طائرة الزعيم تصل المطار ويترجل منها لكنه لم يجد احتفال او كرنفال من اجل استقباله مثل سافراته السابقة وجد عدد من السيارات الرئاسية طارت به الى القصر وجد نائبه وامير جنده وعدد من المساعدين جلس الزعيم وسط المجموعة ساد صمت رهيب المكان يقطعه صوت نائب الزعيم : حمدلله على السلامة . الزعيم : الله يسلمك . امير جند الزعيم : كيف كانت الرحلة ؟ حمال شنطة الزعيم : الرحلة كانت جميلة وماتعة ومليئة بالمغامرات والمواقف الطريفة المسلية و استمتعنا بالامطار والاجواء الجميلة وعملنا مساج للركب . الزعيم : المهم الاوضاع هنا كيف ؟ يصمت الجميع .... يتجمع العفرت في وجه الزعيم ... يضرب بعصا ارض الحجرة ... يرتعد الجميع .... يأتي صوت امير داخلية الزعيم من الخارج : الاوضاع غير مطمئنة خالص يازعيم. الزعيم ينتفض ويرغي ويزبد كيف الكلام ده ؟ امير جند الزعيم : البلد مكركبه مظاهرات واعتصامات معلمين واطباء وصيادلة اعتقلنا كل قيادات الحراك لكن الحراك متزايد بشكل يومي ومتمدد ومخيف . الزعيم : وين الجماعة القاعدين نعلف فيهم السنين الفاتت دي كلها . نائب الزعيم : ديل انا خائف منهم هم اصبحوا خطر علينا اعتدوا على المواطنين واستكرتوا الجيش ورده عليهم والجيش الان هايج ومايج . الزعيم : يضرب الطاولة ويتشتت الورق والحضور جيشي هايج كيف الكلام ده ؟؟والله دي فوضى تحتاج حسم. نائب الزعيم : يازعيم ده جيش البلد ممكن صمت كتير على افعالنا وافعال الجماعة لكن ما بصمت طول الوقت وحادثة الاسبوع الماضي خير ديل عشان كده نتخلص من الجماعة ديل سريع . الزعيم : عملتوا شنو عشان تمتصوا غضب الشارع ؟ امير جند الزعيم : طلعنا بتاع الصحة اسمو منو ياربي ؟ المهم عمل مؤتمر صحفي قال تراجعنا عن اسعار الدواء لكن المؤتمر راح زي بندق في بحر ما عمل حاجه مافي زول صدقوا يعني ماجاب نتيجة . الزعيم : كان تقطعوا الانترنت . نائب الزعيم : مابنفع الحملة اصبحت عالمية وتجاوب معها كل العالم . الزعيم : وين كتائب الجهاد الالكتروني ؟ نائب الزعيم : ديل راحوا شمار في مرقه. الزعيم : بهياج اعتقلوا كل مشارك في الحراك والوقفات والدعوات دي الان . امير جند الزعيم : ما بنفع كل الناس مشاركة فيه الا نعتقل كل الشعب . نائب الزعيم : بكره كمان في دعوة عصيان مدني وناجحة ميه الميه مافي شك . الزعيم بزعر: انت معنا ولا معهم يا زول؟ نائب الزعيم : انا بقول ليك الحقيقة عشان ماتنخدع ساي . الزعيم : وين ناسنا بتاعين النقابات حقتنا ؟ امير جند الزعيم : ديل اصبحوا خارج التشكيلة الان تشكلت نقابات بديلة فاعلة وهي التى تقود الحراك ومسنودة من كل فئات وقطاعات الشعب . الزعيم : يشرب ثلاثة قوارير ماء ويتنحنح وبصوت ضعيف : دعوة العصيان دي الناس اتجابوا معها ؟ امير جند الزعيم : تجاوب منقطع النظير فاق تجاوب ابريل ياخ اولادنا مشاركين فيه والناشطين كتبوا الدعوة على جدران بيوتنا . الزعيم: الحل شنو ؟ امير جند الزعيم : تسافر بس . الزعيم : اسافر وين ؟ انت جنيت ؟ امير جند الزعيم : تسافر اي دولة من الدول البنثق فيها. نائب الزعيم : اي تسافر بس ده الراي السليم لانه متوقعين كتمه شديدة . حمال شطنة الزعيم : تسافر دولة نجرستان انا عندي عمارة هناك . امير داخلية الزعيم : خلاص تسافر يازعيم لانه الشغله دي منتهية وقيامتنا قايمه قايمه والشعب قرر خلاص كان فشلت تعال راجع والله اعلم تفشل وكان مافشلت اقعد هناك قبلك. الزعيم : اسافر كيف بدون مناسبة اهجم على الناس ساي . حمال شنطة الزعيم: وجدتها سمعت قال عندهم سباق فورميلا ون تمشي تحضروا ونشوف نهاية الحكاية شنو. نائب الزعيم : كيف نبرر سفر الزعيم للناس في الوقت الحرج ده ؟ امير جند الزعيم : اتصل على بتاع الاعلام خليه يشوف شغلوا قاعد ساي يقبض في المخصصات . التلفون يرن توت .. توت .. توت من الطرف الاخر يأتي صوت بتاع اعلام الزعيم : الوو يازعيم حمدلله على السلامة الزعيم : اسمع انا مسافر احضر سباق الفورميلا ون انت شوف بتاعين جرايدنا يتصرفوا وينشروا خبر سفري بصورة مشرفة. بتاع الاعلام : محلوله ح نقول سافر الزعيم في زيارة رسمية تستغرق عدد من الايام من اجل بحث سبل تطوير العلاقات بين البلدين الشقيقين ويرافقه عدد من الوزراء لكن ماقلت لى يازعيم انت مسافر عشان شنو؟ الزعيم يفصل الخط بعصبية باينه عليه. وسافر الزعيم وكانت رحلته الاخيرة خارج البلاد ولم يعد منها وهنالك محاولات جارية من اجل اعادته للبلاد ومحاكمته وكما تجري مدعية المحكمة الجنائية الدولية مباحثات مع سلطات الدولة المضيفة له من اجل تسليمه لها ومحاكمته . **** العصيان المدني 2016/11/27م خيار الشعب وبأمر الشعب لايفوتك شرف المشاركة فيه العصيان المدني خطوة شعب في طريق الخلاص الوطني العصيان المدني من اجل وطن اجمل وغد افضل . وتطلع شمس مقهوره بخط الشعب ممهوره تخلي الدنيا مبهوره إراده وحده شعبيّه **** [email protected]
