جاء في الانترنت ان شركة يابانية طلبت من مصر مليون حمار بقيمة نصف مليار دولار وذلك لاستخلاص مادة من جلود الحمير تستخدم في صناعة دواء لشرق آسيا، الدراسة اجريت لعدة انواع من الحمير (هندي، تايواني، امريكي، فيتنامي، وافغاني) الحمار المصري وجد انه غني بالمواد المطلوبة بفضل سمك جلده.. عدد الحمير المراد استيرادها مليون حمار ومصر فيها حوالى 700 ألف حمار فقط.. فكرت الشركة في انشاء مزرعة لتسمين الحمير وذبحها والحصول على الجلود (لاستخلاص المادة واللحم سيكون من نصيب التماسيح التي سيعمل لها مزرعة)، سعر الحمار يتراوح 400 الى 600 دولار. تعليق: مسكينة الحمير بشيلوها الاثقال على ظهرها ويضربوها ويشتموها وبعد ده كله دايرين يقرضوها ويعدموها. معلومات وحكاوى عن الحمير: ٭ لو قالوا ليك الجماعة اتشاكلوا ووصلوا سوق الحمير معناه ختوه قرض وشكلتهم كان ليها ضل. ٭ هناك اعتقاد سائد اذا وجدت حمارا في الليل جمب برميل الوساخة، ده معناه ان الشيطان متقمص شكل حمار ، في الحالة دي اتبسمل وفك البيرق. # بعض السذج في الكورة يقولوا لو دفنوا حمار حي فريقهم حيغلب ابقى ما فرق بين المشجع والمدفون. ٭ يقال ان (مرفعين) طارد حمارا الى ان جاء في ارض طينية ولزجة وغرست ارجله هو والحمار في الطين، المرفعين قال للثعلب والله دي وكرة شديدة، الثعلب قال ليه لا الوكرة الشديدة الصباح لما يجوا اسياد الحمار!! ٭ امرأة سايقة ليها اربعة حمير، الاولاد قالوا ليها ازيك يا ام الحمير، قالت ليهم اهلاً يا ابنائي.. ٭ واحد حب يغيظ صاحبه، قال ليه تتصور وانت جاي من بعيد عرفت الحمار وما عرفتك، قال ليه صدقت لان الحمير بتعرف بعضها. ٭ حاكم وديكتاتور عربي كان بسجل زيارات دون اخطار مسبق للاسر جلس مع اسرة كان من ضمن افرادها طفل، الحاكم قال للطفل عرفتني؟ قال ليه ايوة انت البتظهر في التلفزيون وابوي بقول عليك حمار. ودي آخر مرة يشوف فيها الطفل أبوه. ٭ حمار الكارو قال للحمارة خطيبته يا ترى بتحبيني لشخصي ولا علشان عندي عربية؟!. ٭ واحد ابله حماره ضاع مشى يفتش عليه في الغابة، لاقاه حمار وحش قال الحمار الاهبل ده متنكر قايلني ما حأعرفه. ٭ الراجل قال لزوجته انا ماشي السوق حأبيع الحمار واشتري ليك هدية، جاء زعلان لأن الحمار اتسرق، زوجته قالت ليه دخلتك علينا تساوي ألف حمار. ٭ الحمار سأل اخوه قال ليه عملية التنفس بتتكون من شنو؟ قال ليه من شهيق ونهيق. خواطر حمار فيلسوف: عجبي عليك يا ابن آدم يا كبير الدار قومت الدنيا وما قعدتها لما قالوا عليك حمار هو اصلو اسمي شتيمة ولا جنسي عار خلقني ربي وخلقك وما فيش زول عنده خيار وانا مهما زاد الحمل فوقي صابر على المشوار لا بعاين لزول غيري وأحسده ومنه اغار ما بدفع مهرا لحمارتي ولا شبكة ولا سوار عايش في حالي مبسوط وعندي اسرار وابن آدم بيخدمني ليل ونهار اذا جعت يشتري برسيم وقش بأغلى اسعار خادم أمين من غير راتب ولا حتى ايجار دلوقتي عرفت يا ابن آدم مين فينا الحمار؟ هدايا الحلقة: 1 - الرباطابية راكبة في القطر مع شايقية، لما وصلا ابو حمد ، الشايقية قالت للرباطابية دي ابو حمد؟ قالت ليها لا دي (ابو ظبي)! 2 - الرباطابي مشى يطلع جنسية، الضابط قال ليه الا تجيب واحد من طرف ابوك عنده جنسية يشهد ليك، قال ليه (طيب داريو كان ده ود عمه لقيته وين)!. 3 - واحد عنده سكري شديد، عرس ليه واحدة مسيخة «سنة يا الاستون». 4 - واحد كسلان قالوا ليه بعد ما تصحى من النوم بتعمل شنو؟ قال ليهم برتاح شوية. 5 - صعايدة بياكلوا في قصب سكر، لما انتهوا ودايرين يمشوا ما لقوا عكاكيزهم. خاتمة: أثبتت دراسات عديدة ان الحمار حيوان ذكي بدليل انه يعرف لوحده الطريق لمنزل سيده، الجماعة الحاقدين على الحمار برددوا مقولة (كترت التكرار بتعلم الحمار) المشكلة دلوقتي بقت ما في غباوة او ذكاوة ، المشكلة بقت في بقائه على وجه الارض اذا ناس اليابان بدأوا في ذبحه للاستفادة من جلده وتقديم لحمه للتماسيح.. اين منظمات الرفق بالحيوان يا ناس اليابان؟ (حاو تر).. مع تحياتي..