# النساء أكثر تلهفاً للأخبار والشمارات اكثر من الرجال، الشمار عندهن له طقوس وجلسات عادية وجلسات قهوة، الشمارات تطورت مع التقنية الحديثة بقت بالموبايلات وبالنت الثابت واللابتوب، يعنى الواحدة مستعدة حق المصروف تشتري كرت شحن للموبايل او تدفع اشتراك النت.. والغداء ممكن تسخن ليها اي حاجة من التلاجة او تعمل عدس سريع او سندوتشات او اى حاجة المهم الموبايل يكون استايل ومليان وحالو ما مايل. # هذه الحلقة نخصصها لقصص واخبار ظهرت في الصحف او على الانترنت مع التعليق على هذه الاحداث: 1- فتاة عميانة في قرية نائية احبت شاباً طيباً بصورة كبيرة جداً ولأنها لم تره كانت تقول له انها ستتزوجه اذا استطاعت ان تراه بعينها، حدث ان تبرع لها شخص بعيونه وبعد العملية وبعد ان فتحت عينيها ورأت حبيبها وعلمت انه اعمى رفضته لما تقدم للزواج منها فابتسم الشاب وقال لها: فقط ارجوكي ان تحافظى على عينيّ اللتين معك. (التعليق: في حب يا اخوانا اكتر من كدا) وفي غدر افظع من ده غايتو ده كان انا كنت قددت ليها عيونها اقصد عيوني. 2- غرق عامل مصنع الفطائر في بنسلفانيا في قدر ملئ بالشكولاتة (حبيبي غاطس في صحن البطاطس). 3- في بولندة زعلت المرة عندما ابلغها زوجها انه سيطلقها ونزل من العمارة وبعد مدة فكرت في الانتحار ورمت نفسها من الطابق العاشر، وفي هذه الاثناء وصل الزوج في خارج المبنى فوقعت عليه ومات ومات هو وعاشت هي. قصتها دى ذكرتنى بقصة المرة التى اعطاها زوجها ثلاث طلقات ولم تمت. 4- في واحد في تكساس أخو خطيبتو فك فيه طلقة ولكنها لم تصبه وأصابت الشجرة التى خلفه، وبعد عشرين سنة وهو يقطع في جذع الشجرة انطلقت الطلقة واصابته في رأسه وتوفى في الحال. (الفكي قال للراجل نكتب ليك كتاب انشاء الله ما تموت الا اذا كان اجلك يتم). 5- اربعة مشعوذات في المكسيك بجهزوا في خلطة يستعملونها في الشعوذة وهي من الاعشاب والامونيا، الساحرات متن بسبب الابخرة المتصاعدة (التسوي كريت في القرض تلقاهو في جلدها عقبال المشعوذين العندنا). 6- في واحدة من سنغافورة حرشت كلبها على الخادمة الاندونيسية لما اتشاجرت مع زوجها والكلب المحرش عض الخدامة (صحى والله الريد قسم واحدين يوصلوهم شارع الزلط وواحدين يوصفو ليهم البيت غلط وواحدين يحرشوا ليهم الكلب). زوجات المشاهير: 1-. زوجة فرويد: مارتا فرويد زوجة العالم الشهير سيموند فرويد كانت تقضى معظم اوقاتها وراء الستار الذي يفصلها عن مكتب زوجها كانت تسمع وترى اشياء خيالية لكنها ترى في زوجها حاله غير شاذة (وياحنوني وعليك بزيد في جنوني). 2-. زوجة ماركس: جيني ماركس كانت من اسرة غنية وكارل ماركس كان فقيراً معدماً، تحملت الفقر وكل ألوان الاذلال والسبب سحر نظرات ماركس وليس من اجل نصره البوليتاريا (الريد قسم يا عينيّ). 3- زوجة سقراط: كانت تعيسة جداً، عشقت استاذها وهامت به حباً وهي في عمر الزهور (15 سنة)، لكنه لفظها واحتقرها لحدي ما جنت، سقراط فيلسوف يوناني فتح لى حبيبته وزوجته ومشى (يجكس) لحدى المسكينة ما جنت. هدايا الحلقة: 1)- حلفاوي صلى بالجماعة الجمعة بعد الصلاة سأل صاحبه رأيك شنو فيني؟ قال ليه كويس بس عنك أخطاء: أولاً: المنبر عنده سلم ما في داعى تتلب. ثانياً: ايه حكاية السيجارة بين الخطبتين؟. ثالثاً: ما في صحابي اسمه تامر. رابعاً: ابو جهل صاح كافر بس ود الحرام دي مافى داعى ليها. خامساً: الملك فهد ما شارك في صلح الحديبية. سادساً: غزوة بدر ما كانت بالطائرات وما استعملوا فيها الاسلحة الكيماوية. سابعاً: امية بن خلف صحيح باع بلال بن رباح لكن ما لى ناس برشلونة. 2- الحلفاوي سأل امام الجامع: ما هى الحكمة من الصوم؟ قال ليه للاحساس بما يعنيه الفقراء من الجوع والعطش والمعاناة، قال ليه طيب انا حسيت ممكن اوقف؟!. 3- واحد من اهل الخيال سمع فنان بقلد ابو داود عليه الرحمة فعلق قائلاً: والله ابو داود ده من ما مات صوته بقى كعب!. 4- في رمضان كان حار جداً حلفاوي صاحبه قال ليه رمضان سخن جداً الحلفاوي قال ليه ما من صالحوا!. 5- بعد فوز مرسي بالرئاسة اعلن الاخوان عن تأسيس فريق كرة قدم للمشاركة في الدورى واهم القرارات: أ.- عدم الانفراد بالمرمى الا بوجود محرم. ب- اللاعب الذي يطرد كفارته كفالة يتيم. ج- يمنع حساب الهدف خارج الارض بهدفين.. لشبهة الربا. د- الخروج على الحكم جائز.. اذا لم يحكم بكتاب الله. ه-. نسبة لأن الصافرة محرمة شرعاً تستبدل بالدف او النحاس. و- الشورت لابد ان يكون تحت الركبة. ز- عدم استقدام حكام اجانب.. حيث انه لا ولية لكافر على مسلم. ح- العرقلة من الخلف حرام ويلزمها كفارة صيام ثلاثة ايام. 6- الزوج: حلمت انا في الجنة. الزوجة: وانا كنت معاك؟ الزوج: ايوة علشان كده عرفت انه حلم!. 7- رباطابي سايق عربية وقفوه ناس التفتيش قالوا ليه شايل شنو؟ قال ليهم جنى حرام، فتحوا الضهرية لقوه شايل بيض جداد، قال ليه بتهظر معانا ولاشنو؟ شايل جنى جداد وتقول لينا جنى حرام، قال ليهم ايوة جنى حرام شفتو ليكم ديك عقد ليه على جدادة؟!. 8- حنكوش اتشاكل مع صاحبه عايز يدعى عليه قال ليه: انشاء الله الشامبو يخش ليك في عيونك!. 9- واحد من اهل الخيال خش معاينة لوظيفة سألوه في المعاينة قالوا ليه: ما معنى الترتيب الانتقائي لابجديات الهوس الآيديولوجي في الوجدان الروحي؟ قال ليهم معناها انتو ما دايرين تشغلوني!. خاتمة: # شمار كتير انا تانى ما بجي بالحلة ديك تاني ما بجي. # ونحن نقول لاخواتنا النسوان ما حنقول ليكم بطلوا الشمار لانكن ما حتقدرن بس ما تنسجموا في الشمارات لحدى ما الحلل تحرق. مع تحياتي
