كان الوقت متأخراً عندما رن جرس هاتفي على غير العادة وتأملت الرقم ولم أكن أعرف صاحبه فترددت عن الرد ظناً مني أن المتصل يقصد شخصاً آخر، ولكنه عاود الاتصال وأصر على أن يواصل رنين الجرس ففضلت فتح الخط لأبين لصاحبه أنه يخطئ الرقم، ولكن كانت المفاجأة أن وجدته صديقي ود أبو صرة، فعجبت لاتصاله من رقم غير معروف لدي وكان معي قبل لحظات مما أثار دهشتي لماذا يهاتفني برقم لا أعرفه إلا أنه سارع قائلاً: ألو عارفك استغربت من الرقم.. واستغربت أكثر لأنك كنت معي قبل لحظات لقد اتصلت بك من شريحة خاصة خوفاً من أن يكون رقمي مرصوداً في هذه الايام الخاصة بتسجيلات اللاعبين وخير الكلام يا صاحبي ما قل ودل - وأنا مالي ومال تسجيلات اللاعبين خليني في موضوعي إن شاء الله لقيت لي حل لمشكلتي- - اسكت ساكت ليك حل رهيب شغلة تجيب دهب بس حقي النص يكون محفوظ. - ده كلامك! أكثر منه لو داير، بس إن شالله مضمونة تخارجني من الظروف الفيها ما تكون كلام ساكت - مضمونة ساكت شغلة تاخد منك يومين بس وتقبض مليار كاش رزمة ورا رزمة بدون شيك وورق جديد - مل – شنو بتقول كم مليار تقبضه كاش رزمة وراء رزمة إنت عندك كابوس في رأسك!! أظنك داير دكتور نفساني دي شغلة شنو التجيب مليار في يومين ونحن لينا سنة ورا مائة مليون - أيوة ومضمونةخليك جاهز عشان توقع عقد احتراف لاعب كورة - بتقول شنو ما سامعك كويس - كلامي واضح قلت خليك جاهز توقع عقد احتراف لاعب كورة؟؟ - أنت فكت منك ولا شنو، أنا اشتغل لاعب كورة وأنت عارف - قاطعني: (اسكت أوعة تقول كلمة ما يكون واحد سامعنا اليومين دي التلفونات كلها مرصودة ومتفرغة للموضوع ده) انتظر الصباح حافهمك كل حاجة بس حقي مضمون نص لي ونص ليك أنت تكتب لي وأنا أكتب ليك سددت السماعة وأنا أضحك أنا أوقع عقد احتراف وأنا ما بعرف أفرق بين الكورنر وضربة الجزاء. --------------------------------- (صباح اليوم التالي جاء لي صاحبي برزمة لا تحصى من الصحف ولفت نظري وصورتي محمولاً على أكتاف الجماهير تتوسط الصفحات الرياضية فأصابتني الدهشة وأنا أطالع ما كتب، وكان الخبر يقول كابتن كابو وصل الخرطوم سراً من جنوب أفريقيا لتسجيله بنادي طير الرهو بصحبة مندوب النادي وكان في استقباله القطب الكبير والذي كان قد رتب خروجه من المطار في سرية تامة بغرفة كبار الزوار حتى لا يراه أحد ويفشي أمره، ومن المطار حملته عربة مظللة لشقة خصصت لإخفائه، ولكن تحرياتنا أفادت بأن جواسيس نادي الصقر (البدون جناح) رصدوا العربة لهذا من المتوقع أن تكون المعركة شرسة للحصول على توقيع هذا اللاعب الفذ) (لم أتمالك نفسي من الدهشة فهاتفت صديقي) - ياخي جننتني إنت عارفني أنا وين لا كنت في المطار ولا في عربية شالتني جبت صورتي بزي الكورة من وين؟؟ - ياخي أنت مالك أنت نسيت الصورة دي لما أنت صورناك في الملعب تمثل دور لاعب كورة في مسلسل (فكت) والملعب كله يصفق ليك حسب السيناريو - ياخي أنت عارفه تمثيل وأني ما بعرف كورة - ومنو القال ليك لازم تعرف كورة عشان الشغلة دي أنت بس خليك في مكانك وأنا بعرف أوصل الخبر للجماعة وحيتسابقوا عليك بالشنط بس أوعى تنزل من المليار وكاش وزي ما قلت ليك أنت تكتب لي وأنا أكتب ليك نص ليك ونص لي - ياخي وبعدين لما يكتشفوا الحكاية - ما تبقى عبيط من أول يوم تدخل الملعب واتخيل نفسك تمثل نفس الدور وتقع على الأرض مع أول احتكاك ليك مع خصم زي ما عملت في المسلسل، وطوالي يستبدلوك و يسفروك لندن ولا ألمانيا ويكتشفوا أن عندك قضروف ويشطبوك طوالي - والله أنت خطر فهمت اللعبة - وبعد يشطبوك كان داير تبقى رئيس النادي خلاص الجمهور كله معاك حيتظاهروا ليك (عايزين كابو عايزين كابو) بس في الإدارة مش في الملعب ---------------------------------- في ظهر نفس اليوم كانت عربة فاخرة مظللة تحملني لمباني الاتحاد وازدادت دهشتي أكتر وأنا أسمع هتافات الجماهير باسمي ولحظة خروجي من مكتب الاتحاد خطفوني ليك وشالوني بس صاحبي كان عامل حساب الشنطة شالها مني قبل ما أطلع من مكتب الاتحاد. ------------------------ - مساء نفس اليوم حضر صاحبي يحمل الحقيبة وأنا لا أصدق ما حدث وفتحت الشنطة وفي ذهني ربما يكون هذا العمل ربما يكون تمثيل زي المرة الفاتت ولكن لما فتحت الحقيبة ذهلت ما كانت فاضية زي يوم المسلسل رزم فوق رزم، ورحت أعد المبلغ ولدهشتي وجدتها كانت نصف مليار فنظرت لصاحبي فضحك وقال لي: - أنا حقي شلته (أنا الآن في انتظار أول تمرين وأرتطم بأيّ لاعب من أول دقيقة وأعمل ميت، وأنتظر بعد كده إجراءات السفر عشان يعالجوا لي الغضروف بتاعي ويشطبوني. - ------------------------ (المالاقي ليه شغلة يرفع أيده بس نص بالنص أنت تكتب لي وأنا أكتب ليك وعقبال التسجيلات الجاية واللاعبون المبرزون يمتنعون).
