بسم الله الرحمن الرحيم سلكشن الحياه تمضي بسرعه جعلتنا نفقد التركيز , متطلبات لاتعفينا من الوفاء بها والتزامات تجعلنا نئن تحت اقدام المستحيل للايفاء بها , لا مصاريف المدرسه بتستحمل تأجيل , ولا سداد الكهرباء المقدم فيهو طريقه للتأجيل ولا كرش الفيل في حبة البرد ده تستحمل تأجيل البوش لعشره دقائق , ولا صاحب البوش يستحمل تأجيل سداد رسوم البوش , بل اصبح السداد مقدم , يعيني الحكومه احسن من سيد البوش بي شنو ؟ وكت الحكومه امنا وهمنا تصر علي ان نسدد اي شئ مقدما لماذا يحن علينا بتاع البوش ؟ المهم الحياه تخنق والحلقوم ضاق من الخنق والصوت بحه من ضيق الحلقوم واصبح صوتنا صاااااااامت بدون نغمه , قاموا الناس فكروا يبيعوا بيوتهم ويمشوا لي ورا عشان يستفيدوا من فرق العمله , اقصد فرق السعر , وبعد شهور قليله تكمل القحه ويكون الزول فقد بيتو القريب وجارو الحبيب والحله التي تربي فيها من اجل مال بسيط عديم عشره فارقه في سرعة الصوت , والغريبه الناس البشتروا البيوت ليسوا من الناس القدااام سكان المنطقه التي يوجد فيها البيت الضايع , ناس جداد لنج , اتوا ورزقهم يجري خلفهم , واحد ولدو مغترب ( عامل ) في الخليج اضطر لبيع البيت للظروف اعلاه ورحل للحارات الجديده وضاع فرق السعر كما ضاع من الناس قبله , ولدو رجع البلد ولقي البيت بفتح علي الجبل في منطقه يسميها اهلها اصطلاحا السودان قفل , وسموها السودان قفل عشان البيوت مقبله علي الجبل , تاني بعدها مافي الا فاس الماوراها ناس , الولد زعل وقال لي ابوهو يا ابوي الناس بتمشي لي قدام ونحنا راجعين لي ورا , الابو اتحكر وقال : ياولدي الناس العرفوها بدري اغتربوا هنا جوه البلد ما زيكم خريجين وتطلعوا بره البلد تشتغلوا عمال , اريتك لو سمعت كلام حامد صاحبك في الجامعه لما قال ليك ابقي معانا تضمن مستقبلك وانت كنت قايل المستقبل في الاكاديميات وقريت لما طلعت اول الدفعه وطلعت بي قد القفه وحامد صاحبك الودر زمنو في الندوات واللقاءات ولتخرج بعدك بي سنتين ومملحق كمان , الليله الامين العام لمجلس شنو كده ماعارف ورئيس منظمة شنو كده ماعارف ورجل البر والاحسان , الولد اصابتو دهشه من كلام ابوهو وقال : يا ابوي وكت انت عارف ده كلو عن حامد كان ترجع ليهو بحكم علاقتي بيهو يحلحل ليك المشاكل بدل تبيع البيت , الابو اطلق آهه طويييييله وقال : مشيت ليهو وشرحت ليهو كل الحاصل وقلت ليهو لو ما لقيت حل مافي طريقه غير ابيع بيتي , الولد قال :غريبه حامد ده صديقي لحد الثماله وماساعدك ليه ؟ الاب قال ساعدني ياولدي , الولد قال : حيرتني ياابوي ساعدك كيف وانت بعت البيت ؟ الاب قال حامد هو الاشتري البيت . سلكتد ولا خير علي الدنيا اذا لم يك بها صديق صدوق صادق الوعد قد وفا والي لقاء
