محمد عبد الماجد دق الدلجة قالوا ليهم عيدوا مباراة ام درمان قالوا ليهم بنعيد مباراة عطبرة
* عرفت ليك (الاشاعات) بتطلع من وين؟. * بتطلع من ناس المريخ ديل. * ديل قطعوا ليهم (عمر عثمان) من رأسهم ..وقالوا دا (عمر عثمان) بتاع الامل. * مسرح العرائس بس. * نشيل ونغالط فيهم. * قلنا ليهم دا (عمر عباس)…دا ما (عمر عثمان) ما تلخبطوا لينا ساكت. * قالوا لينا عمر عثمان فرقو من عمر عباس شنو ؟؟ كلو عند العرب (عمر)…يعني بقت على (عباس). * ديل يفهموهم كيف؟. * ديل يقولوا ليهم شنو؟. * خلاص رأسهم ربط على كدا. * قفل. * ذكروتني …واحد جاء من السعودية …جديد ..شنطتو لغاية الان ما فتحها. * البلاقيه كلو بقول ليه (لسه ما فتحنا الشنط). * زولكم قال عاوز يعرس – عشان تاني ما عندو اجازة ..الشركة الشغال فيها في السعودية خمس سنوات لي قدام ما بتديه (اجازة)..عشان ماسك ملفات خطيرة والشغل كلو واقع في رأسو. * دا (حنك) المغتربين..معليش طبعا في (مغتربين) ظرّاف كدا بقرأوا لينا في (المواقع) ما يزعلو من كلامنا دا ..عاوز ارفع ليكم روح الناس القاعدة في البلد دي. * ما يبقى عليهم حرّاق روح..وهبوط معنويات. * وقطوعات كهربة. * وخروف العيد. * خلاص شفتوا من الليلة بدخل ليكم (خروف العيد) في العمود دا. * قالوا ليك واحد مشى ليه لي زول في مستشفى شايل ليه حلاوة وخبيز وملايات جديدة وهدوم شفع وبسكويت ..ما خلي ليه شيء. * الزول العيان قام وصنقع ليك فيه – وقال ليه ..هسع عليك الله بدل الحاجات الكتيرة دي لو جبت لي (خروف) ما كان احسن من الكلام البتعمل فيه دا. * صاحبكم بقى يفكر في العيد. * المهم (دا ما موضوعنا). * المغترب قال عاوز اعرس …شاف بنت عمو اسماعيل ..جات تشيل ليها (تلج). * طبعا وقت المغترب يرجع من برة ..الجية بتاعة شحدة التلج من بنات الجيران بتكتر. * الحلة كلها بتكون عاوزة (تلج). * المغترب شاف البنت واقفة في التلاجة بتنزل في قالب التلج زي (تاجوج) ..عجبتو قال عاوز يتقدم ليها. * اهلو قالوا ليه والله نعم الاختيار ..اصلو البنت دي ما فيها كلمة..عينها ما بترفعها من الواطة …..و(التلج). * جماعتكم اتكركروا بي مغتربهم ومشوا يخطبوا البنت. * البنت كانوا متكلمين فيها ..ابو البنت قال ليهم والله البنت دي ..ما بقدر اديكم ليها ..(مخطوبة) ..لكن ممكن اديكم اختها الكبيرة. * المغترب قال ما في مشكلة ..وقت الصغيرة كدا ..الكبيرة ح تكون خطيرة..زولكم ما تم كلمتو ..الكبيرة جات طالعة. * ابو البنت قال ليه ..دي البنت العاوز اديكم ليها – ما فيها كلمة ..والله (الادب) الفيها عند اختها الصغيرة ما في. * المغترب (صنقع) ليك شهر ونص لي فوق عشان يشوف البنت ..زولة طويلة خالص. * المغترب قال ليهم يا خال انا عاوز لي (عروس) ما عاوز لي زول يركب لينا (الستائر). * بعدين بتكم الصغيرة دي وقت مخطوبة مالها اليوم كلو بتنزل في (التلج) من تلاجتنا…لخبطتنا ساكت. * ناس المريخ عاوزين يطبقوا نفس النظرية …عندهم زول اسمو عمر ضرب ليه حكم (بونية)..قالوا بس دا عمر دا ذاتو. * عمر منو؟. * قلنا ليهم (عمر عثمان) بتاع الامل وقت الكلام البتقولو فيه دا ..كان في (كسلا). * عمركم دا عمر تاني. * قالوا لينا ابدا دا عمر ذاتو ..بعدين كسلا فرقها من القضارف شنو ..الحاجات دي عند ناس (اسامة عطا المنان) ما بتفرق. * يكون في كسلا. * يكون في مدني. * يكون في الجنينة. * اصلو ما فارقة عند ناس اسامة عطا المنان …مع الواتساب دا ..ممكن يضرب الحكم بونية (واتسابية) كدا من كسلا. * كمان ناس اسامة عطا المنان عاوزين ليهم قانون. * الزول الضرب الحكم عديل كدا…في (شندي) لا كسلا ولا القضارف..والضربة اتوثقت في تقرير الحكم بي شتيمتها ..هسع قاعد وبلعب مع المريخ. * زول سألو مافي. * كمان جابت ليها (ترابيز). * وقرار الاعادة الذي خرج من لجنة الاستئنافات ..اعلى لجان الاتحاد واكثرها قانوينة ..ما اتنفذ ..عاوزين تنفذوا لينا قرار اعادة (وهمي) كدا في بونية وهمية ..وعمر عثمان تاني. * شوفوا الناس ديل في الاشاعات قالوا شنو؟. * قالوا المباراة معادة. * بالله. * والله انتوا فالحين. * ناس الامل ديل بترسوا ليهم خمسة شهور في (اعادة) – قرارها طلع من لجنة الاستئنافات ..ما عيدتوا ليهم المباراة عاوزين تعيدوا مباراة عطبرة بي اشاعة. * فلاحة مبالغ فيها. * امس كانت تقارير وقرارات منسوبة لاتحاد الكرة قد انتشرت عبر وسائط الاتصال الاجتماعي تقول بان الاتحاد قبل شكوى المريخ ضد الامل وقرر اعادة المباراة لاشتراك اتحاد القضارف في الخطأ وعدم علم الامل بايقاف اللاعب. * بالله. * شوفوا (المنطق). * منطقكم دا (زلابية) ما بأكلكم ليها. * في الوقت الذي اكد فيه نائب رئيس اللجنة الادارية باتحاد القضارف صحة موقف اتحادهم وان اللاعب كان طرد ووقف مباراتين فقط موكدا حديث رييس نادي الامل. * بعد دا عاوزين يعيدوا المباراة. * عشان شنو؟. * عشان (رزاق) جاب ليه قونين. * لو الاتحاد بيتشغل بالنظرية دي ..نحن عاوزين نعيد مباراة الهلال مع الاهلي شندي في شندي. * وعاوزين نعيد مباراة الهلال مع الاهلي شندي في ام درمان. * وعاوزين نعيد مباراة الهلال مع مريخ كوستي في ام درمان. * وعاوزين نعيد مباراة الهلال مع هلال كادوقلي في كادوقلي. * وقت بتعيدوا ساكت كدا ..عيدوا لينا مبارياتنا دي. * وما تخافوا بنجيب ليكم بونية وهمية كدا. * في كل مباراة عاوزين نعيدها بنقطع لينا اسم من رأسنا وبنقول اللاعب دا ضرب الحكم بونية وما اتوقف سنة. * زي بكري المدينة. * الغريبة الزول الضرب الحكم قاعد ..وبيلعب ..وقرار الاعادة طالع وما اتنفذ ..وبفتشوا في اعادة مباراة (رزاق). * لاقتكم فلاحة اكتر من دي. * اعلام المريخ دا محتاج يفرق بين عمر عثمان وعمر عباس ..مفروض يدخلوهم كورسيات في الحتة دي. * عشان ما يقعدوا يلخبطوا لينا ساكت. * ومحتاجين كمان يراجعوا ليهم (الجغرافيا)..عشان يفرقوا بين القضارفوكسلا. * ويعرفوا من ناحية (جغرافية) ان كسلا براها ..والقضارف براها. * وعاوزين زول يدرسهم (رياضيات) عديل كدا ..ويقول ليهم (الاعادة) صدرت في حق مباراة الامل الاولى وليس التانية. * اما قانونيا ..نحن قنعانين منهم ..ما بستوعبوا لينا (النظريات) دي. * الموضوع دا كبير عليهم. * قال شنو؟. * قال الاتحاد يعيد مباراة الامل والمريخ. * زي ما قال خالد عزالدين قول عادوها ..البنفذ ليكم منو؟. * انتوا ما عندكم اتحاد. * ولا عندكم قرار. * ولا قدرة على تنفيذ اي قرار وان صدر من لجنة الاستئنافات. * قرار قانوني ما قدرتوا تنفذوها ..عاوزين تنفذوا ليكم قرار وهمي ..قرار اشاعة ساكت. * يا جماعة يا اسامة عطا المنان. * يا جمال الوالي. * فريق الامل دا فريق كورة …ما (حقل تجارب). * الامل دا ما صالون حلاقة. * ولا رأس يتيم. * الامل عندو مجلس ادارة قوي وفاهم القانون..وعنده جماهير واعية وحصيفة. * البخليهم يعيدوا المباراة شنو؟. * انتوا جنيتوا؟. * ……… و * قالوا ليك عبدالصمد وقت عرف الموضوع فيه (طيارة) خاصة ..طوالي عمل فيها زعلان. * طوالي استقال. * ابوجريشة اول قراراته قال ليهم ما عاوز لي اي (تربيزة) حايمة. * ايمن تربيزة …يسافر على كيفو ..ويرجع على كيفو ..ويضرب على كيفو. * ………… * السيدة (ل)..اللبخة القدام بيتكم ..ما طلعت شجرة لبخة ..طلعت (كلام جرايد) ساكت. * وقرّض على كدا.