يحاول الاخ الاستاذ مزمل ابوالقاسم ...ان يقارن بين (سفر) مهند الطاهر الي السعودية وبين (هروب) عصام الحضري وعودته (فجرا) الي القاهرة. اعجب في البدء كيف قارن مزمل ابوالقاسم بين سفر مهند وهروب الحضري اذ لا توجد اي علاقة بين سفر الاول وهروب الثاني. المقارنة هنا مثل المقارنة بين رائعة الهادي آدم التي تغنت بها كوكب الشرق (أغدا القاك) وبين (بلاغ فقدان) ينشر في ركن صغير اسفل صفحة داخلية لصحيفة اسبوعية. ويمكن ان نفند كل ادعاءات مزمل في هذا الشأن من غير حتى ان نتعرض الي (الايميل الممسوح) الذي كتب فيه مزمل لمدة 3 اشهر وعاد بعد سنة ليكتب عن (الايقاف مدى الحياة). ايقاف مدى الحياة ليه ؟...الكورة دي اخترعها جمال الوالي ونحن ما عارفين؟. لو ابوجريشة رئيس الاتحاد الدولي لكرة القدم ..سادومبا دا ما بقيف (مدى الحياة). مدى الحياة ليه ؟...عمل ليهو انقلاب عسكري. وإلا فجر البنتاجون. نرجع الي سفر مهند الطاهر الذي كان الي وقت قريب يسبق مزمل اسمه بكلمة (ولدنا). طبعا بنفس الفهم.. اذا اردنا ان نلحق صفة (تقريب) للحضري سوف نقول (عمنا) الحضري. او (جدنا) الحضري اذا كنا اكثر انصافا. اذا سلمنا ان مهند الطاهر وقع في (خطأ) شنيع بسفره هذا ..واذا اعتبرنا ان الهلال كان يجب ان يعاقب مهند الطاهر وان يكتب وقتها اعلام الهلال عن هذا السفر بنفس الغلظة التي يكتب بها الان عن هروب الحضري. اذا افترضنا هذا من باب المجاز ...هل يعفي ذلك المريخ من (الذنب)؟. ما يقوله مزمل يؤكد ان القياس عندهم في المريخ ...هو (الهلال)...وان الهلال اذا وقع في اخطاء ..حلالا من بعد ان يقع فيها المريخ. ما في اية مشكلة. وهذا تصغير للمريخ ..واثبات ان المريخ (ظلا) للهلال حتى في الاخطاء. ولعلكم قد لاحظتم ذلك ...اي حاجة بتحصل في المريخ ..بقولوا ليك دي حصلت قبل كدا في الهلال. اذا طار المريخ من بطولة الاندية الافريقية من دور ال(32) ..ممكن المريخاب يحللوا ذلك بقولهم ان الهلال طار من هذا الدور سنة 1977م. واذا احرز المريخ المركز الثالث في بطولة سيكافا التي يشارك فيها فرق من الصومال وبورندي واثيوبيا ..في ظل مشاركة المريخ في تلك البطولة ب (7) لاعبين اجانب و150 الف دولار لا اعرف حتى هذه اللحظة سلمت للجنة المنظمة لسيكافا تحت اي (بند). ممكن بكل بساطة يبرر المريخاب (برونزوية) سيكافا بان الهلال سبق له ان خرج بهذا المركز. رغم ان الهلال الان يعف عن هذه البطولة ...ولا يطيق حتى سيرتها. وكيف نطيق الحديث عن سيكافا والتصنيفات الدولية تضع الهلال كافضل فريق افريقي وافضل فريق عربي. المريخ ذهب الي شندي ...ولعب امام الاهلي شندي وهو في باله ان الاهلي هزم الهلال. وهذا يعفيهم من اي عتاب. هكذا تقاس الامور في المريخ. عليه فاننا اذا سلمنا ان مهند اخطأ في سفره هذا ...(بقول فرضا)..فان ذلك لا يعطي المبرر للحضري ان يهرب ولا يعفي مجلس ادارة نادي المريخ من ان يعاقب الحضري. اما قول مزمل ابوالقاسم ان اعلام الهلال لم يكتب عن هذه الواقعة فهو قول مضحك ..لأننا عندما فعل مهند الطاهر ذلك ..لم نمنع احد من كتاب المريخ ان يكتب عن هذه الواقعة او يهاجم مجلس الهلال. لم يمنعكم احد ...واحسب انكم كتبتكم عن ذلك لكن (الزبد يذهب جفاء). ويبقى ما ينفع الناس. لقد كتب مزمل ابوالقاسم 3 شهور كاملة عن (الايميل الممسوح) ولم يطلب منه احد في الهلال ان يكتب سطر واحد عن بصمة علاءالدين يوسف. او بصمة قلق ..او العجب او مصطفي توفيق. ويكتب مزمل ابوالقاسم عن (الايقاف مدى الحياة) الان ...ولا احد يطلب منه ان يعلق مجرد تعليق عن اتهامات الصحافة الجزائرية للمريخ عندما ذهب المريخ للتباري مع شبيبة القبائل الجزائري. او الحوافز الذي قدمها جمال الوالي لفريق حي العرب للانتصار على الهلال. لكم اقلامكم ..ولكم صحفكم ...اكتبوا عن اي شيء ترونه (غلط) في الهلال ..وقد كنتم تفعلون ذلك في صحف الهلال نفسها ..لم يعترض احد ...ولم يطلب منكم شخصا واحدا ان تكتبوا لنا مثلا عن (بري قيت). او التقرير الطبي الذي خرج بعد رحيل لاعب المريخ السابق ايدهور. او ال (150) الف دولار التي قدمتوها للجنة المنظمة لسيكافا مقابل (البرونزية). او التهديدات التي اسكت بها عماد الناس مجلس المريخ واعلامه عندما هدد بالتحدث عن اشياء قذرة تحدث في المريخ. او ..او.....او ...(الي ما لا نهاية). لذلك فان التعليل بتجاوز اعلام الهلال الكتابة عن سفر مهند الطاهر امر يبقى غريبا ..ومضحكا في نفس الوقت. ندخل الي نقطة ثانية او نقاط اخرى ونحن نناقش وجهة نظر مزمل ابوالقاسم بكل هدوء. عاب مزمل ابوالقاسم على مهند الطاهر سفره ...رغم ان سفر مهند كان في فترة الاعداد. اكرر فترة الاعداد ...ولم يكن مثل هروب الحضري الذي كان قبل 48 ساعة من مباراة دورية يلعبها المريخ في الدوري الممتاز امام هلال الساحل. اذن تلك نقطة اخرى ...توضح الفرق بين سفر مهند وهروب الحضري. وخليكم معاي ...ما سوف يأتي يبين التناقض الكامل بين امرين اراد مزمل ان يشابه بينهما. سافر مهند الطاهر في فترة الاعداد ..بل كان سفره في فترة الراحة ...وهو لم يمنع من السفر ولم يصادر (جوازه) ..ولم يكن مهند الطاهر محروس من قبل لجنة الكورة او المكتب التنفيذي. مهند الطاهر سافر دون ان يجلس مع رئيس النادي ليبلغه ويحذره من اي تصرف يبدر منه يأتى دون موافقة المجلس. اما عصام الحضري فالكل يعلم ان رئيس نادي المريخ السيد جمال الوالي اجتمع به الليلة التي تسبق فجر هروبه بالنادي الالماني. والكل يعلم ان جمال الوالي حذره من السفر ..وحذره من عواقب تصرفاته. لكن الحضري لا اشتغل بالوالي ولا خاف من عواقب تصرفاته. سافر ورجع ...وكأن ذلك الشخص الذي حذره من السفر هو تامر حسني او محمد حماقي. الحضري ما اشتغل بي زول. مهند لم يفعل ذلك. نأتي لامر اخر ...هل تعلموا ما هو (الجرم) الذي يكتب عنه مزمل ابوالقاسم ويعتمد مهند الطاهر مرتكبه؟. الجرم الذي يقارنه مزمل بما فعله عصام الحضري هو ان مهند الطاهر كان في السعودية يودي (العمرة). هل يمكن ان يحاسب الهلال لاعب يعتمر في الارضي المقدسة؟. هل يمكن ان ينتقد اعلام الهلال لاعبا يودي (العمرة).؟ كورة شنو البتخلينا نحاسب لينا زول يعتمر. ملعون ابو الكورة. الاهم من ذلك ...ان مهند الطاهر كان برفقة والدته التي كانت تعتمر ايضا. هل بر الوالدين اصبح (ذنبا) في المريخ؟. مالكم كيف تحكمون؟. يا جماعة خلوها حلوة شوية. خلوها تتبلع. خليكم في (الايميل الممسوح). او في (الايقاف مدى الحياة). ايقاف مدى الحياة ليه؟. قبضوه بهرب شحنة حشاش لخط ستة!!. شايل (بنقو) في السنتر. يا جماعة قولوا ليكم حاجة تصدق. حاجة تتبلع. عاوزننا نحاسب مهند الطاهر ...وهو اللاعب الذي رفض (بيوت) المريخ كلها ..عرضوا له (حلة) كاملة ..لكن مهند فضل ان يبني بيته (قشة ...قشة) ..لأنه يعشق الهلال. ان سجل مهند الطاهر مع الهلال سجل حافل بالعطاء والوفاء لا يفسده الظن ولا كل حملات (ولدنا). مهند الطاهر شارك مع الهلال ولعب مباراة وجدته رحلت قبيل سويعات من المباراة التي يشارك فيها ..ويخرج منها مستبدلا ليلحق بركب العزاء. مهند الطاهر الذي فتحوا له الغرفة ..وقالوا له اخرج ..لو عاوز المريخ امشي. مشي ورجع اكثر تمسكا بالهلال. مهند الطاهر بهذا الوفاء ...وهذا العطاء والجنسية السودانية ب (الميلاد) عاوزننا نعاقبه عشان مشى (العمرة). ان شر البلية ما يضحك. هرب الحضري (فجرا) وتسبب في حل المكتب التنفيذي واعفاء صديق علي صالح مع (التجريد من المريخية) ...واعفاء مصطفي توفيق (مع البصمة)...ومجاهد احمد محمد ..الذي كان كلما وقف ..قال له حسام البدري (اقعد). مهند الطاهر في كل الظروف.. كل الاحوال لم يصدر منه تصريح ولم يقول شيئا في الصحف ...غير عصام الحضري الذي كان يشارك مع المريخ في سيكافا. وكانت تصريحاته تنشر هنا في صحف المريخ. لا مريخ بعد اليوم. يا ود الناس نحن في ميدان (التحرير). مباراة سيمبا اخر مباراة لي مع المريخ. خلاص يا ابوعرام. لاعبو المريخ ما عندهم (طموح). نسيت (البوفيه المفتوح). رئيس نادي المريخ جمال الوالي ما كان بحلم حتى انو يسلّم عليّ. ليه ..انت ابو الهول. اقعد في بيتنا ...ما ألعب في المريخ. هذه الكلام لم يكن يقوله مهند الطاهر. الكلام دا كان بقولوا عصام الحضري ...الحارس (المسن). وبعد دا كلو. نحن مهند الطاهر ما دفعنا ليهو (غرامة)...وقام هرب. مهند الطاهر ما جبنا ليهو (تورتة). وقام هرب. وما عملنا ليهو (بوفيه مفتوح). وقام هرب. نقطة اخرى في موضوع مهند الطاهر هذا ..نقطة وحدها يمكن ان تنسف ادعاء اعلام المريخ. مهند الطاهر عندما سافر السعودية للعمرة ...كان في عهدة المنتخب الوطني ...الهلال لم يكن مسؤولا عنه ...كما ان مهند لم يكن ملزما بالانضمام لمعسكر الهلال ...لأنه استدعى من جانب المنتخب وقد حاول المنتخب الوطني الحاقه لمباراة كينيا ولكن الحجوزات لم تتوفر لهم ..فكان من مهند الطاهر بعد اذن ادرة المنتخب ان يلحق بمعسكر الهلال في القاهرة. أبعد هذا ..هل توجد مقارنة واحدة بين ما فعله مهند الطاهر وهذا الذي فعله عصام الحضري؟. اما مقارنة ذنب الحضري بذنب ديمبا فهي لا تختلف كثيرا عن المقارنة بين سفر مهند وهروبه. موضوع ديمبا وصل الاتحاد وحل بواسطته ...ولم يكن الهلال يحتاج الي ديمبا ليشركه غصبا عنا ...كما فعل المريخ مع الحضري. ما في اي مقارنة. إلا لو في واحد طلع فجأة كدا ...وقال ركبت لي (طيارة) زي كارو ود السيد. يا ربي الزول دا قاصد ان الطيارة (كركعوبة) زي الكارو وإلا قاصد ان كارو ود السيد سريع زي (الطيارة). احتمال. الزمن دا ما في حاجة عجيبة. ممكن تلقي ليك زول بقلع في (ضرسو) عند طبيب عيون. بالمناسبة دي يا مزمل ...انت موضوع (الايقاف مدى الحياة) وصل وين؟. ما قفلتوا (الاسبوع). التحقيقات لسه ما بدأت. الحاصل شنو؟. هو سادومبا دا كاتل ليهو (مدافع). قالوا ليك دفاع انيمبا كلو بشكي من (الضهر). الضهر والحصوة. كلهم بقوا يهضربوا في الليل. المساكين ..قالوا عاوزين يمشوا لمجلس الامن. عشان شنو؟. عشان يوقف ليهم (سادومبا) مدى الحياة ...اصلوا البعمل فيهو سادومبا دا ...ما عمل انساني. دا اجرام. مباراة الهلال وانيمبا ..قاعد بحضر في المباراة في التلفزيون..جاتني (كدارة) طايرة. قلت دي جات من وين؟. قالوا لي دي حقت الباك الشمال لانيمبا. شوية كدا جاني (شُراب) طاير. عرفتو ليك من (الطين) طوالي ...دا شراب الليبرو. انت يا مزمل ...قلت سادومبا دا ح يقيف مدى الحياة ...وإلا ح يقيف مباراة واحدة. عشان لو قلت سادومبا ح يقيف مباراة واحدة...بكون كلامك صاح. اول مرة كلامك يطلع صاح. الليلة سادومبا (موقوف). مدى الحياة إلا شوية. تكون قاصد انو بقيف مباراة واحدة ...مباراة اليوم امام الموردة ..لكن انتوا عشان مريخاب ..بتزيدوا الحاجة. بتقنبلوها. تكون جاتكم مباراة واحدة...عملتوها (مدى الحياة). انتوا اي حاجة بتزيدوها. كأس مانديلا ..عملتوا بطولات جوية ...والكأسات المحمولة جوا. ونجاد ...عملتوا محترف اوروبي من الوزن العجيب!!. وابالو المدافع التوغولي قلت قفل تري هنري. تقنبلوا ساكت. غايتو انا لو ما عارفكم كويس. كنت قلت المريخ دا شارك السنة الماضية مع برشلونة في بطولة كأس العالم للاندية. بالمناسبة. فيصل العجب دا ..زي الشفتو قبال كدا. شفتوا في حتة. يتخيّل لي اني شفتو (مرة واحدة) شال كأس الممتاز. ملحوظة : العجب ذاتو بكون نسى الموضوع دا. هوامش الليلة انا فرحان عشان سادومبا دا موقف جزء من (مدى الحياة). موقوف مباراة. عاوزين نشوف اتوقووون. يا ميشو ..سيب الكلام الكتير ...بقيت زي استاذ اللغة العربية. السنة كلها تتكلم. لعب لينا اتوقووون دا من بداية المباراة ...ما تقعد تنظر لينا. لياقتك كلها مكملها في الكلام. اهلي شندي كورتو بقت (مسالمة). الشغل دا ما بنفع معانا يا شباب. بعدين صلاح ادريس ذاتو ما فاضي ليكم. صلاح ادريس دا راعي الاهلي شندي ...وإلا راعي الهجوم على الامين البرير. يا صلاح فريقك دا بي هجومك على البرير بنزل من الممتاز. انسى الهلال شوية. ما تبقي لينا زي امولادي. خلوا البرير يشتغل وبعدين حاسبوه. كل ما اشوف عصام الحضري ..بتذكر جمال الوالي. الوالي موقفو بقي بايخ. هذه مواقف للذكرى. للمثال ولا الحصر. الهلال شطب الريح مصطفي كاريكا الساعة تلاتة ...عشان الساعة اتنين قال ما بلعب. والهلال شطب ياسر رحمة ..عشان مشي قعد في بيتو. والهلال شطب بسطاوي عشان قعد مع ناس المريخ. وطمبل وكلتشي صرفنا نظر عنهما ..عشان بتكلموا بعد الساعة حداشر مع ناس المريخ. انتوا الحاجات دي ما بتعرفوها. ولا بتقدروا تعملوها. ولا تحلموا بيها ..عشان هي اشياء لا تشترى. في واحد ضرب للحضري من مصر ..وقال ليهو شوف لي شغل في المريخ. ان شاءالله كابتن الفريق. والله ناس المريخ ديل الواحد لو دخل فيهو قطر (ومات) يقوم بعد شوية ويقول ليك سنة 1954 في هلالابي دخل فيه قطر. عاجل: يا مزمل ارجع للايميل الاتمسح افضل ليك من حكاية (مدى الحياة) دي.
