سودارس : الحالة واحدة

القوز يقرر السفر إلى دنقلا ومواصلة المشوار لاعب منتخب السودان يتخوّف من فشل منظومة ويتمسّك بالخيار الوحيد الدب.. حميدتي لعبة الوداعة والمكر ⛔ قبل أن تحضر الفيديو أريد منك تقرأ هذا الكلام وتفكر فيه إلي اين نسير منشآت المريخ..! كيف واجه القطاع المصرفي في السودان تحديات الحرب خلال 2025 صلوحة: إذا استشهد معاوية فإن السودان سينجب كل يوم ألف معاوية إبراهيم شقلاوي يكتب: وحدة السدود تعيد الدولة إلى سؤال التنمية المؤجَّل كامل إدريس في نيويورك ... عندما يتفوق الشكل ع المحتوى مباحث قسم الصناعات تنهي نشاط شبكة النصب والاحتيال عبر إستخدام تطبيق بنكك المزيف عقار: لا تفاوض ولا هدنة مع مغتصب والسلام العادل سيتحقق عبر رؤية شعب السودان وحكومته إجتماع بسفارة السودان بالمغرب لدعم المنتخب الوطني في بطولة الأمم الإفريقية بولس : توافق سعودي أمريكي للعمل علي إنهاء الحرب في السودان البرهان وأردوغان يجريان مباحثات مشتركة شاهد بالفيديو.. الفنانة ميادة قمر الدين تعبر عن إعجابها بعريس رقص في حفل أحيته على طريقة "العرضة": (العريس الفرفوش سمح.. العرضة سمحة وعواليق نخليها والرجفة نخليها) شاهد بالفيديو.. أسرة الطالب الذي رقص أمام معلمه تقدم إعتذار رسمي للشعب السوداني: (مراهق ولم نقصر في واجبنا تجاهه وما قام به ساتي غير مرضي) بالصورة.. مدير أعمال الفنانة إيمان الشريف يرد على أخبار خلافه مع المطربة وإنفصاله عنها وحدة السدود تعيد الدولة إلى سؤال التنمية المؤجَّل تراجع أسعار الذهب عقب موجة ارتفاع قياسية عثمان ميرغني يكتب: لماذا أثارت المبادرة السودانية الجدل؟ ياسر محجوب الحسين يكتب: الإعلام الأميركي وحماية الدعم السريع محرز يسجل أسرع هدف في كأس أفريقيا شاهد بالصور.. أسطورة ريال مدريد يتابع مباراة المنتخبين السوداني والجزائري.. تعرف على الأسباب!! وزير الداخلية التركي يكشف تفاصيل اختفاء طائرة رئيس أركان الجيش الليبي "سر صحي" في حبات التمر لا يظهر سريعا.. تعرف عليه والي الخرطوم: عودة المؤسسات الاتحادية خطوة مهمة تعكس تحسن الأوضاع الأمنية والخدمية بالعاصمة فيديو يثير الجدل في السودان إسحق أحمد فضل الله يكتب: كسلا 2 ولاية الجزيرة تبحث تمليك الجمعيات التعاونية الزراعية طلمبات ري تعمل بنظام الطاقة الشمسية شرطة ولاية نهر النيل تضبط كمية من المخدرات في عمليتين نوعيتين الكابلي ووردي.. نفس الزول!! حسين خوجلي يكتب: الكاميرا الجارحة احذر من الاستحمام بالماء البارد.. فقد يرفع ضغط الدم لديك فجأة استقالة مدير بنك شهير في السودان بعد أيام من تعيينه كيف تكيف مستهلكو القهوة بالعالم مع موجة الغلاء؟ 4 فواكه مجففة تقوي المناعة في الشتاء اكتشاف هجوم احتيالي يخترق حسابك على "واتسآب" دون أن تشعر رحيل الفنانة المصرية سمية الألفي عن 72 عاما قبور مرعبة وخطيرة! شاهد بالصورة.. "كنت بضاريهم من الناس خائفة عليهم من العين".. وزيرة القراية السودانية وحسناء الإعلام "تغريد الخواض" تفاجئ متابعيها ببناتها والجمهور: (أول مرة نعرف إنك كنتي متزوجة) حملة مشتركة ببحري الكبرى تسفر عن توقيف (216) أجنبي وتسليمهم لإدارة مراقبة الأجانب عزمي عبد الرازق يكتب: عودة لنظام (ACD).. محاولة اختراق السودان مستمرة! ضبط أخطر تجار الحشيش وبحوزته كمية كبيرة من البنقو البرهان يصل الرياض ترامب يعلن: الجيش الأمريكي سيبدأ بشن غارات على الأراضي الفنزويلية قوات الجمارك بكسلا تحبط تهريب (10) آلاف حبة كبتاجون مسيّرتان انتحاريتان للميليشيا في الخرطوم والقبض على المتّهمين إسحق أحمد فضل الله يكتب: (حديث نفس...) مياه الخرطوم تكشف تفاصيل بشأن محطة سوبا وتنويه للمواطنين الصحة الاتحادية تُشدد الرقابة بمطار بورتسودان لمواجهة خطر ماربورغ القادم من إثيوبيا مقترح برلماني بريطاني: توفير مسار آمن لدخول السودانيين إلى بريطانيا بسهولة الشتاء واكتئاب حواء الموسمي عثمان ميرغني يكتب: تصريحات ترامب المفاجئة .. "كرتي والكلاب".. ومأساة شعب! ما الحكم الشرعى فى زوجة قالت لزوجها: "من اليوم أنا حرام عليك"؟ حسين خوجلي: (إن أردت أن تنظر لرجل من أهل النار فأنظر لعبد الرحيم دقلو) حسين خوجلي يكتب: عبد الرجيم دقلو.. إن أردت أن تنظر لرجل من أهل النار!!

شكرا على الإبلاغ!

سيتم حجب هذه الصورة تلقائيا عندما يتم الإبلاغ عنها من طرف عدة أشخاص.

الحالة واحدة

قوون نشر في قوون يوم 11 - 04 - 2016

ما في فرحة بقت في (الانتصار) – للاسف الشديد الفرحة في الكورة السودانية بقت في (الهزائم)
البشوف الهلالاب بيسخروا من المريخ ..بفتكر الهلال دا طلع من البطولة الافريقية دعما للقضية الفلسطينية
الموسم الماضي في نفس الوقت ...الاتحاد اوقف بث مباريات الدوري الممتاز تلفزيونيا..وفي نفس الوقت رجع البث
بنقيف في (العداد) ..نشوف الكهربة باقى فيها كم؟...دي بقى تصرف طبيعي – تلقائي كدا – الواحد بيعملو من غير ما يشعر
* هل (الفرحة) الرياضية في السودان خلصت في ان يخرج الهلال من البطولة الافريقية فيسعد المريخاب لذلك ويسخروا من الهلال ويدوروا في مواقع التواصل الاجتماعي سخرية من الهلال؟.
* البشوف فرحة المريخاب وسخريتهم من الهلال عند الخسارة يقول (ميسي) بيلعب في الرد كسل.
* ويخرج المريخ فيرد الهلالاب (فرحة) المريخاب اليهم ..ينسوا حالهم ووضعهم ويقوموا يسخروا من المريخ ويضحكوا فيه.
* البشوف الهلالاب بيسخروا من المريخ ..بفتكر الهلال دا طلع من البطولة الافريقية دعما للقضية الفلسطينية.
* البقول ان الكورة السودانية لم تعد تفرح احد – هو غلطان ..عشان ناس المريخ بفرحوا فرحة مبالغ فيها عندما يتهزم الهلال.
* الفرحة بتكتلهم.
* ويفعل ناس الهلال نفس الشيء عندما يتهزم المريخ.
* يفرحوا لمن يقسموا ضحكتهم في الشوارع.
* ما في فرحة بقت في (الانتصار) – للاسف الشديد الفرحة بقت في (الهزائم).
* ديل بيشمتوا في ديل.
* وديل بيشمتوا في ديل.
* نفس الشيء.
* يحدث ذلك طبعا حتى على نطاق الاعلام ومن خلل كتاباتنا والصحف الرياضية.
* نحن جوة العملية ..اصلو ما بعيدين منها – ولا بننكرها.
* ولا داسنها.
* يمكن قلة الانتصارات والبطولات هي التى جعلت الفرحة حاضرة في هزيمة الفريق المنافس.
* يطلعوا المريخاب من البطولة ..يقوموا يقولوا ما مشكلة ...نحن نلبد كدا الى ان يطلع الهلال.
* يطلع الهلال يقعدوا يفرحوا لخروج الهلال.
* فرحتهم.
* يومهم.
* الرياضة بقت كدا في السودان – اتبدلت المفاهيم واتعمقت الازمات – عشان كدا الانتصارات بقت قليلة.
* حتى عندما ينتصر الهلال ويتقدم في البطولة – يبقى ترقب المريخاب له لكي يخرج وتكون فرحتهم اكبر.
* وما يحدث في المريخ – يحدث ايضا في الهلال ..نفس الشيء ..يطلع الهلال ..الهلالاب يقولوا (ألبدوا) ليهم في زقاق ضيق ..ناس المريخ ديل بكرة وقعتهم سودا.
* يتهزموا المريخاب ..ناس الهلال يشموا (الهوا) شوية...ويشمتوا في الخروج والهزيمة.
* سرعان ما ننسى هزيمتنا ونقبل على هزيمة الفريق التاني.
* وكأنو ما في حاجة حصلت.
* نحن جزء اصيل في هذه العملية – لا ننكر ذلك ..لكن ذلك يحدث عشان ما في انتصارات.
* ما في بطولات.
* عاوزين نفرح فرحة حقيقية بي انتصاراتنا – بي بطولاتنا ..بدل ما نفرح بي هزائم الآخرين.
* ناس المريخ كان ممكن نقيف معاهم...ونشيل معاهم الشيلة ..لكن عندما خرج الهلال نسوا فريقهم (التعبان) وقبلوا على الهلال.
* سخرية وضحك.
* ما خلوا لينا شيء.
* كان بعد ذلك من الطبيعي ان ننتظر تعثرهم – عشان نأخذ حقنا.
* نحن ما بنسكت.
* ولا بنقبل في الهلال.
* الناس ديل في نيل شندي ما ريحونا – وهم عندهم مباراة مع (وفاق سطيف).
* الفصاحة البلا عدل دي اصلو ما بعرفها.
* ناس ما عندهم قروش.
* قروش التذاكر بلقطوها بالقروبات ..وبيسخروا من الهلال.
* على العموم الحال من بعضو.
* نحن كدا.
* تركيبتنا واحدة.
* وفرحتنا ذاتها ..بقت واحدة.
* بنتشابه في اي حاجة.
* حتى في (الجلابية الواحدة) ..وصداع الساعة اربعة عصرا.
* والدمعة القريبة.
* الزول دا دمعتو قريبة – كلهم كدا ، ما تشوفوا الفصاحة دي.
* والزول القرر يسافر ويطلع من البلد.
* يمرق من السودان.
* حاجاتنا كدا.
* في اي حلة ..وبيت.
* في اي شارع ..ودكان.
* تشيل ليك (طحنية) الساعة اتنين ..عشان تحشيها في (رغيفة).
* مرات بتشيل معاها بارد.
* ومرات على نفسك بتتداغل وتاكلها بدون (حاجة باردة).
* حاجاتنا كدا.
* من يوم سبعة الماهية بتكمل ..وتبدأ تستعمل في الطرق البديلة.
* بنقيف في (العداد) ..نشوف الكهربة باقى فيها كم؟...دي بقى تصرف طبيعي – تلقائي كدا – الواحد بيعملو من غير ما يشعر.
* ونمشي على (التلاجة) عشان نشرب لينا موية باردة.
* نحن بنعيد في نفس الشريط.
* بنكرر في نفس الشيء.
* يوم امس زي يوم الليلة.
* ويوم بكرة ح يكون زي اليوم دا.
* ما في جديد.
* تفتح التلاجة.
* تقفلها.
* بكون فيها (اسوداية) واحدة كدا.
* ما عارف العبقرية وين في حبة الاسود دي؟.
* الغريبة تلاجة اي سوداني بكون فيها حبة اسود واحدة.
* وشافع..لسانو زي الموبايل الصيني ...اصلو ما بسكت.
* يتعلق في رقبتك...ويشيل موبايلك.
* يفتح الاستديو.
* والرسائل.
* والواتساب.
* ويقول ليك دي (صورة) منو؟.
* شفع الزمن دا صعبين شديد ..يحضروا في المسلسلات التركية والافلام الهندية ويطبقوها فيك.
* شفع آخر زمن ..ديل (المتاهة) بتاعة وفاء الكيلاني بقوا يقعدوا يحضروها.
* يشاركونا في اي شيء.
* حاجاتنا كدا متكررة ..لو رجعتوا للامس ..ح تلقوا نفسكم انتوا بتكرروا في نفس الحكاية.
* ساكت شايلين وجه القباحة.
* السنة دي زي السنة الفاتت.
* يعني شنو؟.
* المريخ بطلع اول ..الهلال بيجي يطلع تاني يوم.
* الاختلاف الوحيد حصل السنة دي ..الهلال طلع قبل المريخ ..عشان كدا ناس المريخ فصاحتهم زادت.
* افتكروا الموضوع فيه (عبقرية).
* فاكرنها فلاحة.
* وما عارفين وقعتهم سودا.
* يا جماعة الله نحن بنعيد ليكم في نفس السيناريوهات.
* نفس الكلام.
* والمشاكل.
* يشيلوا المدرب – يقولوا دا اسوأ مدرب.
* يجيبوا ليهم مدرب جديد ..يطلعوه افضل مدرب.
* الغريبة الناس بتصدق الكلام دا.
* يجيبوا ليهم محترف يطلعوه في رأسنا.
* شهر والتاني – يطلعوا ليك المحترف دا اي كلام.
* الحاجات البتحصل الآن – حصلت الموسم الماضي ..انتوا ساكت ما قاعدين تتذكروا.
* انتوا بتنسوا سريع.
* ناس المريخ يجيبوا ليهم (نجيلة) جديدة ..يعملوا لينا الموضوع (بطولة).
* ندوات ثقافية.
* ويوم مفتوح.
* ومهرجان شعبي.
* كل الحاجات دي عشان النجيلة الجديدة.
* ناس الهلال يجيبوا ليهم (كشافات) حديثة ..يمسكوا الجو.
* الكشافات اتحركت.
* الكشافات وصلت بورتسودان.
* الكشافات اتحركت من الميناء.
* وصلت سوبا.
* دخلت الجوهرة الزرقاء.
* ركبوها.
* نزلوها.
* في مشكلة في (الصواميل).
* عليكم الله في كشافات حديثة مشكلتها بتكون في (الصواميل).
* ونحن نشيل ونصدق.
* ونكتب.
* ونفرح مع الناس.
* والموضوع ما بيستاهل.
* نفس موضوع التلاجة.
* التلاجة البتمشي تفتحها تلقى في اسوداية واحدة كدا.
* مرات تكوس الكوز.
* ما تلقاه.
* تشرب بالجركانة.
* عادي الحاجات دي قاعد تحصل – ما تنكروها ساكت.
* حتى حكاية الاتحاد يوقف (بث) مباريات الدوري الممتاز في هذا التوقيت بيبقى امر مكرر.
* الموسم الماضي في نفس الوقت ...الاتحاد اوقف بث مباريات الدوري الممتاز تلفزيونيا.
* يعني ما في حاجة جديدة.
* حتى موضوع الدولة تسدد قسط للاتحاد العام والتلفزيون ينقل مباريات الدوري الممتاز بيبقى امر معيود.
* الفيلم دا نحن شفناه.
* الفيلم دا (مكرر).
* اقول ليكم حاجة غريبة شوية.
* هدف وفاق اسطيف الاول دا ذاتو مكرر.
* يجيبوه في المنتخب.
* يجيبوه في الهلال.
* في المريخ.
* نفس الشيء.
* ولا قاعدين نتعلم.
* ولا قاعدين نقيف في الحاجات دي.
* بتفوت فينا عديل كدا.
* ونحن بنتشاكل ..ونتخاصم ..ونضحك في بعض.
* ديل يطلعوا يشمتوا فيهم ديل.
* يقوموا ديل ينتظروا ديل يطلعوا عشان شنو؟.
* عشان يشمتوا فيهم زي ما شمتوا فيهم اول.
* معقولة – حاجاتنا ح تظل كدا.
* ح نستمر بالصورة دي.
* الجلابية الواحدة.
* وحبة الاسود الفي التلاجة.
* وطحنية الساعة اتنين.
* والمروحة البقت تجيب لينا هوا سخن.
* المروحة دي مالها؟.
* ليها زمن ما عاجباني.
* نحن كدا – ما في جديد.
* تضرب ليك لي زول – ما يرد عليك.
* وقت يرجع ليك تاني يوم يقول ليك والله تلفوني كان في الشاحن.
* حتى (الاعتذار) – نفس الاعتذار.
* الولد مشى المدرسة.
* الولد جاء من المدرسة.
* النتيجة السنة دي كعبة.
* البصل طار السماء.
* الغاز قطع.
* والموية حارة.
* واكرم الهادي سليم ..يختفى 3 سنوات..فجأة كدا يظهر مع المنتخب.
* اكرم يتألق ..واحد من الناس يقول ليك والله الزول دا شطبوه ساكت.
* يا اخي ناس الهلال ديل انا بدخل ليهم مبارياتهم لي خمس سنوات.
* اي مباراة بتنتهي 1 / صفر للهلال.
* وبجيبوا (بشه) كمان.
* الحاجات كدا.
* الصالون الفاتح.
* والشارع البقى ضيق.
* المحلية كل يوم تشيل منو (متر).
* والمدرسة القلبوها (طرمبة).
* والجامعة البقت (فرن).
* والصيدلية الفتحوها جديدة.
* والبنت العاوزة تقرأ.
* حاجات ثابتة – ومكررة.
* ما في اي عبقرية.
* حتى الماسورة القدامي دي ..قدر ما افتحها بلقاها قاطعة.
* وريحة البن.
* واغاني واغاني.
* وفيصل احمد سعد.
* في اي سنة بنسمع الكلام دا قبل رمضان.
* الجديد شنو؟.
* ولا حاجة.
* الواحد قالوا ليك لمن يكون عاوز ليه حاجة جديدة ..قالوا ليك بدخل البيت ويقول للمرا ..اسمع الليلة (العدس) اعمليه شوربة خفيفة ..ما تجيبيه لينا (تخين) زي كل يوم.
* معقولة بس.
* ....
* ملحوظة : والله نحن فترنا من الاسطوانات دي.
* هوامش
*
* الهلال طلع.
* المريخ اتعادل ايجابيا في ملعبه.
* الاهلي شندي اتعادل سلبيا في شندي.
* وقت الهلال يكون ما كويس ..الحاجات كلها بتتلخبط.
* خلاص الصورة وضحت.
* من الهلال طلع – نحن عرفناها.
* هسع الهلال لو مشى لي قدام ..الاندية دي كلها كان اتشجعت ومشت لي قدام.
* ساكت بتسخروا يا مريخاب من خروج الهلال.
* ما عارفين الراجيكم.
* المنتخب.
* الهلال.
* المريخ.
* الاهلي شندي.
* الحال من بعضو.
* لجنة تسيير ..جمال الوالي...كلو واحد.
* المريخ هو المريخ.
* نفس الشيء.
* ونفس الاوضاع.
* والساقية لسه مدورة.
* الليلة الهلال عندو مباراة – الله يستر على الهلال.
* شجعوه ..وادعموه.
* وخلوا الحاجات التانية.
* بقينا نخاف على الهلال في استادنا.
* ومن منو؟.
* من نيل شندي ..وهلال الفاشر.
* ..............
* عاجل : الكورة السودانية بالطريقة دي احسن تحولوها سيخ واسمنت ساكت...ولا في داعي ليها.

انقر هنا لقراءة الخبر من مصدره.