العتب مرفوع هيثم كابو (مواسير) الظلام .. ! * كل من تكبد أمس عناء الذهاب لمقبرة الوصايفة لحضور مباراتهم الكوميدية في ذهاب دور ال32 أمام فريق (بيغ بوليتس) الملاوي لم يندم أبداً على القروش التي دفعها ثمناً للتذكرة، فقد شاهد عرض كوميدياً من الصعب أن تقدم خشبات المسارح شبيهاً له مما يؤكد أنه اذا كانت الكرة بالقارة السمراء (مليئة بالمواسير) فالسينما والمسرح الأفريقي بخير ..! * رصاصات ملاوي (الفشنك) جعلت كل من منحوا آذانهم للمذياع من أجل متابعة مباراة الأمس يتذكرون تفاصيل فيلم (أمير الظلام) الذي جسّد دور البطولة فيه الزعيم عادل إمام ..! * عادل إمام أو (سعيد المصري) رغم أنه فقد نعمة البصر ولكنه يُحسِن (التنشين) أفضل ألف مرة من هؤلاء الملاويين ..! * نازل الوصايفة أمس فريق لم يسبق له اللعب تحت (الأضواء الكاشفة)، وبعثة الرصاصات حتى لحظة كتابة هذا المقال بحوالي ساعة عقب نهاية المباراة لم يعرفوا نتيجة اللقاء ..و(الناس ديل يا مزمل مضروبين كهرباء) ..! * رصاصات (محشوة مواسير) لا تجيد اللعب بالنهار، ولا تحسن الرؤية بالليل ..! * رصاصات (ما بتشوف بالليل) في إستاد الوصايفة اتغلبوا أربعة، (يعني لو مشوا سد مروي بفقدوا الوعي قبل نتيجة اللقاء وبتعرضوا للإغماء) ..! * انتو يا محمد عبد الماجد (الكاف) بجيب ليكم الفرق دي من وين ؟ * غايتو الله شايفكم بالفرق الما بتشوف دي ..! * دا ما فريق كورة الما بشوف دا ما تغشوا نفسكم ..و(البصر دون البصائر والأصل ما ببقى صورة) ..! * فريق وصل الخرطوم (شيرينغ) حق التذاكر ما عندو ..(فعلاً حالة تزعل ومنافس يخجل) ..! * يا جماعة اختشوا شوية ما تقولوا لينا الليلة إنكم أمس كنتوا لاعبين كورة لانو (مواسير الظلام) ديل لو لعبوا براهم ما منهم خطورة ..! * يا عالم ما تخدعوا الجمهور، (عشان لما الفريق يصعد لدور الستاشر ما تنكشفوا وتفتشوا في الشكاوي يا كبسور) ..! * فريق ما بشوف في الكشافات جبتوا من وين .. (معقولة فريق (لو مكتمل ناقص) ولو دخل الملعب بكابس ..! * إذا كانت أحداث فيلم (أمير الظلام) تدور حول أحد أبطال حرب أكتوبر الذين فقدوا بصرهم ويدعى (سعيد المصري)، فالرصاصات (ما بسوفوا مع أنهم ما خاوضوا حرب العبور، وسيوفروا هذه المرة رسوم الشكوى علي كبسور) ..! * شارك الرصاصات في (صندوق) وشالوا (الصرفة الأولى) حتى يتمكنوا من الوصول للخرطوم ..! * يا جماعة الناس ديل شالوا صرفتهم الأولى وصرفوا النظر عن الكورة ..! * نحنا ما زعلانين من (مواسير الظلام) وضعف المستوى ، لكن بصراحة زعلانين من كشف الحال و(النتيجة البتغش الكاردينال) ..! * يا جماعة فريق ما عندو قروش للسفر حقو ينسحب ويحترم نفسو ويعيش الواقع بأمانة، و(البجيبوا لحدي الخرطوم شنو للإهانة) ..! * ديل يا سلك إهانتم مالية الجرايد الملاوية ..(وفعلاً الوصايفة ديل محتاجين لدفرة قوية) ..! * بدل تنسحبوا بدون سبب من الدوري المحلي، (مفروض تنسحبوا من البطولة الأفريقية لانو القرعة ما احترمتكم لما رمتكم مع فريق زي دا) ..! * فريق مفلس وكلو مواسير ..و(شغال شحدة وما فاضل ليهم غير يقيفوا لينا قدام الجامع الكبير) ..! * رئيس فريق (مواسير الظلام) كوندي ماسونقوما ذكر لصحيفة (النيشن) الملاوية أنهم قاموا بتأمين نصف المبلغ المطلوب لتذاكر الطيران لرحلة السودان بتوفيرهم لمبلغ 6 ملايين كواشا – حوالي 13 الف دولار فيما تم توفير بقية المبلغ كسلفية من إحدى وكالات السفر ..و(فعلاً يا عاصم وراق الهلال دا مرزوق لاعب ليهو مع فريق كمل لياقتو في تفتيش الزول البدينو وكمل كل العندو حوامة في السوق) ..! * غايتو أي زول عايز يحلل الكورة دي من ناحية (فنية بحتة) مفروض يركز علي (الديون) ..! * فعلاً دا مستوى فريق لاعب بالدين ..! * يا جماعة مستواكم دا أقل من الدين ..(نحنا لعب الدين بنعرفو) ..! * رئيس الفريق الند للرصاصات بملاوي تبرع لهم بمبلغ 500 دولار كمساهمة في تكلفة رحلتهم للخرطوم ..و(حقيقي يا مواسير كرتكم ضعيفة وكمان جايين نفير) ..! * هسه إعلام الوصايفة يقول ليك (قهرنا الرصاصات) أصلوا الناس ديل غير الخداع والتضخيم مافي حاجة خلتهم عايشين تحت مظلة (الصفر الدولي المقيم) ..! * رصاصاتكم دي لو لعبت مع الأمير البحراوي (ناس أسامة صاين) بفجروها ليهم في رأسهم ..! * بالمناسبة : الليلة عندنا مباراة ودية مع الأمير ..(شوية ترتيبات لا علاقات لها بالفشنك من الرصاصات) ..! * لو فريقكم دا (رصاصات) يا كاردينال كان أبو مرين خلى السلاح وأشتغل (مسدسات أطفال) ..! * رصاصاتكم دي طفل ما بتقنعوا ..! * غايتو دي مباراة للنسيان ورصاصات للذوبان ..! * ديل شدة ما مخلوعين رئيس النادي قال انو معجب بمنشأت الهلال ..(الناس ديل لا بشوفوا بالنهار لا بشوفوا في الكشافات) ..! * لو الهلال يا سيد ماسنقوما عندو منشآت معناها المريخ عندو مدينة رياضية ..(يا زول ما تضحك فيك الناس، وارحم نفسك يا بتاع الرصاص) ..! * لو كان مانسقوما يظن أن لاعبيه هؤلاء اللعبية (رصاص) فكيف يكون النعاس ..! * منشآت الهلال ..(فعلاً الطشاش في بلد العمي شوف) ..! * لو دا فريقكم (الما بشوف) دا رصاص معناها خلاص (الطشاش) يملأ شبكتو ..! * رصاصكم فشنك رأسو عديل .. و(حقيقي وريتونا المواسير) ..! نقش أخير * الخلاص بالرصاص ..!