* من تجليات أزمة الرغيف خلال الفترة الماضية ظهور (حكمة) تقول :(للواقف في الصف فرحتان فرحة لما يدخل الضل وفرحة لما يستلم رغيفو) .. * وعادة (الضل) في الفرن لا يتجاوز (متر لقدام) خلال ساعات النهار .. * ولذلك تكون المعاناة كبيرة في سبيل الوصول إلى (ضل الفرن) ومن بعد ذلك المعاناة الأكبر في الوصول إلى (شباك الفرن) .. * وأنت واقف في الصف (بتحسد) الناس الوصلوا (الضل) .. * في كثير من المرات بيكون همنا نصل (ضل الفرن) ولا يهمنا كثيراً الرغيف .. * لدرجة إنو بيجيني إحساس إنو نحن جايين مستهدفين (الضل) وليس الرغيف .. * لما تصل (ضل الفرن) بتفرح فعلا .. * وإحنا في (الصف) بنحمد الله مرة ، وبنسجد مرة .. * أما الحمد فاننا نحمده عند وصولنا (ضل الفرن) ، أما السجدة فاننا نشكره سجوداً لحظة إستلام (الرغيف) .. * وبما أن ذلك كذلك فان نجوم هلال الأبيض ومن خلال مباراتهم أمام المريخ أمس الأول كانوا بيفرحوا لما (الكورة) تمشي (الحتة) الفيها (نجيلة) .. * والله صحي .. * أنا غايتو لاحظت لمعاذ القوز بيكون مبسوط جدا لما الكورة تصلو وهو واقف في الحتة الفيها نجيلة .. * من شدة (النقعة) الموجودة في الإستاد اللاعبين بيفرحوا ب(المتر البيكون فيهو نجيلة) .. * نجوم هلال الأبيض إتعاملوا مع المباراة زي تعاملنا مع (الصف) .. * معاذ القوز بيحمدالله لما الكورة تصل الضل _ أقصد _ بيحمدالله لما الكورة تصل (النجيلة) .. * لدرجة إنو نجوم شيكان إستهدفوا النجيلة ولم يستهدفوا شبكة المريخ .. * والأسوأ من النجيلة التحكيم .. * الكل يعلم أن معظم كأسات المريخ المحلية حققها عن طريق (الدفرة) .. * هذا مفهوم ويعلمه حتى أهل المريخ .. * ولكن ما هو جديد أن (يندفر) المريخ بعد نهاية المباراة .. * الدفرة داخل ال(90) دقيقة ممكن نقبلها لكن دفرة بعد الدقيقة (93) ما بتتبلع يا أبوشنب .. * حقق المريخ أكثر من إنتصار عبر (المكتب) وليس (الملعب) ولكن كان ذلك في عهد مجلس إتحاد اللقيمات .. * في عهد اللقيمات ممكن المريخ يزوغ من المباراة ويدوهو التلاتة نقاط .. * أما الآن فان المريخ يريد أن يتحصل على النقاط بعد نهاية المباراة .. * يعني تقدر تقول في تحسن لحد ما قياسا بالعهد السابق .. * في تحسن نسبي .. زمان بيشيلوا النقاط بدون ما يلعبوا ، وهسه بيلعبوا لكن دايرين يشيلوا النقاط بعد المباراة تنتهي .. * لا نشك في نزاهة وإستقامة شداد ولذلك نطلب منه تصحيح وإصلاح جهاز التحكيم .. * هو عليك الله هلال الأبيض وقت وافق يلعب في الزريبة عايزين تغدروا بيهم كمان .. * كونو تلعب في إستاد المريخ هذه الأيام ده براهو غدر وطعن من الخلف .. * ملعب لا يصلح حتى للنظر .. * نجيلتكم دي أنا لما أشوفها شوف بالعين بحس بوجع أسفل الساق .. * شوف بس .. * تشوفها تحس إنك قطعت رباط صليبي .. * ولذلك من المهم أن يخرج ملعب المريخ من الخدمة .. * لابد من قرار يصدره شداد شخصياً بمنع ممارسة كرة القدم بملعب إستاد المريخ الشهير بإستاد الحكومة .. * اللعب على التراب أفضل وأرحم من إنك تلعب ليك في ملعب عامل زي (وش البت الما نفع معاها الكريم) .. * ملعب زي (الصلعة المحلوقة بقزازة) .. * ملعب ترابو أكتر من نجيلتو .. * وطبعا أي زول بيلعب حسب نجيلتو .. * ومستوى المريخ في المباراة كان من مستوى نجيلتو .. * ولولا هذه الأرضية السيئة لأنزل التبلدي هزيمة قاسية على المريخ .. * لكن أنقذكم الملعب .. * المريخ عشان ما يخسر داخل ملعبو لازم يحافظ على سوء نجيلتو .. * النجيلة دي لو إتصلحت ما في صالح المريخ .. * وعلى فكرة .. مباراة القمة باقي ليها أقل من أسبوعين .. * ونجيلتكم الشافتها عيني دي شهرين ما بتقوم .. * غايتو نجيلة غريبة جدا .. * ما حصل شفنا لينا نجيلة بتعطش في عز الخريف .. * إنتو متأكدين إنو دي نجيلة ؟؟ * يمكن يكون (قش) ساكت .. * أنا شايف أول حاجة لازم تتأكدوا إنو دي نجيلة وألا قش ساكت .. * دي الخطوة الأولى .. * بعد تتأكدوا إنها نجيلة (وأشك في ذلك) بعد داك أمطوا الحتات الفيها نجيلة وأرموا تيراب فول أو سمسم وحولوا مبارياتكم لملعب الخرطوم .. * الإستثمار الجد في الزراعة .. * ولا أظن أن هذه المعلومة غائبة عن محمد الشيخ مدني .. * أزرع وأكسب زمنك .. * المهم .. * يؤدي الهلال مساء اليوم (الواجب) أمام المصري البورسعيدي .. * وهي مباراة لا تهم الهلال إلا في حدود حفظ ماء الوجه .. * يلعب الهلال بدافع (حفظ ماء الوجه) ولذلك لابد من إنتصار يعيد التوازن ويكون الإنتصار الأول للفريق في المجموعات .. * كنا نتمنى أن يكون وضع الفريق أفضل وأن تكون مباراة اليوم للقزقزة بعد أن نكون قد ضمنا التأهل .. * الطبيعي أن هو أن يسافر الهلال إلي القاهرة لأداء مباراة اليوم وهو ضامن للتأهل .. * ولكن حدث العكس .. يلعب الهلال لأداء الواجب ويلعب المصري والمغربي وهما ضمنا التأهل .. * نعم هو حال الكرة ولكنه حال مجلس الهلال أيضاً .. * كرة القدم فوز هزيمة تعادل ، ولكن كرة القدم في المجموعات شغالة معانا (هزيمة تعادل) .. * ما شفنا ليها فوز .. * ولذلك نقول هذا حال الكورة وحال مجلس الكاردينال .. * ونركب صافنات ونجيبة (حلبية) وأصلو الزول بيموت والذكرى تفضل حية .. * و..و..
