دق الدلجة محمد عبد الماجد بي جازكم زول قرفان شديد. وقنعان من اي حاجة. الموية تقطع بقعد (ينقنق). الكهربة تقطع (ينقنق). المواصلات مافي (ينقنق). المرتب يتأخر (ينقنق). الملح يزيد في الملاح …(ينقنق). نقة شديد. واي موضوع تسألو فيه يقول ليك دا موضوع (منتهي). زولكم طالع من المباراة – لاقاهو زول تاني قال ليه : الكورة (انتهت) كم؟. زولكم مع (القرفة) الفيها قال ليه الكورة (انتهت) فعلا …لكن (كم) دي ما عارفها؟. وفات على كدا. ما بزيدك في الجملة. الكورة (انتهت) مع ناس اسامة عطا المنان. وجمال الوالي. وصلاح ادريس ذاتو. الكورة (انتهت). صلاح ادريس بقى راعي (الاهلي شندي). وراعي (المريخ) برضو. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). بس برضو في امل في ناس (عمر الكسمبر). ان شاءالله (سيلا) يعمل ليكم (الطابق الثالث). …. ما ضروري تكون بتعرف. جر ليك (كرسي). واربط ليك (كرفتة). واتحدث ساي. اتكلم. الناس بتكلموا..البعرف والما بعرف. بتظهر في التلفزيون. وبجيبوك في الجرايد. نحن بنصفق ليك. كل ما تقول حاجة بنصفق. ولو ما قلت شيء – برضو بنصفق. في زول عاوز مننا حاجة. نحن احرار. على كيفنا. نصفق زي ما عاوزين. ما في زول بيسألنا. ما كلكم بتصفقوا – يعني بقت علينا نحن. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). بس الليلة ح تفهموا حاجة. او ما ح تفهموا. تفهموا شنو يعني؟. اي حاجة تمام. …… اللغة الفرنسية ما صعبة. ممكن تتعلمها في اسبوع. جيب ليك عجلة. وسوقها بالمقلوب. لو وقعت سبع مرات – بتلقى نفسك اتعلمت (الفرنسي). الطنطنة البتقولها بعد كل وقعة …دي لغة فرنسية. اول الفرنسيين عندهم شنو غير (الطنطنة). انتوا قالوا ليكم الفرنسيين ديل اتعلموا (الفرنسي) كيف؟. بي ركوب العجلات. وبي (الوقيّع) الكتير. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). بس ما تضيقوا. مباراة الهلال والاولمبي ماشي ليكم عليها. او ما ماشي. على كيفي؟. يعني بقت على المشي. ……… واحد مشى ليه لبتاع دكان. بتاع دكان – المحلية كرهتو. كل يوم الصباح بفكوا ليه سبعة موظفين جدد. لو ما شالوا منو قروش ..بفطّرهم. ولو فطروا ساكت ..صفيحة الطحنية نصها بتقسم. سجائر ساكت خسرانة معاهو. زولكم مع (قرفتو) دي ..جاهو زبون ..قال ليه اديني عليك (جبنة). بتاع الدكان قال ليه الجبنة دي ما للبيع. قال ليه اديني طحنية. بتاع الدكان قال ليه الطحنية دي ما للبيع. قال ليه اديني سكر. بتاع الدكان قال ليه السكر دا ما للبيع. قال ليه اديني دقيق. بتاع الدكان قال ليه الدقيق دا ما للبيع. الزبون زعل ..قال ليه طيب الحاجات دي جايبها لي شنو وقت ما بتبيعها؟. بتاع الدكان قال ليهى جايبها للمحلية!!. انت قايل عندنا فيها حاجة. نحن حارسنها بس. حارسنها ساكت. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). بس مباراة المريخ مع (الناس القاطعنهم من رأسهم ديل) ماشى ليكم عليها. ………. شطب الطابق الاول. فرح ليك. شطب الطابق الثاني. فرح شديد. شطب الطابق الثالث. فرح فرحة مبالغ فيها. شطب الطابق الرابع. عاوز يموت من الفرحة. الطابق الخامس شطبو وعملوا ليه فيه (العزاء). كان زول طيب. زول اصلو ما ساهل. وما فيه كلمة. وعندو خسمة طوابق. تتخيلوا (طابق) واحد ما قدر يشيلو معاه. ما شال غير (طوبة) اتوسد عليها في (ود اللحد). و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). بس اصبروا. الليلة في شغل براهو. في طريقة مختلفة. الصبر ما ضروري يكون (سكات). ولا حبوب بندول. ممكن الصبر ..يكون تقعد تشاهد في التلفزيون القومي. ما في صبر اكتر من كدا. ………. امتحن الشهادة السودانية المرة الاولى جاب (51). وعاوز الطب. امتحن المرة الثانية جاب (51). وعاوز الطب. امتحن المرة الثالثة جاب (51). وعاوز الطب. امتحن المرة الرابعة جاب (51). وعاوز الطب. امتحن المرة الخامسة جاب (51). وعاوز الطب. امتحن المرة السادسة جاب (51). وعاوز الطب. امتحن المرة السادسة جاب (51). وهو عاوز الطب. عاوز يدخل الطب. امتحن المرة السابعة جاب (51). وهو عاوز الطب. امتحن المرة الثامنة جاب (51). وهو عاوز الطب. امتحن المرة التاسعة جاب (51). وهو عاوز الطب. امتحن المرة العاشرة جاب (51). وهو عاوز الطب. واحد من ناس الحلة الكبار الموضوع دا مأثر فيه شديد. متأثر شديد. وما قادر يقول للولد حاجة. اخر حاجة ..لاقى ليك (الطالب) البمتحن كل سنة ويجيب (51) ..وقال ليه : اسمع انت ما ترتاح من الموضوع دا وتنظم (سيكافا)!!. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). بس بتنظمها وما بتشيلها. ……….. سافر السعودية – كشوّه. سافر قطر – كشوّه. سافر الامارات – كشوّه. سافر تركيا – كشوّه. سافر العراق – كشوّه. سافر الاردن – كشوّه. سافر اليمن – كشوّه. سافر بريطانيا – كشوّه. سافر امريكا – كشوّه. واحد من ناس الحلة برضو – الموضوع دا مألمو شديد …زولكم يسافر كل مرة دولة ويعملوا ليه حفلة وداع ويجي راجع بعد شهر. صاحبكم قال ليه : اسمع انت ما تقول (الحقيقة) عشان ما يكشوك. الحقيقة ما بتنفع. اسكت بس – ما تقول (الحقيقة). زولكم (المكشوش) من اي دولة يسافر ليها قال ليه : وانا وقت ما اقول الحقيقة مسافر ليه؟!!. ما اقعد قبلي – البسفرني شنو؟. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). بس (الكشة) قبل رمضان حارة شديد. …… وانت بتوزّع عيونك.. في بيوتات المآسي… في دروب للبهجة تطلع… تزرع الافراح اماسي….. شلت حزنك جوة طبعك…. وبرضو عامل ماك حاسي….. ما كتير الناس بترجع… انت فارقت المراسي… قدر ما قسوة عيونك… ما بخيل فيك التناسي…… …….. و كنت عاوز اكلمكم عن مباراة المريخ والفريق القاطعنو من رأسهم داك. لكن غيرن رأيّ. ما عاوز اتكلم. ولا عاوز اقول حاجة. موش على كيفي. وكنت عاوز اكلمكم عن مباراة الهلال والاولمبي. عن الانتصار. وقون كاريكا. والشعلة. وجوليام. ونزار حامد الصاقعة. لكن غيرت رأي. ما عاوز اقول اي حاجة. موش انا حر. خلوها كدا. متوكل أحمد علي قال جابوا لينا قرار (الاعادة) في ورقة كراس. يا متوكل ..نحن سبق وقلنا ليك مباراة المريخ والامل زي (الاملاء). اعد. يعني اعد. الاملاء يجبوها ليك في شنو؟. في كوريك. طبيعي يجيبوها ليك في ورقة كراس. …….. السيدة (ل) …السودان دا لي هسع بي خيرو – لوح التلج لى هسع (بارد). وقرّض على كدا.
