* أيام كانت (الأبواب) بتستحمل يعلقوا فيها (الخروف) – قبل ما تبقى أبواب )فول وموية فول( ساكت – كان أول ما بطلع من الخروف (المرارة). * بعد موية الفول – وصلنا الآن (موية الموية). * إدهورنا شديد. * يا ولد لحقنا (المرارة)...خلونا عليكم الله. * الدكوة تسيل للكوع – والكوع تفتش ليه فتيش عشان تلقاه - وعيونك (تفتح) (12) سنتمتر زيادة من (الشطة). * نحن مالنا ومال (الحزن) عشان يشخبط وجدانا كدا – ويلخبط عواطفنا. * في ناس (حاقدة) في موضوع (الشطة) دي. * يجيبوا ليك (شطة) تقلع ليك (نخريك). * لمن تشفق على (نخرتك). * نخرتك تترس قدامك زي الحمل. * زمن – كانت (الابواب) فيه مفتوحة لا بحرسوها ب (شركة الهدف) ولا بركبوا فيها (كاميرات). * ولا فيها (لمبات). * ولا كان في سلك شايك. * والله زمان تعمل ليك سلك شايك – الناس يشيلوا حالك. * يطلعوك زول كعب. * زمن. * يجيبوا ليك (صحن المرارة) – والخروف معلق قبلو في الباب. * يجيك (الشافع) جاري بي صحنو...تقول كرت كوتشينة طار ووقع تحت التربيزة. * الجماعة كلهم بفتشوا ليه. * الخروف مدلدل في الباب – زي الساعة اتناشر في الباب – لمن تتكيف – بدون ما تشعر بتلقى نفسك بتخش وتدخل. * وتغني في اغنية لي عثمان حسين ما عاوز زول يسمعك ( كنت فاكر القى قربك الحنان تغمرني بيه). * السر دوليب عمل لينا مشاكل مع (صماماتنا) – ودخلنا في حالة بتاعة (صمصمة). * تروا شوية – بتلقوا (هوبة مهند الطاهر) زي السلطة الخضراء – حاجة بتفتح النفس للمباراة. * نشيلها للفرح ..ونكافح بيها الملاريا..(وزارة الصحة لا قدرت على مكافحة الملاريا ولا حاجة). * هوبة مهند الطاهر كانت مثل (المرارة) – كانت اول ما يطلع من مباريات الهلال. * بننبسط في الدنيا دي جنس ابنساطة ..لمن (الانبساطة) تظهر في (عرارقينا) – الطاقية براها تتحدر في مقدمة الرأس. * هوبة مهند كنا بنطلبها زي ما بنطلب اغنية (الطير المهاجر) لمحمد وردي او (عشرة الايام) لعثمان حسين او (لحن الحياة) لعثمان الشفيع. * ننزل ليها في (الدارة) – ونترتح في الواطة – وقت الوقفة تغلبنا (ندردق) في الواطة من الطرب. * زمن. * تجيك الهوبة في الباب ، مهند بوصلها لينا للباب زي (اللبن) – ونحولها ب (البلوتوث) – نوزعها في تلفوناتنا ونكتبها في جواباتنا – من الخرطوم للبلد . * الكلام دا قبل ما يظهر (الواتساب) ويجيب لينا (هوبات) مهند الطاهر مع (النبّاه الاول). * ننتظرها مع (شروق الشمس) – ونعملها في فطور (الطلبة) الماشين للمدارس. * حايمين في الشوارع – وكتاب الجغرافيا (مغلط) عليهم. * والشنطة تقيلة – تقول عاوزة تطلعهم كلهم علماء فضاء. * زمن. * الناس بتكون واقفة في الصف عشان عاوزة تدخل تشوف المباراة – تجيهم (هوبة) مهند الطاهر طائفة ليهم في حتتهم...تفرحهم وتونسهم وتبقى ليهم موضوع – تنسيهم (رفع الدعم عن المحروقات) – والمواصلات المافي – والرغيفة البقت زي (الختم). * تشيل ليهم وجع الضهر – وطشاش العيون – وتغطي عليهم في (كشف) عرس عثمان ود الشروتبي. * تتمدد لينا في (الضل) نقعد نقيل عليها – نشرب قهوتنا – ونقرأ جرايدنا – ونضحك في الدنيا دي جنس ضحك. * زي كأنو ما عندنا مشكلة. * ما عندنا هم. * هوبة مهند (نلفها) في ورقة زي (الباسطة) ونرجع بيها على البيوت – يلاقك (عبدالماجد) واقف في الباب والسهر مقدد ليه عيونو. * يا ود البسهرك الى الآن شنو؟. * لا بسألك من الباسطة. * ولا بسألك من الموبايل. * ولا بسألك من العجلة. * بسألك بس من (هوبة) مهند الطاهر – انت تقوم كدا تنشرح في الدنيا دي – وتقعد تحكي ليه القصة من بدايتها. * وهو زي الفاهم اي حاجة يا خضر. * ناقش الموضوع كلو. * هوبة مهند الطاهر تطوف بينا – وتحوم بينا في الحلة شارع شارع – تدخل بيت بيت. * يمكن من هنا طلعت اغنية الحقيبة (جاني طيفو طائف) باعتبار ما سيكون...فقد كانت (هوبة) مهند الطاهر تطوف فوق رأسنا – ونحن نقوم زي (العرسان) نبشر فوق الناس. * ونقدل في الشارع وقت يقولوا علينا ديل (هلالاب) شفوت – الشالات براها (تنقز) فوق كتوفنا. * والطحنية تزيد حلاوة – لمن سنونك (تصك). * مهند الطاهر – كان احد صناع السعادة في الهلال – دخل كشوفات الهلال في هدوء. * هدوء (التاكا) عندما يبدأ في حوار غير مسموع مع (القاش) الهايج – وما عاوز يسمع الكلام. * الشرق جاب محمد حسين كسلا وجاب كجراي وجاب اسحق الحلنقي ...جاب (هوبة) مهند الطاهر ودخلها في مقرر المدارس مع مقرر (الجغرافيا). * مهند جاء بذلك الهدوء – غزال الهلال الاسمر وقت يشرع كدا في هدف في الطرف الشمال – (الاستاد كلو بصن). * وبدون ما نشعر نقعد (نطقطق) في اصابعنا. * زي الزول وقت يزرو (البرد) – يقوم يدخل اللوضة. * يلم الملايا ويخلي فردة النعال برة في الحوش. * مهند الطاهر ظل بالهدوء نفسه – ما بنشوف ليه (شغب) – إلا وقت يتجه على جماهير الهلال في المسطبة الجنوبية – ويقوم كدا يقلب ليهم (الهوبة). * اي واحد من المشجعين ديل يشرب ليه فنجان قهوة – بدون ما يشرب بكون شرب. * الاستاد كلو بشرب. * الناس تنفقع من (الفرح) – يدخلوا ويطلعوا ويعرضوا في مدرجاتهم – وضروسهم تصل (جيب الساعة) من الفرحة. * مهند الطاهر – الذي غادر كشوفات الهلال في هذه التسجيلات بعد انتهاء فترة قيده – منحنا (سمرة) القون – وشفنا منو (التمريرة) ذات العيون العسلية – وهو يبدل على رأس خط 18. * يعمل اي شيء بالكورة. * يجيبها يمين...نقوم نقعد نقول خلاص الموضوع انتهى. * نسمع جدول سبعة. * يقوم تاني يحولها شمال. * نسمع (دجاجي يلقط الحب). * المسطبة الجنوبية كلها تميل شمال. * يرجع الكورة تاني لليمين. * هنا نقعد نغني في الليلة سار بلالي انا. * المسطبة الشمالية كلها تقع – (حالتهم تبقى صعبة). * يرجع الكورة لكراعو الشمال – الحكم هنا بغلبو الصبر بقوم طوالي يصفر (هدف). * يفتحوا المدارس مع (التحويلة) دي. * يجري على (السنتر)...بفتر من (التباديل) دي. * مهند الطاهر (مشاهدة) هدف. * شالين هدفو في (حرس الحدود) مع البطاقات ورخصة العربية وحبوب البندول...وكراس الرياضيات. * قام كدا وقف على رأس خط 18. * دفاع حرس الحدود – قالوا الزول دا عاوز يعمل شنو في (الورشة) دي. * رأسهم لفه. * قعدوا يتلفتوا زي (الحصة الفاضية). * ضروسهم وقعت. * مهند الطاهر في اللحظات دي (كفكف) ليك الكورة – استخلص منها (16) معادلة. * نحن معادلة واحدة ما فهمناها. * رجعها – كرفسها تاني. * اتحتحت في اللحظة دي حارس حرس الحدود. * عاين فوق. * علقها ليك مهند الطاهر (فوق). * الاستاد كلو قعد يعاين في الساعة (عاوز يشوف الكورة باقى ليها كم؟). * الحفلة دي ح تنتهي متين؟. * القون جابو مهند في الشبكة – وإلّا جابو في الساعة. * نحن ما عارفين. * ولا فاهمين الحاصل شنو؟. * ولا عارفين نحن هنا جينا ليها. * بنعمل في شنو؟. * انتوا قايلين عشق (نور) لمهند داك من فراغ. * هوبات مهند الطاهر البعملها في استاد الهلال هي الخلت نور تتعلق في مهند التركي. * وانتوا تشيلوا وتصدقوا. * براكم انتوا ما عاوزين تفهموا. * براكم ما عارفين تعرفوا الحاصل شنو؟. * الموضوع دا ما ساكت. * مهند الطاهر – الله يديك العافية – وزعت لينا الفرح في كل الربوع وقسمت لينا غناك في (الهوبة). * ما شفنا ليك في يوم من الايام (كرت). * ما شفناك يوم بتكورك ليك في (حكم). * ولا بتعمل ليك (مخالفة). * زول في منتهى الهدوء. * تقعد في الكنبة – نشيل (هوبتنا) ونطلع – ما بتقول حاجة. * حتى عندما اعلن مجلس الهلال عدم تجديد عقد مهند الطاهر – جاء مجلس المريخ بالمليارات والشوالات وقلاب دولارات عشان يشيلوا منك (هوبة) واحدة. * قلت لا. * اخترت انت ان تهاجر ..وتمشي تجرب (هوباتك) في اسبانيا. * ديل لا بفهموا ليك (الهوبات) دي ولا حاجة. * ولا قرأوا حاجات بالشكل دا. * ولا بتقع ليهم. * احسن اطلع. * شكرا ليك – سوف تظل (هوبتك) في الذاكرة – متى ما غني وردي او عثمان حسين او النعام آدم او محمد النصري ح نطلع (هوبتك) ونراهن عليها. * شكرا كثيرا - لوالدك الهلالي القح (عم الطاهر) – زول هلالابي اكتر من صديق منزول. * حرس ولدو – وقدم هوبتو وكان عنوان لاصالة الزول السوداني الاصيل. * دخل في نوبة وغيبوبة عندما قالوا ليه ان ابنك ح يمشي المريخ. * حلف يمين. * رفض كل الاموال – ركلها . وقال ليها ألعن ابوك وقدم لنا (ابنه) ليكون (هلاليا) بهذا الخلود. * يستحق والد مهند الطاهر ان يكرم..وان نغني له اغاني الهلال ..فهو من الذين جملوا الهلال برة الملعب. * وتستحق والدة مهند الطاهر – الهادية والراضية – ان نفتخر بها ونقول انها اعطتنا اجمل (فرسان) الهلال واعظم درره. * يستحقوا السلام. * ويستحقوا الثناء. * والتقدير. * كرموهم ..بهم تكرموا الهلال كله ...تعزوا الهلال فهم فخر للهلال. * هم الذين عليهم نراهن. * لن يكون هذا الفصل الاخير من كتابتنا عن مهند الطاهر – واسرته الكريمة سوف اعود لافصل القول. * هناك الكثير. * ... * ملحوظة : يا مهند باقى لينا عندك (3) هوبات نجابه بها الغلاء – (كافحنا الملاريا). هوامش * كنت عاوز احدثكم عن (كمان) محمدية. * ما في وقت. * الكمان الباسم. * وكنت عاوز اقول ليكم عن خلاسية محمد المكي ابراهيم وبرتقالته وبعض رحيقه. * لكن الجرس ضرب. * كفاية الهوبة. * كنت ماشي عليكم وداخل ليكم في (رفيق النسمة) لخالد شقوري ومحمد النصري. * لكن الزمن انتهى. * الهوبة شالت المساحة كلها. * لكن برجع ليكم للكمان والبرتقالة والهوبة ورفيق النسمة. * برجع ليكم بالتفاصيل. * وح اقص ليكم الحكاية كلها – من اول برتقالة. * ح افصل ليكم (رفيق النسمة) – نسمة – نسمة. * اسألوا الحضري من مهند الطاهر. * مهند الطاهر جاب قون من اي حتة في عصام الحضري. * بكشح ليكم الحضري زي (العدس). * انت قلت (عدس). * عليك الله ما تدخل لينا (العدس) في العمود دا. * يا مهند – نحن خلينا - (نجليتنا) دي بعدك ح تعمل شنو؟. * تاني ما في (هوبة) بتقع ليها. * الهوبات ح تبقى ليها كتر – كتر. * طلعوا قرار جمهوري وقفوا فيه (الهوبات). * تاني ما عاوزين لينا اي (هوبة) حايمة في البلد دي. * الهوبة مشت (اسبانيا). * اجمل من مهند الطاهر –العم الطاهر – والد مهند الطاهر. * هو (اب) لكل الهلالاب. * وهو رمز من رموز (الابوة) في الهلال. * كرموا الحاج الطاهر. * كرموه بعمرة وحجة. * اعطوه – فقد اعطانا الكثير. * سوف اعود لاتحدث عن مهند الطاهر في تفاصيل اوفى. * وسوف اكتب عن المعلم عمر بخيت. * وساكتب عن الاسد المعز محجوب – والده (هلالابي) آخر في روعة عم الطاهر. * دعوني فقط اجمع قدرة للحديث عن اولئك الروائع. * ان لم نكرم ونقدر هذا الجيل ..الجيل القادم لن يكرم الهلال ولن يقدره. * خلوهم يشوفوا احترامنا للذين غادروا. * اتعلموا قولوا ليهم (شكرا). * هل استعصت عليكم كلمة (شكرا). * الهلال اروع من الجميع ..اجمل من تخيلاتنا. * وادب الهلال ...يفرض علينا (الشكر). * ..... * عاجل : اسبانيا ح تفهم حاجة...مازال في (الحزن) بقية...نعود. *