طارق محمد عبد الله فيلسوف زعلان …!! & سؤال مباشر بدون تعقيد (تووووف )في سقف المرمى جسدته الأغاني السودانية فيما يختص بالانتماء الرياضي بالبلاد ( القمر بيضوي انا شن بلاني بالنجوم )؟؟ومن خلال زاوية الطرح دي نعتقد ان السؤال من الاساس يفترض أن يكون اكثر دقة يعني بدلا ما يكون بالشكل التقليدي السائد منذ سنوات طويلة انت هلالابي ولا ….؟؟ يكون انت هلالابي ولا هلالابي زعلان ؟؟؟ وبعد الإجابة مباشرة الناس تقعد مع الزول المستهدف في الواطه عشان تعرف اساسا هو زعلان من شنو؟؟ عشان يقدر يصل لاتفاقية سلام داخلية حقيقية واذا عرف السبب بطل الاستئناف في موضوع محمد الرشيد ، بخيت خميس والعجب ..!! & ونحن ذكرنا عرضا قصة الثلاثي انفا ليه ماعشان نقول ان أصحاب اللسان الطويل في الفاضي وزعوا الوهم للاقلية وهذا ديدنهم منذ زمن طويل جدا ،والمهم بالجد انو الأغلبية أصحاب العفو عند المقدرة يجدوا كل العذر للثلاثي المذكور أعلاه وقطع شك فإن الثلاثي هسه زعلانين وسافين التراب وحقيقة (دقسوهم )واوردوهم مورد الإيقاف والابتعاد عن (المحبوبة ) كرة القدم وبطبيعة الحال فان الامر بيستفحل في الدواخل شديد (وبياكل معاهم جمبه )كلما يشاهدوا( بام أعينهم وأبوها كمان ) لون الدم ابو عشرين حبيب الملايين وهو يرتدي الزي المميز لجامعة الهلال الكروية ويمضي من حسن الى احسن وخلال نصف موسم فقط بات حديث الوكالات والفضائيات العربية والإفريقية ومثار اهتمام عدد من الأندية الكبيرة والمعروفة (بالماما أفريكا) وفي المقابل الثلاثي لاطال لبس جامعة الهلال المميز بالألوان الجاذبة ولا ثانوية النادي الآخر ومعلقين زي بيت الايجار الفيهو قضية مشربكة قيد النظر بالمحاكم لا رست لصاحب البيت والحق الاصيل الهلال ولا مشت لصالح الطرف الثاني …!! & ونرجع تاني لفلسفة الانتماء للاجابة على سؤال لماذا الهلالاب أغلبية غالبة طاغية بالأرض والهلالاب الزعلانين أقلية؟؟ونعتقد أن رئيس جمهورية الحب الشاعر المبدع إسحاق الحلنقي قد حسم الأمر تماما من خلال الحته البيقول فيها (ما علي لو جات مواكب ..ولا فاتتني المراكب .. القمر مادام معاي اعمل ايه انا بالكواكب) ؟؟؟ بختكم ياهلالاب ما عليكم هنيئا لكم الانتماء للحبور ..! & وحتى لانبخس الاقلية الذين ظلموا أنفسهم بالانتماء لغير الحبور حتى ولو الى حين أشياءهم من الممكن جدا أن تجد منهم فيلسوف زعلان يجيك ناطي و يقول ليك نحن برضو بنحب نادينا ما قلنا حاجة بس نحن تجاوزنا مرحلة الحب ووصلنا مع الأزرق صاحب المقام الرفيع لدرجة العشق البديع شفتوا كيف ؟؟؟ وشتان مابين عشق الشخص الفرحان وسعيد بالانتماء زي اول يوم في العيد والزول الزعلان من فرحة الملايين و طوالي مادي البوز شبرين …!! اهداف سريعة ..اهداف سريعة & تابعت حوار القطب الهلالي صابر شريف الخندقاوي بقناة الهلال عبر برنامج( اعترافات ) سطر سطر زنقه زنقه . & وحقيقة فإن الرجل كان واضحا مرتبا شجاعا في طرحه للحد البعيد . & واعجبتني حتة أنه لا يرفض الرئاسة الفخرية لتركي الشيخ ويعتبرها مكسب ولكنه يرفض الاعتماد الكلي عليه . & ونادى الخندقاوي بتفعيل الرعايات مع الشركات داخليا وخارجيا باعتبارها الشكل الافضل للهلال . & وقالها الخندقاوي واضحة جلية الرئيس الفخري لا يمكن أن تلزمه بالدفع ولكن شركات الرعاية ملزمة وهذه حقيقة طبعا . & وقلناها ونكررها للمرة المليون مالم يتم تغيير النظام الأساسي العقيم وتحول الهلال لشركة مساهمة عامة لن نحقق الآمال والطموحات . & ويظل الهلال الرقم الصحيح بالكرة السودانية وغيره الكسور والبواقي . & نتطلع لهلال قيافه فايت العرب والافارقة مسافة . & مهما طال الزمن او قصر سيد البلد سيصبح سيدا للقارة السمراء باذن الله . & واخيرا احمد الله كثيرا انني حي ازرق .
