· اكتب بعد الساعة التاسعة والربع مساء (لم يبق من الوقت إلا قليلا)..الزمن دا اليوم بقى زي (المسكول). · ومسكول زول (ضنين) كمان – بقطع من اول جرس. · التوقيت الذي اكتب (التاسعة والربع) يعني ان الوقت اتأخر بمفهومنا السوداني العادي (الليل اتقسم) ...وليس هنالك مبررا للتأخر - لا مباراة ولا حتى وصول محترف او بطاقته في انصاص الليالي لتجبر (احمد الحاج) على السهر ...وتجعل ابراهيم الجيلي يرابط بصحبة مصوّر (قوون) في مطار الخرطوم استقبالا لمحترف قادم. · ابراهيم الجيلي الصباح بظهر مع المحترف زول جديد – زي كأنو مشارك في فيلم (تاتينك). · يا ولد انت. · يعني بالواضح كدا – ما في اي عذر...عشان تحتجب ..او تقطع وشك. · امس حدث فجأة ظرف خاص – وقد كان يمكن الاعتذار عن الكتابة اليوم كما اعتذرت امس (ورب احتجاب افضل من الف عمود) – لكن احمد الحاج وضعني امام خيار لا مفر منه وهو الكتابة في كل الاحوال بعد ان روّج في عدد الامس الي ذلك ووضعنا امام الامر الواقع ، دون ان يكون مني وعد بذلك صراحة. · يعني يا اكتب يا اكتب – لا مجال للاحتجاب (فنيا) او لا (فنيا) حتى...واخشى مع تأخر الزمن أن تأتي كتابتي عن (فيصل العجب) اليوم دون المقام ، وهو الذي اريد ان اكتب عنه بمزاج واحساس عالي...وانا فى قرارة نفسي والله اريد ان انصف هذا اللاعب وان اكتب عنه بعض ما ينصفه ، ويخفف ولعة اعتزاله الكرة. · وقد اعتدنا نحن على ذلك في هذه المساحة – ان ننصف المريخ وان نتحدث عنه بجمال ان كان هنالك داعي لذلك. · والروائع في المريخ قليلة (كان ترضوا وكان تزعلوا). · لا تستغربوا ذلك عن الهلالاب ..لأن جمال (وصيفهم) وروعته لا ينقص منهم شيء فان كان (الوصيف) هكذا – فكيف يكون البطل – الهلال (سيد البلد) او كما تردد جماهيره على امتداد الوطن الحبيب. · الهلال الذي اعطانا تنقا فتغنينا مساء (او تنقا – تنقا – تنقا – تنقا)..واعطانا الدكتور محمد حسين كسلا الذي سوى في الخصم (سواة العاصفة في ساق الشتيل الني). · والشتيل الني دا (المريخ). · عشان تكون واضحة – ومفهومة. · واعطانا الهلال – مصطفى النقر وشلنا له جميعا (النقر جاء)..وقبل ذلك كان قاقا وجكسا وصديق منزول. · من هذا الباب – يمكن ان نكتب اليوم عن فيصل العجب وهو (مرتحلا). · ويمكن ان نغني له كما يغني حمد الريح (شلناك شمعة)..في رائعة كامل عبدالماجد (تاه الخصل)..والاغنية من اروع اغنيات حمد فيه توطين للشجن ...وتسكين للروعة حد (الشهيّق). امانة عليك يا تايه الخصل ويا خير عمّ في دروب عمرنا الضايع هطل انحنا متين عرفناك ومتين الكنا ما دايرنو يحصل داس مشاعرنا وحصل · هذا هو فيصل العجب بدمه ولحمه في اغنية حمد الريح: شلناك شمعة نسقيها الحنان غصونها ضوها ما فتر وغنيناك كاشواق شاربة روعتنا وحنان همساتنا روعتنا وحنان همساتنا لابسة ضيء القمر وغنيناك كامال ما بتخيب ريانة تنضم نجمة نجمة تغزل الاهات بعهود مغسولة بعرق السهر شلناك فوق رموش العين سنين يا عمري كانت ساكرة تواهت درب · انا من الذين يحسبون بل يجزمون ان الفنان حمد الريح يمتلك اغنيات يمكن ان نستخرج منها (الطاقة الشمسية). · ادعوكم الي الاستماع الي اغنية حمد الريح (تائه الخصل) فيها كل الجمال فيها (العجب). · اعود بعد هذا الفاصل. · اذكر اني كتبت من قبل عن (ايداهور) عندما رحل – وسطّرت عنه بعض الكلمات الصادقات انصافا لمحترف قدم الجميل لهذا الوطن ورحل في الميادين الخضراء – فقد كان حتى اخر (نبضة) في حياته يعطي للمريخ. · مات واقف. · مات على رأس خط (18) بحثا عن هدف للمريخ في شباك الامل – اذ ارتكبت مخالفة مع اللاعب احمد الباشا ..فتجهّز لها لاعبو المريخ في منطقة جزاء الامل. · غير ان (الموت) لا حول ولا قوة إلا بالله كان اسرع حتى من (الكرة) التى كان ينتظر عكسها امام المرمي. · وصله (الموت) قبل الكرة. · وفي ذلك عبرة لمن يعتبر ...ودرس للغافلين. · كلمات اخرى سطرتها عن جمال الوالي عندما استقال (انصافا) له – مهما كان الاختلاف معه او حوله. · كتبنا عن جمال الوالي بعد الاستقالة – (ولو عارفنو برجع سطر ما كنا كتبناه عنو). · ليس اجحافا ..ولكن عشان ما يقولوا دا (كسير تلج). · يا جمال جايب ليك (17) لورد والي الان بتدفع في الكهرباء من جيبك. · عليك (لورادتك) ديل فرقهم شنو من (هاشم ملاح). · ان (اللوردنة) كدا – نحن عندنا (99) لورد. · اللورد ينطح لورد. · اليوم نكتب بشيء من الشجن والوعي والادراك (الحسي) عن فيصل العجب – واتمنى مع ضيق الوقت ان تأتي كتابتني عن فيصل العجب (على قدر المقام)..وان نحسن في نقل احساس وصورة عن لاعب قدم (السهمل الممتنع) في الملاعب السودانية...وان كنت في كل الاحوال كنت اتمنى متسع من الوقت للكتابة عن فيصل العجب. · لكن – ربما اجمل الكتابات اعجلها – او التى تأتي عفويا دون ترتيب (اكاديمي) له. · وان كنت رتبت نفسيا وعافطيا للكتابة عن فيصل. · فيصل العجب قدم المطبوخ والمفروك في (الكرة السودانية)- المحلي والسفري – الحلو والمر – والجلابية والشال والعمة. · قدم لنا فيصل (فصل) سوداني كامل – فيه ام درمان وشندي ومدني وكسلا والفاشر والابيض وجوبا (قبل الانفصال). · فيه الموز والمنقا واللالوب والنبق والحنبك. · فيصل العجب هو سودانيا (حتى شاي المغرب)..وحوامة العصر ..وشلة المدرسة ولمة الدافوري وشليل وين راح؟...والكوبري قافل ..وضربت ليك لقيت تلفونك مقفول. · بهذه التفاصيل عرفنا (العجب)..وليس في ذلك (عجب) – وكل ما يصدر من (العجب) لا عجب فيه ولا عجب – لأن الشيء من معدنه لا يستغرب. · الكتابة عن فيصل العجب تستحق مراجعة ..وتمحيص وبحث – ولا يجب ان تكون الكتابة عن العجب عابرة او من غير دراسة لتأتي على قدر عطاءه في الملاعب ...وتقارب من ابداعه في الميادين وما كان يقدمه من فرح لجماهير المريخ المحرومة من (الابداع) إلا من فيصل العجب. · لقد اعتزل العجب ..فناقش البرلمان بعد ضغط المالية رفع الدعم من المحروقات. · المحروقات تطير عيشتها. · يؤسفني اني اكتب على عجل او قل على عجب عن العجب. · اظن ان اللاعب فيصل العجب حكاية من حكاياتنا التى يجب الاحتفاء بها والتوقف عندها. · فيه من اغنيات وردي (المستحيل) لو بيدي كنت طوعت الليالي - ومن روائع عثمان حسين (ما بصدقكم) لو قلت حبيبي سلاني ودع حبي وخلاني ما بصدقكم. · فيه من ابراهيم عوض (ملاذ افكارنا) ومن الكاشف (الشوق والريد) ومن حسن خليفة العطبراوي (بين جناين الشاطي). · فيه من كماليات عبدالكريم الكابلي (حبك للناس) - من عنجهيات عبدالعزيز محمد داؤود (او تذكرين حبيبتي) – ومن عواطف زيدان ابراهيم (فراش القاش) خلاك وراح القاش...فيه موسيقيات عبدالعظيم حركة (انا غنيت ليك اغاني)...وفراشات محمد حسنين ابو السريع (الفرقة من بكرة). · فيصل العجب فيه حتى (يا عمر) محمود عبدالعزيز (واصلي من دنياك مهاجر) عصام محمد نور. · فيه التم تم واللولايا والسيرة وشنقلي طوبايا. · قيل ثم من؟. · قيل: شلت من النيل صباه ومن جمال النيل بهاه من مناظر الثغر صفحة من رهيد البرق لوحة ومن مريدي السمحة نفحة الطبيعة حنت علينا خلدت بصماتا فينا · هذا هو فيصل العجب – جيبوا صلاح بن البادية عشان يقعد ويغني ليه (ما عشقتك لي جمالك انت آية من الجمال). · والجمال هنا كورة وعرض واخلاق ..ومرجيحة. · هو من غير جدال – او قل من غير عجب (بتهوفن) الكرة السودانية – النقلب ليكم الصفحة. · والنقول ليكم كمان كلام ما بتعرفوه – (ما تقعدوا تستغربوا فينا ساكت يا هلالاب). · نحن الحقيقة دي بنقولها ان شاءالله في (بلة جابر). · بس الكلام دا ما يطلع مع العمود دا. · النقول ليكم الكلام الما الجد. · قيل ان بتهوفن (اصيب بالصمم وما كان يسمع حتى موسيقاه التى يؤلفها ، او اصوات الفرقة التى يقودها ، حتى اصوات المصفقين له الذين كانوا يلهبون كفهم بالتصفيق ، لم يكن يسمعهم إلا اذا اداروا وجهه للناس ليرى بعيني رأسه ، كيف يكادون يجنون من فرط الاعجاب بموسيقاه التى لا يسمعها ، والي اي حد قد اصاب من النجد والخلود). · هذا ما جاء في (الثقافة الموسيقية) للصاغ صالح عبدون واظن ان وصفه هذا يتناسب مع موسيقى (فيصل العجب) وما كان يفعله في المستطيل الاخضر ..فميتنع عن الاستماع تواضعا منه وليس لأنه كان مصاب بالصمم كما كان بتهوفن. · واذهب ابعد من ذلك ..وادخل على (نوتة) بتهوفن ..لنتحدث بدقة اكثر عن فيصل العجب. · مرجيحة فيصل العجب عندي تشبه تماما (السيمفونية الخامسة) لبتهوفن. · كان نيتشه يقول عن السيموفنية الخامسة ( كل عواطف البشرية السامية في السيمفونية الخامسة). · جاء في الموسوعة الحرة تعريفا للسيموفنية الخامسة هذا (السيمفونية الخامسة هي سيمفونية في سلم دو الصغير مصنف رقم 67 للمؤلف الموسيقي الألماني لودفيج فان بيتهوفن. وهي واحدة من أشهر المؤلفات في الموسيقى الكلاسيكية. كتبها بيتهوفن بين 1804 و1808 م وعرضت السيمفونية الخامسة لأول مرة في مسرح فيينا سنة 1808. وصفها الكاتب والمؤلف الألماني ارنست هوفمان بأنها "واحدة من أبرز المؤلفات الموسيقية المعاصرة). · اها قصرنا معاكم يا مريخاب هذا ما جاء عن السيمفونية الخامسة – ماذا عن المرجيحة. · بعد كدا ما اشوف لي واحد فيكم شايل (جك الفول) وحايم الساعة 11 عشان يجيب ليه فول. · رمضان جاكم. · نرجع للسيموفنية الخاسمة ...(عشان نكمل ليكم فهمكم). · فيصل العجب دا عاوز (محمدية) عشان يكتب عنو – انا الكلام دا ما بقدر عليه. · قيل ان السيمفونية الخامسة تتكوّن من أربع حركات ويستغرق الأداء النموذجي حوالي 30 دقيقة ..ودي نفس الحاجات التى تحتاج اليها (مرجيحة) فيصل العجب. · الشيء شنو؟. · نمشي معاكم حركة – حركة. · الحركة الاولى هى حركة (سوناتا). · في الموسيقي انا ما عارف الحركة دي يعني شنو؟. · لكن في الكورة هي لحظة استلام فيصل العجب للكورة. · شفتوا كيف؟. · المدرج الجنوبي كلو يقوم. · عشان بعدين (اخر السنة) ما ينط لينا واحد ويقول لينا ما فاهم. · الحركة الاولي دي يا جماعة فهمناها. · نمشي للحركة التانية وهي في السيمفونية الخامسة زي ما بقولوا في الكتاب هي : حركة ثانية بطيئة أدنتي كون مولتو (Adante con molto). · موسيقيا انا ذاتي ما فاهم حاجة – لكن رياضيا دي الحركة البدنقر فيها فيصل العجب ...ويبدأ يجمع في الكورة ويطرح. · كدا مفهوم. · ما عاوزين نقعد كتير في الحركة دي ...(الوقت مشى). · نمشي للحركة الثالثة. · نحن قبيل قلنا شنو يا جماعة؟. · قلنا ان (السيمفونية الخامسة) دي بتتكون من اربع حركات. · الحركة الثالثة وهى حركة على نمط شيرزو أليجرو (Scherzo Allegro). · ودي الحركة البقعد فيها العجب خصمو في الواطة ويقعد يشرح ليه من (الف – با – تا - ثاء). · الحركة دي انا ما مسؤول من البحصل فيها. · انا مالي. · الحركة الرابعة: تختتم السيمفونية بحركة سريعة أليجرو (Allegro) على نمط سوناتا نادر. · الكلام دا يا جماعة انا ما قاطعو من رأسي ..الكلام دا في الكتب – الحركة الرابعة بتطابق مع فيصل العجب في انو بشيل الكورة وبقوم جاري على المرمى – الكورة قون. · الرشيد بدوي عبيد يقعد يكورك : (قوووووون). · كدا يا جماعة انا قصرت معاكم. · شرحت ليكم (المرجيحة) حركة – حركة. · ما عاوز لي زول يقعد يتلفت ساكت. · السنة كلها تتلفتوا زي (جرس الحصة الرابعة). · بالمناسبة دي. · جرس الحصة الرابعة ح اكتب ليكم في مساحة قادمة. · عمود براهو – بس انتوا اصبروا. · نحن والله اي حاجة عندنا بي نظام. · نحن ما عندنا حاجة ساكت. · ولا بنجامل في الحتة دي. · ما تقعدوا تعاينوا لي كدا زي (الحلقة الاخيرة). · ملحوظة : نتمنى كل التوفيق لفيصل العجب في محطاته القادمة. هوامش · المنتخب الوطني حقق تعادل غال امام المنتخب البورندي. · العودة من هناك ب (نقطة) وقبل شهر رمضان كمان ...حاجة ما معقولة. · التحية للمنتخب الوطني وهو يلعب ويشارك بدون دعم وبدون مساندة وبدون دولة ذاتها. · الله يشوف المنتخب. · طبعا نحن ما عندنا اتحاد كورة. · اتحاد شنو؟. · ديل ناس فاكسات ساكت. · انت يا محمد سيد احمد يا رئيس لجنة الانضابط يا لورد الجماعة ديل حايمين وين؟. · يكونوا قاعدين في الجرايد. · بس فالحين لي للتصريحات والكلام في الجرايد. · اعملوا ليكم لجنة انضابط ليكم انتوا. · او اعملوا دفتر حضور. · ما في زول شغال بالاتحاد. · الاتحاد قاعد خلى. · انتوا (سيدي بيه) دا الحاصل عليه شنو؟. · شنو كل مرة يجبوه الاتحاد ويرجعوه. · مرة يلقى (السيستم) قفل. · ومرة ما يلقى زول في الاتحاد. · مرة السيستم. · ومرة شلكاوي. · يا البرير انتوا الزول دا غلبكم تسجلوه. · لو غلبكم قولوا لينا عديل كدا. · ما تقعدوا – تجيبوه ..وترجعوه لينا زي (الصينية الخبيز). · صلاح محمد آدم طالما اصبح هو المدير الفني للهلال – يجب ان يجد الدعم والمساندة من كل الهلالاب. · وعلى وجه خاص قدماء لاعبي الهلال يجب ان يدعموه. · يا جماعة الهلال دا ما حق زول. · والهلال دا ما فريق حلة. · يجب ان يكبر فكرنا وان نتعامل مع الاشياء باحترافية. · ما تلافحوا الكلام ساكت. · الهلال في كأس السودان سوف يواجه الاهلي الخرطوم ذهابا وايابا ..في جولات صعبة. · الهلال ما عارفو. · لكن الخرطوم الوطني سوف تبعد المريخ من كأس السودان. · لا سيما وان الخرطوم الوطني معسكر الان في القاهرة. · ناس صلاح الامير ديل الموسم دا عندهم كلام كتير. · على العموم الاندية الاخرى السنة دي يتوقع منها ان تفعل الكثير. · في وجود الكوكي من حق اي فريق ان يطمع في المريخ. · اللعب امام المريخ (3) نقاط هدية. · هدية واقعة من السما. · رمضان بكرة. · ان شاءالله يكون بكرة. · عشان نشوف فصاحتكم دي حدها وين؟. · كمان نحن بنلعب. · ما تقعدوا تتجرسوا فينا. · عاجل : الواحد ما بصوم ويقول ليك السخانة دي كيف مع رمضان؟.
