عندما تهطل امطار غزيزة في موسكو ...ألعن (مصارف الخرطوم) الف مرة ...فهي تتأثر ايضا بذلك... تفور وتموج ..وتطفح...وتملأ لينا اطراف (العراقي).
متل (ضفر)..لو (ميسي) عمل ليه حركة في (كامب نو) في برشلونة ...(ضفر) يقع...
يصنقع ويقوم ويقع ...(زي ام قردون)..
هسع (ضفر) ذنبو شنو...
غايتو يا الهلالاب الزول الما بتريدوا في (الدوحة) تحدروا ليهو.
هسه دا (اهداء) دا.
محمد
اقتراح
المريخ بقي فيه (8) ارتكازات ....مجدي ام بدة ..سعيد السعودي ..مبينزا ..الشغيل ..امير كمال ..الباشا ..رمضان عجب ...قلق ...
اها بعد دا ان شاءالله (مقصورتكم) ما تطير ..
دا كلو من (سادومبا)...خلاكم أي (ارتكاز) تشوفوه تسجلوه ...والله سادومبا دا إلا تعملوا ليه (كبسولة امن شامل) قدام مرمي المريخ.
يا ود الناس تعال هنا ..هسع دا (اقتراح) دا.
اقول ليكم حاجة ..(ضفر) بعد خمسة قالوا ما بشوف!!.
تاني (ضفر).
عشان ما يحلف (ساكت).
نحن كورتو قنعنا منها ..لكن غايظانا (حليفتو).
ثنائيات
حمد والديبة وعبدالعزيز محمد داؤود وعلى المك
كلمة ناصية
أي زول شاف (ضفر) في الدوحة ..قال الحمدلله ...رئيس نادي النيل الحصاحيصا ..طلع ما عندو كلمة!!.
والله يا ضفر حقو ايام صيامك ..نصومها ليك نحن.
الله مرقنا.
صفحة جديدة
اشتري ليه صفيحة (طحنية)...شطب اسم الطحنية من دباجة الطحنية وكتب على الصفيحة كلمة (جبنة)...وقال لي صاحبو ..والله في البيت عندنا (نمل) ..لو عرف الصفيحة دي صفيحة (طحنية)...ما بخلينا نقعد...عشان كدا انا ح اعمل ليك مقلب في (النمل) دا دولي.
طبعا نمل الزمن دا بقرأ ..ومثقف كمان ...ممكن عادي (النملة) تقرأ ليك قصيدة لي (عاطف خيري).
عاطف خيري هسع ذنبو شنو؟.
شولة هندية
مثل جديد لنج
عينك في ( معتز محمد محمود) ..وتطعن في (ضفرو).
لافتة
ناس النيل بعد ما ثبتوا في الممتاز بقروش الهلال ...رجعوا للهلال قروشو!!.
نحن قروشنا رجعت ....البرجع لاتحاد مدنى (ثبوته) في الممتاز منو؟.
والله يا البرير بعد مستوى (ضفر) الظهر في الدوحة ..مفروض تدفع ليهم تاني قروش بدل ما تشيل منهم قروشك.
اها يا فيصل العجب ..الناس ديل جايبين ليك (رمضان عجب) عديل كدا ..بعد كدا لو ما قدمت ليهم خطاب اعتزال ..تكون بالجد ما بتحس.
محمد كمال (شطبوه)..طلع ليهو (بيان).
انت يا محمد كمال بتبقي لي (محمد جعفر قريش) شنو؟.
البشوف (البيان) الطلعتو ..يقول انت حررت (الكرمك).
يا ود الناس الموضوع ما بستاهل (بيان).
انت قايل نفسك في (حماس).
السنة كلها اصبعك (مكسور)...وكمان بتطلع في (البيانات).
هسع وينها (الشولة) هنا!!.
تعريجة
واحد قافل ...
فكوا ليهو (9) اسود ...ما فتح.
فكوا ليهو (ولد) ..ما فتح.
فكوا ليهو (شايب)...ما فتح.
فكوا ليهو (كرت نص)..ما فتح.
فكوا ليهو (دو)...ما فتح!!.
الزول البرمي ليهو في (الورق) دا ..قال ليهو انت ح تفتح متين يا ود الناس ...انت قافل على (ضفر).
مراجعة
مشي للدكتور وقال ليهو : يا دكتور انا بعد خمسة ما بشوف!!.
الدكتور قال ليهو : المشكلة بسيطة من اربعة ونص ما تطلع من البيت!!.
هسع وينها (المراجعة) هنا.
غلوطية
ناس المريخ قالوا إلا عصام الحضري (يعتذر).
قام اعتذر محمد كمال ...وطلع (بيان)..
قام شطبوا (محمد كمال) الاعتذر ..وخلوا عصام الحضري الذي رفض (الاعتذار)... يعني الواحد ما يعتذر...اصلوا انتوا الجميل بتقابلوه بالشطب.
يعتذر محمد كمال ..يشطبوه..
قالوا (العجب) جهز (بيانو).
اشتر افندي
اشتر افندي ضربو بص سفري....دخل في غيبوبة ...شهر فاقد الوعي ...بعد شهر ونص بتاع الشرطة قال ليهو وصف لينا (الحادث).
اشتر افندي قال للشرطي ...انا الحادث ما بقدر اوصفو ليك ما بتذكر فيه حاجة ...لكن الحاجة المتأكد منها انو المقعد الخلفي في البص كانت كانت قاعدة بنت لابسة (نضارة)...تشبه كارينا كابور.
انا العملها فينا شنو غير (كارينا كابور).
نظرية
قندران عاوزين (يقرشوه) في غرفة ...الغرفة اصغر من القندران ...باب الغرفة ...(ركشة) ما بتدخل بيهو...
قال ليهم (الحرجل) ما كعب ..لكن (الجردقة) زي (عكسيات) موسي الزومة.
العلاقة شنو؟
قال ليهو العلاقة بين ضفر وملاح (الورق) شنو؟.
قال ليهو : الاتنين ما بيتأكلو بالرغيف.
هسع (الرغيف) ذنبو شنو؟.
طاقية دا في دا
عندو ملاريا...
الدكتور قال ليهو ما تأكل (الدوم).
علاقة الدوم بالملاريا شنو؟.
دي زي الزول البكون ماشي (جبل اولياء)..يقوم يركب مواصلات (الشنقيطي).
حاجة حريصة
حاجة حريصة اول مرة اتشوف (ميسي)....شالت تلفونها ..وقالت لي ولدها عليك الله حول لي (النغمة) دي.
هناك ثنائيات فنية شهيرة ...معروفة في الوسط الفني ..اشتهرت واشتهر انتاجها..ويمكن على سبيل المثال ان نذكر عثمان حسين وحسين بازرعة ...الثنائية التي خلقت نكهة (البن).
وهناك محمد وردي واسماعيل حسن ..ثنائية صنعت شراكة في كل وجدان.
وهناك عثمان الشفيع ومحمد عوض الكريم القرشي ..ثنائية (القطار المر)...والكثير الكثير من الثنائيات.
لكني اليوم اتوقف عند ثنائية اخرى ..ثنائية حب ..وعرفة وعلم ..ثنائية جمعت بين عبدالعزيز محمد داؤود وعلي المك.
اروع من كتب عن الفنان عبدالعزيز محمد داؤود هو من دون شك الاديب الراحل على المك.
وروعة على المك في الكتابة عن عبدالعزيز محمد داؤود ناتجة من اعجاب على المك بالفنان عبدالعزيز وايمانه بالملكات الصوتية الغريبة التي يمتلكها الفنان الراحل عبدالعزيز داؤود.
حيث لا خلاف في ان خامة صوت عبدالعزيز محمد داؤود لا توجد في أي حنجرة في العالم.
حنجرته كانت مثل (البستان).
مع هذه الامكانيات الصوتية ..اشتهر الفنان عبدالعزيز محمد داؤود بخفة الدم وبنكتته الحاضرة وقد سجل الاديب على المك الكثير من النكات في كتابه عن عبدالعزيز.
لنا ان نتوقف عند بعض النماذج التي عرضها الاديب الراحل على المك في كتابه عن عبدالعزيز وقدمها باسلوبه الادبي الام درماني الرائع.
يحكى على المك عن عبدالعزيز محمد داؤود هذا الموقف : ( كان عبدالعزيز يحب الجلسات الصغيرة ، لانها تجمع اصدقاءه ومعجبي فنه ، وكانت له بعض افدنة من الحلفاية ، زرعها برسيما ، واقام عليها حارسا ، ولكن عبدالعزيز لم يكن يعرف عن الزراعة او التجارة كبير شيء وكسدت بضاعته وصارت المزرعة وبالا بعد ان اقترض من البنك الزراعي مالا وجعل البنك يطارده والفوائد تطارده ، واشباح المحاكم والحجز والبيع وهلم جرا ، تغفل الحكومات ، كل امر وتستأسد احيانا وذاك دين واجب السداد ، وقد دفع من دمه ومن قوت عياله ما اسكت الاقساط والفوائد حينا ولكن اصرار القوم شديد ، فكتب عبدالعزيز خطابا الي المسئولين يلتمس ان يشطب ما تبقي من القرض ، كان أهم ما فيه ( لقد نشأت هذه المزرعة امني نفسي ان اكون عزيز كافوري فصرت عزيز قوم ذل!).
ويحكي على المك :
( جاء احدهم الي حفل يغني فيه عبدالعزيز ولم يكن عبدالعزيز يود الرجل وييستثقله كثيرا ولكنه صبر عليه حتي لا يفسد الحفل ومضي زمان وعبدالعزيز يشدو قام الثقيل من مجلسه ، جاء الى عبدالعزيز وقال ( يا استاذ عليك الله غني لي غصن الرياض لانها بترجعني عشرين سنة لى ورا) رد عبدالعزيز عليه وقال (انت عمرك كم سنة؟) رد الرجل (اربعين سنة) قال له عبدالعزيز ( اغني ليك غصن الرياض مرتين ، عشان ترجع بطن امك وتريحنا).
ويحكي المك :
(كان عبدالعزيز يخضع للالات الموسيقية مثل هذه الاغنيات التي ذكرنا من اغنيات الدلوكة ، اغنيات التم تم ، اغنيات البنات سمها ما شئت ، وكانت حرية القعدات الصافيات تبيح للغناء والحديث حرية مطلقة ، واحيانا لا تشارك أي الة موسيقية ، ايقاع الكبريتة وحده ، يشعل الليل طربا ، رجل لا يخطىء في ادائه قط . مرة جاء عبدالله عربى يبحث عن عبدالعزيز ، كنت جالسا بدار اتحاد الفنانين سألني عربى قلت له ان عبدالعزيز سافر الي عطبرة ، قال عربى (لكن انا شايف برعى موجود وخواض وبشير وانا برضو ما كلمني ، السافر معاه منو؟)..قلت له (غير ليكم ، قال ما عايز عازفين اشترى كروسة كبريت من دكان يماني وسافر).
(وذات يوم جاء عبدالعزيز الى الاذاعة رأى سيدتين ضخمتي الجثة تتقدمان نحوه ، كانتا مشهورتين بالدعابة ومن المعجبات بفنه ، توقف عن السير ينتظر ، بلغت الاولى موقفه ، وئيدة الخطى ، حيته ، كانت الثانية ، وهى اضخم جسدا لم تصل اليهما بعد ، قالت الاولى (اظنك ما عرفتني يا عبدالعزيز ، انا ما دار النعيم ) ثم التفتت كأنها تريد ان تقدم صاحبتها اليه ، لم يهملها عبدالعزيز ، قال على الفور (عارف صاحبتك اتذكرتها دي موش دار الرياضة).
ويحكي على المك هذا الموقف.
(في الجلسات حينا بعد حين ، تكون النكتة سيدة الموقف ، وقد تأخذ مقما قريبا من الغناء ، وقد تنبثق فجاءة رغم كل شىء ..وقد يحكى عبدالعزيز لى ملحة او نكتة انشأها او سمعها ويريد ان يسردها على طريقته الفريدة ، يأتي الى مكتبي في الصباح الباكر ويقول ( سيد على انا جاييك بي واحدة بت كلب) ..اقول له (طيب نسمع) ينطلق (طبعا انت عارف اليومين دى الرعاة بقي عندهم سوق وبيهاجروا كمان ، عشان كده اسعارهم عالية ، المهم في واحد كان عنده خمسة غنيمات ، قال احسن يوديهم للراعي ، قام مشي ليه وقال يا سيادتك تأخذ كم في الشهر وترعى الغنم ديل ؟ صاحبنا الراعي قال ليهو والله انت عارف اليومين الحكاية قرصت معانا شوية ، يعني ح نأخذ منك مية جنيه ، كل غنامية بي عشرين جنيه ! صاحب الغنم ضحك كده وقال للراعي : عندي سؤال واحد ..الكتب عليك وإلا علينا).
رحم الله الاديب الراحل على المك ...ورحم الله فنانا العملاق عبدالعزيز محمد داؤود.
