من الغلاف للغلاف - صفحات يحررها محمد عبد الماجد عند اللزوم فقط """"""""""""""""""""""""""""" عبد الصمد مشى الدهب عشان يجيب حافز (أمير كمال) الاهداء لمن تجيك (رسالة فاضية) من زول عزيز عليك... ما تقعد تشرع ساكت...وتفسر الموضوع على هواك. وما تبقى خفيف وترجع للزول. احسن تصرف في هذه الحالة – تصبر بس وتعمل فيها تقيل...وما تصدر أي (ردة فعل) للرسالة الفاضية. محمد
وجه الشبه وجه الشبه بين القطر والدفار ...(الاتنين )بشيلوا نفس (العدد) من الناس. في الانتظار منتظر التشكيل الحكومي الجديد .. عشان يبدأ ينزل في الطوب والاسمنت والسيخ. ويفتح حساب في البنك. جدادة الخلا اشتري ليك (لوح تلج) وامشي البيت. أي زول يلاقيك في الشارع بقول ليك : (الليلة عندكم شنو؟). الناس بتتخابر جنس مخابرات..عاوزين يعرفوا أي حاجة. علاقة (جدادة الخلا) بالكلام دا شنو؟. فول سادة قالوا ليه الفرق بين الفول السادة والفول بي الجبنة شنو؟. قال ليهم الفول بي الجبنة بقى ما فيه أي (جبنة). قالوا ليه : والفول السادة؟. قال ليهم الفول السادة كمان ما بتأكل. اسحاق الحلنقي : لم نتجاوز حتى وقتنا هذا مرحلة (الحزن القديم) يا أعز الناس ... تداولنا الأغنية ونحن طلبة طمعاً في الخروج ببعض الحب ...فخرجنا بكل الحب. أنت يا الأبيض ضميرك .. بهذه الكلمات كان رهاننا على الصفو ..فكسبنا الرهان كله. شخبطنا على الحيط بشغب عريض (بتتعلم من الأيام مصيرك بكره تتعلم ...وتعرف كيف يكون الريد وليه الناس بتتألم)..فتعلمنا الشقاوة والريدة ...والسهر ...ودك الحصة الأخيرة. وسّمنا المطر ب (عصافير الخريف) فكان ذلك منه أحلى المواسم. كل أحلامنا وآمالنا توافقت مع (عشة صغيرة). عشنا الحب معه ...فكان صالح الضي ...وسمعنا خوجلي عثمان ألف مرة في (اسمعنا مرة). اسحق الحلنقي بهذا الحضور الكبير في الأغنية السودانية ...أجرّب معه اليوم بعض الكلمات.. كنت قد حاورته إذاعياً ...فسردبت كلماته إلى هذه المساحة. (1) وكأننا نسافر معه ..استرجع كلماته التى غناه له إسماعيل حسب الدائم (اديني رضاك قدامي سفر)...نحن أمام (سفر) حقيقي ونحن في حضرة شاعر ...تصدرت أغنياته روائع أي فنان. الحلنقي بدأ غنائياً بأغنية (أنت يا الابيض ضميرك) التى وجدها الطيب عبدالله في احدى الصحف ..فقام بتلحينها والتغني بها. الاغنية كانت طرف الفنان ابراهيم حسين ..لكن الطيب عبدالله سبق الجميع بوضع لحن لكمات كانت اول اغنيات اسحاق الحلنقي. (2) شكّل اسحاق الحلنقي ثنائية (كسلاوية) شهيرة مع الفنان ابراهيم حسين..وغنى له كذلك التاج مكي (اسأل العنبة الرامية فوق بيتنا). الحلنقي يقول ما شرط تكون في (عنبة) في البيت ...الاشياء الجميلة أن لم نجدها في الواقع تخيلناها. وليس بالضرورة أن تكون العنبة (عنبة)...ممكن العنبة تكون (حاجة تانية)...هكذا هي عوالم الحب ودنياواته. وكتب الحلنقي من أجل التاج مكي اغنية (حبيت عشانك كسلا ..خليت دياري عشانك) باعتبار أن التاج مكي ترك دياره ومدينته واستقر في كسلا وأحبها ..لذلك يقول الحلنقي أنا ليس المعني بي (حبيت عشانك كسلا)..لأني أصلاً أنا من كسلا. كثير من الأغنيات التى كتبها اسحاق الحلنقي للفنان التاج مكي منها (أول مرة سامحتك)..والتى يقول عنها الحلنقي إن التسامح فيها ما كان يفترض أن يصل للمرة العاشرة. للمرة الثالثة كان كفاية. (3) الحلنقي يعتز كثيراً بصديقه صالح الضي ...الذي كان يقول له ..أنا بكتب واللحن براي يا اسحاق ما عاوز منك كلمات ..إلى أن جاء صالح الضي يوماً وطلب كلمات للحن أغنية وضع مطلعها ..فكانت (عيش معاي الحب)..ثم غنى صالح الضي ايضاً لاسحاق الحلنقي (بتتغير) الاغنية الكبيرة ..معنًى ولحناً ...واداءً. أما أغنية صلاح مصطفى (مشي امرك يا قدر) فقد كتبها اسحاق الحلنقي عندما كان مغادراً بالقطار مدينة كسلا ...وكانت شقيقته الصغرى متعلقة به ..أرادت أن تسافر معه بعد أن وعدها بذلك. عندما شاهد اسحاق الحلنقي دموع شقيقته والقطار قد تحرك كتب (مشى امرك يا قدر)..فكان صلاح مصطفى لها بالمرصاد. (4) كتب اسحاق الحلنقي اغنية (عصافير الخريف) من اجل الفنان حمد الريح ..الذي اخذ النص وشرع في تلحينه. لكن أبوعركي البخيت كان يرى أن النص يشبه محمد وردي ...ليجد وردي كلمات الأغنية ويقدمها سريعاً قبل حمد الريح فيقع اسحاق الحلنقي في حرج كبير مع حمد الريح. فما كان من الحلنقي إلّا أن يكتب (حمام الوادي يا راحل) عندما تم نقل زوجته من الخرطوم إلى كسلا وهي تعمل استاذة في وزارة التربية والتعليم ..فيغني حمد الريح (حمام الوادي) عوضاً عن (عصافير الخريف) التى تغنى بها محمد وردي. (5) اسحاق الحلنقي شكل ثنائية أخرى مع محمد وردي الذي كانت ثنائيته مع إسماعيل حسن تشتهر. عندما اختلف وردي مع إسماعيل حسن ..جاء اسحاق الحلنقي ..فغني له محمد وردي بعد الفراغ العريض الذي تركه إسماعيل حسن. كتب الحلنقي لوردي بنفس إسماعيل حسن ..وكانت أول أغنية تغنى بها محمد وردي للحلنقي أغنية (يا أعز الناس حبايبك نحن زيدنا قليل حنان). الحلنقي يقول انه يشعر بأنه مديون بالكثير لأغنية (عيش معاي الحب) فقد سمعها وردي عند صالح الضي ..فسأل وردي عن شاعر الاغنية التى أعجب بها ليغني له فكانت (أعز الناس) إحدى روائع وردي الكبيرة. بعد (أعز الناس) جاءت (توعدنا وتبخل بالصورة) ووسط الدائرة وقطر الندى وأقابلك ...وامتدت الثنائية بين الحلنقي ووردي لتمتد لأكثر من (17) عملاً غنائياً. (6) من الاغنيات التى يعتبرها اسحاق الحلنقي كبيرة فعلاً وهي تأتي من ضمن اجمل عشرة اغنيات كتبها الحلنقي حسب قوله اغنية (بتتعلم من الأيام مصيرك بكره تتعلم) التى لحنها وتغنى بها الموسيقار محمد الأمين. محمد الأمين كان يغني فقط لفضل الله محمد وكان الحلنقي يحترم ذلك في محمد الامين ..إلى أن غنى محمد الامين بتتعلم من الأيام ووعد النوار للحلنقي. (7) قدم الحلنقي أروع الاغنيات لعثمان مصطفى فكانت رائعته (راح الميعاد) عندما كانت تسود أغاني (الميعاد) في ذلك الزمن. والتقط الحلنقي كلمة يرددها عبدالعزيز المبارك دائماً في ونسته إذ يبدأ عبدالعزيز المبارك خطابه دائماً ب (يا عسل) ...ليكتب الحلنقي أغنية (يا عسل زايد مصفى). الحلنقي استفزه أن قيل له أن عبدالكريم الكابلي لن يغني لك ....ليذاكر الحلنقي الكابلي فيقدم له أغنية تشبهه ..وهي الاغنية الوحيدة التى تغني بها الكابلي لاسحاق الحلنقي (عقبال بيك نفرح يا زينة)...أغنية (شربات الفرح). البلابل غنين للحلنقي مجموعة من الأغنيات (عشة صغيرة)..والبيسأل ما بتوه ..ولون المنقة ونحن أخوات تلاتة..وغير ذلك من الأعمال الغنائية الكبيرة. (8) اسحاق الحلنقي هو صاحب نشيد الأطفال الشهير (أنا بدري صحيت من نومي) والذي حاز على جائزة الاولى في مهرجان أغنية الطفل في أحد السنوات في الاردن. الطريف أن النشيد قدم بصوت طفلة أردنية ...بعد أن تم تحفيظها النص واللحن ليقدم بفرقة أردنية في المهرجان. (9) يرى الحلنقي أنهم لم يبلغوا بعد مكانة عمر الطيب الدوش الذي كانت تجمعه به صداقة قوية. الحلنقي مع كل الذي قدمه من أغنيات وروائع ..يقول إننا دون (الحزن القديم)..لم يأتي شاعر لتجاوز هذا النص حتى الآن. """""""""""""""""""""""""""""""""""""""""""""" احتمال الكهربة لمن تقطع في البيت ..ما تستعجل وتسب ناس الهيئة القومية للكهرباء ..يمكن الكهربة ما تكون قطعت ..يمكن أنت كهربتك تكون كملت. عشان كدا يستحسن في كل صباح تقيف قدام العداد ...وتشوف الحاصل – عشان لمن الكهربة تقطع ...تهاجم الهيئة القومية بي قلب قوي. """""""""""""""""""""""""""""""""""""""""""""""" نظرية الراجل من يقول للمرا ..الليلة الغداء شنو؟. يكون ناوي يعمل ليه مشكلة. """"""""""""""""""""""""""""""""""""""""""""""""""""" حكمة بالطوب البلدي سوء الظن ما بمنع (القدر)...عشان كدا أحسن تحسن الظن في كل الناس. """"""""""""""""""""""""""""""""""""""""""""""""""" حكمة بالطوب الآلي الضل لمن يكون قصيّر – ما تمدد فيه كرعيك. """"""""""""""""""""""""""""""""""""""""""""""""""""" هيثم كابو يرفع الحصانة من نجوم المجتمع السوداني نجح هيثم كابو في أن يرفع الحصانة عن عدد كبير من نجوم المجتمع السوداني عبر برنامجه الناقد التلفزيوني (بدون حصانة). حيث سجل كابو حلقات أسخن من جو هذه الأيام عبر استوديو (عالمي) بديكور خالب وإنتاج ضخم وإعداد محترم مع شخصيات مثيرة للجدل ويحوم حول شخصيتها الغموض. من بين الشخصيات التى سجل معها هيثم كابو ..الفنانة ندى القلعة التى دخلت الاستوديوهات بمستنداتها حتى تنفى التهم التى وجهت لها. كابو سجل مع المعز محجوب ووجه له اتهام تمثل في (بيع المباريات) الاتهام الذي ظل يلاحق حارس المنتخب الأول. كذلك سجل كابو مع أكرم الهادي سليم وفكك معه سباعية الوحدات الأردني. من بين الشخصيات التى سجل معها كابو وزير الصحة الولائي بالخرطوم ووزير الصحة الاتحادي. البرنامج يستهدف بشكل خاص نجوم الفن والرياضة ..وتقدمه قناة الشروق عبر برمجتها لشهر رمضان الكريم. تقارير الحلقات كتبها بلغة عالية ومعلومات دقيقة الصحفي والمعد التلفزيوني (ياسر عركي) الذي يشارك في الإعداد في عدد من البرامج في قناة النيل الأزرق وقناة الشروق بتفوق تام. على العموم المشاهد موعود بحلقات ساخنة من (بدون حصانة) على شاشة قناة الشروق. """""""""""""""""""""""""""""""""""""""""""""""""""""""" ملحوظة جمال الوالي وعبد الصمد وصديق علي صالح ..ورابطة المريخ المركزية ...كلهم مشوا الدهب. عشان يلقطوا (حافز) تسجيل إعادة قيد أمير كمال. """""""""""""""""""""""""""""""""""""""""""""" الحيطة القصيّرة رمضان عجب بعد أن أعاد قيده في كشوفات نادي المريخ سألوه ..قالوا ليه أمنيتك شنو في الحياة الكبيرة دي؟. قال ليهم : يكون باقى لي خمسة شهور فقط من انتهاء قيدي مع ناس المريخ – عشان ناس الهلال تاني يدخلوا ويرفعوا لي السعر. وسيلا قال ليهم: بعد التسجيل لو عاوزين تقعدونا (كنبة) مع المعز محجوب ما عندي مشكلة. اكتر من كدا ما بقدر أعمل ليكم حاجة. الكتف مخلوع. """""""""""""""""""""""""""""""""""""""""""""""""""""""""""" قالوا قالوا ليك الولاية استعدت للخريف ...بي كميات كبيرة من (اتفاجأنا بي موسم الخريف). (اتفاجأنا بي موسم الخريف). (اتفاجأنا بي موسم الخريف). (اتفاجأنا بي موسم الخريف). (اتفاجأنا بي موسم الخريف). (اتفاجأنا بي موسم الخريف). عشان كدا السنة دي الحكومة ما عندها مشكلة في الخريف. عم غوغل واحد كتب في محرك البحث اسم (بشه). النت اداهو خمس خيارات في الصفحة الاولى. الخيار الاول – أكرم واقع بياكل في النجيلة. الخيار التاني – رمزي صالح طالع من قونو. الخيار الثالث – عصام الحضري قال راجع أهلو. الخيار الرابع – جمال سالم يشيل شيلتو. الخيار الخامس ما بقدر أقوله ليكم – عشان صعب شوية. عليكم الله ما تحرجوني اكتر من كدا. الشبكة كعبة قال ليه: أنت تعال هنا ..نسيبتك رجعت من البلد. قال ليه : عرفت كيف؟. قال ليه : كل ما اضرب ليك ...بقولوا لي هذا المشترك لا يمكن الوصول إليه. الرقم غلط واحد قال لي صاحبو ..رأيك شنو أقلب (الركشة) دي (هايس). صاحبو قال ليه :لو الركشة دي بتتقلب هايس ...كان بله جابر بقى (صانع العاب). فكرة مختلفة الظاهر كدا – والله أعلم ..صلاح ادريس خلى (التلحين) واتفرغ للكتابة عن (سيلا). الهلال ذاتو خلاهو ..بقى (سيلا) بس. قصة قصيرة جداً لكن طويلة قصة الحب زمان كانت بتبدأ ب (اديني رواية). هسع بقت بتبدأ ب (اديني رقمك). الحب زمان كان (رواية). هسع بقى (مكالمة).
مكالمة لم يرد عليها علاء الدين يوسف قال ما سافر معسكر تونس عشان خايف على زملائه في المريخ من (البرجم). في نفس الوقت علاء الدين يوسف قال ممكن اتمرن مع ناس الاهلي شندي. يعني يا علاء الدين ناس الاهلي شندي ديل ما بيجيهم (برجم). العدوى ما بتمشي فيهم. تستاهل يا صلاح ادريس ناس المريخ تجيب ليهم (سيلا) – وهم يجيبوا ليكم في (البرجم).
حكاية كل يوم المريخاب ووكيل تراوري ذاتو – قالوا فقدوا الاتصال بالمحترف المالي (تراوري). يا ربي (المؤتمر الصحفي) الكان عاملوا تراوري في الخرطوم كان عن بداية العام الدراسي الجديد. ولّا كان عن تشكيل الحكومة الجديدة. ولّا عن الخريف يا أحباب. غايتو تعبتوا ساكت ..وعملتوا ليكم (مؤتمر صحفي) في الفاضي. يا خاسرة (موية الصحة) الجابوها في المؤتمر الصحفي بتاع تراوري. عليكم الله مؤتمر شنو كمان؟. تراوري دا لاعب كورة ولّا قيادي في حركة العدل والمساواة.
اقتراح الأيامات دي – الواحد لو اشترى ليه بطيخة ساكت – يقولوا ليك متجرس من رمضان. عندنا جماعة ...من رمضان يقرب ..بقيفوا جوار (الزير) ويتصوروا معاه. أي واحد فيكم يتصور صورة (سيلفي) مع الزير ..السنة دي رمضان سخن شديد.
السيستم أحوص غارزيتو قال ليهم سجلوا لي الياسو. سجلوا ليه سيلا. غارزيتو قال ليهم اشطبوا لي تراوري. شطبوا ليه وانغا. غارزيتو قال ليهم اعيروا لي أحمد الباشا. اعاروا ليه عنكبة. عليكم الله – وأمانة فيكم كدا ...السيستم دا ما أحوص؟. كيف؟ قال ليهم السودان جميل. بس في الصيف ما بتقعد. في الخريف ما بتمشي. في الشتاء صعب.
يمكن يا ربي الليلة مع نهائي دوري أبطال أروبا بين برشلونة ويوفنتوس ..صديق علي صالح شعورو شنو؟. الزول دا فاكر المريخ بيلعب في دوري ابطال أروبا. صاحبكم قائل المجموعات دي بالانجليزي. غايتو الزول وقت يكون جديد على المرحلة.
بالوصف الحاجة الما عارفنها انتوا.. قالوا ليك تراوري قال في المؤتمر الصحفي الذي عمله بالخرطوم أنه ح يسافر مالي ويعمل ليه (مصنع تلج) هناك ويستقر نهائي في بلدو. المترجم قام ترجم الموضوع دا – على أنو (اعتذار) لي غارزيتو. عليكم الله في علاقة بين الاعتذار ومصنع التلج. والشيء البنعرفو نحن – تراوري ما بعرف يكسر تلج. يعني ما في أي علاقة. تنططوا لي في عيونكم ...متل التلاجة المن رمضان يقرب ما تشتغل. والمروحة ذاتها.
شفافية الفيفا الأيامات دي مشغولة بي استقالة بلاتر ...عشان كدا موضوع بكري المدينة ح يتأخر شوية. الفيفا ما فاضية لي حاجات زي دي في الايام دي. بكري شنو كمان؟..مع الجوطة دي. مشروع أمنيات كل ما يقولوا لي ضفر ..جوليام بجيب قونو من أول ست دقائق ...بقول ليهم يا ريت (برجم) علاء الدين يوسف لو جاني انا. كان على الاقل مرقني من الورطة دي. مع البرتغالي الظهر جديد في الهلال ..ناس ضفر وبله ما بفهموا أي حاجة. بقطعوا من أول خمس دقائق.
شوال غتاتة قال ليه رأيك في الحكومة الجديدة شنو؟. قال ليه : أنا ما عندي رأي – لكن الفول دا لو لقى ليه (بصلة) ببقى حاجة ما بتخلص. بصلة بس. السيستم قفل " مشي لبتاع الدكان قال ليه عاوز لي طحنية. بتاع الدكان قال ليه : طحنية ما في والله. قال لي بتاع الدكان وقت ما عندك طحنية – المروحة دي مشغلها في شنو؟. فروقات سألوه – الفرق بين الحقيقة والحقيقة شنو؟. قال ليهم : الاتنين كضب. صفيحة دغالة لو دا استعدادكم للخريف.. خلونا من هسع نغرق. ونشوف لينا طريقة نرمي الصالون ...ونقفل الشارع. ونطلب الاسعاف. أصلو الزول وقت يطلب الاسعاف في البلد دي بيصلو بعد سنة. واحد تعبان شديد. ضرب طلب الاسعاف. قبل ما يقفل الخط ..قال ليهم ولّا أقول ليكم ...تعالوا (المقابر) طوالي.
غراب سنة تالتة واحد ما جايب أي خبر سألوه ...قالوا ليه الفريق البفوز منو الليلة برشلونة أم يوفنتوس؟. قال ليهم الفريق البخط الكورة في الواطة – هو البغلب. أها – قالوا ليك ديل عندهم (واطة) زينا كدا. ديل لو ختوها في سابع دور – ما عندهم مشكلة. أنت قايل عندهم علي جعفر.
شارع اتجاه واحد عصام الحضري ...لو عرف مهند الطاهر مشى هلال الأبيض ..برجع يلعب تاني في المريخ. لو عاوزين ترجعوه يا ناس المريخ ..قولوا ليه المعلومة دي بس. برجع ليكم بدون (حوض سباحة).
من الأمس مريخابي زعلان ..قال لي انت عارف ..المريخ بقى زي صورة الهلال القديمة. زي صورة الهلال سنة 2002م البنعلقها في الديوان الكبير. تعاين لي صورة المريخ ..تلقى المعز محجوب وأحمد الباشا وعبده جابر وتراوري وعلاء الدين يوسف وبكري المدينة وعمر بخيت.. ناس التلفزيون لو عاوزين يحرجوا المريخاب ..يجيبوا ليهم مباراة للهلال سنة 1994م. انتوا يا ناس المريخ بتشجعوا في هلال 2004م.
من أول السطر السر أحمد قدور ..اتأخر شوية في (أغاني وأغاني). السر أحمد قدور لو جاء في مايو ...ناس المريخ كانوا سجلوه. اصلهم كانوا بفتشوا ليهم في طرف شمال ...حافظ أغاني الحقيبة كلها. انسحاب رسمي المريخاب شافوا قون جوليام قالوا أجلوا لينا الدوري الممتاز. لو شافوا اندرزينهو كان عملوا شنو؟. كان قالوا ما بنلعب عديل كدا. كان انسحبوا رسمي من الدوري الممتاز. زمالة نزار الصاعقة نزار حامد عايش في منتهى الاستقرار بعد أن أعاد قيده... بعد الماجستير عمل الزمالة.. الشغيل ..ومساوي ..ونزار ..كلهم في منتهى الاستقرار. الكلام ناس راجي وأمير كمال وأحمد الباشا وبله جابر (لو وشوش صوت الريح في الباب يسبقنا الشوق قبل العينين). ح تقعدوا تحرسوهم كدا. ح تقطعوا يا جماعة.
تحويل رصيد المريخاب عملوا ليهم (رقم) لتحويل الرصيد ..عشان يعيدوا قيد أمير كمال. قالوا أمير كمال قال ليهم عاوز تسعة مليار. المريخاب قالوا ليه نحن لو عندنا تسعة مليار جنيه – كان جمال الوالي بيستقيل في السنة أربع مرات. انتوا تعالوا هنا. انتوا ما بتتفقوا معاي ..أنو جمال الوالي المرة دي طوّل من (الاستقالة). عبد الصمد وين؟. عبد الصمد (فتح). عبد الصمد قال أحسن اركز في مدارسي. ناس الريح علي ديل يا عبد الصمد ما بتستفيد منهم أي حاجة.
بالمناسبة بالمناسبة دي. أو من غير أي مناسبة. انتوا مالكم؟. في زول عاوز مني حاجة. اعملوا ليكم رقم جديد مع رقم تحويل الرصيد. رقم تخصصوه للهجوم على عوض أحمد طه. هسع عليكم الله ما قاعدين تخجلوا. اعلامكم كلوا بهاجم في عوض أحمد طه. وتراوري ما معروف وين؟. انتوا ما عندكم شجاعة أدبية. ما بتقدروا تقولوا حاجة لي تراوري دا.
ميسي ..الليلة الله يستر على سلسلة حاج حسن الفقرية المرة الفاتت ...وقت لمى ميسي في المدافع الالماني وزعوا على (13) كوم. كل كوم مشى على بيت. كل كوم في حتة. بالله مدافع بايرن ميونيخ بقى زي الملوخية المدفقة. زي (الروب) المدفوق. مشى على كل الحتات. مشى على كل الاتجاهات. بعد هدف ميسي (المشرور) دا في بايرن ميونخ الالماني في نصف نهائي دوري أبطال أوربا ...لاقانا ليك عمك حاج حسن يشكي من السلسلة الفقرية. قلت ليه وأنت كمان مالك يا حاج حسن. الدخل سلسلتك الفقرية في مباراة برشلونة وبايرن ميونخ شنو؟. عمك حاج حسن قال لي ..عندي (كرت) بي ان سبورت. قلت ليه قول عندك كرت ..دي ما حاجة تخلي (سلسلتك الفقرية) يحصل عليها التكسر دا. عمك قال لي يا زول ميسي دا سرو باتع... ميسي دا واصل.. بعدين يا ود الناس سلسلة المدافع الالماني ما استحملت الكلام البعمل فيه ميسي دا – باقى ليك ح تستحمل سلسلتي دا. عشان كدا – الله يستر علينا الليلة. قلت ليه لو خايف شديد ..ما تحضر المباراة. قال لي أنا دافع مليون وميتين جنيه لكرت بي ان سبورت ..وما أحضر المباراة. يمين لو السلسلة جات قدامي هنا ..ما بفوت المباراة. على العموم ..نحن ما بنقدر نحرمكم من المباراة – لكن يا جماعة أي واحد يعمل حسابو على (السلسلة الفقرية) حقتو. أي واحد يعمل حسابو على (لغاليغو). كل واحد يحاسب على (لغاليغو). يقولوا ليكم الكلام ألف مرة. وبعدين بتنكروا. احضروا المباراة اليوم بين اليوفي والبارسا ..وارجعوا لي في تلات تسعات.