خمسة نقاط كتيرة !! ملعب المريخ ما قانوني ..المباراة مفروض تلعب في (حدائق الموردة) محمد عبدالماجد عندما فاز الهلال بالدوري الممتاز في فترة صلاح ادريس خمس مرات على التوالي – مازلت اذكر اني كتبت (وان طال السفر) تحت عنوان مقطع من اغنية عبدالرحمن عبدالله (يا ضابط السجن ما تسمح لي اشوفو)…وقد جاء العنوان على هذا النحو على ما اعتقد (خمسه سنين طويلة مرت ليله ليله). ناس المريخ كان ما بشوفوا (الكاس). وأظن ولغرامي بهذه الاغنية ولذكراها الجميلة عندي سوف اكتب لكم اليوم تحن عنوان (خمسة نقاط كتيرة). بعد تعادل المريخ امس مع هلال الساحل…لكن برضو لن اترك ملعب استاد المريخ…عشان كدا سوف اجعل العنوان الاول مدخل للعنوان التاني. دي فرصتنا. ود الشريف كان عشمان في حي الوادي…قنع من هلال الابيض. ظهر ليه هلال الساحل. عفارم عليكم. ديل لا بعرفوا مطر ..ولا بعرفوا طين ..لا سوداكال ..لا الكندو ..ديل حاضرين في أي وقت. في استاد المريخ او في حديقة الموردة. الاغنية كتبها شاعرها محمد حامد آدم في سجن الابيض – عليكم الله كلام زي دا يطلع من سجن. ومن زول مسجون. إذنك لحظة واحدة يا ضابط السجن أتزود بنظرة و أرجع أنسجن .. خمسة سنين طويلة مرت ليلة ليلة و دمع الشوق هميله ورى الدمعة الهميلة تشرح سايلة حالي و تكتب في مثيلها قصة وردة جفت من فرقت خميلها اعتقد ان لقب الممتاز الذي توج به المريخ (مكتبيا) في المواسم السابقة في شوق للهلال. هلال الملايين. اللقب ذاتو لو سألوه بكون في حالة شوق. هلال الحركة الوطنية. هلال نادي الخريجين. هلال الشعب. تاني يا ناس المريخ لقب الممتاز لا ميدانيا لا مكتبيا – تشموه قدحة. تمشوا (كاس). ترجّعوا (الكيزان) تاني. ما في ليكم. محمد سيد احمد قال احسن نشوف لينا في (ضهر) قوي ..قال شنو؟ قال حمدوك قال ليه انا مريخابي اكتر منك. خلاص قنعتوا من (الكيزان). عاوزين تركبوا قطار الثورة. والله لو حمدوك وقف ليكم (حارس مرمى) – تاني (لقب الممتاز) ما بتشوفوه. الفرق بقى (5) نقاط. ما شاءالله. وتبارك الله. تلعبوا بدون لاعبي المرحلة السنية. عادي. ما غريبة عليكم. تتفقوا مع الاهلي الخرطوم. عادي. تواطؤ ما تواطؤ ..ما بخصنا. متعودة دائما. ترفض الشكوى (شكلا) – كمان الفاتح باني دي حاجة بوصوها عليه. الفاتح باني لو جابوها ليه في (حانوت) ح يرفضها شكلا. تلعبوا بي 4 محترفين. يشاركوا امام هلال الساحل في الدورة الاولى – هلال الساحل ذاتو يجي يتعادل معكم 2 / 2 في الدورة التانية. عشان شنو؟ عشان الفرق يبقى 5 نقاط. هسع عليكم الله ما بتخجلوا. عندكم مجلسين. وعندكم عضويتين. وعندكم مدربين …واحد فرنسي والتاني انجليزي. وعندكم رئيسين. وعندكم جمال الوالي. وعندكم حمدوك الطلع مريخابي. والفاضل ابوشنب. والفاتح باني. ومعتز الشاعر ومحمد حلفا. والفرق يبقى (5) نقاط. انتوا ما بتخجلوا. يعني مباراة القمة لو اتلعبت في ميعادها الفرق كان بقى (8) نقاط. حالتها اجلوها ليكم. لكن يا ناس المريخ ممكن تقدموا شكوى. ملعب المريخ ما قانوني…دا ملعب سوداكال. المباراة مفروض تلعب في (حدائق الموردة) في الهايد بارك ..جناح الكندو. 5 نقاط. نشكر الله ونحمد فضله. اللهم احفظها صدارة من الزوال. اللهم دوي وكاس. الارضية على الاقل في حديقة الموردة كانت بتكون احسن من ملعب المريخ. والله انا مباراة المريخ ما تباعتها …كنت متابع مباراة الهلال ..خلوني اشوف مباراة المريخ وهلال الساحل في اليويتوب وارجع ليكم. ناس الملاعب اصلو الاعادة عندهم اصعب من عودة الاندلس. ادخل ليكم على مباراة الهلال وحي الوادي…و9 مباريات والهلال يحافظ على شباكه. تسع انتصارات متتالية …ما فيها ولا هدف. وبلاعبي المرحلة السنية. وبدون محترفين. ما شاءالله. وتبارك الله. قولوا ما شاءالله. من خلال المستويات التى يقدمها فريق حي الوادي في الدوري السوداني ثبت ان الفريق يستحق حقا ان يكون ثالث ترتيب الدوري الممتاز – وان يمنحه هذا المستوى بطاقة تمثيل السودان في البطولة الكونفدرالية. فريق حي الوادي حقق المركز الثالث في الدورة الاولى وحافظ على مركزه هذا حتى ونحن نشرف على نهاية الدوري الممتاز ، مما يؤكد ان مستوى فريق حي الوادي ثابتا – عكس فريق الاهلي مروى الذي تراجع من المركز الرابع الى المركز الثامن وربما يتراجع اكثر في الايام القادمة. يمتلك فريق حي الوادي عناصر شابة – معظم لاعبي الفريق صغار في السن ، الى جانب تميزهم بقوام رياضي متميز. لذلك مباراة الهلال امس امام حي الوادي ربما تكون اصعب مباريات الهلال في الدورة الثانية. لولا الرؤية التكتيكية الممتازة لمدرب الهلال البرتغالي ريكاردو وقدرات لاعبيه الفنية خاصة محمد عبدالرحمن كان يمكن ان يتعثر فريق الهلال امام حي الوادي. الهلال حسم المباراة في الشوط الاول – بل في الدقائق الاولى من عمر المباراة ليتجه اللاعبون بعد ذلك للعب على الاجسام – من جانب لاعبي حي الوادي ومن جانب لاعبي الهلال ايضا. اهم المكاسب التى خرج بها الهلال الى جانب تحقيق الانتصار وحصد ثلاثة نقاط جديدة – هو المحافظة على عناصره من الاصابات ومن الكروت الملونة. مباراة الامس كان يمكن ان يفقد فيه الهلال لاعبا او اثنين بسبب العنف الذي كان واضحا في المباراة. تعرض محمد ارنق الى مخالفات خطيرة كانت يمكن ان تبعده – حتى من المشاركات مع المنتخب في المواجهات القادمة. كذلك ارتكبت مع صلاح عادل مخالفات ودخل في إلتحامات كثيرة عرضته للإصابة اكثر من مرة. صلاح عادل حتى يحافظ على نفسه من الاصابات عليه ان يبتعد عن الالتحامات التى يمكن ان تصيبه – هناك تدخلات لا داعي لها. تعقيد الكرة يعرض اللاعب للإصابة – والحماس والاندفاع الذي يلعب به صلاح عادل يمكن ان يعرضه للاصابة. الملاحظة المهمة في صلاح عادل في الفترة الاخيرة انه تخلى من ارتكاب المخالفات – فقد كانت اكثر عيوب صلاح عادل ارتكابه الى عدد كبير من المخالفات. صلاح عادل تخلى عن ذلك وهذا يوضح سيطرة المدير الفني للهلال عليه. بقى ان يتخلى صلاح عادل من الدخول في الزحمة والدخول في التحامات تعرضه للإصابة. يجب ان يعرف اللاعب كيف يحافظ على سلامته ومستواه. محمد عبدالرحمن ايضا تعرض لأكثر من اصابة – وكان يمكن ايضا ان نفقده بسبب الالتحامات القوية من دفاع فريق حي الوادي الذي فشل في ايقاف محمد عبدالرحمن حتى بعد استخدام العنف الزائد معه. عبدالرؤوف كان بعيدا بعض الشيء من مستواه – لذلك تم استبداله. في ظني ان المباراة بشكلها (العنيف) هذا – وبعد ان سجل الهلال هدفين في شباك حي الوادي كانت في حاجة الى ابوعاقلة والشغيل. عناصر الخبرة والقوة مهمة في مثل هذه المباريات. محمد اوتارا تبدأ من عنده الهجمة بشكل ممتاز – لكن اللاعب وهو اخر لاعب في الهلال ومحاصر بأكثر من لاعب من الفريق المنافس بلف ويدور ويحاول المرور من مهاجمي الفريق المنافس – اوتارا نجح في كل هذه المحاولات – لكن كان في اكثر من مرة قريب من ان يفقد الكرة ويتسبب في اصابة مرمى الهلال الذي حافظ على امتداد تسعة مباريات في الممتاز على نظافة شباكه. على اوتارا ان يتخلى من هذه العادة – لأنه يمكن ان يتعرض لضغط اكبر ويفقد الكرة. النجاح في هذه المحاولات مرة او مرتين او حتى عشرة لا يعني النجاح فيها دائما. كل ما يعرض مرمى الهلال للخطر يجب ان تبعدوا منه. الجهاز الفني للهلال يجب ان يراجع مع اللاعب فيديو مبارياته الاخيرة مع الهلال سوف تجدوا ان اوتارا يفعل ذلك بصورة مكثفة في كل مباراة. من مكاسب المباراة ايضا رفع الغربال رصيده من الاهداف الى 26 هدفا. ما شاءالله. مشاركة ياسر مزمل في اخر دقيقة من الزمن البدل ضائع – امر لا جدوى منه …كنا نتمنى ان يمنح الجهاز الفني للهلال فرصة اكبر للاعب ياسر مزمل. ياسر مزمل في حاجة الى المشاركة والفرصة – وبعد ذلك سوف يفعل العجب …لا اعتقد ان هناك لاعب في العالم يمكن ان يقدم شيء من خلال الدقائق التى يمنح لها ياسر مزمل. كذلك نحن في انتظار حسين النور – الذي شارك مع الهلال في مباريات كاس السودان وقدم مستويات مذهلة. ومازلنا نترقب ظهور محمد موسى وسليم برشاوي – اعتقد ان ريكاردو لو اعطى الفرصة لهذه العناصر سوف يكسب الكثير. نحن نعرف ان المدرب يلعب على البطولة وان الاسلوب الذي يلعب به الهلال يحتاج الى ثبات في التشكيلة. لكن مع ذلك نرجو مراعاة مواهب كثيرة في الهلال في حاجة الى المشاركة والظهور. لا ننسى نزار حامد – الذي ابتعد كثيرا في الفترة الاخيرة. الحمدلله ..اولا واخيرا. متاريس غارزيتو همو في القروش ما في النقاط. هسع ولدو لزومو شنو؟ الفرق بقى 5 نقاط. دي ابراهومة كان بقدر عليها. ما عاوز اطول في الكلام. والمطبعة. بكرة ان شاءالله برجع ليكم لفارق الخمس نقاط. احسن نلحق المطبعة. ….. ترس اخير : ونشوف الاهداف في اليوتيوب.
