ولدنا نزار يعمل طبيباً بيطرياً ويسكن منطقة شمبات ببحري إلتقيتة بالأمس وهو يضع ضمادة طبية على يده فسألته عمَّ به لعلمي بأنه رغم بنيته المتماسكة وجسده الرياضي إلا أنه زول متسامح وما بتاع (شبك). وحكى لي القصة: ركبت العربية من البيت الضهر ماشي لي مشوار وأنا طالع من الحلة ماشي على ظلط المعونة وعلى بُعد حوالي 300 متر شايف ليك (مرا) تشيل وترفع في أيديها وتولول، لقيت (مرا) قدامي قبل ما أوصل ليها سألتها قالت لي (المرا دي في إتنين راكبين موتر) خطفوا هسه الشنطة بتاعتا ودخلوا على الحلة. (يقول د. نزار مواصلا) : طوالي لفيت رجعت في إتجاه الحلة بعد ما كنت ماشي على الظلط، وفتحت للعربية فتح صاح وأنا بفكر (الحرامية) ديل ح يمشوا وين؟ طوالي إتذكرت إنو فسحة فاضية وسط المزارع فمشيت بشارع فرعي ووصلت قبلهم، وأول ما دخلوا الفسحة مشيت بالعربية عليهم وقعدت أزنق عليهم وأنا خاتيهم يميني لحدت ما وصلنا ترعة دقيت فرامل وقفت وهم الموتر بتاعهم طار فوق ووقع وهم وقعوا في الترعة، واحد فيهم عاوز يطلع من الترعة جريتو لي فوق ولمن وقف (أديتو بونية وااااحدة) وقع، ولما لقيتو فاتح عيونو عرفتو خشه في غيبوبة عاوز ليهو تاني نص ساعة عشان يفيق منها قلت أجري وراء التاني، المهم التاني طلع جراي شديد وما حصلتو، جيت راجع لي زولنا فكيت الحزام بتاعو بتاع قماش وكتفت ليهو أيدينو وقعدتو في الواطة وإتصلتا على 999 جوني جارين جري وحكيت ليهم الحاصل وقبضو الزول، ولقوهو شايل ليهو سكينة طويلة خاتيها في البنطلون من وراء ! ناس الشرطة رفعوا الموتر و(الحرامي) والشنطة المخطوفة في العربية ومشينا القسم أخدوا أقوالي وبياناتي والشنطة لقينا فيها مبلغ 12 مليون (بالقديم) مربوطة ربطة بنك وكمان شوية كم مية تاني ومعاهم موبايل . رجعتا المكان الكانت واقفة فيهو (المرا) تولول، وقعدت أدق في البيوت وأسأل لحدت ما وصفوا لي بيتها، بشرتها بانو شنطتا إتلقت بي قروشا وموبايلا، حكت لي إنو القروش دي هي عبارة عن المصروفات الجامعية لإحدى بناتها التي تدرس بإحدى الجامعات وقد كانت في طريقها للجامعة لتوريدها ! بعد أن أكمل دكتور نزار الحكاية سألته: والشريط ده لافيهو ليه في أيدك؟ أوع الزول دا يكون عوقك ! لا الشريط ده من أثر البونية الأديتا ليهو ! وهنا عرفت لماذا أغمي على ذلك (الحرامي) ! هذه القصة التي حدثت فصولها قبل أيام أضحت تحدث بصورة شبه يومية، كل حرامية إتنين راكبين موتر ويخطفوا شيء يخطفوا شنط ستات وشيء موبايلات وشيء سلاسل دهب ومضابط الشرطة تمتلئ بالبلاغات التي تقيد غالبا ضد مجهول نسبة لتعذر القبض على هؤلاء اللصوص . العبدلله يعتقد بأن إنتشار مثل عصابات (الخطف) هذه وتلك العصابات التي تعتدي على المواطنين بالسواطير في عز النهار هو ضعف العقوبة إذ يكتفي القاضي بعقوبة السجن لأشهر قليلة مع الغرامة التي لا تصل في بعض الأحيان إلى 300 جنيه على الرغم من أن ما تقوم به هذه العصابات يندرج تحت (حد الحرابة) و(السرقة الحدية) وفق ما تقوله الشريعة الإسلامية. نحن نعلم يا سادتي بأنه لا يمكن لأي شرطة في العالم أن تتواجد في كل شارع وكل (زقاق) لذا فالعقاب الرادع هو العامل الوحيد الوحيد الذي يمكنه الحد من هذه الظاهرة التي تقلق المواطنين وتروعهم . عليه نناشد مولانا أخونا الدكتور عوض النور الحسن وزير العدل تفعيل مواد القانون المستمدة من (الشرع) في مواجهة مثل هذه العصابات فلا يمكن أن تكون عقوبة من يقوم بهذه الأعمال المروعة التي تهدد ممتلكات وأرواح وأمن وطمأنينة المواطنين شهر سجن وكم سوط كده أو غرامة ؟؟ وبالمرة كمان يا مولانا شوف لينا معاك (الواوات) التحت دي !!!! كسرة: أوعا (الحرامية) الختفوا الشنطة ديل يقوموا يتحللوا هههههههه توجد (واو) جديدة (لنج) كسرة ثابتة (قديمة): – أخبار ملف خط هيثرو العند النائب العام شنو (وووووووووووو)+(وووووووووووو)+ (وووووووووووو)+(وووو)+(و+و+و)+و كسرة ثابتة (جديدة): أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)+(ووووووووو) +(وووو)+(و+و+و)+و.
