احمد يعقوب ود ابكر طيب زمان ! زمن الطيبة كان يصان و يفتكر! زمن الككر ! زمن الوداعة تمشي تجيك زي القدر . زمن الصلاح، زمن البنود تكابسن صف الكفاح! و في كل صباح يعم رباح ' مولود جديد تنور ضياء، وزغاريد البلد ، كواريك البلد، شمار البلد، شالو الرياح و انتشر، ويمر ليل و يشرق صباح والبندر ود الخريف كان خفيف! زي موية النهر و في كل صباح ايد يإيد الناس تصافح القمر! كان النجوم تدلى وتعيش مع البشر ! حليل يا حليل ! كانت الدنيا خير لا وعيد، ولا تهديد، ولا سجن للعبيد، كان الناس سوي/ القريب و البعيد. ولا دق حديد! ولا حريق! ولا خيل جنجويد ! ولا عذاب ولا هناك ويل حليل يا حليل كانت الدنيا خير احكي ليك عن منو! اقول شنو! من وين ابدأ و من وين اشيل' اوريك قصص الدقيل؟ ولا حكاية بت عجبنا نصاب الشرك ام حبيل وشن اقول ليك عن ولدمي و حبي القبيل ****** و الايام تمر، الايام تمر بنكهة و طعم صيف و خريف تخضر العشب و تسمع نغم واحنا نلعب، نعلب شيل شيليلو جوطة و عويل في رملة و ضو القمر و حسن اخلاقنا النبيل ' و ام قميدو! تيلم تيلم دانو، و حكايتنا الجميل في اليل الطويل نصنع المستحل. و ودابكر يهاوق الجبال، سلالم الخيال، الشجر الطوال، بالاماني يلقط حطب ود ابكريلقط حطب و يربِط حبال. بهناك ورى الدرأ جنب اللاداي مرحاكة الحجر وفطومة بت الفكي و ام ضيفان المرءاة الضكر تشفعن البرتال بالاشفي السنين طولة بال و حلم الزمن! تمسحن الكركار في يوم غبار ! الودك النضيف، و الخمرة الدلكة الخفيف، و حفرت الدخان و نار الجمر ما كان يشبهنا بنات العصر و لا كان قصر ! سلام عليك يا ود ابكر ' كنت شديد كنت منقذنا الوحيد و رسول الاطفال للوجيج و فرحة عمر، اهديتنا الامان، كستنا السكينة والدفء الضمان نسيتنا الحصل زمان، انت بطل. بالجد بطل ***** عشت في زمن الصبر، قُبال الفقُر! قبال الدفن الجماعي و قصة حفر القبُر ريحة القبُر! موت الكفٌر عرس الجبُر والدنيا تشد تيار و ترخي حوار، عمود وانكسر مرت زمان ولا كان امان و باطيل البشد الحيل الشاي المسيخ رحيت الفسيخ ! مُولاح العطرون الطعم قرض! حسابات الضرائب، مسئول المكاتب الزول الشوفت مرض قرض في مرض !! مرض في قرض و المرض علاجة موية القرض!! !! ود ابكر زهج !!! زهج و اتنفخ، ود ابكر ما عاد يلقط حطب قرر قرار، ود ابكر مليان غضب شن شن شنشنا شنين ام حبال، كش كش كشكشا ود ابكر مات غضب يا ود ابكر راجع القرار. ما تتهور و تشنج عصب ******** لكن ود ابكر ما عاد يرجع عتب. قرار و انكتب ود ابكر قرر ينتهي، و يندثر! ود ابكر قرر ينتحر! حرام عليك يا ود ابكر، لالالالا ما تنتحر لا ما تتنحر ******* كان يملك حلم، حلم مش اي حلم، حلم يقدر بتمن ود ابكر عمرو ما مسك كتاب و لا لمس قلم، تعلم من الاجداد، من حكاوى الحجات، من خبرة سفر القدم هم كان معيشة العيال و الخاف سِلم !!! وفي الجودية يقول كلام، ممزوج بحكمة و سلام، شكروه العمد و الشيوخ، و اتفرج الافندي المليان علم ********* يعني خلاص انتحر؟؟؟؟ تعالوا يا اولاد تعالوا يا بنات، اقعدو في الواطه قنٌبوُ في الواطة صنقروُ في الواطة عارفين شنو عن قصة ود ابكر؟ فاهمين شنو عن حكاية الطير الفي ضهر البقر؟ عارفين شنو؟ فاهمين شنو عن البلد ؟ عن تاريخ البلد؟ عن اسم البلد؟ شرف البلد؟ ؟ حكم البلد مساحة البلد؟ حكام البلد؟ سكان البلد؟ اصالة البلد؟ فاهمين شنو؟ شافين شنو؟ ؟ قارين شنو ناكشين شنو؟؟ عن السائر غلط في غلط، راجين منو؟؟ راجين شنو؟؟؟ ********* عاش ود ابكر، و قالو الخير تجي عاش مع بلعطت السمساري و قطرست الكمساري و صُحبت الدنداري و فلهمة العتالي، وعربدة حمار الاربجي. اكيد الخير تجي! و احتمال ما تجي و التمساح الكبير. بلاع المدن خراب الديار اكال السحت اب سنون كتير، نشفت التري و شرد اهل القرى و المصير مجهول و سلطان البلد مرة تطبق شرعية، و مرة تجيب نهب، و مرة تجيب مجاعة و الحالة صعب كتالين !!! ونهب اب سكاكين، و شريعة ضد المساكين، و الحالة صعب أتبدل حال و ساءت اهوال، ولا مطامير انحفر و لا نزل مطر، و الناس اتبدل و القلوب اصبح حجر ود ابكر يعاين لفرارو داك !! للدبنقا الفاضي هناك!!! لمطاريق الحوش القديم ! لإبرة خيط! لخراب البيت لقزازة الزيت! للعراقي المرقع و ياريت ، يا ريت كان ياريت استغفر الله سبحان الله الحمدلله ، يا رب يا رحمان مليون دينار، عدي الليل تسبيح و رقد و النوم هرب ! عاد الفكر لايام زمان ايام الطرب، تفُنج تفنج ام دوفوفو لبن العيش طوار البطن فوار الجسم ايام الدرت الغبيش و الصديق اغترب، ايام الدرت الغبيش هوي يا زول ماشي وين ماش شقيش هوي يا زول ماشي وين ماش شقيش الصديق هجر، و اغترب ، فات اغترب ما عاد هناك صديق . لف و دار و تاني فكر في ايام الجرب فكر في سروال الولد! جلابية الولد! بطن الولد ! و فكر كمان في مشاكل البلد ايام الجرب و المسكين الانضرب و الوليد الانكرب ، و كم و كم هرب !!! و الجندي اللئيم و جُمال العرب ******** يا حاج بتفكر في شنو؟ و انت زاتك منو ؟؟ يا حاج اولاد كم؟؟؟ و وزنوك كم؟؟؟ و لمتبن الصبر؟ لمتين يا تاجر الهم ؟؟ و الحالة كعب الحالة صعب ود ابكر يا اب سناً دهب، يا جمل الشيل يا راجل صعب، البي شوفك كان يتبسم زي نار القصب ود ابكر كان بحر ، يقوم الدغش وقكت الارزاق يدوب انكتب، وقكت فراج الكُرب ود ابكر ما كان زول شغب ، ولا بعرف تعب ، يشتغل زى الدربكين، زي دقاقة الدقن زي حربة و سكين يشقي لي لقمة المساكين يقطع عصب، و اخر اليوم يقصر مصاريف الحطب احمد يعقوب فرنسا / [email protected]