سودارس : الشاي والقهوة وكورتك

وزير الخارجية والتعاون الدولي يلتقي رئيس الوزراء الهندي تفاصيل بشأن محاولة تزوير في جامعة الخرطوم التعادل الإيجابي يحسم مباراة الأهلي المصري والشباب التنزاني حسين خوجلي يكتب:كنتُ خائفًا أن يفعلها حميدتي، لكنه لم يخذلني!! شاهد بالصور والفيديو.. رئيس مجلس السيادة "البرهان" يكسر "البروتوكول" ويشرب "كوب" من "العرديب" أهداه له مواطن خلال موكب حاشد بالخرطوم شاهد بالصورة والفيديو.. فتاة سودانية تقتحم المسرح وتدخل في وصلة رقص مثيرة وهستيرية مع الفنانة هدى عربي على أنغام "لولا" شاهد بالصورة والفيديو.. نائب رئيس نادي الهلال يثير الجدل برقصات مثيرة مع محترف الفريق داخل أرضية الملعب احتفالاً بالفوز على صن داونز وساخرون: (هذا المنصب جلس عليه عظماء) السفير السوداني بالقاهرة: أعداد المرحّلين أقل مما يُشاع الإعيسر يدعو المواطنين للعودة إلى ديارهم معززين مكرمين صحفية مصرية تنتقد سفير السودان بالقاهرة بسبب تجاهله دعوة الإعلام المصري: (القصة الخاصة بأوضاع السودانيين في مصر لا تخص السودانيين وحدهم سعاده السفير) بالصور.. أيقونة الثورة السودانية آلاء صلاح تضرب في كل الإتجاهات: أنا ضد قحت وصمود وتأسيس (تجار الشعارات، اللاهثين وراء بريق السلطة والمشترين بالثمن البخس) سعر الدولار اليوم السبت 31-1-2026.. تغيرات محدودة الهلال يهزم صن داونز وينفرد بالصدارة ويضع قدما في دور الثمانية رغم نزيف باحثي الذكاء الاصطناعي.. "أبل" تحضر نسختين جديدتين ل"سيري" خلال أحياء ذكرى الاستقلال، سفير السودان بلندن يتناول جهود القوات المسلحة في إعادة الأمان لعدد من الولايات داليا البحيري تقر بشد وجهها.. وتسأل "تفتكروا هصغر كم سنة؟" جهاز ثوري يراقب الإجهاد والتوتر المزمن بدقة من القمة إلى الهبوط.. هل سقط اتحاد جدة في بئر ريال مدريد المظلم؟ إنستغرام تطور خيار مغادرة "الأصدقاء المقربين" (المريخ …. يتعافى) استقرار سعر الذهب في مصر اليوم السبت 31 يناير 2026 *كش ملك .. هلال اماهور هلال الفرحة والسرور لم تزدهم الحرب إلّا غالباً المقال الأخير ... السودان شجرة "البامبو" مصر.. القبض على أصحاب تريند "صلي على النبي" الذهب يهوي من قمته التاريخية بنفيكا البرتغالي وريال مدريد الإسباني.. نتيجة قرعة الملحق لدوري أبطال أوروبا نشر صور نادرة للعروس مع والدها الراحل.. شقيق الفنان محمود عبد العزيز يهنئ "حنين" بزواجها من المطرب مأمون سوار الدهب بتدوينة مؤثرة (يا محمود اليوم ده كان حقك تكون واقف تدمع وتضحك في نفس اللحظة) تحويلات المغتربين الأفارقة.. شريان اقتصادي لحاضر الدولة ومستقبلها ارتفاع اسعار الذرة والسمسم بسوق القضارف المالية تعلن ضوابط وترتيبات إنفاذ موازنة العام 2026م وزير الطاقة يعلن التوجه نحو توطين الطاقة النظيفة وتعزيز الشراكات الدولية خلال أسبوع الطاقة الهندي 2026 مصطفى شعبان يعود إلى الدراما الشعبية بعد الصعيدية فى مسلسل درش مركز عمليات الطوارئ بالجزيرة يؤكد استقرار الأوضاع الصحية اكتشاف علمي قد يُغني عن الرياضة.. بروتين يحمي العظام حتى دون حركة ترامب يحذر إيران: الوقت ينفد والهجوم القادم سيكون أشد مباحث الخرطوم تعلن توجيه ضربة موجعة لمافيا السيارات..إليكم التفاصيل البروفيسور ايهاب السر محمدالياس يكتب: مكافحة القوارض .. النظر خارج الصندوق شرطة مكافحة المخدرات بتندلتي تضبط شخصاً بحوزته 250 قندول حشيش إحباط محاولة تهريب ذخيرة في السودان تلفزيون السودان يستأنف البث المباشر من مقرّه الرئيسي الشرطة في الخرطوم تداهم منزل أحد قادة الميليشيا المُبدع الذي جَعلَ الرؤيَة بالأُذن مُمكِنة الشرطة في الخرطوم تداهم منزل أحد قادة الميليشيا شرطة الأزهري غرب تضع يدها على مقتنيات منهوبة وزير الصحة: التبغ عدو الحاضر والمستقبل و فاتورته الصحية تفوق عائداته الضريبية رشوة ب 12 ملياراً..إحباط محاولة كبرى في السودان هل قتل السحر الأسود الإسرائيلي عبد الناصر؟.. كتاب جديد يكشف خفايا خطيرة في مصر سباق اختراق الضاحية باكورة بطولات الاتحاد العربي لألعاب القوى شركة اتصالات في السودان تعلن عن توقف خدمات "مَا حَرَّمَ إِسْرَائِيلُ عَلَى نَفْسِهِ"! أحمد الشاكر: انا أعجز عن شكر جميع الإخوة الأشقاء في المملكة العربية السعودية ترامب للإيرانيين: واصلوا الاحتجاج.. المساعدة في الطريق إليكم «تحشير بالحبر».. وادعاء بالتلاعب في سند صرف ب 2.2 مليون درهم مستقبل اللغات في عالم متغير.. هل ستبقى العربية؟! السودان..حصيلة صادمة بمرض شهير في ولايتين إسحق أحمد فضل الله يكتب: (حديث نفس...) "كرتي والكلاب".. ومأساة شعب!

شكرا على الإبلاغ!

سيتم حجب هذه الصورة تلقائيا عندما يتم الإبلاغ عنها من طرف عدة أشخاص.

الشاي والقهوة وكورتك

قوون نشر في قوون يوم 18 - 05 - 2013

قصتنا نحن ..ذاتها قصتك....وقصتك ...هي قصتنا..حكاية منو كان فينا الاول.

تشرب شاي اول ..ولاّ قهوة.

ولاّ تشوف هدف والي الدين.

الزول البشبه الحلة ..والحلة البتشبه الزول.

الناس الطالعة العصر...عند (المغيرب).

واللمة ...والحوش الكبير.

الكهربة قطعت...(الضل) يتمدد فينا..قبل ما يتمد على التراب.

الشجرة البنقعد تحتها...كانت (وريفة)...ما كانت بالشحتفة الفيها هسع دي.

ممحوقة ...وشفقانة.

كانت شبعانة وعينها مليانة.

الجا فينا منو ...قبال التاني.

بالمعزة بالمودة البينا

بي أغلى الصلات

بالهوى العشناه بأعصابنا خمسة سنين ومات

بالعذاب الشفته والسر الكتمته وباقي الطيبات

استحلفك أترك سبيلي وسيبني وحدي أقاسي وأبكي مر الذكريات

زي كأنو في (لخبطة) في الحتة دي.

في كرسي رايح.

نتكسر في المقطع دا ..لمن يجوا يشاكلونا.

ما في اي مشكلة.

نطلع ..نرجع تاني للمقطع.

نتلاقى المساء ...عشان (نجضم) المقطع دا..زي كأنو ما في زول عندو شغل.

البال رايق ..والحال مية المية ...ما كان في زول عندو عوجة.

وعصير الليمون مدور في الجماعة زي ( ليه بتسأل عني تاني بعد ما بعت الاماني).

هسع البتلقى كلو ..بشكي.

ما في زول كويس.

الناس جنت.

دخلتها ليك شفقة ...غريبة ...جاريين من تصبح ..لمن تغيب ...(من القون للقون).

زمان في المدرسة كنا في فسحة الفطور بنغني (ريدتنا ومحبتنا)..وفي فسحة الحصة الرابعة بنغني (ما بصدقكم).

كانت الحاجات دي عندنا ثابتة.

ما بنغيرها ..وما بنبدلها.

لو قلبت الشريط بتسمع (السنين) للطيب عبدالله او (انت يا الابيض ضميرك صافي زي طفل رضيع).

نروح فيها ...ونغطس للنخرة.

اخر الحصص بنطلع الشارع ب (مسامحك يا حبيبي ، مهم قسيت علي ..قلبك عارفو ابيض وكلك حسن نيّة).

الناس طيبة ...ما في اي مشكلة ..رغم من ان (الكهربة) اليوم كلو قاطعة.

الكهربة ذاتها نعمل بيها شنو؟.

لا مراوح ..لا مكيفات ...لا تلفزيونات.

الناس كانت ماليه وقتها بي حاجات تاني.

هسع لو الكهربة قطعت في (الرهد) ...يجيك مليون تلفون.

الناس بقت ما بتعرف تقعد بدون (الكهرباء).

والله زمان الكهربة دي ..ما بنتذكرها إلا في (المسلسل).

وفي المسلسل ذاتو إلا تكون (الحلقة الاخيرة).

او الهلال عندو مباراة متلفزة.

ان شاءالله (معيودة).

نقعد نكاتل فيها عديل كدا.

كانت الدنيا حلوة .. اغنيات عثمان حسين دي كنا بنوزعها ليك مع (جدول الحصص).

حصة ..حصة ..واغنية ..اغنية.

كل اغنية عندنا ليها فهم معين ...زي (الترزي).

تمشي ليه يوم الاربعاء ..يقول ليك تعال يوم (الاحد).

تمشي ليه يوم الاحد ...يقول الليلة اليوم زحمة ...تعال يوم الخميس.

تمشي ليه يوم الخميس.

يقول ليك الخميس يوم (قصيّر).

قصيّر كيف يعني؟.

هو سلم ولاّ سقالة ولاّ يوم..(القصيّر) دا.

نعمل شنو نحن ..نتقطع.

الحاجات دي كلها كان البصبرنا فيها (والي الدين).

واغنيات عثمان حسين...(الدينا كانت بي خيرها).

ما في اي عوجة.

ولا في زول زعلان ..او ما صارف ..او ما لاقى ليه مواصلات.

الحاجات كلها مية المية.

كنا قبلك يا والي..نسمع (اغنيات) عثمان حسين ...توافقا ..مع اهدافك ..مع مرورك ...(وانت ماشي).

بتتهادي زي (النسمة).

الباكات كلهم مسكهم بي سببك (ابوالشهيق).

يتشهقوا تقول ماكلين ليهم (خشب).

يتراوحو من اهلهم.

الواحد فيهم ..ضلو يلاوز ليه...يتاوري ليه في (الضل).

كورتك يا والي الدين زي اغنيات عثمان حسين..ما في اي فرق....نحن كنا في كل (هدف) بتسجلو ..بنطلع برة نغني (قصتنا).

نملأ الشارع بي (قصتنا).

نشخبط في (الكراريس).

وندخل المباراة من الساعة تلاتة.

لو ما جيت الساعة تلاتة للاستاد ..(تسالي) ما بتلقاه.

اي حاجة بتكون كملت.

تعال بدري.

وقت تقول لي زول داخل الكورة ...يقول ليك عليك الله اتحرك بدري.

بدري كم يعني؟.

من الساعة اتنين.

ما زي هسع ...مباريات الهلال ...الجمهور الفيها قدر (طاقم تحكيم المباراة).

زمن الصفوف ..راحت مع الوالي.

زمان قالوا ليك الناس الساكنين في الثورة الحارة (41)...الواحد فيهم بطلع من البيت ..بقيف طوالي في (الصف).

بي جاي ..ناس الكلاكلة كانو بحجزوا قدام بيوتهم بالطوب.

الواحد كان (بعّض) الجلابية ..ويقيف في الصف.

ما في اي فسحة.

تدقس ساكت ..يدخلوا قدامك (5) انفار.

لو فاتتك اول خمس دقائق ...نص عمرك راح.

السر كلو في (الخمس دقائق) دي.

خمس دقائق ..كانت بالعمر كلو.

والي الدين كان بعمل اي حاجة في الخمس دقائق دي ...ما بخلي ليه حاجة.

يمسك المدافعين ديل ..مدافع ...مدافع..يفكفكم ليكم ركبة ...ركبة...زي (الراديو).

ركبة الباك ..تدخل ليك في ركبة حارس المرمي ..وركبة صانع الالعاب تتلخبط ليك مع (الحكم الرابع).

بعد المباراة ..اي واحد فيهم بقعد يفتش عن (ركبتو).

اي زول بقابلو والي الدين في دربو ..كان (بستخلصو) ليك.

في زمان المباراة اهم حاجة عندها فيها ..(التسخينة).

لو فاتتهم (التسخينة)..المباراة كلها ما تقع ليهم.

اهم حاجة الواحد يشوف (التسخينة)...اسمع نمرة (12) داك ما عرفتو ..دا منو؟.

الليلة محمد حمدان ما لاعب ..ما شايفو في التسخينة.

التسخينة دي بتوريك الحاصل ..بتكشف ليك اي حاجة.

عشان كدا البفوت التسخينة ..لمن الهلال يسجل هدف ..بتلفت عليك ويقول ليك : (الجاب الهدف دا منو؟).

ما بفهم اي حاجة.

الكورة كلها ما بتقع ليه.

يقعد التسعين دقيقة يرفع في (نضارتو)...زي الاستوبر.

والي الدين كان سبب في الحاجات دي.

بتذكر مرة مع مولانا عبدالفتاح البشير الفحل ..(بقى قاضي هسع في كسلا)..بتذكر والي الدين دا جاء بالقطر ماشي الدامر.

كان عندو تكريم هناك.

والي الدين وقت نزل من القطر في (رصيف) محطة شندي ..شندي دي كلها طلعت في الباب.

ما في زول قعد.

شندي دي كلها تتلفت.

الزول دا مسك ليك (الباكات) ديل من الخرطوم بحري الي ان وصل الدامر.

ما في باك وقف قدامو.

في رصيف شندي ..مازلت اذكر والي الدين ..وهو بكل النجومية ..والالق ...والناس المشدوهة.

يمعطوا في نظرهم من الشوف.

نجومية طاغية ..وحاجة فوق الخيال ...اي واحد طلع (يمتع نفسو بالدهشة).

ووالي الدين بتلقائية ...بكل بساطة ...يقابل الناس ..ويضحك ..ويتحرك من حتة لي حتة.

والناس ..تتقاسم الفرحة ..شوفوا والي الدين.

زي كأنو كان بغني..بينو وبين اغنيات عثمان حسين ..شبه كبير ..وتفاصيل دقيقة.

حسين بازرعة ...دون غيره من الشعراء ..قدم لعثمان حسين ..تجارب حقيقية.

ووالي الدين ..قدم للهلال تجارب حقيقية ايضا.

بازرعة قدم له اغنيات ..عاش قصتها في حياته ...لذا فان اغاني عثمان حسين ..شيء من الواقع (الوجداني).

حاجة مننا ...زي اهداف الوالي.

اي هدف عند والي الدين فيه ..قصة..وحكاية وشجن.

بازرعة كان بكتب لي عثمان حسين ...اغنيات ب (اعصابه).

وكان والي الدين ايضا .يقدم حياته ..روحه ...واعصابه ..وعظامه للهلال.

نادرا ان تجد لاعبا ..قدم كل هذه التضحيات ..ودفع حياته حبا للنادي الذي يلعب له.

ومثلما كانت اهداف والي الدين اغنيات خاصة لجماهير الهلال ...كانت اغنيات حسين بازرعة ..قصص واقعية ..عاشها الشاعر ..وترجمها شعريا.

هذا (دفتر وجداني) واقعي ..قصتنا ..شجن...المصير ...بعد الصبر ..انا والنجم والمساء ...كلها اغنيات تلامس (عصب) الحقيقة.

اي زول في رأسو هذا التساؤل الحائر ...والاستفهام الدائم (لمتين يلازمك في هواك مر الشجن).

مقطع تقعد ليه في الواطة ..وتقطع ليك (جك موية).

وقد كان (الشجن) ملازم والي الدين في حبه ..وعشقه للهلال..جاء للهلال يافعا من النيل مدني ...وغادر الهلال يافعا ايضا ..لكن بعد ان ترك سيرة تملأ كل الملاعب ..والمدارس والصحف.

الدليل على ذلك ...ان الناس مازلت تكتب عن والي الدين كأنه رحل امس ..رغم من ان رحيله مضى عليه (12) عاما.

رغم الغياب (12) سنة ..مازال والي الدين ..حايم في حاراتنا ..وقاعد في قلوبنا ...ولاعب في تشكيلة الهلال.

12 سنة من الغياب ..كأنو ما غاب.

اخر مباراة للهلال زي كأنو كان مشارك فيها.

يمكن عشان الناس حبت والي الدين ..ويمكن عشان والي الدين لاعب خاص..لم تنجب الملاعب مثله.

ويمكن عشان الهلال ..فريق عظيم ..بعرف يقدر الذين اخلصوا له ..وقدموا حياتهم في سبيله.

اي مشجع هلالي الان ..بكون شايل لوالي الدين هدف في ذاكرتو.

في المريخ سجل والي الدين اهداف (اشكال والوان).

بي اي طريقة سجل.

بي جاي ..وبي جاي ..وبي جاي.

جوة هنا سجل ..مشينا برة سجل.

في كل الحراس ..ومن اي حتة ..وفي كل زاويا.

وهل يمكن ان ينسى الناس له هدفه في الهلال السعودي في القاهرة ..هدف جابو من بي غادي.

الزاوية التى سجل فيها والي الدين ..حبة تسالي ما بتدخل فيها.

والي الدين سجل منها.

في شمبات ..سجل ..وفي الاهلي الخرطوم ..اي هدف عندو طريقتو براهو.

اي هدف عاوز ليه (كتلوج) خاص.

عاوز ليه (77) مدرب عالمي ..عشان يقعدوا ينظروا فيه.

نسأل له الرحمة والمغفرة ..وان يلهم اهله الصبر والسلوان.

اكيد حب هذا الناس ..سوف يجعلهم جميعا يدعوا له ..ويسألوا الله ان يسكنه فسيح جناته.

ملحوظة : والينا نحن كان شغال بدون اي (لورد)...شغال براهو ..ما زي واليكم ..جاب ليه (16) لورد ..عشان يغلبوا اهلي مدني 1/ صفر.

هوامش

ناس المريخ ...لجنة سوداني ما تختار هيثم مصطفى نجما للمباراة ..يقولوا دا اعلام الهلال.

مازدا ما يختار هيثم مصطفى في المنتخب الوطني ..ناس المريخ برضو يقولوا ليك دا اعلام الهلال.

رغم ان اعلام الهلال لا يكتب عن هيثم مصطفى ..ومازالت الكثير من الاقلام تحترم تجربة هيثم مصطفى في الهلال.

مع ذلك ..ناس المريخ بقولوا دا اعلام الهلال.

الجماعة ديل موهومين وإلا شنو؟.

اعلام الهلال عامل ليهم (زعر).

بعد ما شاهدت مباراة الاهلي مدني ..والمريخ ..حسيت ان (جلاكسي 4) ..وصل مدني.

ونخشى ان يصل (جلاكسي 4) الفاشر.

يا ناس الفاشر اعملوا حسابكم من (الجلاكسات).

لو قفلتوا (الجلاكسات) تاني ما بتجيكم اي عوجة.

سيحة ..اتعود في اي جمعة ..يطلع يقول هدف الهلال ما صحيح ..(من تسلل واضح).

واتعود في نفس الجمعة ..يقول : (هدف المريخ صحيح).

رغم من ان الكاميرا دائما ما بتوضح اهداف المريخ.

لكن ناس محمد سيلمان دخيل الله والمصورين في التلفزيون وقناة النيلين ..يعيدوا ليك هدف الهلال من الف حتة.

لمن يطلعوا ليك الهدف (تسلل).

لماذا لا تصور وتعرض اهداف المريخ ..بالصورة التى تعرض وتصور فيها اهداف ناس الهلال.

طبعا المخرج محمد سليمان دخيل الله ..(مريخابي) متعصب.

مريخابي ..يشاكل في المريخ.

اما (سيحة)..فهو فالح بس في مساوي كترها ..والهدف حق الهلال ما صحيح.

ووقت يكون عاوز يصلح الحكاية ..يقول ليك باسكال مفروض يطرد.

الكوكي قال الاصابة حرمت العجب من المنتخب.

هسع العجب دا لو نصيح يتلتل في زول بختارو.

خليه المنتخب يا الكوكي ...انت في المريخ ليه ما بتلعبو.

زول في فريقو ما بيلعب ...عاوزين يلعبوه في المنتخب.

طيب قول الاصابة حرمت العجب من المنتخب.

هيثم مصطفى دا مالو؟.

يمكن يكونوا ما اختاروه عشان اصابة العجب.

ادم ساير ...مهاجم الامل عطبرة ...لاعب بيلعب في اي حتة ...وهو من نوعية اللاعبين الذين يحتاجهم الهلال.

نتمنى ان يحسم مجلس الهلال امر ادم ساير من بدري ..وان يصل لاتفاق مع اللاعب ومع ادارة نادي الامل.

مدافع الاهلي الخرطوم علي جعفر ..مدافع ممتاز ..ويجب ان يسعى اليه الهلال.

لو ضم الهلال علي جعفر ..بكون ما عندو اي مشكلة في الدفاع ..خاصة بعد تسجيل مدافع محترف.

علي جعفر ..لاعب صغير السن ..وطويل القامة ..وبيلعب بعقله.

من الممتاز لو اكتفى الهلال ب (ادم ساير) وعلي جعفر ...تاني ما عاوزين شيء.

طبعا بعد اضافة اجانب جدد لكشوفات الهلال.

اذا فكر مجلس الهلال في شطب بكري المدينة ...يكون بذلك مجلس الهلال ارتكب اكبر حماقته.

بكري المدنية ..لو وجد المناخ والظروف الجيدة في الهلال ..سوف يكون افضل مهاجم وطني.

غير ذلك فان شطب بكري المدينة ..يعني تلقائيا انتقاله للمريخ.

ما معقول مجلس الهلال يظل يقوى المريخ ..ويقدم له افضل اللاعبين في الساحة.

لاعب اهلي مدني علي النور ..ايضا من اللاعبين المميزين في الدوري الممتاز.

تسجيلات يونيو يجب ان يدخلها الهلال برؤية .ودراسة ..ويجب ان تكون هناك اضافات حقيقية لكشوفات الهلال.

في الهلال الان اكثر من (5) لاعبين ...يمكن ان يشطبهم الهلال ..دون ان يحدث شطبهم اي اثر.

لاعبو الشباب في الهلال يجب ان يجدوا فرصتهم ..ويجب ان يتم تصعيد المميزين في فريق الشباب.

اطراف الهلال الحالية ..يجب ان يتم الغاءها نهائيا.

نحن ما عندنا اي طرف.

ويا ريت يتم الاستعانة بلاعبي الشباب ...اذا لم يجد الهلال في التسجيلات القادمة ..لاعبين ..يجيدوا اللعب في الدفاع.

مباراة الاهلي شندي ..سوف تكون مباراة صدارة الهلال للممتاز ان شاءالله.

لم انفعل عندما حدد الاتحاد العام بطل الدورة الاولى للممتاز ليمثل السودان في البطولة العربية.

لأن الهلال ان شاءالله سوف يكون بطلا للدورة الاولى.

ح نكمل ليكم فهمكم يا ناس الاتحاد العام.

بس ان شاءالله (الجلاكسي 4) ما يكون وصل الفاشر.

يا معاوية صابر ...وصلتك (الصفحة)...بعد كدا الموضوع بقى في ايدك ..انا ما عندي قضية.

عاجل : لو انتوا (لوردات) ..ناس الفاشر ديل (سلاطين) عديل كدا.

انقر هنا لقراءة الخبر من مصدره.