٭ في مقامة حلمنتيشية من آخر إبداعات المهندس ياسر قطامش احد ملوك حلمنتيش بمصر جاء في مطلعها تحت عنوان ( الفراخ والكتاكيت والديك): حدثنا عبدو منفاخ تاجر الفراخ قال، عندي عُشة بها مئات الفراخ الروشة، منها البيضا والرومدو البلدي والفيومي وكتاكيت وبعض الديوك، منهم ثلاثة يشبهون الملوك، أولهم ابن القرندلي اطلقت عليه اسم ابن علي، والثاني كنت به أتبارك فسميته مبارك، والثالث ديك خرافي جنونه ليس بالخافي فسميته العقيد القذافي… على هذا المنوال الحلمنتيشي شاد المهندس السوداني نصر رضوان مقامة حلمنتيشية يرد بها على ما كتبناه هنا حول ما تردد في الصحف عن منح أحد الاحزاب المصرية مليون فدان زراعية وختمناه بقولنا فهل أنا غلطان والصحيح ما فعله شيخ علي عثمان وهو ما نُفي لاحقاً وقيل أنه أنتزع من سياقه الصحيح، وننشر هنا مقامة الرجل بعد أن وضعني بين خيارين لا ثالث لهما إما النشر أو النشر… الاخ العزيز ابو الحيادر أزيك سلامات طبعاً ما قاله شيخ علي صحيح وانت غلطان.. والا طرفك من اصله نعسان يعني انت يا حيدره يا ليث المندره قاعد في المكتب كسلان وما عاوز تزرع كمان، ولمن يجوا خلق الله من المصروان عشان يزرعوا الحيشان عاوز تطرشقها كمان؟!! يا اخي ما يكونو مصريين ولا يابان.. إحنا عاوزين نبطل كلام ونشتغل في وئام مع كل الكرام عشان نفيد الانام خبارك يا حيدوره.. ما عاوز تزرع بندوره.. وعاوز تبور الارض المعموره.. وتفرتق الزعتوره.. وتزعل الاموره. انت بتقول من زمان.. اتكونت لجان.. وجابو الصولجان عشان نزرع في الشمالية جنان.. ونعمل تكامل مع الجيران وكله فشل كمان.. ولما جا علي عثمان وحسم الامر واعطى للجيران مليون فدان.. عاوزينه يعمل تاني لجان.. عشان يفوت الزمان ويروح المشروع في النسيان ويفرحوا الامريكان واتباعهم بني علمان وابو قفطان كمان.. والشيخ ابو طاقية ومريوم المنظراتية والمحامية اليسارية ونقيب محامين الدول العربية اللي بيحب اوكامبو.. طب ما يروح يقعد جنبو.. مع الخواجة خرالمبو. يا صديقي حيدر.. معروف ان بلاد الله لخلق الله.. وان امريكا واستراليا وكندا بجيبوا الناس من كل مكان.. عشان يعمروا البلدان.. ويبقوا دول ذات كيان.. وان السودان عمروه من زمان العرب والامريكان والزنجران. طب انتو لما لقيتو حد يجي يغذيكوا تقولوا سيكن سيك وميكن ميكو.. وليش علي عثمان يعزم على الجيران.. ويديهم كذا فدان. يا حيدوره يا جميل.. ما عرفناك بخيل.. وبتحب تبادل المنافع وبتاخذ وتدي.. حتى لو البطري قال ما عندي. أنا فاهمك يا ابو الحيادر.. ما عاوز الانقاذ تبادر.. وتوظف الكوادر وتزرع الوديان.. وتصدر برتكان.. وتروح نظرياتكم في خبر كان والاسلامويين يبقوا طرزان.. ويزعل ابو قفطان واحجوجة يصبح غير فرحان. انت عارف يا حيدران.. ان الفلاتة بيزرعوا من زمان في السودان في كل مكان.. وبيأكلونا وياكلوا كمان.. طب مالهم المصريين ما يزرعوا برضه قمر دين عشان يبقى اقتصادنا متين ونستغنى بقمحنا عن الامريكيين ونبقى سمان ومكلبظين يا صديقي احنا منفتحين على كل العالمين.. ولو جوا فلاحين من اندونيسيا والصين حنخليهم يزرعوا في بلادنا بساتين وحتاكلوا معانا زبيب وتين.. وسيبك من ماركس ولينين والشيخ ابو القفاطين.. بس قابلنا في الشدره.. والارض حتبقى خدره.. وحتنسى كلام ناس النجمة.. وتغش معانا الهجمة والاشيا حتبقى زلابية، والفقرا حياكلوا بطاطا، وحيمشو بكل قلاطه.. وبدال ما يسمو جمعة.. حيسموا عيالهم جان.. وحتحصل نهضة عظيمة في المسرح أو في السيما.. والجمعيات تتكون.. والعربات حتمون بدل البنزين بارفان. مهندس نصر رضوان
