* يُمارس الإنسان العنصرية في أعلى درجاتها فيما يتعلق ب(الملابس) . * عندنا تصنيفات وموازنات خاصة للملابس وألوان الملابس . * في ملابس ما بنلبسها بالنهار . * وملابس بنلبسها مرة في السنة . * عندنا قميص للمرقة. * وقميص للشغل . * في مشوار بنمشيهو بالتشيرت ، ومشوار بنمشيهو (شاكين) ، ومشوار بالجلابية . * في ملابس بنغسلها ونكويها نحن ، وفي ملابس بنوديها المكوجي ، وملابس بندلعها وبتمشي الغسيل الجاف . * كلها ملابس ولكن نحن (بنعزل) اللبسة حسب المشوار . * وبما أن ذلك كذلك فإن الهلال هذا العام سيعزل التشكيلة حسب المباراة. * لو دايرين نفوز بهدف وشباك نظيفة .. عندنا تشكيلة لهذه المهمة . * دايرين نغلب كتير .. عندنا تشكيلة لهذا الغرض . * دايرين نغلب ونستعرض .. عندنا تشكيلة الفنون الجميلة . * تشكيلة الفنون الجميلة في الغالب بتتكون من (أبو عشرين ، ارنق، مؤيد ، فارس ، بوغبا ، جيسي ، روفا ، مجاهد ، موفق ، بشة الصغير والغربال) . * دي تشكيلة الطرب . * مشاء الله تبارك الله (تلاتة تشكيلات) وكل تشكيلة عندها أهداف معينة. * ده بالنسبة للهلال . * اجيك للموضوع الأهم. * قبل الموضوع الأهم .. في عمود الأمس الذي تحدثت فيه عن الجيش وانتصارات الجيش ذكرت مدينة (كاودا) بجانب مدن حلايب وشلاتين والفشقة . * والصحيح أن كاودا ليس بها مشاكل في الوقت الراهن . * كاودا التي كان عمر البشير يحلم بالصلاة فيها هي الآن خالية من المشاكل وتتمتع بما تتمتع به شندي وسنار والأبيض وعطبرة. * كاودا عروس الغرب وبها خيرة أبناء هذا الشعب الكريم . * لهم التحية ومؤكد أن ما ورد في عمود الأمس لم نقصد به شئ خلاف حبنا لهذه المدينة المناضلة . * المهم .. نرجع لموضوع التشكيلة . * مصلحة السودان تتطلب إختيار الهلال ليلعب بإسم المنتخب الوطني في مباراة جنوب أفريقيا. * وتعال أناقشك. * آخر مباراة للمنتخب مع غانا كان فيها من جانب الهلال كل من : (أبو عشرين ، وضاح ، فارس ، السموأل ، الشغيل ، أبو عاقلة ، بشة الصغير والغربال) . * ديل كم ؟ * تمانية صاح ؟ * طيب عندك بوي وياسر مزمل تم ابعادهما عن مباراة غانا بسبب الإصابة وهسه بقوا كويسين ، يعني ح يرجعو . * كده بقوا كم ؟ * عشرة صاح ؟ * عندك محمد موسي الضي ووليد الشعلة تم ابعادهما عن مباراة غانا ، الأول بسبب زيادة الوزن والثاني بسبب تراجع المستوى . * الضي وزنو رجع عادي والشعلة مستواه ارتفع. * يعني ح يرجعو للمنتخب . * كده بقوا كم ؟ * اطناشر صاح ؟ * بوغبا وصلاح عادل وعيد مقدم كانوا ضمن قائمة المنتخب قبل مباراة تشاد الودية ولظروف الإصابة والتأثر بتوقف الدوري بسبب كورونا تم ابعادهم مؤقتاً وهسه أمورهم ظبطت . * كده بقوا كم ؟ * خمسطاشر صاح ؟ * محمد أحمد ارنق وبعد المستوى الذي ظهر به أمام الاشانتي سيتم اختياره دون شك . * كده بقوا سطاشر صاح ؟ * هل مجاهد فاروق ح يكون بره المنتخب؟ طبعاً لا . * بقوا سبعطاشر صاح ؟ * نزار حامد قبل الإصابة بالرباط الصليبي كان مع المنتخب وهسه رجع معافى وح يرجع المنتخب. * كده كم ؟ * طمنطاشر صاح ؟ * بكل الحسابات وبعيداً عن التعصب ياها دي قائمة المنتخب . * ما في أفضل من الأسماء دي في السودان . * بدون مجاملة ياهم ديل ناس المنتخب . * وكل الذكرتهم ديل موجودين في قائمة المنتخب ما عدا محمد أحمد ارنق . * يبقى كل المطلوب أن يكون مدرب منتخبنا شجاع ويسمي فريق الهلال ممثلاً للسودان (منتخب وطني) . * وإذا كان لابد من إكمال العدد الي (22) لاعب يمكن إضافة (روفا والطيب عبد الرازق ومؤيد عابدين وموفق) . * هلال المنتخب أو منتخب الهلال . * طيب بلاش من الرباعي الأخير ده . * طمنطاشر من الهلال ويضاف لهم شيبوب من الجزائر ، أكرم الهادي من الأمل عطبرة ، سيف تيري من المريخ واطهر الطاهر من سموحة . * جيب سيف تيري من المريخ وبس . * لو فعل مدرب منتخبنا ذلك أنا بضمن ليك بلوغ النهائيات . * وأي قائمة تخلو من الطمنطاشر المذكورين يكون الموضوع موازنات. * وزمن الموازنات انتهي . * عظمة يا هلال . * عزة جد . * وعلى فكرة .. ممكن نديكم تشكلية للمنتخب ونحن نواصل مبارياتنا بتشكيلة تانية دون أن يؤثر ذلك علينا . * سمحة المقدرة والله . * ملحوظة : (اعتباراً من أول السنة سأقوم بتغيير إسم عمودي هذا لاسم جديد إن شاء الله) . * ونركب صافنات ونجيبة (كردفانية) واصلو الزول بيموت والذكرى تفضل حية . * و..و.. * وأنا بفخر بيك يا وطني .