دق الدلجة محمد عبد الماجد مدرب المنتخب (الوطني) نائب في المجلس (الوطني) اللالوبة في فرنسا (لالوبة). في ايطاليا (لالوبة). في انجلترا (لالوبة). في البرتغال (لالوبة). في هولندا (لالوبة). في الهند (لالوبة). في نيجيريا (لالوبة). في الصومال ذاتها (لالوبة). لكن في بلدنا دي (تمر هندي). والله ما بتقولوا حاجة. ولا كلمة. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). بس برضو بنقول (لالوب) بلدنا ولا تفاح السعودية. عدسنا ولا (شاورما) سوريا. فرفورنا ولا كاظم الساهر. بكري المدينة ولا انيستا. النيلين ولا قناة ام بي سي. العاملون في التلفزيون القومي والنيلين قالوا اضربوا عن نقل مباريات الممتاز..الى ان يستلموا حقوقهم. عليكم الله واصلوا في اضرابكم. عشان لو رفعتوا الاضراب – المشاهدون بضربوا. بضربوا من المشاهدة. انتوا قايلين نفسكم بتقدموا كورة. كورة في النيلين …يقطعوها ليك زي (الدِرب). يمرقوها من نفسك. احسن حاجة تعملوها ..اضرابكم دا. تخلوا الزول يلف (الطبق) وتضربوا. العاوز يلف ليكم الطبق في رمضان منو؟. الواحد ذاتو في رمضان ما فايق يقعد (يلفلف) في الطبق – تقول سائق ليه (لوري). اضربوا. ابوس ايدكم …ما ترفعوا الاضراب. ما عاوزين منكم اي مباراة. ما عاوزين اي كورة. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). بس الموية قاطعة!!. في تصريحات نشرت في المواقع الالكترونية أمس حسب ما جاء نصا (اعترف مدرب منتخبنا الوطني مازدا بمشكلة النقص في الإعداد لمباراة سيراليون بالأحد وقال : كنا منذ البداية نسقنا برنامجنا مع مدربي الهلال والمريخ من خلال معسكرهما بتونس ، حيث تتضم قائمة المنتخب معظم لاعبي الفريقين ليكون بذلك المعسكر مشتركا ، بل من جانبنا حددنا مباراة مع المنتخب الليبي بتونس، ولكن تعذر سفر المنتخب للحاق بالفريقين الكبيرين في تونس بسبب عدم حصولنا على دعم الدولة في الوقت المناسب ولهذا نفذنا إعدادنا بالسودان ، ورغم حصولنا على لاعبي الهلال والمريخ ، لكن كان ينقصنا خوض مباراة ودية دولية ، ومع ذلك سخنوض مباراة الاحد بتفاؤل كبير ورغبة أكيدة). تصريح مازدا …يحتاج ان تقرأوه اكثر من مرة. عشان عندنا فيه كلام. اتذكرت بي تصريح مازدا القصة دي. ناس (الامين تور النم) عندهم كديسة اللبن لو ما فرورتو ليها ما بتشربو. ولو فار اللبن لو ما برد ما بتمشي عليه. ولو برد اللبن لو ما طعموه ليها – ولا بتقبل عليها. نوع الكديسة دي الفأر عندها زي قوات الاممالمتحدة – ما بتقدر تعمل ليه اي شيء. اذا كان (اللبن) عشان تشربو بمر بكل هذه المراحل – تفتكرو بتقدر ليها على (فأر). مازدا المنتخب بمر عندو بمراحل (اللبن) دي كلها. مازدا اتعود قبل اي مباراة للمنتخب الوطني يقول عندنا مشكلة ..عندنا نقص في الاعداد. من بدري ..مازدا بشوف ليه (عذر). بجهز عذرو اول حاجة. عشان لو طلع بي اي نتيجة سلبية يقول المنتخب لم يستعد الاستعداد الكافي. والدولة ما عملت حاجة. تشعر في احيان كثيرة ان ضعف الاعداد يأتي في صالح الجهاز الفني للمنتخب. ضعف الاعداد هذا ببقى ليهم (مراقات). ببقى ليهم عذر. اول ما يتغلبوا – يطلعوا يصرحوا في الجرايد وفي المؤتمرات الصحفية ويقولوا كيف انتوا بتطلبوا مننا انتصار في ظل هذا الاعداد الضعيف. طيب يا مازدا – الاعداد مسؤولية منو؟. الاعداد مسؤولية الاتحاد العام ..وانت عضو في مجلس الادارة ورئيس لجنة التدريب وعلاقتك مع ناس مجدي واسامة سمنة على عسل. انت عاوز المنتخب تعدو ليك الاممالمتحدة. مجلس الامن. عاوز منظمة اطباء بلا حدود تعد ليك المنتخب. نعدو نحن يا مازدا. على الاقل اذا لم يوفروا ليك الاعداد المثالي مفروض (تستقيل). امشي ما في زول عاوز منك حاجة. ما في داعي تقعد في ظل نقص الاعداد هذا. حارس شنو؟. طالما انت بترضي للمنتخب هذا الوضع ..ما في زول بيجيب خبر المنتخب. تشتغلوا كدا ب (الحظ). الاتحاد العام لكورة القدم السوداني ممكن يشيل المشكلة كلها ويرميها في الدولة. لكن دا برضو ليس مخرج. يفترض ان يكون اتحاد الكورة عندو المزانية الكافية لتسيير امور المنتخب ولتوفير اعداد نموذجي له. كورة القدم اصبحت اضمن استثمار في العالم وهو الانجح والاربح على الاطلاق…الاتحاد العام يملك الكثير من موارد الدخل بداية من حقوق الرعاية وحقوق التلفزة والرسوم المفروضة في التسجيلات والمقررة في الشكاوي والعقوبات….الخ. والاتحاد كذلك تأتيه اموال كثيرة من الاتحاد الدولي والاتحاد الافريقي. اين تذهب هذه الاموال؟. بتمشي وين؟. عملتوها لينا كلها وكالات سفر واستثمارات ..وما قادرين توفروا اعداد للمنتخب الوطني. القاعدين ليها شنو؟. اذا انتوا عاجزين عن توفير اعداد مثالي للمنتخب يفترض ان تغادروا مواقعكم. امشوا. مازدا والاتحاد العام دائما برموا لومهم على الدولة ..وبقولوا ان الدولة لم توفر لهم مزانية لاعداد المنتخب. الكلام دا ما منطقى ولا مقبول. اذا افترضنا ان الاتحاد فشل في توفير اموال الاعداد من الاموال الكثيرة التى يدخلها ..هل يفشل الاتحاد في ان يوفر اموال الاعداد من الدولة؟. الاتحاد العام لكورة القدم اصبح جزء من الدولة ..يعني الدولة دي ما بعيدة منكم..ولا غريبة عليكم. مجدي شمس الدين واسامة عطا المنان وجمال الكيماوي وقبلهم كان معتصم جعفر كلهم اعضاء في المجلس الوطني. بل محمد عبدالله مازدا المدير الفني للمنتخب (الوطني) والذي يلوم الدولة على عدم الدعم وتوفير تصاريف الاعداد هو عضو في البرلمان (الوطني). يعني يا مازدا اوعك تاني نسمعك تشكي من عدم دعم الدولة. الكلام البتقول فيه كمراقات للناس في الجرايد ..قولوا في البرلمان. اذا لم يكن مازدا قادر على توفير حقوق المنتخب وهو نائب برلماني …تفتكروا ح يقدر يعمل شنو؟. اوعكم تقولوا لينا الدولة. نحن الكلام دا فترنا منو؟. بنسمع فيه لينا عشرين سنة. عشرين سنة بتقولوا لينا الدولة. وانتوا نواب في البرلمان. على الاقل لو ما قادرين توفروا للمنتخب اعداد مثالي وتفرضوا كلمتكم على الدولة استقيلوا. استقيلوا والله نطلعكم احسن ناس. ونحفظ ليكم موقفكم دا. ما تمسكوا لينا في المناصب عشرين سنة …وتدخلوا البرلمان …وتجوا تقولوا لينا الدولة. انتوا قاصدين (دولة) تانية. انتوا بقيتوا (الدولة) ذاتها يا مجدي واسامة ومازدا. ما تغشوا في الناس ساكت. انتوا جزء من الدولة. ما تتاجروا بالمنتخب والكورة السودانية ..وتحققوا (مآرب) ليكم من خلال المناصب التى تشغلوها. وتقولوا لينا الدولة. بتغشوا في الناس. القروش من الدولة عاوزين يجيبها ليكم بلة جابر؟. يجيبها ليكم عبداللطيف بويا؟. عبدالمطلب الفحل؟. جيبوها براكم. دي مسؤوليتكم. مقعدنكم في الكراسي دي …وماسكين المناصب دي عشان تقولوا لينا الدولة. نحن ما بنعرف الدولة. نحن بنعرفكم انتوا. لو فشلتوا – استقيلوا. الاستقالة صعبة. استقيلوا. وقت ما قادرين تعملوا اي حاجة. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). بس ناس الارصاد ديل كل يوم بقولوا بتجي مطرة الليلة ..وما بتجي. ما تقطعوا لينا من رأسكم. اي زول في السودان دا بقى يقطع من رأسو. ما في شغل علمي. ما في مسؤولية. ………… و المريخ بي مستواه دا …الوصافة السنة دي ما بلم فيها. ناس الخرطوم الوطني كلموهم يشدوا حيلهم. الله يستر بكرة من المطرة. المطرة دي ما بتجي إلّا يوم مباراة المنتخب. الكلام دا بقولوا ليكم انا. خلوهم ناس الارصاد. ديل ما عندهم اي موضوع. ما عندهم اي مطرة. بس يقعدوا يصرحوا لينا ساكت في الجرايد. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). بس لو جات مطرة ..(الوالي) جديد لسه المطر ما وقعت ليه. ……….. السيدة (ل) مطرة الارصاد دي مطرة كلام جرايد ساكت. وقرّض على كدا.