ارجع للشريحة القديمة (كروجر) واحصل على (ابراهومة) زيادة جاء في احد المواقع ان مرتب المدرب الالماني كروجر مدرب المريخ الجديد القديم يصل الي (20) الف دولار...من غير المخصصات الاخرى الشقة والعربية والحوافز والنثريات ...وهلم جرا.
شوفوا (البزار) دا.
في شنو يا جماعة؟.
علما ان مرتب كروجر كان في اثيوبيا عندما كان يشرف على (سان جورج) عشرة الاف دولار ..وهذا استخلصناه من ان المريخ نفسه سوف يدفع (30) الف دولار لفريق سان جورج عبارة عن مرتبات ثلاثة شهور ، ملزم كروجر بدفعها (كشرط جزائي) لفك الارتباط مع الفريق الاثيوبي.
طيب يا (لوردات) يا القاعدين في السهلة ...انتوا الزول دا وقت كان في اثيوبيا مرتبو (10) الاف دولار ..بتدوه هنا (20) الف دولار ليه؟...انتوا بتدوه بدل سهر من قريص (الباعوض)
هى البلد ناقصة افتقاد (دولارات).
غايتو خسارة (دولارات) ساكت.
دولارات وكبوها في البحر.
انتوا الزول دا مع قيادة المريخ فنيا اتفقتوا معاه يفتح ليه (عيادة) في شارع الدكاترة.
وإلا عاوزين تدخلوه (البرلمان) السوداني عشان تمنحوه ضعف ما كان يناله في (سان جورج).
انتوا يا مريخاب (اللوردات) ديل قاعدين ليكم لي متين؟.
ما تتبجحوا في الفاضي ساكت.
بالتأكيد كروجر مدرب جيد ..لكن بالمنطق كدا طالما كان مرتبه في (سان جورج) عشرة الاف دولار فانه من المفترض ان يكون مرتبه في المريخ (5) الاف دولار فقط ..لأن اسم المريخ اكبر من (سان جورج) ويمكن ان يحقق كروجر مع المريخ انجازات اكتر من التي يمكن ان يحققها في سان جورج.
خلاص قول ادوه نفس المرتب طقة بي طقة.
يا زول قول زادوه عديل كدا (2) الف دولار....ممكن....ادوه 12 الف دولار ..ما في مشكلة.
لكن تزيدوه الضعف.
ليه؟.
ح تشغلوه وردية اضافية في (الرديف).
وإلا ح تخلوه يتم الباقى (سويدي) في شارع النيل.
غايتو الفرق دا إلا تطلعوه من كروجر عن طريق مغسلة عربات.
كروجر دا قايل نفسو (غارزيتو) وإلا شنو؟.
يعني يا جماعة في زول بدفع ليه اربعين جنيه في (بطيخة) سعرها (20) جنيه.
غشوكم يا اللوردات.
عليكم الله دا منو الزول (السمسر) في العملية دي.
المشكلة ان (لوردات) المريخ عارفين مرتب كروجر في سان جورج لأنهم دفعوا الشرط الجزائي للفريق الاثيوبي مرتب ثلاث شهور...(30 الف دولار).
بمعني وكيل كروجر ما ممكن يغشكم ويقول ليكم مثلا ان مرتب كروجر في سان جورج (15) الف دولار.
حالتكم دي عارفين.
عودة كروجر للمريخ ..ذكرتني بي حكاية الشريحة القديمة.
موش الزول مرات بكون عندو شريحة مقفولة .....او (مجدوعة) كدا ...يقوم يرجع ليها (فجأة).
يقوم ينشطها تاني.
بعد ما تكون اتقفلت.
اظن ان (M T N) عندها حاجة بالشكل.
ناس ام تي اني ..بحفزفوك وبحرضوك عشان ترجع للشريحة القديمة.
وكمان ناس ام تي ان عندهم دعاية بقولوا فيها :
لو غبت شهر..وتاني رجعت..
يا غالي رجوعك..بالدنيا..
لو ترجع تلقى البيت بيتك ..
يا غالي رجوعك بالدنيا ..
ارجع لي شريحتك من تاني..
بنزيدك خمسين في المية...
المعنى انو قدر ما تشحن رصيد ..بدوك خمسين في المية زيادة ..يعني لو شحنت ب (10) في الشريحة القديمة دي ..بدوك رصيد ب (15) جنيه.
هسع ناس المريخ عملوا نفس النظرية مع كروجر.
وبدل ما يخفض ليهم كروجر باعتباره (شريحة قديمة)...وكانت مقفولة في اثيوبيا ..وغلبوه في اخر مباراة في ارضه ووسط جمهوره بثلاثية.
ناس المريخ زادوا كروجر مية في المية.
لكن في ناس عندهم رأي غير الكلام دا.
الزيادة في الحكاية دي قالوا (ابراهومة).
الكوكي زعلان من ابراهومة ...قال هو السبب وراء ابعاده من فريق المريخ.
والله لو ابراهومة السبب ..مفروض جماهير المريخ ...تكرم ابراهومة دا ..عشان حلاهم من (الكوكي).
كوكي شنو البدرب المريخ.
نحن الهلالاب ما مقتنعين بالحكاية دي.
تجوا انتوا يا مريخاب ..وتجيبوا (الكوكي) براكم عشان يمسك ليك الفريق الاول.
الكوكي قال في حوار مع معتصم محمود مهند الطاهر مكانه اوروبا.
انتوا دا شنو البعملوا فيه المريخاب ديل.
الجماعة وقعوا تشكير في مهند الطاهر.
عصام الحضري ...شكر مهند الطاهر وقال مفروض يحترف برة البلد دي في حواره مع هيثم كابو.
والكوكي الان قال ان مهند الطاهر دا مفروض يحترف في اوروبا.
يا جماعة انتوا ما في زول قال ليكم الهلال دا (اوروبا) ذاتها.
يعني اللعب في الهلال اعظم من الاحتراف في اوروبا عند مهند الطاهر.
انتوا لو عاجبكم مهند الطاهر شديد كدا ...شجعوا الهلال.
الجماعة فكوا (هيثم مصطفى)..وقعدوا يتكلموا عن مهند الطاهر.
الزول دا عامل ليهم (خلعة) عديل كدا.
يعني مباراة القمة القادمة اتوقع مهند الطاهر دا تمسكوا (كتيبة) كاملة.
خايف (اللوردات) ينزلوا الملعب عشان يراقبوه.
الزول دا كاسر فيهم (51) ضلعة.
الكوكي بعد كلامه عن مهند الطاهر قال مدثر كاريكا المهاجم الاول في السودان.
انت يا زول وقت معجب كدا ..المقعدك مع الناس ديل شنو؟.
الله شافك بس.
الكوكي لم يكتف بهذا.
عارفين قال شنو في حواره مع معتصم محمود.
الكوكي قال تراوري احسن محترف في البلد.
يعني الكوكي ما فاضل ليه إلا يقول (الشغيل) افضل ارتكاز.
ولو معتصم محمود سألو عن افضل حارس ..اكيد ح يقول المعز محجوب.
بس يا معتصم ما تسألو عن افضل ادري عشان ما تحرجوا مع جمال الوالي ..اصلو الكوكي بعد دا ما عندو خيار افضل من الامين البرير.
معتصم محمود عندما سأل الكوكي عن الهلال وهل يمكن ان يدربه قال الكوكي (الهلال يمر بظروف ادراية بالغة التعقيد).
يا الكوكي براك قلتها.
يعني فرق الخمس النقاط التى تفصل بين الهلال والمريخ لصالح الاخير ..ما حققتها شطارة يا الكوكي.
دي اتحققت لأن الهلال يمر بظروف ادراية بالغة التعقيد.
براك عرفتها.
طيب بتغالط مالك؟.
نرجع للشريحة القديمة.
كروجر دا ...(البرمودة) ابتعد عنها وإلا الي الان شابك لينا فيها.
كلموه منذ الان ..قولوا ليه ما نشوفك بي (برمودتك) دي.
الكلام دا كان زمان ..هسع بقى في تشدد.
الحكم من الملعب ممكن يمشي المعمل عشان يعمل كشف طبي.
يعني بي برمودتك دي ممكن يودوك (سباق الخيل).
بنشكك في قواك العقلية.
الشيء الملاحظ في (الشريحة القديمة) دي ..ان الاخوة في صحيفة الصدي اطلقوا على كروجر لقب (الجنرال).
واللقب معروف حصريا حق صلاح محمد آدم.
ناس الصدى يكونوا فاكرين ان العروض البقدم فيها الهلال هذه الايام ..والاهداف الكتيرة دي ...من اللقب.
قاموا لقبوا ليك (كروجر) ب (الجنرال).
وهذا معتاد من اهل المريخ ان يسرقوا ألقاب الهلالاب.
عليكم الله من الله خلقكم كدا ..شفتوا ليكم (جنرال) بي برمودة.
الجنرال دي حق خالص ل (صلاح محمد آدم).
إلا انتوا ما عاجبكم (نضارتو) دي.
انتوا ما شفتوا الزول دا اثناء المباراة بقعد كيف؟.
بقعد قعدة (جنرالات).
والله القعدة دي ابراهومة لو ادرب عليها و(21) سنة ما يعرف ليها.
هذه شيء محسوب على اتحاد الخرطوم ...ان كان يشجع على هذا السلوك.
حكم ساقوه في الدقيقة 13 من الشوط التاني للكشف الطبي.
يمكن اي ادارة نادي ما تعجبها النتيجة تسوق الحكم للمستشفى للفحص الطبي.
وكان يمكن اي فريق مهزوم ...ان يطالب بأن يعمل الحكم كشف طبي.
في موقع الزاوية سئل الكوكي فكانت اجابته على هذا النحو : (هذا إفتراء وصورة خاطئة رسمها بعض الصحافيين عنى وصدقها الجمهور للأسف وأثاروا المجتمع المريخى ضدى بالأرقام أنا خضت 14 مباراة رسمية مع المريخ فزت فى 12 وتعادلت فى إثنين أمام الهلال وهلال كادوقلى وهذه كانت من أفضل المباريات ولكن خطأ فردى من باسكال قصم ظهرنا ومباراة الخرطوم الوطنى لم أكن مشرفا عليها بسبب الإيقاف من عصام الحاج وفى المباراة الأولى أفريقيا قدمنا عرضا جيدا وخرجنا بهزيمة إيجابية 2\1 بحسابات البطولات ومباراة ليبولو الأنغولى الثانية لم أكن موجودا فى السودان بسبب مرضى وسفرى لتونس).
اريد ان اتوقف فقط في مقولة (خطأ فردي من باسكال قصم ظهرنا).
باسكال ثغرة واضحة في دفاع المريخ بشهادة مدربه الذي يشركه ويعتمد عليه.
كل الاندية اذا ارادت ان تفوز على المريخ ..عليها ان تركز على (بوابة عبدالقيوم) دا.
باسكال دا تاميها (اشارات) ونضمي ساكت.
لكن هو ثغرة في دفاع المريخ ..واي هدف جاء في المريخ يسأل منو.
لذا على الاندية التى تباري المريخ ان تركز على باسكال.
وسأله المحرر في الزاوية عن خلافه مع محمد موسي فقال الكوكي :
لم يكن بيننا خلاف فى الأول وتعاملنا بصورة جيدة مع بعضنا ولكنه بعد ذلك إفتعل خلافات ووضع العراقيل أمام الجهاز الفنى وهو لايمتلك الخبرة الكافية للقيام بمهمة مدير الكرة.
أنت وصفت جمهور المريخ بالجهلة بعد مباراة الأمل ومحمد موسى كان شاهدا؟
(ضحك..لايمكن أن أقول جهلة بالمعنى الذى أراده محمد موسى وهذا الموقف دليل أخر على أنه لايمتلك الخبرة كما قلت لك..ماحدث أن الجمهور كان غاضبا على مستوى الفريق وإبعاد لاعبى المنتخب الذين حضروا من سفر مرهق قبل ساعات من المباراة وهناك فئة كانت تشتمنى طيلة زمن المباراة وبعدها ذهبت إليهم وتحدثت معهم بإحترام عن الأسباب التى دعتنى للعب بالتشكيلة البديلة وعندما دخلت لغرفة اللبس وجدت محمد موسى غاضبا فقلت له أنت لاعب كرة ومسؤول الأن لاتكن مثل هؤلاء الجهلاء أنت تعرف ظروف الفريق ولابد أن تكون قوى فى مثل هذه المواقف قلتها بطريقة أخوية).
وكما قاطعه المحرر في الزاوية فان الكوكي ينفى في اجباته كلمة (جهلة)..ثم يعود ويؤكده في نفس الاجابة عندما طالب من محمد موسى ألا يكون مثل هؤلاء الجهلاء.