة الفكر الذي يدير المريخ ويقوده. · انني الان اصل الي الحقيقة التى جعلت المريخ يفقد كأس الظفرة ويخرج المريخ من امام منافس عمره عشر سنوات. · عبدالصمد الذي كان رئيس بعثة المريخ في الامارات لا بد من انه كان السبب الرئيس في اضاعة كأس البطولة. · لا يعقل ان يأتي كأس من الخارج وان كان في مناسبة ودية عبر رئيس بعثة بهذه الصورة المتواضعة والفكر المخجل. · انني اقول اذا كان هذا الرجل هو عضو من بين اعضاء لجنة التسيير فان على (لوردات) المريخ السلام. · لا تنتظروا شيئا من المريخ في هذا الموسم طالما فيه (لورد) بهذا التواضع. · اول مرة اكتشف واعرف ان هنالك في المريخ لورد (كفكفة جلاليب). · يا السيد الوزير. · يا زول. · شفت البحدث في المريخ. · اها دي لجنتك يا السيد الوزير ..اتفرج وشوف. · هذا ما اتي به وزير الشباب والرياضة في ولاية الخرطوم تحت مسمى لجنة التسيير. · تسيير ايه؟. · ديل كفكفة الجلابية عندهم فيها رأي. · ملحوظة : البشوف بلاوي اللورادت تهون عليه استقالة العسقلاني. هوامش · عزالدين الحاج ...هو ذاتو قعد يطاول على الهلال. · عزالدين الحاج ..افتكر رعاية جهاز الامن والمخابرات لفريق الخرطوم (الوطني) يمكن ان يجعله يطاول على فريق الهلال وعلى جماهير النادي العريق. · يا زول اعمل حسابك. · انت فاكر كأسك دا كأس. · انتوا بتطلقوا (الكضبة) وتصدقوها. · قال شنو؟. · قال اتفضلنا على الهلال بالكأس. · يا راجل. · لا بالله. · الزول دا ما قاعد يتغطي كويس. · هذا نتاج رعاية السلطة للاندية الرياضية في السودان. · في شندي اقتادت ادارة النسور الحكم الي المستشفى للكشف الطبي متهما بالسكر. · وفي الخرطوم يفعل عزالدين الحاج ..ما فعل في شندي. · الهلال الذي شارك في البطولة من اجل انقاذها وتقدير لفريق الخرطوم (القديم)...ما فريق الخرطوم (الوطني)..يجد هذا السخف من عزالدين. · قالوا القصار طالو. · وعشنا شفنا. · اما ما حدث في الاتحاد العام من ترفيع ثلاثة مريخاب لمساعدة الرئيس فهذا امر نعود له لاحقا. · الاتحاد العام بقى زي المريخ (فرع العمارات). · يا معتصم انت قاعد تعمل شنو عشان تجيب ليك ثلاث مساعدين من المريخ. · يساعدوك في شنو؟. · في السفر. · وإلا في تصليح الامور والاشياء لفريق المريخ. · بلد كلها هلالاب...جاب ليه ثلاثة مريخاب لمساعدته. · والله منتهى الفوضى. · الحكاية باظت. · تاني عادي جدا ..مباراة القمة يكون حكمها (عادل ابوجريشة)..وطارق تفاحة وجمال الكيماوي رجال خطوط. · تاني عادي جدا ..نقاط المباراة يحولوها للمريخ ..قبل المباراة ما تلعب. · الحكاية بقت ظاهرة. · ثلاثة مساعدين. · الدكتور كمال شداد ..ما كان بعمل كدا. · ما كان بجيب ليه مساعد واحد. · انت يا معتصم جعفر تجيب تلاتة. · طيب انت ح تشتغل شنو؟. · ..... · عاجل : بي طريقتكم دي (السيول والفيضانات) بتجيكم في شارع واحد بالعمارات.
