في التسجيلات الماضية عندما فشل الاهلي المصري في تسجيل لاعب الاسماعيلي والمنتخب المصري (عمرو السولية) في كشوفاته – مرر الاهلي اللاعب لفريق (الشعب) الاماراتي ليوقع اللاعب في كشوفات الفريق الاماراتي. يعني بالواضح كدا. وقبل ما ادخل ليكم في (الغريق). واعملها ليكم كلها (برد). عمرو السولية لبس (الكسكتة). او ممكن نصلح ليكم الحكاية بالمصري ونقول ليكم السولية لبس (الطربوش). اللاعب المصري وقع الآن في التسجيلات الشتوية بعد كوبري (الشعب) الاماراتي في كشوفات الاهلي المصري. بالواضح كدا. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). لكن الغريبة في الموضوع دا كلو ما سمعنا لينا زول واحد في مصر قال السولية اتسلق المواسير. او قفز من الطابق الرابع. يمكن عشان ناس الاسماعيلي ما عندهم (مزمل ابوالقاسم). ولا عندهم (سلك). الجماعة ديل لو كان عندهم (سلك) واحد – كان عمرو السولية قفز ليهم من الطابق العاشر. طبعا (النفخ) المصري اقوى من (النفخ) السوداني. يعني الطابق الرابع عندنا في السودان بيساوي عشرة طوابق في مصر. انتقال عمرو السولية تم عبر عقد ثلاثي – اذ كان الاهلي حاضر في كل تعاقدات اللاعب الى ان حقق اللاعب رغبته اخيرا بالتوقيع في كشوفات الاهلي. ما في زول في الاسماعيلي قال ح يمشي (الفيفا). ناس المريخ (الفيفا) عندهم زي بتاع الخضار ..ممكن يمشوا ليها في اي لحظة. لو عندكم قروش للفيفا احسن تدفعوها لي ناس مازن شمس الفلاح وابراهومة – عشان الجماعة ديل ما بيصبروا ليكم اكتر من كدا. ندخل على المواقع المصرية ونشوف الحاصل شنو في موضوع عمرو السولية دا. (قال أبو السعود في تصريحات ل (كورابيا) إن السولية لم يعترف بفضل الإسماعيلي وجماهيره عليه ، ورفض التجديد رغم أن الإدارة قدمت له أفضل العروض. وأشار رئيس الإسماعيلي إلى أن السولية كان يرغب في الرحيل للأهلي منذ فترة طويلة وحسم أمره بذلك، ولم يسمح للإسماعيلي الذي له الفضل عليه في تحقيق الاستفادة القصوى من وراء بيعه. يذكر أن الإسماعيلي رفض انتقال اللاعب إلى الأهلي، رغم أن اللاعب أبدى رغبة بذلك، وفضلت الإدارة بيعه خارجيا خوفا من غضب الجماهير). نفس حركات شيبوب. وناس الاسماعيلي زعلتهم من السولية كانت متل زعلة المريخاب من شيبوب. بس ناس الاسماعيلي ما عملوا ليهم (مهرجان) للسولية. ولا طافوا بيه في (4) مطارات. ناس الاسماعيلي لو عملوا الحاجات دي كانت شقتهم (الزعلة) نصين. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). كوبري الشعب الذي اتخذه الاهلي المصري من اجل التعاقد مع عمرو السولية يختلف قليلا عن كوبري القيروان – لأن السولية كان لاعب (محترف) في الاسماعيلي. مع ذلك جاء للاهلي عبر كوبري. شيبوب في المريخ كان يلعب (هاويا) – مع ذلك فان الاسماعيلي تقبل الامر وما قال حاجة رغم من ان الاهلي كان وراء عمرو السولية منذ سنوات واللاعب مقيد كمحترف في كشوفات الاسماعيلي المصري. لذلك ليس هناك اي عقوبة يمكن ان تكون على اللاعب او على النادي الذي سوف ينتقل له شيبوب ان شاءالله في مايو القادم. الله يجيب لينا نحن شهر خمسة. ما عشان شيبوب. عشان نفتتح الجوهرة الزرقاء. عملية المعروف ان عمرو السولية انتقل للاهلي المصري (مجانا) دون ان ينال فريق الشعب مقابلا على هذه الصفقة رغم مكانة السولية وموهبته الكبيرة. هذا يثبت ان الاهلي كان منسق مع عمرو السولية ومع فريق الشعب ايضا – يعني حكاية ان شيبوب انتقل لفريق القيرون (مجاني) ما فيها اي حاجة. علما ان شيبوب (هاوي) – وانتقاله (مجانا) امر تلزمه لوائح كورة القدم في الفيفا. يقولوا ليكم الكلام الف مرة. وبرضو ما قاعدين تقنتعوا بالكلام دا. ولا بتقيفوا عندو. عمرو السولية وهو في الشعب الاماراتي كان قد رفض عرض ب مليون ونص مليون دولار من اجل الانتقال لفريق اخر – لكن اللاعب رفض ذلك وبقى على كلمته في انتظار الاهلي. الى ان تمت رغبة اللاعب وتحقق حلمه بالانتقال اخيرا الى الاهلي المصري. شيبوب ايضا تحمل الكثير – ووافق على اللعب في الملكية جوبا ..وجاء وانتقل الى تونس ليكون اول لاعب سوداني يلعب في الدوري التونسي. كل ذلك فعله شيبوب من اجل ان يحقق حلمه وامله الذي يتمثل في الانتقال الى النادي الذي عشقه. والذي انصفه وعرف قيمته. ما عاوز اقول ليكم النادي دا (الهلال). افهموها براكم. يعني انتوا اي حاجة إلّا يقولوها ليكم. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). بعد النجاح الكبير الذي حققه نصرالدين الشغيل الذي يعتبر الآن الاكثر انضباطا والتزاما في الهلال ينتظر ان يحقق شيبوب نجاحا اكبر وهو يقدم كل هذه التضحيات ويمشي هذا الطريق من اجل ان يحقق هدف حياته. شيبوب في كل الاندية التى انتقل لها ولعب فيها قدم مردود طيب ولفت النظر وكان مصدر حديث الناس. شيبوب مشى لعب في الجزائر – الجزائر دي وقفت على فد رجل. الجزائريون بالمليون شهيد – اظنهم الى الآن يتحدثوا عن هدف شيبوب الذي سجله في فريق الاتحاد. الجماعة في الجزائر الى وقتنا هذا في عبرت وما عبرت. نحن خايفين الموضوع ينتقل الى تونس. وخايفين ناس تونس ديل يقوم شيبوب يلعب ليهم كورة ويجيب ليهم قون – يقوموا يخلوا شغلتهم ويدوروا في عبرت وما عبرت. ناس المريخ الى الآن ما عارفين الزول دا وصل تونس كيف؟. فجأة ظهر ليهم في شبيبة القيروان. ومدني الحارث – الزول الما ناقش حاجة ظهر في التلفزيون وقال اللاعب لاعب المريخ. واللاعب الآن في شبيبة القيروان. انت يا مدني الحارث بقيت في اخر ايامك بتشجع شبيبة القيروان. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). الهلال والكاردينال على وجه التحديد عليه ان يرتب منذ الآن لتسجيلات 11 مايو. التسجيلات التكملية مدتها 10 ايام فقط. يعني اي ملف في التسجيلات القادمة – بما في ذلك ملف المهاجم المحترف يجب ان يحسم مبكرا. في مايو الانظار كلها سوف تتجه نحو شيبوب. اقصد نحو الجوهرة الزرقاء. عشان كدا يا الكاردينال رتبوا اوضاعكم من الآن – واحسموا ملفاتكم ..وخليكم قريبين من اللاعب. يا حسن علي صالح ..خليك قريب ..وما تفكوا. الظروف ما معروفة. واصلو الناس من قديم الزمان عندها (الحسد). ابقوا عشرة – واحكموا قبضتكم ..وما تدوها الطير بعد ما وصلت شبيبة القيروان. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). ……….. و نسأل الله ان يبدأ الهلال بداية مبشرة وجميلة وموفقة في كادوقلي وهو يلعب عصرا امام هلال كادوقلي. نتوقع ان يحقق الهلال انتصار كبير باذن الله وتوفيقه. ابقوا مع الهلال في كل الاحوال. وما تهتموا بالنتيجة كتير . الزول العاوز يحقق ليه بطولة ما بعاين تحت كرعينو. عاينو قدام. ما في زول بعاين ليه في مباراة. نرحب بي اي نتيجة يخرج بها الهلال اليوم. وان كنا نتوقع انتصار كبير للهلال اليوم ان شاءالله. سوف يعود الهلال من كادوقلي. ليبقى الترتيب الاكبر لمباراة الابيض. ركزوا وألعبوا كورتكم. ما بتجيكم اي عوجة. وما التوفيق إلّا من عند الله. بشه. وولاءالدين. ونيسلون ذاتو. اعمل حساب (التحكيم). ما تمنحوا حكم المباراة فرصة. وما تشتغلوا بارضية الملعب. البطولات والانتصارات لا تتم إلّا عبر هذه الملاعب. عاوزين ليكم بطولة بدون مشقة. الله معاكم. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). ………. السيدة (ل) – الزولة دي لو قالت جدول اتنين بنعتبروا ليها جدول تسعة. وقرّط على كدا.
