محمد عبد الماجد بطولاتكم البتمشوا ليها (كاس) بنجيبها ب (عصمت عبدالحميد) . مباراة صعبة خاضها الهلال امس لاستعادة لقبه المحبب الذي سلب منه في السنوات الاخيرة (مكتبيا). . المريخ حقق بطولة الممتاز ثلاث مرات (مكتبيا) وليس (تواليا). . اوعكم تنسوا سوف تظل هذه البطولات محسوبة على المريخ وليس محسوبة له. . ما تنسوا الحكاية دي. . مرة حقق المريخ البطولة بعد انسحاب الهلال من بطولة الدوري الممتاز التى كان يتقدم فيها الهلال بفارق (9) نقاط – حيث قرر الهلال بعد اغتيال المنافسة الانسحاب من البطولة ليهدي بطولة (مكتبية) مدنكلة للمريخ. . شالوها (فطيس). . وقتها كنت قد اسميت هذه البطولة التى فاز بها المريخ ب (وَمَا أَكَلَ السَّبُعُ). . فرحوا بيها (فطيس). . ومرة عن طريق (هشام جنيه) الذي اشركه فريق مريخ الفاشر (الابن) وهو موقوف ليهدي (البطولة) للمريخ (الاب)...وكنت قد اسميت هذه البطولة التى فاز بها المريخ عن طريق (كاس) ب (الْمُتَرَدِّيَةُ). . نجيبها ليكم بي تشكيلها. . عشان ما تقعدوا تغالطوا. . ومرة فاز المريخ بعد ان تم الغاء مرحلة كاملة من الدوري الممتاز بسبب الاعتداء الذي حدث من بكري المدينة على حكم المباراة لنبدأ من الاول بدلا من اعتبار المريخ مهزوما بعد اقتحام جماهيره لملعب المباراة مما ادى ذلك الى الغاء المباراة. . هذه البطولة التى وقع فيها اعتداء بكري المدينة على حكم المباراة اسميتها ب (النَّطِيحَةُ). . ومرات ومرات – كانت لجنة عامر عثمان تقدم فيه الهدايا اشكال وألوان من اجل ان يحقق المريخ الفوز. . بطولات المريخ اغلبها تدخل ضمن هذه الاوصاف (الْمُنْخَنِقَةُ وَالْمَوْقُوذَةُ وَالْمُتَرَدِّيَةُ وَالنَّطِيحَةُ وَمَا أَكَلَ السَّبُعُ). . نغشكم يعني؟ . انتوا قاعدين تصدقوا روحكم؟ . في هذا الموسم ...رئيس لجنة المسابقات الفاتح باني اصلو ما قصر مع المريخ. . اوقف الدوري (3) شهور عشان رمضان عجب ومحمد الرشيد وبخيت خميس يكملوا ايقافهم في فترة توقف الدوري. . في عز (كورونا) الدوري الممتاز ما وقف كل هذه المدة. . في الثورة وقت الناس كانت بتموت في الشوارع ..والبلد ما كان فيها حكومة الدوري الممتاز كان شغال. . ويا ريت الفاتح باني لو وقف على كدا فقد قام بعد ذلك بتأجيل مباراة القمة حتى تكتمل جاهزية لاعبي المريخ. . اجلوها الى اجل غير مسمى. . يرجع التش وسيف تيري وصلاح نمر وتكتمل جاهزية الثلاثي الموقوف. . ثم بعد ذلك تلعب مباراة القمة. . ولأنهم يمكرون. . ولأنهم يكيدون كيدا. . مباراة القمة ان شاءالله سوف تكون (ودية). . مباراة احتفالية نلعبها بي ناس عصمت عبدالحميد. . بي ميسي وميسي. . يا ناس المريخ. . البطولة البتمشوا ليها (القضارف) عشان تجيبوا ليكم تقرير حكم وتسافروا ليها كادوقلي عشان تجيبوا ليكم (رقم وطني) وتمرقوا ليها لي (كاس) بعد ان تدفعوا رسوم الشكوى (40) الف جنيه استرليني بعد (نفرة هشام جنيه) يحققها الهلال باالشبل (عصمت عبدالحميد). . لا بنمشي ليها (كاس). . ولا اليمن. . ولا قطر. . ولا موزمبيق. . ولا كادوقلي. . ولا حتى القضارف. . بنحققها في (الملعب). . بعرق اللاعبين ما عرق الاداريين. . لا بنعمل نفرة لا بندفع 40 الف جنيه استرليني. . بطولة الممتاز بنجيبها كدا (حية). . من الملعب. . ما محتاجين فيها لمساعدات الفاضل ابوشنب ولا لاغاثة شانتير. . الفاضل ابوشنب ضربات الجزاء التى احتسبها للمريخ لو لقاها فريق درجة ثالثة بشيل الممتاز. . ولد عمره 17 سنة بجيب لينا البطولة. . الباشا عصمت عبدالحميد ..ربنا يحفظه..ويغطي عليه. . الموضوع ما محتاج (المحكمة الرياضية). . بنحسمو قبلو. . ولا عاوز ليه استقالة لمحمد الشيخ مدني بعد بيانه الشهير بعد مباراة المريخين في النقعة. . البطولات عندنا كدا. . من الغربال للشبكة. . ومن ياسر لى عصمت. . لا بنشرك لينا 4 محترفين في مباراة ونكسر اللائحة. . لا بنخالف اللائحة ونلعب بدون لاعبي المرحلة السنية. . ولا بنكوس لينا لي (شكوى). . لا هشام جنيه. . ولا عمار كنو. . عصمت عبدالحميد بس. . ان شاءالله الكلام دا يقع ليكم. . نحن لو عاوزين نرسم سيناريو مباراة الهلال والمريخ والله ما بنرسموا بهذا الوجع. . المريخ الاب عشم والهلال للدقيقة 80 ما يسجل. . جماعتكم بقوا يفكروا في المواجهات المباشرة. . بقوا يكوسوا في الشكاوي. . نحن اصلو ما كنا بنضع السيناريو بهذا الشكل المؤلم. . مريخ عشم. . ومريخ حلم. . مريخ اتبدهل. . واتوصف. . ومريخ هبط. . وكل هذا تم عن طريق عصمت عبدالحميد. . طبعا ناس المريخ بكونوا فاكرين عصمت عبدالحميد دا (حكم). . او عضو في لجنة المسابقات. . يا جماعة عصمت عبدالحميد دا لاعب المرحلة السنية في الهلال. . عمره 17 سنة. . خلى المريخ (وصيف). . ونزل مريخ الفاشر من الدوري الممتاز. . كفاح مدرب شاطر ...لعب بتكيتك ذكي مع الهلال. . راقب مريخ الفاشر محمد عبدالرحمن ووضع تحت الاقامة الجبرية خارج منطقة الجزاء. . وتحرك المريخ بعد ذلك بهجمات منظمة من مجدي عبداللطيف وحسين افول وشلش ليسببوا ازعاج كبير على الهلال. . راقبوا الغربال. . راقبوا عيد مقدم. . راقبوا عبدالرؤوف. . راقبوا ياسر مزمل. . الجماعة ما واضعين اعتبار لي (عصمت عبدالحميد). . قالوا دا صغير في السن وما محتاج. . عصمت اقتلع (الكرة) من حسين افول الذي كان نجم المباراة. . عصمت لا بعرف ليك د ازول كبير. . لا بحترم (السلاطين). . لا بعاين لزكريا حيدر. . ما بخت أي اعتبارات للحاجات دي. . معليش يا ناس مريخ الفاشر ..كنا عاوزين نهزمكم هزيمة كبيرة ...ونرسلكم للدوري الدرجة الثانية. . لكن فضلنا ان يقوم بهذه المهمة الشبل عصمت عبدالحميد. . لا الغربال. . ولا عيد مقدم. . ولا الشعلة. . ولا عبدالرؤوف. . ولا ياسر مزمل. . الموضوع كله بقوم بيه عصمت عبدالحميد. . هو الزول دا جابوه من وين؟ . والله ما في زول عارفو. . لا في زول كتب عنه. . لا شفناه في تمرين. . فجأة كدا قام يسخن. . نحن قلنا دا منو كمان؟ . شارك في المباراة. . قلنا المباراة دي صعبة على الولد دي. . دي مباراة (هبوط). . مباراة مغادرة. . لمن شفنا (الشبل) في عكسية ياسر مزمل يقلع الكرة من حسين افول ويثبت وهو وسط كماشة ويسدد في حلق المرمى. . لا كادوقلي. . ولا القضارف. . ولا كاس. . ولا الفاضل ابوشنب. . كدا عديل كدا. . قووون. . الدوري يتحقق من (الميدان). . وبي عرق اللاعبين. . وعن طريق الشبل عصمت عبدالحميد. . هذا الشبل يحسب للمدرب البرتغالي ريكاردو. . ريكاردو ادخل عصمت عبدالحميد المجهول للجميع في وقت صعب. . أي زول شاف التغيير دا ..قال دي مجازفة من ريكاردو. . لكن ما شاءالله عليه ...عصمت عبدالحميد ما خذل ريكاردو. . فات الكبار والقدرو. . حسم المباراة. . وحسم الدوري. . وشال البطولة. . وارسل مريخ الفاشر الى دوري الدرجة الاولى. . قلنا ليكم يا جماعة. . ما تحفروا للهلال. . ما تبيعوا الهلال. . عشان الجزاء بكون في النهاية على هذه الصورة. . وين نيل الحصاحيصا؟ . مريخ الفاشر لحق نيل الحصاحيصا. . كلهم هبطوا. . كلهم نزلوا. . نذكر ليكم اسماء تانية. . وإلّا نقيف هنا. . ...... متاريس . نجم المباراة في اعتقادي كان ياسر مزمل. . معقول بوجبا بهذا المستوى يبعد من المنتخب. . انتوا فيلود دا ..بقى يتابع حاجة غير الدوري الممتاز. . صلاح عادل هذه الطريقة التى تلعب بها تعرضك لاصابات. . ما تعقد الكورة كتير. . وما تلف وتدور. . العب الساهلة. . بكرة نرجع للمباراة ان شاءالله بتفاصيل اوفى. . مريخ الفاشر مع كل هذا قدم مباراة كبيرة. . مريخ الفاشر لو كان بيلعب بهذا المستوى في الدوري ما كان هبط. . لكن عشان مريخ الفاشر بيلعب لغيره. . عشان كدا هبط. . انا اول مرة اشوف لي فريق بيلعب لغيره اقوى مما يلعب لنفسه. . معليش. . دنيا. . .................. . ترس اخير : بكرة برجع ليكم – ما تمشوا بعيد