كدي وريني مدرب فاشل زي غارزيتو ده كييييف قلب صفحة الدورة الأولي بإنجاز زي ده؟ معقولة بس نكتب كل يوم ونهتف كل يوم ونصرح كل يوم ونعمل مسيرات كل يوم ونقدم طعون كل يوم ونرفع لافتات كل يوم وبعد ده كله يغلب وينهي مشواره الأول بدون هزيمة ويكون أفضل فريق علي كل المستويات؟ في شنو مفروض يتعمل وماعملناهو عشان الزول يطلع من طوره ويقول السودان ده لو آخر بلد في الدنيا تاني مابدرب فيهو .. ياخي نحن عيشناهو تحت ضغط رهيب لو جبل كان إتهد مافاضل لينا إلا نخطفوا ويكون شرطنا الوحيد لإطلاق سراحه يتغلب في كورتين وبعدها يستقيل . فشلت كل مخططاتنا وراح تعبنا وسهر الليالي شمار في مرقة والراجل الخواجة في النهاية إنتصر علينا عشان كده ننسي الموضوع .. ولكن هذا الحديث لم يعجب أحدهم رفض الإعتراف بالهزيمة فصرخ في وجه محدثه قائلا (ماحانستسلم والفريق ده لازم يتغلب لازم يتغلب نقعد ونفكر ونخطط ماممكن نقيف من الدورة الأولي ونقول ننسي الموضوع أنا في رأيي يادوب إبتدينا .. وأنا في رأيي تكتيكنا بقي مكشوف ولازم نغيروا نشوف أساليب وطرق تانية ) . كان يوم أمس الأول يوما حزينا في أوساط أعداء الهلال الساعين لتدميره وتخريبه فقد حقق الفريق إنجازا حقيقيا وليس وهميا بتصدره للدورة الأولي بجدارة وإستحقاق بدون هزيمة وهو في تقديري إنجاز للمدرب الكبير غارزيتو الذي إستطاع أن يتجاوز كل التعقيدات التي واجهته في بداية مشواره مع النادي الكبير مقدما درسا مجانيا لمجالس الإدارات والمدربين يؤكد من خلاله أن المدرب الواثق من إمكانياته وقدارته قادر علي العمل تحت أسواء الظروف وأن ألاعيب الصيبة والمراهقين فكريا لن تعطل تركيزه في العمل الذي جاء من أجله. ضربة قاضية وجهها غارزيتو لكل من حاولوا إستخدام وضعه علي رأس الجهاز الفني لأجندتهم الرخيصة وكان صادقا مع نفسه عندما وصفهم بالجنون وهو يشير لأساليبهم المنحطة وتفاهتهم وسطحيتهم في الصراع أكد لهم أنه جاء من أجل العمل ولاشيء غير العمل وسيعطيه كل وقته من أجل بناء فريق بطولات قوي قادر علي المنافسة في البطولات الأفريقية . رسالة كافية وشافية قال فيها غارزيتو لاوقت عندي أهدره مع أصحاب الزمن المفتوح الذين يعملون 24ساعة للتخطيط لإيقاف الهلال في محطة الفشل .. لاوقت عندي ولاأعلم من أين يأتون بهذا الوقت المهدر في المخططات الحقيرة ألا يعملون؟ قالها غارزيتو أقلب الصفحة إنتهت الدورة الأولي وأعمل الآن علي التحضير للدورة الثانية والكنفدرالية الأفريقية .. أضحك مع الخواجة ( إنت ناس ديل كل يوم بجيبو لافتات جديدة في مباريات متر القماش عندكم بي كم؟ إنت ناس ديل بقولوا أقعد .. أقعد نحن في سينما ولا كورة؟ إنت ناس ديل بقعدوا هنا بدري بجوا ساعة كم؟ إنت ناس ديل مجانين الفريق غالب كواريك الفريق غالب كواريك طيب لو فريق مغلوب يعملوا شنو؟ يقتلونا؟) إنتهي نصبت صيوانات العزاء في هذا اليوم وعادوا يجرجرون أذيال الخيبة والهزيمة في منظر يثير الشفقة والحزن والأسي علي حالة الدمار التي وصلوا إليها .. الدمار الذي تمنوه للهلال وعملوا بكل الأساليب الملتوية لتحقيقه ولكن دارت الدائرة عليهم وعلي نواياهم السوداء فلم يجدوا أمامهم سوي طريق (الحرباء وفي أقوال أخري الحربوية) ليلونوا مواقفهم ويسيروا مع التيار مهللين للإبداع والإمتاع والإنجاز وكأنه فريقا آخر غير الفريق الذي قالوا أنه غير جدير بموقعه الصداري . ولو لم يفعلوا ذلك لما كانوا الإنتهازيين المتسلقين .. وبرافو غارزيتو يكفيك أنك أعدت كل فأر لجحره. hassan faroog [[email protected]]