محمد هبدالماجد ابو حمد ..مدينة الذهب والطفل (ابراهيم محمد)!!
مدينة ابوحمد الآن اضحت هي مدينة (الذهب) ويمكن ان نقول مدينة الذهب وسريعة البديهة ..او بعد الاستقبال الكبير الذي وجده الهلال هناك يمكن ان نطلق على ابوحمد عاصمة الهلال – ممكن ان نقول هي مدينة الذهب والهلال. . هذا (الذهب) الذي اكتشف في اراضيهم – واحدث نقلة اقتصادية كبيرة في المنطقة قبل ان يتواجد في اعماق الارض – كان يتواجد في اعماق انسان المنطقة. . اهالي المنطقة هم بذلك النقاء والذكاء والقيم (النفيسة). . لقد احسن الله جزاء اهالي منطقة ابوحمد بان جعل (الذهب) في اراضيهم. . ابو حمد مدنية الذهب والنخيل. . الذهب والهلال. . الذهب والطفل (ابراهيم محمد). . ابوحمد مدينة الذهب والرباطاب. . الذهب واحمد عمر الرباطابي. . انها مدينة الهلال. . لا عجب في ذلك فمن مدنية ابو حمد خرج الفنان والشاعر احمد عمر الرباطابي رحمة الله عليه الذي كتب شعار برنامج (من ربوع السودان) – رغم ان الشعار طرحته اذاعة ام درمان في عام 1958م للتسابق ليكتبوا عنه بروفيسورات ودكاترة لينجح احمد عمر الرباطابي في كتابة اغنية (الربوع) بهذا الابداع والحس الوطني الكبير ، الذي تجسّد حتى في استقبال الهلال في مدنية ابو حمد. . (نحييك فى القرى والبادية وفى كل النواحى الهادية..فى الخرطوم زهورك نادية وتهواك النفوس ليك راضية...من ام در يا ربوع سودانا نحييك وانت كل امالنا..بنعيم الجنوب جود لينا ومن فيض كردفان اغنينا..فى شرقك نصيد وادينا شمالك فيهو بركاوينا...تطرب بيك جميع اجيالك وفى كل البقع ترضالك...طوالى الفرح فى بالك يا ربوع شوقنا فى استقبالك). . نعم شفنا (استقبال) اهالي مدينة ابو حمد للهلال بهذا الشوق ...والتلقائية الجميلة. . هذا هو الهلال .. (تطرب بيك جميع اجيالك وفى كل البقع ترضالك...طوالى الفرح فى بالك يا هلال شوقنا فى استقبالك). . الما قعد في الواطة وشرب شاي المغرب وهو بيسمع في يوم الجمعة في برنامج (من ربوع السودان) – ما عاش دنيا ...ولا شاف حاجة. . ولا بعرف شيء. . جربتوا تشيلوا (حلة الحلبة)؟ . قرضتم الرغيف الحار مع الشاي؟ . كتبتوا ليكم (جواب غرامي) وما رسلتوه؟ . دكيتوا الحصة الاخيرة؟ . اكلتوا المنقة الخضراء بالشطة والليمون؟ . لو ما عملتوا الحاجات دي انتوا لا ناسنا ولا نحن بنعرفكم. . برنامج ربوع السودان دا كان عندنا ولا بطولة الامم الاوربية. . برنامج ما يطلبه المستمعون دا بننتظروا زي مباريات الهلال...تحفظ الاغنيات التى تذاع فيه ...والاهداءات التى تقرن بالاغنيات. . احمد عمر الرباطابي الى جانب اغنية (الربوع) كتب وتغني ايضا بأغنية شهيرة – زاحمت اغاني الحقيبة ونافستهم : (الحبيب الشغل العقول..نغني عليه ونقول.....وين راقي منك طولنا طول.. حبيبي اب قدرا سما...يا جميل يا بدر السما....يا الجدي العينتو مغيمة... حن علي روحي وارحما). . الطولة زمان كانت بتتقاس بهذه الاغنية (منك طولنا طول). . الحكاية شنو؟ . الشوفة زمان كانت حاجة صعبة – كونك تشوف ليك زول عزيز عليك دا ما بحصل إلّا في العيد. . الغريبة الحاجات دي كلها كانت ما بتتم إلّا (صدفة). . عايشين على (الصدفة). . ما في حاجة بتخطط ليها ..ولا بتقدر تقصدها. . خليها للصدف. . هذه هي ابو حمد تتجسد في هذه الكلمات : (يا الحنين واخلاقك لطاف..يا اب كلاما خاتي الجفاف..من ظرفك نالو الظراف..والشباب اعترف اعتراف). . الرباطابي كان عبقرية حقيقية في الغنا. . هل تعلموا ان نهر (النيل) لا ينحني إلّا عند مدينتين في مدينة شندي وفي مدينة ابوحمد. . تميز اهالي ابوحمد وعرفوا في التاريخ الاجتماعي بسرعة البديهة واشتهروا بالفطنة في هذا الجانب – حتى ان الرد السريع والساخر دائما يقرن بالرباطاب. . أي زول بيبدع في الحتة دي ...بقولوا ليه : (يا زول انت رباطابي؟). . ماركة مسجلة باسمهم. . النخيل في منطقة ابو حمد يعطي ثمارا اكثر حلاوة – كل انوع التمور في السودان تسمى (بلحا) إلّا في ابو حمد يسمى (عجوة) وذلك لحلاوة البلح ولأنه عندهم لينا وطريا. . حكاية الطفل (ابراهيم محمد) والذي عسكر امام الفندق الذي نزلت فيه بعثة الهلال يحكي توضح كيف يكون عشق الهلال. . ابراهيم محمد عبر بصورة تلقائية عن اهالي المنطقة ..قعد (صاقر) بعثة الهلال. . لفتة جميلة من بعثة الهلال بقيادة رامي كمال تكريم هذا الطفل (الازرق). . ازرق عشقا. . جميل تقوم بعثة الهلال باداء الواجب وتزور مدينة عطبرة من اجل التعزية في رئيس نادي الامل الراحل جمال حسن سعيد. . هذا هو الهلال. . الجهاز الفني للهلال في ابوحمد لبس (الجلابية والطاقية)...هذا افضل رد من جهاز فني برتغالي لم يجد افضل من ان يرد التحية لأهالي المنطقة بالجلابية والطاقية. . لقد بادلكم الحب. . ريكاردو اصبح واحد منكم. . شفت الصور ..وكيف كان استقبال الهلال واعلامه عند وصول البعثة. . حاجة تفرح. . لقد عبرتم عنا ...هذا هو عشقنا الحقيقي للهلال ...هذا هو الهلال الذي نعرف. . الهلال في ام درمان وفي ابوحمد وفي كسلا وفي كوستي. . الهلال كدا. . عشق لا ينتهي. . ناس بتلقائية ..بوضوح يبدو عليهم (حبهم) للهلال. . ريدتهم للهلال ظاهرة. . هلال ابوحمد ..كان موجودا ...نظم ورتب ...وكان امتداد حقيقي للهلال. . الشرطة ابوحمد والاهلي ابوحمد. . هذه المدينة لا يبد ان يوجد لها ممثل في الدوري الممتاز. . اتحاد ابو حمد عليه ان يجتهد من اجل ذلك – هذا الجمهور قبل كل شيء يستحق ان يسافر له الهلال في كل عام. . خلونا هسع في حكاية السفر. . وفي الطريق الى ابوحمد. . الذين جربوا السفر بالقطار يعرفون ان الطريق الى ابو حمد من محطة عطبرة يمر بهذه المحطات والسند. . السندة هي منطقة تقع بين محطتين ..منطقة لم تبلغ مرحلة (المحطة) لذلك يقولون عنها في السكة الحديد (سندة). . حاجة اصغر من المحطة واكبر من اللا محطة. . حاجة بين بين. . الغريبة في سند اشهر من المحطات – هكذا هو السودان – الحاجات فيه ما معروفة. . الحاجات الصغيرة فيه بتكون اكثر ادهاشا. . السندة يتوقف فيها القطار بتوصية من الراكب حتى يتمكن من النزول من القطر او الطلوع فيه ..اما من دون ذلك فان القطار (يهدن) في السندة او يسير فيها ببطيء احتراما لاهليها وهو يصفر. . نبدأ من عطبرة مدنية (الحديد والنار) في الطريق الى ابو حمد مدينة (الذهب وسرعة البديهة) او مدنية (الذهب والهلال) حيث يبدأ القطار بعد الخروج من محطة الوطن الكبير عطبرة بسندة خليوة ثم سندة كنور والتى جاء منها نادي الفلاح الذي ننتظر عودته ، ثم يصل القطار الى محطة دار مالي (محطة هادئة) تشبه اغنيات عثمان حسين القديمة، ثم محطة بربر ،المحطة التاريخية والمنقطة الاثرية المعروفة في تاريخ السودان وفي حضاراته ، بعد بربر يصل القطار محطة العبيدية وهي من مناطق اراضي الذهب في السودان ، في الجهة الغربية لهذه المحطة هناك منطقة الباوقة (اللذيذ تفاحها) والتى اشتهرت بالجناين ...وقبل ذلك هناك مناطق خلاوي واهل قرآن مثل منطقة (كدباس). . شرقا بعد العبيدية في اتجاه الشمال محطة مبيريكة ثم محطة الكربة التى خرج منها عبقريات كبيرة ثم سندة سبنس ثم محطة ندي ثم سندة الزويرة ومحطة الشريك (شاي اللبن في الشريك) ثم سندة ارتل (ابو الحسنين ) ومحطة ابو ديس ومحطة أبو هشيم ثم سندة كرقس وسندة أمن وسندة مرو ثم محطة دقش بلد الاعلامي الراحل ابراهيم دقش ثم سندة الكرو ثم مدينة ابوحمد. . هناك جزر وقرى اخرى مشهورة في المنطقة مثل جزيرة مقرات الجزيرة الساحرة ...(دي لو شافها ريكاردو ما كان برجع معاكم يا رامي كمال من هناك). . لا انسى في الكرو حلة (القماري) – وهي المنطقة التى جاء منها الراحل عبدالفتاح بشير فحل.. رحمة الله عليه احد اهم علامات الطيبة والاخلاق. . ناس القماري بشير الفحل ..والعطا والسنجك وعبدالماجد والجعلي. . ناس بيوتهم فاتحة على البحر ...لا تغيب (الضحكة) عنهم ...ابواب دائما مفتوحة للناس مثل قلوبهم. . ابوح حمد منحت الهلال الكثير. . هذه الزيارة اعطت للهلال الكثير. . على الاقل فان الجهاز الفني للهلال عرف عظمة الهلال وعرف السودان على حقيقته. . يا هو دا السودان. . ................ متاريس . كل التحايا والتهاني والأماني لأسرة قناة الهلال في العيد الرابع للقناة. . حقيقة القناة – اصحبت القناة الاولى في السودان. . قناة تشرف ...قناة في قامة الهلال. . استطاعت ادارة القناة ان تضع بصمة فضائية (زرقاء) في الساحة. . نتحدث عن قناة الهلال ليس في الجانب (الرياضي) فقط – وانما في الجانب الثقافي والاجتماعي ...وحتى السياسي. . بالتوفيق للقناة. . ننتظر المزيد من اسرة القناة...انتم تحملون شعار واسم الهلال. . ليس هناك اعظم من ذلك. . .......... . ترس اخير : ابو حمد (زرقاء).
