والله الريس دا حيرنا عديل ، يعني يا جماعة ، نحن الشعب البسيط دا ، نعرف تماماً ان ما ضيّق معيشتنا وشتت الناس في كل انحاء الدنيا ، هي مواقفنا هذه التي نراها صحيحة ، ولكنها عند الغير خلاف ذلك ، وعارفين كمان انو ما غلطانين انحنا على العالم ، لكن يا عم الريس السياسة العالمية كما خبرت ، خصوصا الايام دي ما بتعرف الغلطان مين ، إنما تتربص كثير من الدول الفرص السانحة لتتفيذ أجندتها . انت آبكريق في أيام زي دي داير تشيلك أربع موبغات سياسية قاتلات :- الاولى:- آ ريس موقفكم من ايران ممزوجا مع موقفكم السابق مع دخول امريكا للعراق ، وحتى لو كان موقف سيادي او اخوي او اسلامي ، سمّه ما شئت ، وانت عارف انو العراق شايل في إبطه دولة لها سيادتها وهي الكويت ، والكويت والخليج كله لا يمكن فصل مصالحه وجيناته البشرية، داير تقول لي موقفكم من ايران ، و دخول وخروج السفن الإيرانية (اليومين ديل) ، في البحر الآحمر ما بغطس حجرنا؟ الثانية آبكريق :- موضوع أبيي على الابواب ، وهذا التزام دولي لدولة الجنوب والتزام استراتيجي ، وأخلاقي ، حتى لو كنتم تحسبونها من حقوقكم ، وقررتم ما قررتم من عدم السماح بالاستفتاء، تفتكر دا براه ما بغطس حجرنا؟ والثالثة آبركيق :- ماشي لي أمريكا الايام دي وهم كايسين ليك بي خت الودع وانت تبني لينا على أخلاقيات وقوانين امريكا ، ياخي والله لو دخلوا عضوية المحكمة الدولية اثناء سفرك في الجو لاسبوع واحد يكفي لقبصك ، الناس ديل ما يخلوك، يا زول!!! والربعة آريس : خلاس يعني عاجباك رفاهية المساكين من شعبك داير ترفع ليهم ( عفريتة) عربة حياتهم من جانب واحد هو البترول ، وانت عارف دي عفريته العربية كلها ، يا ريس احذر امامك عتاريس والشغلانية دي بتفور عليكم اللساتك ، وحتى لو ظننت انكم الايام دي بتحاولوا ترضية سياسية داخلية ما ، ستفسر على انكم تريدوا ان تطبطبوا بيها على كتوف الناس حتى لا يخرجوا للشارع ، وتفسر على انها علاجات موضعية ، حتى لو كنتم صادقين فيها ، وهذا وذاك سوف يخلق ميادين للتحرير ورابعة قريبا جداً ... وانت ماشي في نفس الطريق المصري يا ريس. سبحان الله بعض الرؤساء يصل بهم الاعتداد بالرأي ما لا يمكن معه قبول الرأي الآخر ، وبعضهم لا يفرق بين مواقفه الشخصية والنفسية والمبدئية ، ومواقف ومصالح دولته وشعبه ، فيقرر( انه ) دولة ممانعة ، يا ريس والله دا رأيك براك ، وليس رأي الشعب ولم يستفتَ فيه. يا ريس راجع جماعتك المستشارين ديل ، والله لو كانت القرارات دي متفق عليها معهم يبقى حيغطسوا حجرك وحجرنا معاك ، وكان شايل الشيلة دي كلها براك، ياريس ، دحين ، قول بسم الله الرحمن الرحيم ، نحنا ما عندنا قرون نناطح بيها دا كلوا ، والناس في السياسة بختوا فيها قشة ، الموضوع مش الرزق من الله او خلافه ، نعم بالله ، وفي السودان من هو متوكل على الله الف مرة اكثر منك ، ولكنه ، يعرف اعقلها وتوكل ويعرف ولا ترموا بأيديكم للتهلكة . اللهم هل بلغت فأشهد. الرفيع بشير الشفيع rafeibashir [[email protected]]
