الأستاذ البدخل لينا الفصل بي (كتاب) – طوالي بنطلع (انطباع) عنو انو استاذ ما شاطر """"""""""""""""""""""""""""""""""" الحضري بي (حرياتو الاربعة) مهند الطاهر جاب فيه اقوان من اي حتة """""""""""""""""""""""""""""""""""""""" بشه (فلفل) ليكم جامعة الدول العربية – دولة – دولة – فصل – فصل """"""""""""""""""""""""""""""""""" طبعا نحن من خلال متابعتنا للأحداث – بنتوقع يتفتح موضوع (الجنسيات) في إسبانيا """"""""""""""""""""""""""""""""" • زمان كان عندنا استاذ لغة عربية. • استاذ قاطع. • في اللغة العربية ما بتصاقع. • ما بتهبش. • النوع البدخل ليك الفصل قبل ما الحصة تبدأ. • ويطلع ليك من الفصل في نص الحصة التانية. • ناس مخلصة في الدنيا دي جنس اخلاص. • استاذ صعب. • يطقطق ليك اللغة دي زي ما قال سبويه. • ابوالاسود الدؤلي. • ما بتلفت. • ما بعاين للكتاب. • نحن زمنا كنا بنحكم على (الاستاذ) من خلال الكتاب. • الاستاذ البدخل لينا الفصل بي (كتاب) – طوالي بنطلع (انطباع) عنو انو استاذ ما شاطر. • ونقعد ما نركز في حصتو. • ويبقى عندنا فوقو رأي. • لو نقطها نقيط – تاني ما بنقتنع بيه. • والاستاذ البدخل لينا الفصل – ورقة ما شايلها لو درسنا ليك (تربية ريفية) بنقتنع بيه. • بنقول الاستاذ دا شاطر – الكتاب ما بعاين ليه. • العلم كلو في رأسو. • الآن اكتشفنا الموضوع ما عندو علاقة بالنظرية الشايلنها في رأسنا. • ما في اي علاقة. • ساكت كنا قاعدين نظلم اساتذة الجغرافيا. • استاذنا بتاع اللغة العربية – كان لو شاف اي طلبة في حوش المدرسة بدخلهم الفصل ويديهم (حصة املاء). • جنو (املاء). • الاملاء عندو زي السمك. • لو شاف ليه طالب في طابونة عيش – بقبضو ويديه ليك اختبار (املاء). • نظريتو في الحياة كدا. • نظريتو قايمة على اساس ان (الاملاء) اهم حاجة في العلوم. • وانها المرتكز الاساسي للتقدم – وهي اساس العلم. • والما عندو (املاء) ما عندو الحبة. • اي استاذ عندو نظرية بالشكل دا. • يعني استاذ الرياضيات بكون مفتكر ان اهم حاجة في الدنيا دي (النظريات). • زمان نحن كانوا بسمّعوا لينا (النظريات). • قرينا وكملنا القراية واشتغلنا ..وطلعنا وجينا – اصلو ما حصل في يوم من الايام قابلتنا في الحياة دي (نظرية). • ابدا. • حفظونا ليك نظريات ما في ليها اي داعي. • ولا استفدنا منها. • ولا قابلتنا قبل كدا. • لا - مرة قابلتنا (نظرية). • مرة كنا راكبين في (الحافلة). • ساعة ونص بنتغالط مع (الكمساري). • ما خلينا ليه (حليفة). • هو يحلف – ونحن نحلف. • في النهاية كدا – رجعنا للسواق. • السواق رجع لاحد الركاب. • طبعا اي حافلة بكون فيها راكب (حكيم) كدا – حكمة الله. • الحافلات دي لو ما فيها راكب (حكيم) بتولع. • الحفالات دي بدون راكب (حكيم) ما بتتقابل. • المهم من الكمساري للسواق للراكب الحكيم – طلعنا ليك بالباقي. • نحن نازلين كدا من الحافلة – زميلي قال لي انت تعال هنا دي ما نظرية المثلث متساوي الاضلاع. • قلت ليه صدقت – اول مرة تقابلنا نظرية درسونا ليها في المدارس في الحياة. • لكن يا ود الناس نحن لو اقتنعنا بالنظرية دي..البقنع لينا (السواق) شنو؟. • السواق دا اي نظرية بتقلل ليه اراد اليوم ما بقبلها لينا. • ولا بعتبرها. • هسع الكلام دا – الجابو شنو؟. • الاملاء الدخلها هنا شنو؟. • موقعها وين من الاعراب؟. • مرة تانية عندنا واحد عاوز يعرس. • نسيبتو شبكتو ليك (طلبات). • قدر ما تلاقيه – تقول ليه جيب. • مرة تقول ليه جيب لينا (الدقيق). • ومرة جيب (السكر). • ومرة جيب (الفحم). • كلو مرة طالعة ليه بي حاجة جديدة. • زولكم قعد يشكي لي صاحبو من نسيبتو. • قال ليه : والله عندي (نسيبة) زي (المحلية) بس شغالة جيب وجيب وجيب. • رأسي عاوز يتفتح اتنين من (الجيب). • صاحبو قال ليه طيب دي ما نظرية (فيثاغورس) ذاتها. • العريس قال ليه يا زول نظرية فيثاغورس الجابها هنا شنو؟. • صاحبو قال ليه جابتها نسيبتك دي. • والله الحاجات البتعمل فيها دي (فيثاغورس) ذاتو ما عملها. • البلد دي فيها (فيثاغورسات) كتار. • ما ليهم حد. • انتوا ساكت ماسكين لينا في واحد قبل 580 سنة قبل الميلاد. • يقعد ينظر لينا – عشان نحن هنا نتفرم بالنظريات دي. • اتفرمنا نظريات. • عليكم الله انتوا هسع ما بتخجلوا...ينظر ليكم واحد من قبل 580 سنة قبل الميلاد. • لكن دا كلو ما بحلكم. • ما بحلكم مننا يا مريخاب. • زمان وقت الهلال يكون عندو مباراة مع المريخ – الجهاز الفني كان بلم (باكات) المريخ كلهم ويديهم اختبار املاء. • بيديهم (املاء) عشان يشوف استوعابهم كيف للمباراة. • بمتحنوهم ب (الاملاء). • بجربوهم ب (الاملاء). • ايام مهند الطاهر في الهلال اي لاعب كان بسقط في (الاملاء). • بجيبوا في الاملاء (تلاتة) – نوع ديل عاوزين ينستروا ليكم كيف؟. • هسع مهند الطاهر سافر. • اتخارج – بقى ما في داعي للاملاء. • وقفوا اختبارات (الاملاء). • انسوا الموضوع دا. • وانسوا كمان حكاية (تجنيس) حرّاس المرمى. • انتوا قايلين (التجنيس) دا جابو صلاح ادريس. • التجنيس جابو (مهند الطاهر). • ناس المريخ اكتشفوا ليك الحرّاس الوطنيين ديل ما بنستروا مع مهند الطاهر. • قاموا استعانوا بدول الاتحاد الافريقي. • استعانوا بدول جامعة الدول العربية. • ما خلوا ليهم اتحاد. • ما خلوا ليهم حريات. • استعملوا اي حاجة – عشان يثبتوا ليكم مهند الطاهر. • يجي شيكوزي ويفوت. • ويجي الحضري ويفوت. • الحضري بي (حرياتو الاربعة) مهند الطاهر جاب فيه اقوان من اي حتة. • رمزي صالح بي جامعة دولو العربية – مهند الطاهر ما ريحو. • بشه (فلفل) ليكم جامعة الدول العربية – دولة – دولة – فصل – فصل. • هسع يا جماعة وقفوا موضوع (التجنيس). • ألغوا الموضوع عديل كدا. • مهند الطاهر غادر البلاد. • الموضوع بقى ما بستاهل. • الحكاية بقت ما عاوزة ليها (جنسية). • لا جنسية ولا حصة املاء. • وقفوا الحكاية دي. • طبعا نحن من خلال متابعتنا للاحداث – بنتوقع يتفتح موضوع (الجنسيات) في اسبانيا. • الاسبان ديل ما بنستروا. • هسع (التجنيس) ح يدور ليك في اسبانيا. • بس انتظروا خلوا مهند الطاهر يدشن هوباته في اسبانيا. • لو شافوا ليهم (هوبة) واحدة – بجنسوا ليك. • كمان اسبانيا قالوا الايامات دي فيها جنس (برد). • عليك الله (البرد) الدخلو شنو هنا؟. • شايلين هم على مهند الطاهر. • الهوبة في درجة حرارة لا تتجاوز ال (4) درجات كيف؟. • مهند ح يلعب في اسبانيا ضمن اندية الدرجة الثانية. • وميسي في برشلونة. • بتوقع رغم المسافات دي – مهند الطاهر يكون ليه ثنائية مع ميسي. • ناس برشلونة لو شافوا ليهم (هوبة) بخلوا (ميسي) بتاعهم دا وبصاقروا مهند الطاهر. • انا خايف دوري الدرجة الثانية في اسبانيا يولع اكتر من الدوري الاسباني. • وخايف كمان الناس تنسى ليك ميسي. • ونسي رونالدو. • ويركزوا مع مهند الطاهر. • ......... • ملحوظة : ليل الشتاء دا تقول فيه اشواط اضافية – مالو طويل كدا؟. هوامش • مجلس ادارة نادي الهلال يجب ان يكون شجاع ويصدر قرار في موضوع هيثم مصطفى. • بدلا من ان يظل يحول في القرار من يوم لي يوم. • يجب ان يتعامل مجلس الهلال مع الموضوع باخلاق. • من حق هيثم مصطفى ان يعرف قرار المجلس قبل فترة كافية من انتهاء المجلس. • لا اتوقع ان يصدر مجلس الهلال اليوم قرار. • المجلس ما عندو قرار. • خاصة في موضوع هيثم مصطفى. • لذلك ظل القرار يحول من يوم الى يوم. • وح يكون قرار المجلس في آخر يوم من التسجيلات. • المجلس حتى في آخر يوم لن يصدر قرار. • الموضوع ح يمشي كدا – يا تسجيل يا لا (بدون اي قرار). • كأن المجلس بزايد في موضوع هيثم. • بزايد بين الرافضين له – والمؤيدين. • هاشم احمدونا نائب سكرتير الاهلي شندي في برنامج البحث عن هدف في قناة النيل الازرق قال ان اعارة محمد صلاح للمهدية كانت نتيجة لارتباط اللاعب بالدارسة في الخرطوم. • ان شاءالله يكون صلاح ادريس قد شاهد الحلقة. • مع ايماني التام ان مجلس الاهلي شندي لا بربط ولا بحل. • وبسمعوا كمان اخبار الاهلي من عالم الرياضة بعد الساعة تلاتة ونص. • موضوع البرازيلي كروز هل طلع فيلم (هندي). • غايتو في الافلام الهندية اتوقعوا اي شيء. • يمكن في آخر لحظة – البطل يطلع من تحت الانقاض. • ويمكن حبيبة البطل تطلع اختو بالرضاعة. • جايز. • لكن ناس الاتحاد (الدغلين) ديل – سيستمهم يمكن يقفل الليلة من بعد الفطور. • فارق التوقيت بين السودان والبرازيل قريب للسبع ساعات. • .... • عاجل : صلاح ادريس ما فاضل ليه إلّا يعير هاشم احمدونا.
