دق الدلجة محمد عبد الماجد شيبوب عملها ظاهرة!! وانا زي بقابلك والصباح سبقك عليّ… مستنى لي غاية المساء… مترجى تصبح في (المغيب) … غلطان انا؟؟… وإلّا الغلط كان في مشيك؟… ……… و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). قالوا ليك (طالب) دخل امتحان (رياضيات) ..ما فهم فيه اي شيء. السؤال الاول ما فهم فيه حاجة. السؤال التاني ما فهم فيه حاجة. السؤال الثالث ما فهم فيه حاجة. السؤال الرابع ما فهم فيه حاجة. السؤال الخامس ما فهم حاجة. الطالب اتلفت على زميلو ..لقى ليك زميلو نفس الشيء ما فاهم اي حاجة. ورقتو فاضية. الطالب قبل ما يمشي على السؤال السادس كورك للمراقب. المراقب جاهو منطط عيونو – قال ليه في شنو؟. الطالب قال للمراقب – انت الامتحان دا وضعتو امريكا؟. المراقب قال ليه : ليه بتقول كدا؟…في شنو؟. الطالب قال ليه : عشان الامتحان دا فيه (استهداف) لينا عديل كدا – دا شغل بتاع (استهداف) – اصلو ما شغل (رياضيات) – كمان نحن ما بنعرف (الرياضيات). الحاجات الذاكرناها كلها ما جابوا لينا منها شيء. ولا سؤال. المراقب ما عرف يقول اي شيء. الكلام الفوق دا ما عندو علاقة بي شيبوب…ولا عندو علاقة بي حاجة. عشان الموضوع يبقى ليكم واضح. وما تلخبطوا لينا ساكت. امس في صحيفة (الجوهرة) قال شيبوب :(تشجيع الهلال واجبي في معركة الابطال). ولد انت يا بتاع الواجب. اصلك ما قاعد تقصر يا شيبوب في الواجب. عداك العيب. الزول دا مالو؟. في زول سألو؟. مالو جارى كدا لتشجيع الهلال. يا شيبوب اصبر – نحن الموضوع دا عاملنو بي (حرفنة). اتقل شوية. اصبر. اهمد. شيبوب قال في حوار مع الجوهرة امس ارى ان الهلال يأخذ موقع متميز في حسابات مواجهته مع اهلى طرابلس ..وان حظوظ الازرق في الترشح تبقى وافرة). الكلام البقول فيه شيبوب دا – (بشه) ما بقولو. كتر خيرك ..وبارك الله فيك. اصلو ما قاعد تقصر. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). شيبوب مشى ابعد من ذلك ..وقال : (تابعت الفريق مؤخرا وهو يحقق فوز عريض على حساب الامير بثمانية اهداف ..صحيح انه جاء على صعيد المسابقة المحلية لكن يمكن ان تنعكس تأثيراته على المباراة الافريقية المرتقبة..هذه النتيجة الثقيلة كفيلة بان تدخل الرعب في الجانب الليبي ..لكن المطلوب من لاعبي الهلال تناسي ذلك الفوز العريض والتفكير جديا في المواجهة الافريقية). الزول دا بقى شايل هم الهلال اكتر من مدثر كاريكا. وكمان بوصى في لاعبي الهلال. وبحلل. وبطلع مبررات. وبحذر. يا اخوى هي عرفت من متين؟. شيبوب من لهفته على الهلال قال تابع مباراة الهلال والامير- وشاف (التمانية) اهداف. شفتوا التمانية دي لو شافها (محمد صلاح) ما بقعد في روما. برجع تاني يوم. شيبوب غلبتو القعدة في تونس بعد التمانية. لكن هي (تمانية) نصاح. زولكم حفظ الهلال – وبقى يتابعه عشان يفهم طريقتو. لقيتك حريف لكن. ومفتح. وشفت. وتنفع مع الهلال. يا ربي شيبوب بعمل كدا ليه؟. غايتو إلّا يكون عندو (فهم) براهو. يكون قاصدها. شيبوب دا اصلو ما بعمل حاجة ساكت. شيبوب دا قفز من الطابق الثالث. ومشى كينيا بدون جواز. مشى اثيوبيا بدون جواز. وجاء راجع الخرطوم بدون جواز. ولعب في شبيبة القيروان بدون كرت. في واحد من ناس حلتنا ..بنط لي في حلقي. اي كلمة بقولها – بنط لي فيها. اصلو ما بيديني فرصة – اتجدع شوية في الكلام. الزول دا وقت قلت ليه شيبوب سافر من جوبا بدون (جواز). ومشى نيروبي بدون (جواز). وسافر منها بدون (جواز). ودخل اديس ابابا بدون (جواز). وطلع منها بدون (جواز). ودخل الخرطوم بدون (جواز). وطلع من ناس المريخ بدون (جواز). الزول قال لي معقولة بس ..دي عملها كيف؟…معقولة يتحرك في المطارات دي كلها بدون (جواز). قلت ليه (الجواز) يعمل بيه شنو مع (الكسكتة)؟. شيبوب لبس (الكسكتة) ما عاوز (جواز). وكان تبقى عارف – وفاهم ب (الكسكتة) شيبوب في شبيبة القيروان لعب بدون (كرت). الكسكتة دي (خطيرة). و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). الحاجة الجديدة لينا في حوار الزميل عمر صالح في الجوهرة امس ..ما ذكره شيبوب حينما قال : (سبق ان كنت لاعبا في المراحل السنية بالهلال عندما كنت طفلا صغيرا ..تعلمت شيء من فنون الكرة في الديار الزرقاء ..هذا فضلا عن علاقتي مع اللاعبين بالفريق..والتى كونتها جراء مشاركات طويلة رفقة المنتخبات الوطنية). وانا من زمان بقول الزول دا بيشبهنا. وانا بقول الطبع دا اصلو ما طبع مريخاب. الموهبة دي ما موهبة مريخاب. الولد طلع من (إندينا). طلع مننا وفينا. بعد الكلام دا – ليك حق يا شيبوب تقفز من الطابق الثالث. يا زول الله شافك. الله مرقك. لو قعدت لي مع ناس ضفر وعلي جعفر ديل ..كان (المغصة) شقتك. شيبوب لمن يرجع للهلال في التسجيلات القادمة ان شاءالله ما ح يدخل طوالي في الفورمة. والتفاهم والتجانس ح يكون متوفر بينه وبين لاعبي الهلال. شيبوب بتابع في مباريات الهلال من تونس. وشيبوب قال في حواره مع الجوهرة عن لاعبي الهلال : ( مجموعة من اللاعبين الشبان ابناء جيلي ..تزاملنا في المنتخبات الوطنية فئة الشباب والاولمبي ..انهم اصدقاء اعزاء واصحاب موهبة كبيرة ..ويتعين هنا الاشارة الى قيمة محمد مختار بشه ، ارى ان عذا اللاعب صاحب موهبة كبيرة). بشه الصغير ما شاءالله عليه. اي زول بشيد بيه. هذه الموهبة تحتاج لرعاية وعناية اكبر. انتبهوا لهذا اللاعب عشان ما تفقدوه. الهلال بقى كله (شباب) – فيه الكثير من المواهب القادرة على تقديم العطاء لاكثر من عشر سنوات قادمة. بشه الصغير ومحمد محمود ام بدة وصهيب الثعلب والفادني. بالمناسبة وين الفادني ؟ – لماذا اختفى في الفترة الاخيرة؟. هؤلاء الشباب امنحوهم الفرصة وقدموهم منذ الآن – الموهبة عندما تكون عاطلة ممكن ان تكون حارقة. يمكن ان نفقدها. الجميل ان كل المباريات التى لعبها الهلال مع رديفه ..انتهت بالتعادل..وهذا يعني ان (الرديف) فريق كبير – وان كانت اعمارهم صغيرة. مهم نمنحهم الفرصة. على الاقل مفروض في اي مباراة محلية ..يشارك لاعب من فريق الرديف. عندهم القدرة لتقديم الكثير. شيبوب توقف عند بشه الصغير..والاشارة واضحة. ديل ثنائي خطير في المستقبل القريب ان شاءالله. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). ………. و تفوق الهلال في انه وصل تونس من الاتنين. هذا امر جيد. ولفتة ممتازة من مجلس الادارة. التعود على الاجواء في تونس سوف يمكن الهلال ان شاءالله بالخروج بنتيجة ايجابية في تونس. مهم ان يضع لاعبو الهلال في الاعتبار ان الليبي يلعب في تونس. 6 مشجع ما بعملوا اي حاجة. لا بد من حسم الاهلي الليبي في تونس. هذا امر لا بد منه. ……….. السيدة (ل) – السنة فيها (4) فصول و12 فاتورة موية. وقرّط على كدا.
حمل تطبيق كورة سودانية لتصفح اسهل لزوارنا من السودان على متجر 1موبايل http://www.1mobile.com/net.koorasudan.app-2451076.html لزوارنا من جميع انحاء العالم من متجر قوقل https://play.google.com/store/apps/details?id=net.koorasudan.app لزوارنا من الصين الشعبية http://www.androidappstore.mobi/EN/displayproduct/112531/playstore
