محمد عبد الماجد اعاين للدكة اقول (مانشيستر اوالريال) …انظر للملعب اشوف (السمؤال وارنق) مرات أنا قاعد اتلخبط. مرات قاعدين نسرح. امالنا واحلامنا وكراعنا مرات بتكون اكبر من (لحافنا). الليلة يا ربي انا شربت (القهوة)؟ والله مع قطوعات الكهربة دي ما تفهم أي شيء – غايتو الكهربة دي لو مساكها (المستعمر) ما بعمل فينا كدا. دي سخانة يقطعوا فيها (كهربة) – الله لا يجازيكم. انتوا يا ناس (الحرية والتغيير) كلامكم دا لو عملتوا نصه (كهربة) ما كان في كهربة قطعت في البلد. الكهربة مرة يجيبوها بالنهار ومرة بالليل. ما بدوك ليها اليوم كله. حبة مساء. وحبة صباح. الكهربة بقت (دوا). بقينا نشتهى (النور). عملتوا لينا (دوشة). اللخبطة حاصلة. عصر الخميس بقى يدخل في نهار الثلاثاء….عادي – ولا في زول بقدر يقول حاجة. عوموا (الجنيه). سخانة عجيبة. مرات بجيبوا لينا (غداء الجمعة) في (فطور السبت). عادي. بتحصل. أي شيء جايزة في البلد دي. لخبطة شديدة. نحن بقينا ما فاهمين أي حاجة. أي حاجة تسأل منها يقولوا ليك (عوموا الجنيه). اخر الشهر بقى يجيك تلات مرات في الشهر. عادي. قدر ما تلف …تلقى (اخر الشهر). الغريبة الزمن دا بقى الشهر فيه (3) أواخر شهر …واول الشهر مرة واحدة بس. اللخبطة في شنو؟ نحن وقت جابوا لينا السوباط – قلنا خلاص – تاني مرحلة المجموعات دي نحسمها من الجولة الاولى. قلنا مع (السوباط) دا – تاني (الدو) في بداية اللعب (خمسين). لقينا ليك تسعة الأسود ما بتفتح. ورق كعب. انتوا في علاقة بين الكلام دا – والكلام الذي سوف أقوله ليكم لاحقا. اكيد في علاقة. ما تقعدوا تغالطوا ساكت. انتوا عارفين أنا عاوز أقول ليكم (لاحقا) شنو في السخانة دي؟ نحن وقت جابوا لينا تركي آل الشيخ – قلنا السنة دي بنلعب في بطولة كاس العالم. تغريدة ساكت من تركي آل الشيخ ممكن تجيب لينا بطولة. والله ما شفنا أي حاجة. جابوا لينا محترف سنغالي اسمه (انداي)….الزول دا وقت الهلال ما عندو مجلس – لا سوباط ولا تركي آل الشيخ ما بدخل الخرطوم. ولا بلعب في درجة تانية. تجيبوه لينا في الهلال!! معقولة بس. دي التازي ما بعملها. تأشيرة ساكت ما بدوها ليه. الزول دا دخل بمطار الخرطوم ام انه دخل (تهريب بشر)؟ يكون دخل بالحدود. مطار الخرطوم ما بسمح بالحاجات دي. والطاهر يونس شغال (صور). صور الطاهر يونس براها تجيب كاس العالم. تجيب امبابي ونيمار في الهلال. ونحن ما شفنا غير (انداي). والله نحن بعد كدا ما بنسكت. شيلوا شيلتكم معانا. نحن فترنا من الحاجات دي. الطاهر يونس سجّل لينا 18 لاعبا محليا – أتصور معاهم 290 صورة. ونحن من صور الكاردينال الى صور الطاهر يونس. الطاهر يونس فاضل ليه (الكسكتة). اوعك يا الطاهر تكون اتصورت مع انداي. اعمل حسابك. ما تتصور ساي. والله بعد العمر دا – اكتشفت ليك التسجيلات بتاعة (الصور) دي عمرها ما بتعمل ليها فريق. ولا بتودينا لي قدام. تسجيلات (صور) ساكت. تاني ما عاوزين (صور). البشير مرة أتصور مع مبعوثة برشلونة ذاتها – وقالوا ميسي قدم قميصه هدية للبشير. البشير أتصور وهو شايل قميص ميسي. والكلام دا طلع (صور) ساكت. ما عندو أي قيمة. عشان كدا (الصور) ما بتودي لي قدام. السوباط ذاتو لمن كتر (الصور) – فقد السيطرة. انتوا عاوزين تتموها (صور). بالله الصور التى اتصورها الطاهر يونس – الطيب عبدالله زعيم امة الهلال في نصف قرن خدمة في الهلال ما اتصور ربعها. وعشان الموضوع ما يبقى الطاهر يونس براه – كل اللجنة مسؤولة من ذلك – اصلو ما بنعفى لينا زول. كل الأعضاء شركاء في هذا التخبط. ما تقعدوا تعاينوا لي كدا. كلكم واحد. زمان نحن كان عندنا (كاردينال) واحد – وقاطع قلبنا – ومبهدل الفريق اخر بهدلة. هسع بقى عندنا (14) كاردينال في لجنة التطبيع. والله ما عارفهم. 14 ام 13 عضوا في لجنة التطبيع ما عارف… وما عندي وقت عشان اشوفهم كم؟ نحن غير (اللخبطة) ما عرفنا منهم شيء. معقولة الهلال في الموسم الماضي بي يونس الطيب ومؤمن عصام واسكندر صماويل ومن غير قلب دفاع (رسمي) وبدون محترفين نعمل (10) نقاط وهسع مع ابوعشرين ومحمد عبدالرحمن وعيد مقدم و6 محترفين – جيسي واوتارا نعمل (3) نقاط. معقولة بس!! بالفاتح النقر – الله يديه العافية عملنا (10) نقاط – وبي جهاز فني يتكون من (7) افراد نعمل (3) نقاط. وقبلهم كان زوران وجهازه التونسي. اصلو ما كان في حاجة ناقصة. السوباط. وتركي آل الشيخ. و3 نقاط. والله نحن بقينا ناس كلام ساكت. نحن ذاتو ما عارفين نقول للناس شنو؟ نقول للجمهور ايه؟ غلبنا. الكورة كدا. ما عندها منطق. وما مفهومة. وما عارفينها ذاتها بتمشي كيف؟ يوم داك شاهدت مباراة الهلال وهلال كادوقلي. وشاهدت مباراة الهلال وشباب بلوزداد الجزائري من ملعب الهلال. ما قدرت استوعب الحكاية. ما وقعت لي. اعاين للمنطقة الفنية للهلال اشوف ليك البرتغالي ريكاردو وجهازه الفني البرتغالي. شيء بتاع احمال. وشيء منسق. وشيء مدرب حراس عالمي. وشيء بتاع تغذية. بعثة الأممالمتحدة بس. بيني وبين نفسي كنت بقول انا الجماعة ديل شايفيهم وين؟ الخلق دا ما بنشوفها إلّا في بي ان سبورت. ريكاردو دا بشوفوا مع مورنيهو….الجابو هنا شنو؟ مع توتنهام. ومانشيستر سيتي. والريال. هسع بقيت اشوفه ليك مع عم (شبشه) وكمال الشغيل وعبدالمهيمن الامين. قعدت افكر. واحك في رأسي. يا ربي انا بحضر في الدوري الإنجليزي. يا ربي انا فاتح بي ان سبورت. قناة الخرطوم الدولية. لكن السخانة دي سخانة استاد الهلال. دي ما سخانة بي ان سبورت. اصلو السخانة دي ما بتغبى عليّ. لكن ديل البجيبهم شنو في السخانة دي؟ دي سخانة (محسن سيد) ما بقدر عليها. اقرص نفسي. اصنقع. اعاين فوق. اشرب لي قهوة. وبرضو ما فاهم شيء. اعاين في الدكة ألقي ناس ريكاردو …(توتنهام – الريال – مانشيستر يونتايد)…انظر الى الملعب جوة القى ليك (السمؤال وارنق وفارس عبدالله والشغيل). يا جماعة انتوا مالكم عاوزين تجننوني؟ الدكة دكة (ريال مدريد) والكورة كورة (الهلال). انتوا ابوعشرين مشى توتنهام؟ الريال سجل محمد عبدالرحمن. عيد مقدم في ايفرتون. طيب الحاصل شنو؟ الناس ديل ما بتلموا في حتة واحدة. قدر ما احاول اقنع ليك نفسي بالدوري الانجليزى …اوتارا يقوم بي هناك يصرجها. يقوم يجليها. أقوم تاني استوعب ليك الحكاية. شوية كدا اشوف ليك ريكاردو واقف مع بوجبا. يا جماعة الحاصل شنو؟ ديل البلمهم شنو في السخانة دي. الدنيا بقت ضيقة. العالم فعلا بقى قرية. ريكاردو دا كنا بنعاين ليه في الدوري الإنجليزي مع مورينهو في الأسبوع مرة. هسع بقينا نشوفه في تمارين الهلال. دنيا. 6 أجانب في الجهاز الفني للهلال. مع كمال الشغيل. و6 محترفين في الهلال. وتسجيلات كل 21 يوم. اها عاوزين نشوفكم في التسجيلات القادمة ح تعملوا شنو؟ اشتغلوا بدون صور. لو عاوزين تتصوروا – اتصوروا لينا فقط مع سيف تيري. دي (الصورة) الوحيدة التي يمكن ان نقبلها منكم. غير كدا ما بنقبل منكم أي صورة. ولا (تغريدة). عشان الموضوع يبقى واضح. وعشان ما تدخلوا التسجيلات القادمة بفكرة (الصور) أيضا. كفاية (صور). نحن ما شفنا منكم غير (انداي). حتى (جيسي) – يبدو انه دخل الخرطوم مشروع (تسمين). معقولة في محترف بهذه البدانة. انتوا الجهاز الفني بعمل في شنو؟ اشتغلوا. عشان نحن خلاص. صبرنا عليكم كتير. وما بنصبر اكتر من كدا. …………… متاريس تتخيلوا مع لجنة التطبيع دي – في ناس بهاجموا في الشغيل والسمؤال. والشغيل والسمؤال …شايلين الهلال في اخر 3 مواسم. وين المحترفين؟ وين التسجيلات الأخيرة؟ اطعنوا في (الفيل). الضل ما عاوز الفراسة دي كلها. …………. ترس أخير : الهلال عنده (12) لاعبا في المنتخب الوطني و (3) نقاط في المجموعات.
