اتزوجن رجال ذوو بشرة بيضاء. هه!! هه شنو؟ انتن مش دايرات تنضفن لونكن بطريقة آمنة لا تسبب لكم أمراض السرطان او الفشل الكلوي اوالامراض الجلدية بس خلاص اسمعن نصيحتي و(اتزوجن رجال ذوو بشرة بيضاء) وبكده لونكن ح يفتح وينضف عن طريق وليداكتن البتنجبوهن منهم! يعني حسع أولئك الرجال السودانيين الخُدر المنهزمين داخليا تطبيقا لمقولة: (نحنا نفتح في اللون وأنت جاي ترجعنا لورا) أحسن منكن في شنو؟!! ما هم زاتهم بيفتحوا وينضفوا ويبيضوا في لونهم عن طريق حرصهم على الزواج بسيدات من ذوات البشرة البيضاء لينجبوا منهم أطفالا ذوو بشرة فاتحة!! بعدين انتو حصل سمعتوا ليكم انه سوداني أخدر متزوج من سيدة بيضاء البشرة مع سبق الاصرار والترصد جاهو سرطان ولا فشل كلوي ولا مرض جلدي؟!! فآيتها الآنسات والسيدات من داكنات البشرة كان خلاص الانهزام الداخلي بلغ مداه لديكن إحساسا بالدونية بسبب لونكن الاخدر ولا الكاكاوي ولا الاسود ولا الداكن بلون قهوة النسكافية ولا اكان بلون الشيكولا، كلو عند العرب صابون! ومن ثم سعيتن للتبرؤ منه تفتيحا له وتبييضا فحتى لا تصيبكن الامراض جراء استعمالكن الكريمات الكيماوية ف(لتتزوجن رجال ذوو بشرة بيضاء) وبذا ستكونن أخذتن مساركن الصحيح بجانب ذاك الاخدر المنهزم داخليا والشاعر بالدونية صاحب مقولة:(نحنا ننضف في اللون وانت جاي ترجعنا لورا)!! والتي قالها ردا لطلب اخدر متلو للزواج من ابنته التي تنتمي السيدة والدتها للون الابيض بدرجة من القرابة. ولا اخفيكم القول أنني حال تأملي وتدبري قبل أعوام خلت في هذه المقولة إلا وأدركت أن قائلها ما هو إلا زول مهزوم داخليا ولو تعلمون أن شر أنواع الهزيمة هو هزيمة المرء داخليا والتي ما هي إلا ترجمة لشعور وتعايش احدهم مع إحساس الدونية التي سعى ويسعى مجتمعه الذي ينضح نفاقا وعنصرية لم ينجح في مواراتها بذاك الاحترام الزائف! والمصيبة أنه ذاك المنهزم داخليا إن كان سعى لنضافة لونه وهو ماسك خشمه عليه لمَ اكترثنا له ولكن إعلانه وتصريحه في القبل الأربعة بأن:(نحنا ننضف في اللون وانت جاي ترجعنا لورا) أدى بدوره لان تتبنى نسبة مقدرة إن لم نقل الاكثرية من السودانيين أن يسيروا على دربه! فلا أخفيكم القول أنني منذ انتبهت منذ أعوام لما تحمله مقولة:(نحنا ننضف في اللون وأنت جاي ترجعنا لورا) من تقليل لشان ومكانة السيدة الخدرا بقيت ما بهببوا واصم خشمي عليّ من الغناء أو الشيل غناء مشاركة لتلك المغنية حال سماعي لها كان في مسجل العربية ولا في مناسبة اجتماعية حال سماعي لها تتغنى قائلة: طويل أخدر قيافة ولا لي أخدر في المطار ولا اكان زولي الأخدر! اغني لمنو وأشكر منو يا عم فانا إييش بيضمني انه ايا من الخدُر البشكروا فيهم ذكرا في اغاني البنات ديل ليس ممن يتبنون مقولة:(نحنا ننضف في اللون وانت جاي ترجعنا لورا)!! لتنطبق عليّ مقولة القاهرة تكتب وبيروت تطبع والخرطوم تقرا؟!! أو لتبقى علي حكاية الخيل تجقلب والشكر لحماد!! وبالمناسبة يا داكنات البشرة الساعيات لتفتيح بشرتكن تبرؤا من لونكن! لو جاكن أيا من داكني البشرة وصرف ليكن شعارات من شاكلة: حفاظا على الهوية .. أوعكن تعرسن من غير لونا! ما عليكن إلا الرد عليه بكل شفافية قائلات: يا زول هوووي أسمع النقول ليك الهوية دي يا نقعد ونحافظ عليها ونحرسها سوا .. يا ننضف ونفتح ونبيض لونا سوا. ومع تذكري يا داكنات البشرة لشكر وشكير وتنبر داكنة البشرة بت عمكم الامريكية السوداء المذيعة اوبرا وينفري بالممثل الامريكي جورج كلوني وشخصيته بانه أي كلوني بيحسس المرأة التي يتحدث إليها بأنها بالنسبة له أهم امرأة في العالم و.. وشنو؟!! حسع شنو المناسبة الخلتك تتذكري وتطري لينا سيرة الممثل الأمريكي جورج كلوني هنا!! عاد كيفن ما اطراه واتذكره لأني أنا شخصيا لو كنت مصابة بفايروس الانهزام الداخلي تبرؤا من لون بشرتي ولكي افتح لوني بطريقة آمنة فلن اتزوج بغير وسيم مسلسل (ER) الانسان.. كلوني. لكن كلوني ده ما مسلم! فانى لك انتي المسلمة الزواج بكتابي!! البركة في فتوى الشيخ الدكتور/ الترابي .. و.. هه! وشنو!! و.. إعلان: بُشرى لداكنات البشرة: لتفتحن لونكن بطريقة آمنة! .. اتزوجن رجال ذوو بشرة بيضاء. [email protected]
