محمد عبد الماجد …و…. لو طبقنا لو نظريتكم دي معسكرنا ما ح يكون فيه غير فداسي وبويا
…و الحمدلله – نحن الحركات دي ما عندنا. الحركات دي عند المريخاب براهم – نحن بتوع نظام. النظام عندنا اولا واخيرا. بلاتر – بخلي شغلو وبرسل لينا (جواب). دي في فرنسا ما بتحصل. بلاتر دا ما عندو اعياد ميلاد. رأس سنة في سويسرا ما في. الكاف ..بردوا على مجلس الهلال في استفساره على اللعب في مرحلة التمهيدي. جوابات ساكات الايامات دي. نستلم جواب – ونرسل جواب. انتوا تعالوا هنا ..الايامات دي موضة (الجوابات) الاجتاحات ناس الهلال دي شنو؟ – الهلال بقى زي (البوستة) يستقبل في الجوابات ويرسل فيها. ناس عماد الطيب ديل ما يقوموا ينسوا الشغلة مع (الجوابات) الكتيرة دي ويفكوا الكورة ويمسكوا في (الجوابات). ذكرتونا ايام الثانوي – كنا شغالين (جوابات) زي قشارات الفول. الزمن داك لا في موبايل …ولا بنعرف التلفونات. الزول البتقدرو شديد كدا بترسل ليه (جواب). يا عماد الطيب بيني وبينك (الجوابات) دي ما بتجيب ليها بطولة. شفتوا ليكم فريق لاعب في دوري (الرسالة). او في فريق فاز ببطولة (الجواب) المكتوب باليد. فكوا حكاية الجوابات دي وركزوا في الكورة. و…. (اكمل). على العموم سير الاوضاع في الهلال على ذلك النحو بيأكد ان الهلال فيه (نظام). المريخ يمكن عشان هو فريق (حكومي) ..اي اجازة رسمية في السودان او في فرنسا ..التمارين والعمل فيه بتوقف. هسع ناس المريخ تمارينهم متوقفة. عارفين ليه؟..عشان اعياد الميلاد. وح تقيف تمارين المريخ تاني في رأس السنة. غارزيتو وابنه سافروا (فرنسا) من القاهرة – قالوا ماشيين يحتفلوا باعياد الميلاد. الشيء الغريب غارزيتو دا وقت كان في الهلال اعياد الميلاد مرت عليه مرتين..ما سافر. يعني انتوا فاكرين الهلال ما كان فيه رأس سنة. اشمعنا غارزيتو وابنه وقت كانوا في الهلال ما بجيبوا سيرة اعياد الميلاد. اعياد الميلاد عرفها غارزيتو وابنه الان. هذا يثبت ان الامور في المريخ فوضى وان الاشياء تدار بصورة عشوائية. على كدا اي مناسبة سوف تمر هذه السنة على المريخ سوف تتوقف تمارين المريخ. مناسبات المسيحيين سوف يسافر فيها غارزيتو وابنه. ومناسبات المسلمين سوف يطالب فيه برهان ومحسن سيد بالاجازة. برهان ومحسن سيد تاني يوم الجمعة ما بشتغلوه ليكم. يا كمان حاسبوهم الساعة بساعتين. السنة كلها ح يكون المريخ في (اجازة رسمية). فريق في مرحلة اعداد هل يعقل ان يقطع المدير الفني ومدرب الاحمال المعسكر والتمارين ويسافر؟. غارزيتو عندما يعود هو وابنه من فرنسا سوف يجد برهان تيه ومحسن سيد لخبطوا ليه اي حاجة. سوف يبدأ غارزيتو الاعداد من جديد بعد العودة من فرنسا. خاصة ان غارزيتو وابنه غير مقتنعين ببرهان تيه ومحسن سيد. نحن في الهلال الحاجات دي ما عندنا. وهذا من حسن حظ الهلال. ويمكن هذا من الانضباط الذي هو في الهلال. لكن لو الهلال اشتغل بنظرية المريخ دي – كان معسكر الهلال ما ح يكون فيه زول غير معاوية فداسي وعبداللطيف بويا. الهلال كلو اجانب. لو فتح الهلال باب زي الباب دا ..ما في زول بقعد. اول حاجة الجهاز الفني كلو ح يقادر. مدرب بلجيكي..ومساعده فرنسي ..ومدرب حراس فرنسي. وتعال شوف كشف اللاعبين. عشرة لاعبين اجانب. شوفوا لو فتحنا موضوع (رأس السنة) في الهلال ما ح يقعد لينا زول في الهلال. عشان كدا مجلس الهلال من بدري حسم الموضوع دا. قال ليهم يا جماعة نحن الاعياد دي ..ما عندنا ليها اجازة. رغم من انها مناسبات سعيدة ..ومناسبات مقدسة ..لكن حتى في عيد الاضحي فريق الهلال بكون في معسكر مقفول. واحسب ان غارزيتو وابنه يرد عليه الدوري الانجليزي ..امس مباريات الدوري الانجليزي كلها كانت جارية. ما في مدرب واحد في الدوري الانجليزي جاب سيرة لاعياد الميلاد او قال رأس السنة. الجماعة امس كانوا يجروا زي الحصان. مانشيستر سيتي امس كان لاعب ليه في (جليد) نحن في التلفزيون تابعنا مبارياتهم مع تحت (البطانية). تجي يا غارزيتو وانت عامل لينا فيها بتاع انضباط وفريقك في مرحلة اعداد تسافر وتخلي الادارة الفنية للمريخ لمزمل ابوالقاسم. في مباراة المريخ والاعلاميين شفت ليك مزمل ابوالقاسم قاعد برة ..اظنو رسم ليهم الخطة ووضع ليهم التشكيلة. ناس برهان ديل ما بتكلوا عليهم. ما عليهم تكل ناس محسن سيد. وغارزيتو ما فاضي مع اعياد الميلاد دي للمريخ. و… غارزيتو دا تاني كل رأس شهر بقول عاوز يسافر فرنسا. زي عصام الحضري كل خميس بمشي القاهرة. انتوا تعالوا هنا…صحي ناس الاتحاد لقوا الدوري الممتاز بقى كل اجانب قاموا قالوا نغير اسمه من (سوداني) الى (سلام بلدنا). و… وانتهى….