المؤكد إننا لن نبحث وراء أمين خزينة نادي الهلال الجديد المطروح منافسا للحكومة في دعم نادي الهلال ونقول هو منو؟ وما حا نقول قروشو (لو في) جابها من وين؟ ولا حا نسأل عن تاريخه وأسرته في عالم المال والاعمال لانه ده كله مابهمنا لا في كتير ولا قليل .. لو عنده قروش لي نفسو ولو عنده جبال متحركه من المال لي نفسو بإختصار الموضوع مابهمنا كتير .. الكلام ده بقولوا من ما جات ظاهرة رجال المال البظهروا فجأة يعني ماكانوا معروفين .. قلتو لما ظهر صلاح إدريس وقلته لما ظهر جمال الوالي وغيرهم من الذين سبقوهم والحاليين أمثال محمد مأمون واللاحقين لأنه ياما في الجراب ياحاوي.. والحاوي هو الذي يصنع زي الحكومة مثلا بتصنع رجال أعمال لغاية قبل 1989 (فترة وصولهم للحكم) ماكان في زول بعرفهم وديل ممكن تلقاهم حتي في (الحلة) أسرعادية ومتوسطة وبعضها رقيق الحال وفجأة يتغير كل شيء من البيت لغاية العربية من وين وكيف؟ الله أعلم لكن المعلوم إنه تبع الحكومة . الوسط الرياضي لاينفصل عن المجتمع وزي ماظهروا ناس عندهم قروش مابتتحسب في (الحلة) والبيت والشارع والمصنع ظهر ناس زي ديل في الرياضة وفي الرياضة في كرة القدم علي مستوي الاندية والناشئين دعمتهم الحكومة لأنهم كوادر حزبية معروفة ومع إنه المال البدوهم ليهو ده مال عام لكن مابدوهو لواحد حزب أمة أو إتحادي أو حتي شيوعي ولابعثي ولا لإداري عادي ليس له علاقة بالأحزاب وزي ماقلت قبل كده بدوك القروش لأنك زولهم مش لأنه قلبهم علي النادي أو بحبوهو أو لأنه نادي الحكومة زي مابتقال ولكن لأنه النادي الكوادرنا الفيهو فلان وفلان ماقلت ليكم قبل كده بديروا الكورة زي إدارتهم لشئون العباد في هذا البلد . لذا عندما يبدأ المطروح جمال الوالي جديد في الهلال (محمد المأمون) مشواره الاداري بتصريحات مثل (كل ثروتي وأموالي صفر علي الشمال أمام حبي للهلال) وعندما يواصل في تصريح آخر بلغة (الأنا) بقوله (جئت الهلال داعما وليس دائنا وعطائي إستمر لمجلسي سرالختم وشيخ العرب) .. نقول له إنتظر فقد جئت متأخرا لأن المعروف عند الجميع وبإعترافات موثقة من رئيس مجلس إدارة النادي وأمينه العام أن أموال الدعم التي تلقاها الهلال جاءت من الحكومة وتحديدا (رئيس الجمهورية ومؤسسات الدولة) حسب تصريحات الأمين البرير والكاروري .. وأقول له هذه الامور تحديدا لا ينفع فيها ( الأفضل أن تحضر متأخرا من ألا تحضر) لانك اصلا لم تكن موجودا والرجلان يحددان الجهات الداعمة للمجلس . هذا جانب وهناك جانب آخر يستحق أن نتوقف عنده قليلا وهي السيرة الذاتية التي قدمت علي صفحات الزميلة (حبيب البلد) لمحمد مأمون فقد جاء فيها مايلي : ( محمد المأمون عبدالمطلب خريج جامعة أمدرمان الاهلية (إدارة أعمال) .. إنخرط في العمل التجاري .. قام بتأسيس مجموعة نوبلز والتي ضمت مجموعة من الشركات .. المدير العام وصاحب مجموعة نوبلز جروب .. وتضم هذه المجموعة عدد من الشركات منها .. نوبلز العقارية ونوبلز الزراعية ونوبلز الصناعية وتانا للطرق والجسور ومستشفي رويال كير.. أيضا يوجد جانب ثالث من سيرته الذاتية يقول أنه يتولي منصب المدير العام لشركة جياد للجرارات والمعدات الزراعية ويتولي كذلك منصب المدير العام لشركة جياد للالمونيوم) .. وهي كما ذكرت شأن خاص حتي ولو إمتلك كل شركات السودان فهو أمر شخصي بحت وإن كان من ملاحظة حول آخر شركتين جياد للألمونيوم وجياد للجرارات والمعدات الزراعية وجياد كمؤسسة أو مجموعة معروف لمن تتبع .. لذا انسي يامحمد مأمون وخليك وخلينا مع الحكومة وقروش الحكومة .. hassan faroog [[email protected]]