محمد عبد الماجد دق الدلجة بنكرياس الحاجة علوية بنت الحسن الحاجة (علوية بنت الحسن) ..جابوها من البلد ..حالتها صعبة ..اي زول شافها قال ما بتصل الخرطوم. مرض الموت ظاهر. الولية اي دكتور شافها ..بشيل تلفونو ويطلع برة. لكن (آسيا بنت جاد الشيخ) لحقتها ليك في الموقف قبل ما تركب البص..وقالت ليها عليك لمن ترجعي من الخرطوم جيبي لي معاك (بيتي فور)…الخرطوم قالوا سمح فيها (البيتي فور)..وكمان يا علوية لو حصل قدر الله ..خلي بنتك (معزة) تجيب لي معاها (كعك) عادي ..(البيتي فور) ما بتاكل لي لو حصلت ليك حاجة. في ناس طبعا …لو شافوك ماشى على (الزير) بقولوا ليك جيب لينا معاك موية. ولو شافوك جوار (كوبس) كهربة ..بقولوا ليك عليك الله شوف معاك (الشاحن) دا شغال. وفي ناس ..لو شافوا ليهم زول عينو واقعة ..بقولوا ليك الزول دا ما بعيش كتير. لو عندك (صداع)..يرسلوا ليهم اربعة للمقابر …ويملأوا الصبارات موية باردة. هو زول مات في عمرو دا – الموية الباردة لزومها شنو؟. ما تجغوري بالموية الحارة دي. اول ما الحاجة (علوية بنت الحسن) وصلت الخرطوم ..فتحت عيونها ..لا والله فتحت عين واحدة …(رقرقت) بيها كدا .. بين فتحت عينها وما فتحتها. يعني كتلتها قبلها. موش مرات بقولوا ليك الزول دا (راخي) اضانو. يعني خالى بالو معاكم. انتوا فاكرين راخي اضانو يعني نازل بيها في الواطة. زي الستائر. انتوا الواحد اصلو ما يقول ليكم كلمة. علوية وصلت الخرطوم ..فتحت عينها بصورة كاملة (دائرة 360 درجة) ..وقالت ليهم جيبوا لي (ايسكريم) بارد …انا الايسكريم بريحني اكتر من (الدكاترة). كلام الدكاترة ما بدرو. دكاترة الخرطوم غير الواحد فيهم يقول ليك اعمل لي (فحوصات) ما بعمل حاجة. وانا وقت اعمل الفحوصات ..عاوز بيك شنو يا دكتور؟. اليوم التاني شالوا علوية بنت الحسن في (بوكسي)..ومشوا قابلوا بيها الدكتور. الدكتور ينزل ويطلع. ويقعد. ويفتح (الواتس آب). ويرجع تاني يقول ليها يا حاجة انتي قلت لي بتشعري شنو؟. علوية تقول ليه يا ولدي ..شاعرة بي نفسي مقبوضة ..زي الواقعة لي في بئر….والشاي يا دكتور …الشاي طعمو بقى لي مر ..مر. الدكتور يفتح التلفون ..ويقعد يضحك ويقول والله لكن يا (ندى). ويرجع تاني يقول للحاجة علوية قلت لي بتشعري بي شنو؟. علوية تقول ليه والله يا ولدي شاعرة بي نفسي مقبوضة …زي الواقعة لي في بئر ..والشاي يا دكتور ..الشاي طعمو بقى لي مر..مر. الدكتور يقعد يضحك. بضحك من الرسالة الوصلتو في التلفون ..ما بضحك من علوية ..وبقول والله يا (ايمان). ويرجع يسأل الحاجة ..قلت لي بتشعري بي شنو؟. علوية تقول ليه والله يا ولدي شاعرة بي نفسي مقبوضة …زي الواقعة لي في بئر ..والشاي يا دكتور ..الشاي طعمو بقى لي مر..مر. الدكتور لمن يرجع لي وراء من الضحك ..وهو بمسح في التلفون بي اصبعو وبقول والله يا (منى) بالغتي عديل. وبرجع (كتر خيرو) يسأل الحاجة ..قلت لي بتشعري بي شنو؟. علوية تقول ليه والله يا ولدي شاعرة بي نفسي مقبوضة …زي الواقعة لي في بئر ..والشاي يا دكتور ..الشاي طعمو بقى لي مر..مر. والدكتور لمن يقوم علي حيلو من الضحك ..وهو بقول والله يا (فاتن) الله يجازي محنك. ويرجع ..قلت لي شنو يا حاجة؟. الحاجة علوية بنت الحسن هنا تقوم زي الحصان ..وتقول ليه يا ولدي انت كشفك دا كان تعملوا بالواتساب. يا دكتور ..اديني …رقم تلفونك الشغال بيه (واتس آب) عشان ارسل ليك واوريك انا بشعر بي شنو؟. الدكتور بدل ما يتحرج زي الناس ..قال ليها والله فكرة. زمان في الشغل ..كانوا في ساعات بقولوا (اوفر تايم). وكانوا بيدوا الزول بدل وجبة. وبدل لبس. هسع افتكر المرتب مفروض يكون فيه خصم … يسموه (بدل واتسآب). وخصم (بدل فيس بوك). عشان ما تاكلو حق الحكومة ساكت. لكن الحكومة تستاهل. بعد اربعة يوم …اولاد الحاجة علوية بنت الحسن ودوها لي دكتور تاني. دكتور كبير. لكن اول حاجة عملوها ..اتأكدوا ان الدكتور ما عندو (واتس آب). قالوا ليك الدكتور في القاهرة ..بكتب في اللافتة دكتور الفاتح عمر جامعة القاهرة ..اخصائي جراحة القلب المفتوح..عضوية كلية الجراحيين الملكية …لا عندو واتس وآب ولا فيس بوك. الكلام دا بكتبوه في لافتة العيادة. (المصريين) مفتحين ..بعرفوا يجيبوا ليك الزول كيف؟. الواحد لو ما عيان ..يقول احسن امشي اعمل لي دعامة للقلب دا ..(الظروف ما معروفة). والبتعمل فيه الحكومة دا ..محتاج لي (دعومات) للقلب. يا زول دعومات شنو؟. دعومات سكر ..مالكم انتوا؟..فهمتو شنو؟. علوية مشت على الدكتور الكبير ..وهي مهجسة بي موضوع الدكتور السابق. زعلانة ..وما شايفة قدامها. دخلوها على الدكتور ..وقت شافت التلفون الثابت قدامو حيلها برد. قالت الحمدلله …التلفزيون الثابت يرحمن. الدكتور قال ليها ..عندك شنو يا حاجة؟. علوية قالت ليه عندي (واتس آب). الدكتور قال ليها ..لا يا حاجة انا قاصد (حالتك). علوية اتعدلت في القعدة وقالت ليه حالتي (ارملة) يا دكتور. بعد تعب ..بعد جرجرة طويلة ..الدكتور وصل الى ان الحاجة علوية بنت الحسن عندها مشكلة في (البنكرياس). بنكرياسها منتهي. ما فيه عشم. الدكتور عاين للحاجة علوية ..قال ليها يا حاجة معليش ..(البنكرياس) حقك ما فيه امل. علوية قالت ليه تصور يا دكتور انا قلت للاولاد كدا …قلت ليهم مشكلتي في بنكرياسي ..وهم بفتكرو مرضي دا مرض كبر ساكت. انا شاعرة من زمان ان بنكرياسي دا ما كويس. لكن يا دكتور ..عاوزة اسألك …الحصل لي في بنكرياسي دي عندو علاقة بي ازمة الغاز. والله انا من ازمة الغاز ..حسيت ليك بيها… بنكرياسي دا ما طبيعي. الاولاد شالوا امهم ..وطلعوا من العيادة وهم قنعانين من (بنكرياس) الحاجة. ولدها قال ليها ..يا حاجة انا قلت ليك مية مرة المسلسلات التركية الكتيرة دي بتنعكس على بنكرياسك. الحاجة ..قالت ليه يمين المسلسلات ما بتعمل الحبة ..انا العملها في بنكرياسي (ازمة الغاز)..لي شهر بقول ليكم املأوا الانبوبة ..وانتوا بتطارشوا في كلامي. ولاد مطاريش ..اها الموضوع هسع انعكس على (البنكرياس). وصلتها البيت ..ضربت ليها (آسيا) بتاعة (البيتي فور)..قالت ليها اها ان شاءالله خير يا علوية. علوية قالت ليها تصوري يا آسيا ..المشكلة طلعت من (البنكرياس).. آسيا قالت ليها في التلفون ..مشكلتك دي ما من البنكرياس ..مشكلتك دي يا علوية من (الطبق). موضوعك دا حصل قبل كدا على (كلتوم)..ناس الخرطوم قالوا ليها المشكلة في (البنكرياس)..كلتوم سافرت القاهرة ..ناس القاهرة قالوا ليها المشكلة من (الطبق). جابت ليها طبق معاها من القاهرة ..هسع الديجتال والبنكرياس ..حقاتها شغالات زي الطلقة. موش انت وقت تكوني قاعدة في التلفزيون ..بتشوفي الصورة قدامك بتتقطع. علوية عاوزة تقفل التلفون ..آسيا قالت ليها ما تنسي (البتي فور)..وقت طلع (بنكرياس) ساكت ..الموضوع ما بيستاهل. ………. و لما الهلال تكون عندو مباراة صعبة بقوم اطلع. ما بحب (التنظير) في الحتة دي. ولا الشحن الزايد. ان شاءالله الهلال ينتصر ويعود من شندي باول ثلاث نقاط في طريقه نحو اللقب المفضل. قولوا يا رب. و… السيدة (ل)..الناس كلها عندها (واتس آب)..وبشتموا فيه…وبشكوا منو. و… وقرّض على كدا.
