سودارس : سانغا والمريخ عندهم خيارين الليلة يا يمشوا الدهب يا الكونفدرالية

لجان مقاومة النهود : مليشيا الدعم السريع استباحت المدينة وارتكبت جرائم قتل بدم بارد بحق مواطنين كم تبلغ ثروة لامين جمال؟ شاهد بالصورة والفيديو.. حسناء الشاشة نورهان نجيب تحتفل بزفافها على أنغام الفنان عثمان بشة وتدخل في وصلة رقص مؤثرة مع والدها حين يُجيد العازف التطبيل... ينكسر اللحن شاهد بالفيديو.. في مشهد نال إعجاب الجمهور والمتابعون.. شباب سعوديون يقفون لحظة رفع العلم السوداني بإحدى الفعاليات أبوعركي البخيت الفَنان الذي يَحتفظ بشبابه في (حنجرته) جامعة ابن سينا تصدم الطلاب.. جامعات السوق الأسود والسمسرة من رئاسة المحلية.. الناطق الرسمي باسم قوات الدعم السريع يعلن تحرير النهود (فيديو) شاهد بالصور والفيديو.. بوصلة رقص مثيرة.. الفنانة هدى عربي تشعل حفل غنائي بالدوحة تتسلل إلى الكبد.. "الملاريا الحبشية" ترعب السودانيين بحضور عقار.. رئيس مجلس السيادة يعتمد نتيجة امتحانات الشهادة السودانية للدفعة المؤجلة للعام 2023م إعلان نتيجة الشهادة السودانية الدفعة المؤجلة 2023 بنسبة نجاح عامة 69% والد لامين يامال: لم تشاهدوا 10% من قدراته احتجز معتقلين في حاويات.. تقرير أممي يدين "انتهاكات مروعة" للجيش السوداني هجوم المليشيا علي النهود هدفه نهب وسرقة خيرات هذه المنطقة الغنية عبد العاطي يؤكد على دعم مصر الكامل لأمن واستقرار ووحدة السودان وسلامة أراضيه منتخب الشباب يختتم تحضيراته وبعثته تغادر فجرا الى عسلاية اشراقة بطلاً لكاس السوبر بالقضارف المريخ يواصل تحضيراته للقاء انتر نواكشوط الحسم يتأجل.. 6 أهداف ترسم قمة مجنونة بين برشلونة وإنتر استئناف العمل بمحطة مياه سوبا وتحسين إمدادات المياه في الخرطوم هيئة مياه الخرطوم تعلن عن خطوة مهمة هل أصبح أنشيلوتي قريباً من الهلال السعودي؟ جديد الإيجارات في مصر.. خبراء يكشفون مصير المستأجرين باكستان تعلن إسقاط مسيَّرة هنديَّة خلال ليلة خامسة من المناوشات ترامب: بوتين تخلى عن حلمه ويريد السلام إيقاف مدافع ريال مدريد روديغر 6 مباريات تجدد شكاوى المواطنين من سحب مبالغ مالية من تطبيق (بنكك) ما حكم الدعاء بعد القراءة وقبل الركوع في الصلاة؟ عركي وفرفور وطه سليمان.. فنانون سودانيون أمام محكمة السوشيال ميديا تعاون بين الجزيرة والفاو لإصلاح القطاع الزراعي وإعادة الإعمار قُلْ: ليتني شمعةٌ في الظلامْ؟! الكشف عن بشريات بشأن التيار الكهربائي للولاية للشمالية ترامب: يجب السماح للسفن الأمريكية بالمرور مجاناً عبر قناتي السويس وبنما كهرباء السودان توضح بشأن قطوعات التيار في ولايتين تبادل جديد لإطلاق النار بين الهند وباكستان علي طريقة محمد رمضان طه سليمان يثير الجدل في اغنيته الجديده "سوداني كياني" دراسة: البروتين النباتي سر الحياة الطويلة خبير الزلازل الهولندي يعلّق على زلزال تركيا في حضرة الجراح: إستعادة التوازن الممكن التحقيقات تكشف تفاصيل صادمة في قضية الإعلامية سارة خليفة الجيش يشن غارات جوية على «بارا» وسقوط عشرات الضحايا وزير المالية يرأس وفد السودان المشارك في إجتماعات الربيع بواشنطن حملة لمكافحة الجريمة وإزالة الظواهر السالبة في مدينة بورتسودان ارتفاع التضخم في السودان شندي تحتاج لعمل كبير… بطلوا ثرثرة فوق النيل!!!!! انتشار مرض "الغدة الدرقية" في دارفور يثير المخاوف مستشفى الكدرو بالخرطوم بحري يستعد لاستقبال المرضى قريبًا "مثلث الموت".. عادة يومية بريئة قد تنتهي بك في المستشفى وفاة اللاعب أرون بوبيندزا في حادثة مأساوية 5 وفيات و19 مصابا في حريق "برج النهدة" بالشارقة عضو وفد الحكومة السودانية يكشف ل "المحقق" ما دار في الكواليس: بيان محكمة العدل الدولية لم يصدر ضبط عربة بوكس مستوبيشي بالحاج يوسف وعدد 3 مركبات ZY مسروقة وتوقف متهمين الدفاع المدني ولاية الجزيرة يسيطر علي حريق باحدي المخازن الملحقة بنادي الاتحاد والمباني المجاورة حسين خوجلي يكتب: نتنياهو وترامب يفعلان هذا اتعرفون لماذا؟ من حكمته تعالي أن جعل اختلاف ألسنتهم وألوانهم آيةً من آياته الباهرة بعد سؤال الفنان حمزة العليلي .. الإفتاء: المسافر من السعودية إلى مصر غدا لا يجب عليه الصيام بيان مجمع الفقه الإسلامي حول القدر الواجب إخراجه في زكاة الفطر

شكرا على الإبلاغ!

سيتم حجب هذه الصورة تلقائيا عندما يتم الإبلاغ عنها من طرف عدة أشخاص.

سانغا والمريخ عندهم خيارين الليلة يا يمشوا الدهب يا الكونفدرالية

الإهداء نشر في قوون يوم 03 - 05 - 2015

الى اولئك كل ما نمشي ليهم بقولوا لينا نعمل ليكم (ليمون) وإلّا نشغل ليكم هدف (بشه) التاني.
يشغلوا لينا الهدف ونطلع على كدا.
محمد
يمكن مع السخانة دي ..لو ما جابت ليها مطر ..على الاقل يمكن تجيب ليها خمسة اقوان.
المشكلة
في قسم البوليس ...جنابو قال ليه الزول دا طعنتو (51) طعنة في منطقة قاتلة ليه؟...عمل ليك شنو عشان تطعنو (51) طعنة؟.
قال ليه يا جنابو قال لي كورة الترجي الساعة كم؟.
الغريبة بعد ما قال كلامو دا طلعوه بي ضمانة.
علاقات
عثمان ود الاريتلية طقتو عقرب.
الهيئة القومية للكهرباء قطعت التيار الكهربائي.
علاقة لدغة العقرب بي قطعة الكهرباء شنو؟.
لو ما حركات منهم ساكت.
سؤال
مريخابي قالوا ليه شارع الموردة بي وين؟.
فتح عيونو سمح وقال ليهم : ما عارف ...قبل مباراة الترجي ما تسألوني من اي حاجة..الفيني مكفيني.
لكن الشارع دا قبل المباراة يتخيل لي في الخرطوم بحري!!.
ارموا قدام
فريق الهلال يجب ان يتعامل مع مباراة اليوم من اجل الخروج باكبر مكاسب ...الهدف ليس فقط الصعود الى مرحلة المجموعات.
يجب تحقيق انتصار كبير على فريق سانغا ..من اجل امتاع واسعاد جماهير الهلال وتسجيل كيبي وكاريكا وبشه لاكثر من هدف من اجل الانفراد بلقب هداف البطولة.
المخاوف التى نضعها ربما تضعف قوة الهلال ..وتجعله يدخل المباراة بحذر شديد.
لا السحر الاسود ولا الف سانغا يستطيع ان يقف امام الهلال في (المقبرة).
كفى ان جماهير الهلال سوف تكون حاضرة اليوم من اجل الاحتفال بتأهل الهلال والوصول لمرحلة المجموعات ...المرحلة التى اصبحت مألوفة للهلال.
مطلوب من جماهير الهلال ان تأتي اليوم للاحتفال والابتهاج ومساندة الهلال وتشجيعه بقوة.
عليكم الله مع التشجيع والمساندة ..حولوا ليكم (رصيد) للهلال.
الليلة يوم الفرح الهلالي.
الليلة باذن الله وتوفيقه يوم الهلال.
اقتراح
واحد مشى اشترى ليه كيلو لحمة ضان.
الجزار وقت كان بوزن ليه في اللحمة ..قال ليه اسمع عليك الله كب لي فيه (موية جبنة).
صاحبكم متعود على (الفول)...اللحمة جديدة عليه.
زي جماعتنا ديل ...اول مرة يصلوا دور ال (16)...عشان كدا الليلة بالهم كلو ح يكون في مباريات الكونفدرالية.
هسع دا اقتراح ليك.
رؤية
اول مرة اشوف لي زول يطير من دوري ابطال افريقيا ..يبلع ليه حبوب ملاريا.
كمان عاوزين تعملوا لينا ازمة في (حبوب الملاريا) مع طيرانكم الكتير دا.
شوال عجور
وقف قدام بتاع الخضار ..ومسك ليه (عجورة) وقعد ياكل فيها ..قال لبتاع الخضار اسمع انت العجور دا هسع فيه فايدة؟.
بتاع الخضار قال ليه العجور ما فيه فايدة ..لكن انت فيك فايدة للعجور ..كل يوم بتجي تشتري مني عجور بي خمسة جنيه.
في ناس كدا.
فايدتهم في الحياة دي ..بس يشتروا (العجور).
هسع عليكم الله العجور دا في زول قرأ طب بيشتريه.
محاولة
شوفوا المحاولة دي كيف معاكم يا ناس الولاية.
شفتوا السنة دي لو الخريف نجح ..والشوارع اتقفلت ..والخرطوم غرقت ...والنيل الازرق وصل الازهري ..شوفوا ليكم (حيلة) ذكية سريعة كدا ..واعملوا ليكم (سيكافا).
وخلوا الباقى لاعلام الولاية.
جواب
قال ليه : زمان كانوا بيمتحنونا في الرياضيات بنجيب في الامتحان ستة او سبعة.
هسع خايف على المريخ من درجتنا الكنا بنجيبها في الرياضيات زمان.
و الله ناس ضفر ..الترجي عندهم زي امتحان الرياضيات.
حاجة حريصة
حاجة حريصة قالوا ليها نسمعك موسيقي هادية كدا ...تروقي اعصابك.
قالت ليهم لو جبتوا لي للروقة كباية ليمون احسن لي من الموسيقي.
جابوا ليها كباية الليمون – قالت ليهم موسيقتكم وينها؟.
ملاح قرع
بوتاكو دا لا محترف ولا حاجة.
بوتاكو في تشكيلة الهلال مع ناس وليد علاءالدين واطهر والصيني وبشه الصغير ومحمد عبدالرحمن بقى زي ملاح القرع في السفرة.
زول بمشي عليه ما في.
والبمشي عليه بفوت فيه ساكت.
حكمة اجنبية
من حسنات الفيلم الاجنبي البتكون ترجمتو غير واضحة ..انك ما بتنوم فيه ..عشان بتكون مركز شديد في الترجمة.
خاصة لو كانت الترجمة سريعة.
في افلام بشيلوا ليك منها (الترجمة) سريع زي (الزلابية) مع شاي اللبن.
يخطفوها خطف.
حصة انجليزي
خواجة جاء البلد – ناس البلد كلهم اتلموا في (عجلتو)..الخواجة قعد يرطن ليهم بالانجليزي.
ناس البلد ما فهموا ليك منو اي حاجة.
العمدة قال ليهم اجروا نادوا (ود اليسع) ما في زول بقدر على الانجليزي بتاع الخواجة دي غيرو.
جروا نادي ود اليسع.
ود اليسع جاهم بي صلعتو في السخانة دي – قال ليهم في شنو؟.
قالوا ليه الخواجة دا برطن من الصباح ما عرفنا لينا كلمة منو؟..كدا شوفوا لينا يا ود اليسع الزول دا قاعد يقول في شنو؟.
ود اليسع قال ليهم كدا تروا كدا ..ابعدوا لي.
الخواجة قعد يرطن.
ساعة ونص بيرطن..وود اليسع مصنقع فيه.
ناس الحلة وقت المسافة طالت عليهم ..قالوا ليه يا ود اليسع (الداهية) دا بقول في شنو؟.
ود اليسع قال ليهم بقول ليكم الليلة الترجي بيديكم سبعة.
واحد (متثوقف) من ناس الحلة ..قال لي ود اليسع ..هسع سبعة الترجي دي عاوزة الانجليزي دا كلو.
كمان دي عاوزة ليها انجليزي.
كيلو غتاتة
زولكم طقتو (عجلة) فرتكتو ليك اصبع – اصبع.
زولكم صعب ..مشى الحلة خجل يقول ليهم ضربتني (عجلة).. ناس الحلة سألوه قالوا ليه الضربك شنو؟.
قال ليهم (عجلة) – لكن عجلة (دبل).
مع الاعتذار للاغنية
مرات اقول اديهو كلمة تزعلو ..(ارجع اقول لو عملت كدا ما برسل لي رصيد) الزول ابو رويس دا.
تشكيلة ريال مدريد
-الحارس: إيكر كاسياس
-الدفاع: كارفخال – فاران – ناتشو – كونتيراو
-الوسط: خضيرة – كروس – إيسكو
-الهجوم: بيل – بنزيما – رونالدو – وبله جابر.
ح تقولوا لي التشكيلة دي زايدة لاعب.
ج اقول ليكم انتوا عديتو (بله جابر).
بله جابر ما بعدوه.
كمان ما عندكم رياضيات.
مروحة
بله جابر قال (ضفر) ح يجيب ليه قون في الترجي.
انت يا بله جابر لو ما بتعرف (الترجي) كمان ما بتعرف (ضفر).
شنو (المروحة) البتعمل لينا فيها دي؟.
السر قدور في عشرة مواسم من (اغاني واغاني) عنده (300) ضحكة
عندما يقترب شهر رمضان ..بتشعر ان قناة النيل الازرق شغلها كله في رمضان برنامج (اغاني واغاني).
القناة كلها بتتجه نحو (اغاني واغاني).
وتبدأ التصريحات ..والتلميحات عن مشاركة بعض الفنانين وعن خروج البعض الآخر ..والموضوع في النهاية ما بخرج عن جمال فرفور وعاصم البنا وعصام محمد نور وحسين الصادق وطه سليمان.
كل سنة كدا.
اما افراح عصام وريماز ميرغني فهن موضوع الصحافة والقناة ايضا حول مشاركتهن هذا الموسم او ابعادهن.
دا الموضوع.
عليه تبقى الاضافات هي ..هي لا تخرج من نطاق (نجوم الغد).
ولو قلبوا الهوبة كدا يجيبوا ليك (مصطفى السني) ويعملوا نايمين.
ومثلما لا جديد في (اغاني واغاني)..كذلك لا جديد في حكاية تسجيل البرنامج فهم منذ الموسم الثالث لبرنامج اغاني واغاني ظلوا يعتبروا التسجيل خارج استديوهات النيل الازرق (امر جديد)...رغم ان هذا الامر شاهدناه في كل مواسم برنامج اغاني واغاني التى وصلت للموسم العاشر هذا العام.
وكما لا جديد في الاستديوهات ..لا جديد ايضا في الاستضافات ..فقد ظل البرنامج منذ الموسم الخامس يستضيف فنان كبير - تارة صلاح مصطفى وتارة شرحبيل احمد وتارة كمال ترباس من اجل تحليل (السطو) على اغنياتهم.
وتظل كما هو معتاد (اغنيات) البرنامج التى تقدم كل عام هي ..هي ...حيث اغاني الحقيبة والاغنيات الحديثة ...ومن موسم الى موسم يعود السر احمد قدور الى اغنيات محمد أحمد عوض الشعبية وعبدالوهاب الصادق.
حافظنهم حفظ.
ولمن يجيبوا النور الجيلاني في البرنامج يكونوا زي كأنهم عملوا ليهم (مفاجأة) ما في بعدها.
اذا رجعنا الى ارشيف البرنامج سوف نجد عاصم البنا مثلا قدم اغنية من (من الخوجلاب) اربع مرات.
وقدم (من قليبو الجافي) ..خمس مرات.
وغني عصام محمد نور اغنية (شجن) على ما اعتقد ثلاث مرات.
وظلت اغنية (السنين) متنقلة من فنان الى آخر في كل موسم.
وقدمت اغنية (مسامحك يا حبيبي) اكثر من ست مرات في مواسم البرنامج التسعة.
اما ضحكة السر قدور فهي ثابتة في كل موسم ..بل ثابتة في كل حلقة من حلقات برنامج اغاني واغاني.
بعد شهر رمضان القادم ح تكون قناة النيل الازرق سجلت (300) ضحكة للسر أحمد قدور ..لتماثل عدد حلقات البرنامج في عشرة مواسم.
يعني حكاية (الجديد) في البرنامج نرجو ان لا يتم خداع المشاهد به ..وخداع المعلن الذي يرعى برنامج في حقيقة الامر اعاده عشر مرات ولكن مع التغيير الذي يحدث في الديكور والاضاءة.
لكل هذه الاسباب نرجو من قناة النيل الازرق ان تجتهد في هذا الموسم وتقدم شيئا آخر ..بدلا من ان تخم الناس ببرنامج (اغاني واغاني) كما تفعل في كل عام.
نحن (اغاني واغاني) فترنا منو.
شوفوا لينا حاجة جديدة.
هذه الحالات
رمضان أحمد السيد عنده فقرة ثابتة عن (الحالة) في (لقاء كل يوم)..نحن ح نشيل حالة رمضان أحمد السيد ..ونشوف الجماعة ديل حالتهم كيف الليلة؟.
* مزمل ابوالقاسم (الحالة) ما اتعودت اخاف من قبلك إلّا معاك حسيت بالخوف.
* بابكر سلك (الحالة) ومشيت معاك كل الخطاوي الممكنة البقدر عليها وبعرفها.
* معاوية الجاك (الحالة) بتسيبني في عز الجمر وانت من حولي بتمر.
* هيثم صديق (الحالة) جرحي قرب يطيب جددتو تاني علي.
* عمر بشاشة (الحالة) واغالط نفسي بي اصرار واقول يمكن انا الما جيت.
* هيثم كابو (الحالة) عذبني وزيد عذابي يمكن قلبي يقسى.
ملحوظة
في الحلة الولد وقت ينوي على العرس ..بنات الحلة كلهن بقولن ليه ..ادينا رقمك بتاع الواتساب.
نظرية
لو عاوز تعمل ليك كارثة – جيب ضفر والريح علي وعلي جعفر وبله جابر واخد ليهم صورة الاربعة.
في (الصورة) تاخدوا سبعة.
شولة هندية
تفتكروا المريخ السنة دي لو طار من دور ال (16) واتهزم امام الترجي واتخارج ..جمال الوالي يعمل للمريخاب شنو؟.
و الله الزول دا ما خلى ليكم حاجة – بعد كدا إلّا يعمل ليكم (كوبري).
ويا ريت يبقى (كوبري طائر) عشان يكون متماشي مع المرحلة.
بوتاكو لو جرب يكون فني ساوند يمكن ينجح
في صحيفة السوداني جاء هذا الخبر : (قام الفنان الشاب طه سليمان بإضافة فني صوت (إثيوبي ) إلى فرقته بغرض تجويد عمل الفرقة ، وفيما لم تكشف المصادر عن قيمة التعاقد إلا أنها أكدت أن تفاصيل الإتفاق والعقد كانت ( مجزية جداً.)
مما تجدر الإشارة إليه أن العديد من الموسيقيين الإثيوبيين باتوا يسجلون حضوراً دائما ضمن الفرق الموسيقية للفنانين الشباب ، خصوصاً فرقتي الأخوين أحمد وحسين الصادق والتي تتضمن أكثر من (4) عازفين إثيوبيين) .
الاحتراف دخل على الفن.
الفنان سوداني ..والفرقة حبشية.
احمد وحسين الصادق عندهم (8) عازفين اثيوبيين في فرقتهم ..يعني زي الهلال والمريخ.
افتكر بوتاكو دا لو جرب يكون فني ساوند فرصة نجاحه بتكون اكبر من الكورة...خاصة لو جرب الموضوع دا مع احمد الصادق ..ما عاوزين منو شيء غير (يبعبص) لينا في الساوند.
و الله انا خايف مع الاجانب الدخلو البلد دي ...تاني (العريس) ذاتو يطلع اثيوبي.
لو وقفت على العازفين هينة.
قصة غريبة
قالوا ليه إلّا تغطي (قدحك).
بنت عمو (نجاح الموجي) إلّا شوية.
يوم العرس صاحبكم قاعد في الكوشة ..واحد صاحبو جاء يبشر فيه ..قال ليه (رأيك) شنو في الفنان دا؟ ..والفنان وقتها كان بغني في اغنية صلاح بن البادية (زي القمر و الله احلي من القمر).
العريس عاين للعروس وقال لي صاحبو انا لو عندي (رأي) بعرس الزولة دي ..زولة لو عكست ليها كورة تجيبها قون ..لو المرمى واقف فيه عصام الحضري.
كمان انت ما تبالغ ..اصلها بقت (بويا).
بالقطعة
بكري المدينة قالوا عندو (شد عضلي).
غايتو الزول دا بقى يدلع فيكم جنس دلع.
بكري المدينة دا ...في الهلال لعب اربع سنوات وكان بيجري في المباراة مسافة (21) كيلو متر في (70) دقيقة ..ما سمعنا بيه يوم قال عندو (شد عضلي).
بكري المدينة لقى ليك ناس وانغا وعنبكة ديل ..عمل ليه (عضل).
هو (العضل) عاوز بيه شنو مع (السكين).
دعاء المجموعات
اللهم باعد بيننا وبين الكونفدرالية...واحفظ رئيسنا من (سيكافا) وضربات الجزاء البرة المنطقة.
اللهم ارمي لينا (الترجي) في مجموعتنا ..عشان نضربو ليكم والمريخاب يقولوا لينا الترجي (حمام ميت).
يا رب يا كريم ابقى لينا بله جابر وضفر والريح علي وعلي جعفر وعنبكة وبكري المدينة في تشكيلة المريخ.
ان شاء الله الواحد فيهم لو عندو (شد عضلي) ما يطلع من التشكيلة.
يا كريم يا منان ...جمال الوالي يسحب استقالتو ..ويقعد لينا كدا بس ..لي سنة 2070م.
جغرافيا الحواس
هلالابي قال لي في مباراة الهلال وهلال الفاشر ..طلع بشه الكبير ودخل بشه الصغير ..قال دا يعني شنو؟.
قلت ليه دا تبادل اجيال.
ناس المريخ وقت جابوا رمضان عجب ..قالوا لي فيصل العجب تكتب خطاب اعتزال.
العجب مرقها للفاشر عشان يلعب كورة.انتوا تبادل الاجيال دا ما درسوكم ليه.
إحتمال
احتمال بكرة الكهرباء تقطع ..عشان بس تستركم من البعملوا فيه ناس (ضفر) ديل.
قالوا ليك غارزيتو ح يشرك (الريح علي).
الظاهر كدا غارزيتو قنع من المريخ.
وعلى ما يبدو عاوز يغادر من (رادس).
عليكم الله هسع (الريح علي) في مباراة في ميدان عقرب دا بشركو.
هسع دا احتمال دا.
سواق قندران
سواق قندران دخل ليه في بيت عزابة كتل ليه فيهم (13) واحد..
انتوا شوفوا الاعتذار.
سواق القندران لقى ليك المراتب مجدعة في نص الحوش ..قعد يعتذر ليك ليهم – قال ليهم معليش يا جماعة و الله لو عارف البيت دا بيت عزابة كان جبت لي معاي (كوتشينة).
لكن و الله ما عارف.
الطب ما بدخلوه بي (الجغرافيا) والمجموعات ما بدخلوها بي (بكري المدينة)
برنامج (اغاني واغاني) السنة دي ما فيه حاجة غير (ضحكة) السر قدور
خطين تحت الجواب
زمان كان الواحدة لمن تكون عندها علاقة حب مع زول تاني بتغني ليه مع عصير الليمون (عيونك كانو في عيوني).
هسع بقن يعملنها ظاهرة ..بقت (عيونك كانو في جيوبي).
انا ما عارف ليه البنات بقن يعاينن في جيوب الزول؟.
فهموها غلط
المريخاب قالوا ليك عندهم خدمة لتحويل الرصيد.
المجلس على ما يبدو فهم الموضوع غلط.
المجلس قدم استقالاته للوزير ..قالوا ليهم حولوها للمفوضية.
اها بالطريقة دي ح تحولوا (رصيد) وإلّا (استقالات)؟.
مسألة صعبة
الساعة واحدة ونص ..ناس الضرائب دقوا ليه الباب.
طلع ليهم مهجوم..قال ليهم في شنو؟.
قالوا ليه انت الساعة عشرة و13 دقيقة اشتريت ليك ربع كيلو لحمة عجالي.
قبال ما يطلعوا ورقهم عشان يحاسبوه ..قال ليهم اقيفوا النجيب ليكم (الكديسة) تتفاهموا معاه ...ربع الكيلو اكلتو الكديسة.
ديل الكديسة ما بخلوها.
فيلم هندي
عالم هندي ما عندو موضوع اكتشف ان (الواتساب) بطول فترة الخطوبة.
زمان خطيبتك بتشوفها مرتين في السنة.
مرة في عيد رمضان.
ومرة في عيد الضحية.
ولو بالغت شديد بتقول ليها (كل سنة وانتي طيبة).
وهي المسكينة ولا بتقدر ترد عليك.
تعال شوف هسع دي ...الخطيبة تصور في اللحوم والسمك والشيات والفراخ وترسلها لي خطيبها عبر الواتساب.
بعدين بعد العرس الموضوع يطلع (عدس) ساكت.
نفسي اعرف (السمك) دا بصوروه لي شنو؟..وقت الزول مصيرو يكون (عدس).
حصة فاضية
ضفر في تمرين المباراة على ملعب (رادس)..قالوا سأل محسن سيد قال ليه يا كوتش ...الميدان دا فيه (تسلل).
محسن سيد قال ليه (تسلل) فيه – لكن ضربات جزاء يقطعها الحكم من رأسو الميدان دا ما فيه.
وهمة جديدة
الوهمة الايامات دي ...الشكية الظهرت فجأة من (الكلي).
الشعب السوداني كلو الايامات دي بيشكي من (كلاهو).
يا جماعة رمضان لسع ..بدري عليه ..موضوع الكلي اجلوه شوية.
المعلم علي تفتيحة
المعلم على تفتيحة قال امل المريخاب في بكري المدينة زي (الاسرة) البكون عندها ولد بيسقط في كل المواد ...وبجيب في الانجليزي (3) درجات بس ..وبيقعدوا مع ذلك في الاذاعة والتلفزيون عشان يسمعوا (العشرة الاوائل).
تلقاهم قاعدين في المؤتمر الصحفي لاعلان نتيجة الشهادة السودانية ومجهزين (الحلاوة) كمان.
امل المريخاب بقى كلو في بكري المدينة ...زي الزول العاوز يدخل الطب بالجغرافيا.
المجموعات ما بدخلوها بي بكري.
جغرافيتكم دي ما بتدخلكم طب.
على رأي (عركي) ..نحن كنا فاكرين الفرق بين الهلال والمريخ شارع زلط.
الفرق طلع كبير اوى يا معوض.
من العلب
الخبر :
((قالت الفنانة يسرا خلال حوارها في برنامج (الحريم أسرار)، الذي يقدمه الفنان أمير كرارة ، والمذاع على قناة (ten) ، (إنها تحب أن تشعر بأنها أنثي في كل الأوقات، مضيفة بأنها بتحب تتعاكس ولكن هناك أشخاص معاكستهم مملة).
وأثارت تصريحات الفنانة يسرا، سخرية رواد مواقع التواصل الاجتماعي، مشيرين إلى تقدم الفنانة في العمر وأنها تخطت السبعين)).
التعليق :
يسرا دي يا ما عندها موضوع.
يا ما عندها (واتس اب).
بالوصف
عناصر الهزيمة كلها اجتمعت في رادس.
ضفر.
الريح علي.
مازدا.
وجمال الوالي.
بعد كدا اكرم الهادي سليم لو تابع المباراة من ام درمان ..ح تأخدوا سبعة.
خيارات
الترجي دا شكلو ح يلاقينا في المجموعات.
لكن ناس سانغا والمريخ ديل ..يا اتلاقوا في الدهب ..يا اتلاقوا في الكونفدرالية.
سانغا والمريخ عندهم خيارين الليلة يا يمشوا الدهب يا الكونفدرالية
آمال سراج اول من كونت (الاسرة) الاذاعية
الاجيال السابقة البعيدة عن الفيس بوك والواتساب كلها كانت الاعلامية (آمال أحمد سراج مختار) شريكة في تكوين رابط (اسري) لها امتد عبر اثير اذاعة ام درمان – عندما كان اثير الاذاعة يشكل رابطا لا يقل عن رابط الرحم والدم.
قدمت في الفترة التى سبقت حكومة الانقاذ ..اي قبل عام 1989م الاعلامية (آمال سراج) برنامج الاسرة في اذاعة ام درمان ..وتميزت امال سراج بالقدرة الفائقة والكبيرة على خلق اسرة اذاعية كانت تفرض تجمع اسري امام (الراديو) للاستماع لبرنامج (الاسرة) عند الساعة الحادية عشرة.
حيث كانت كل المؤشرات في كل السودان عند الساعة 11 توجه المؤشر على موجة ام درمان للاستماع لفقرات برنامج (الاسرة) الذي شكل بفقراته الاسرية والدنية والاجتماعية مدرسة خاصة بالقيم والمثل والمباديء.
آمال سراج كان لنا شرف الجلوس معها ...لنلتقط بعض الاسطر في مسيرتها الحافلة وهي التى مازالت تعطي وتعطي من خلال زاويتها الاسبوعية في صحيفة (المجهر السياسي).
(1)
ولدت آمال سراج عام 1948م ..ونشأت في منطقة السجانة وسط اسرة متعلمة ولها ايادي بيضاء على السودان اجتماعيا وسياسيا حيث كانت تجتمع قيادات الحزب الاتحادي في دارهم الذي كان يشكل مجمعا ثقافيا ووطنيا قبل الاستقلال.
درست امال سراج المرحلة الثانوية العليا في (Unity High School) – ثم دبلوم الصحافة – معهد الدراسات الاضافية جامعة الخرطوم.
عملت آمال سراج بعد التخرج موظفة في شركة شل سابقا.
(2)
دورها الاجتماعي والثقافي والاعلامي تمثل في انها كانت مستشار تحرير مجلة اسرتي.
خبير برامج اسرية – الاذاعة القومية.
عضو لجنة التحكيم للقصة القصيرة.
امين عام رابطة الاديبات السودانيات.
الرئيس الفخري لجمعية الاعلاميات السودانيات.
عضو المجلس القومي لرعاية الاداب والفنون.
رئيس دائرة ثقافة الطفل بالمجلس القومي لرعاية الآداب والفنون.
اما في مجال الصحافة فقد عملت آمال سراج في مجلة الحياة – مجلة حواء الجديدة – مجلة الشباب والرياضة – مجلة عزة والتى اختارت لها الاسم.
وعملت كذلك في صحف يومية – المجهر السياسي – صحيفة اكتوبر – صحيفة الاضواء – صحيفة الايام – صحيفة السودان الجديد – صحيفة القوات المسلحة – صحيفة المجالس.
ولها من المؤلفات قصص الاطفال (الغابة والصياد – الفيل التائب)..ولها كذلك القصة القصيرة.
(3)
امال سراج رسمت عبر سوطها ..الكثير من المعالم ..والدورس وساعدت في ترسيخ الكثير من المفاهيم.
وقد ظلت الذاكرة السودانية محتفظة لها بما قدمت رغم توقف البرنامج منذ ربع قرن ..إلا انها مازلت تتحرك بذاكرة البرنامج وتتعرض لمواقف في المواصلات والشارع وكأن البرنامج مازال يبث على اثير اذاعة ام درمان.
من المواقف التى لا تنساها امال سراج ..ان احد السيدات طلبت منها ان تتوسط لها من اجل ان يتم اعفاء ابنها (القاتل)..وقد كان لها ذلك بعد ان ترددت امال سراج في قبول المهمة لكنها عادت وتتوسط من اجل الثقة التى وضعت فيها ..والتى كانت سببا في ان تعفو والدة القتيل على القاتل.
هذا امر يوضح رسالية الاعلامي ..ونجاح امال سراج في مهمتها وفي تأثيرها الذي بلغ حتى الحصول على (العفو) من ام القتيل التي فقدت ابنها.
(4)
امال سراج مازالت بالعطاء نفسه ...بل زادت خبرة ومعرفة وعلم ...وهذا ما يستوجب الاستفادة من تلك القدرات والامكانيات الكبيرة.
فهي قادرة على صنع اسرة من فرد واحد في اي لحظة.
نرجو من اذاعاتنا والفضائيات السودانية الالتفات الى امال سراج ..والاستفادة من قدراتها وخبرتها في الحياة في ظل التفكك الذي اضحت تعاني منه الاسرة.
امال سراج مدرسة لمحو فصول العزلة ..فلا تهملوها ..انتم في حاجة اكثر لها الآن من اي وقت.
صورة ناطقة
اعمامكم الفرحانين ديل ..لا عندهم هم سانغا ولا عندهم هم الترجي...ظاهر عليهم يا دوب أتأهلوا.

انقر هنا لقراءة الخبر من مصدره.