سودارس : نظرية الباب البعمل صوت

القوز يقرر السفر إلى دنقلا ومواصلة المشوار لاعب منتخب السودان يتخوّف من فشل منظومة ويتمسّك بالخيار الوحيد الدب.. حميدتي لعبة الوداعة والمكر ⛔ قبل أن تحضر الفيديو أريد منك تقرأ هذا الكلام وتفكر فيه إلي اين نسير منشآت المريخ..! كيف واجه القطاع المصرفي في السودان تحديات الحرب خلال 2025 صلوحة: إذا استشهد معاوية فإن السودان سينجب كل يوم ألف معاوية إبراهيم شقلاوي يكتب: وحدة السدود تعيد الدولة إلى سؤال التنمية المؤجَّل كامل إدريس في نيويورك ... عندما يتفوق الشكل ع المحتوى مباحث قسم الصناعات تنهي نشاط شبكة النصب والاحتيال عبر إستخدام تطبيق بنكك المزيف عقار: لا تفاوض ولا هدنة مع مغتصب والسلام العادل سيتحقق عبر رؤية شعب السودان وحكومته إجتماع بسفارة السودان بالمغرب لدعم المنتخب الوطني في بطولة الأمم الإفريقية بولس : توافق سعودي أمريكي للعمل علي إنهاء الحرب في السودان البرهان وأردوغان يجريان مباحثات مشتركة شاهد بالفيديو.. الفنانة ميادة قمر الدين تعبر عن إعجابها بعريس رقص في حفل أحيته على طريقة "العرضة": (العريس الفرفوش سمح.. العرضة سمحة وعواليق نخليها والرجفة نخليها) شاهد بالفيديو.. أسرة الطالب الذي رقص أمام معلمه تقدم إعتذار رسمي للشعب السوداني: (مراهق ولم نقصر في واجبنا تجاهه وما قام به ساتي غير مرضي) بالصورة.. مدير أعمال الفنانة إيمان الشريف يرد على أخبار خلافه مع المطربة وإنفصاله عنها وحدة السدود تعيد الدولة إلى سؤال التنمية المؤجَّل تراجع أسعار الذهب عقب موجة ارتفاع قياسية عثمان ميرغني يكتب: لماذا أثارت المبادرة السودانية الجدل؟ ياسر محجوب الحسين يكتب: الإعلام الأميركي وحماية الدعم السريع محرز يسجل أسرع هدف في كأس أفريقيا شاهد بالصور.. أسطورة ريال مدريد يتابع مباراة المنتخبين السوداني والجزائري.. تعرف على الأسباب!! وزير الداخلية التركي يكشف تفاصيل اختفاء طائرة رئيس أركان الجيش الليبي "سر صحي" في حبات التمر لا يظهر سريعا.. تعرف عليه والي الخرطوم: عودة المؤسسات الاتحادية خطوة مهمة تعكس تحسن الأوضاع الأمنية والخدمية بالعاصمة فيديو يثير الجدل في السودان إسحق أحمد فضل الله يكتب: كسلا 2 ولاية الجزيرة تبحث تمليك الجمعيات التعاونية الزراعية طلمبات ري تعمل بنظام الطاقة الشمسية شرطة ولاية نهر النيل تضبط كمية من المخدرات في عمليتين نوعيتين الكابلي ووردي.. نفس الزول!! حسين خوجلي يكتب: الكاميرا الجارحة احذر من الاستحمام بالماء البارد.. فقد يرفع ضغط الدم لديك فجأة استقالة مدير بنك شهير في السودان بعد أيام من تعيينه كيف تكيف مستهلكو القهوة بالعالم مع موجة الغلاء؟ 4 فواكه مجففة تقوي المناعة في الشتاء اكتشاف هجوم احتيالي يخترق حسابك على "واتسآب" دون أن تشعر رحيل الفنانة المصرية سمية الألفي عن 72 عاما قبور مرعبة وخطيرة! شاهد بالصورة.. "كنت بضاريهم من الناس خائفة عليهم من العين".. وزيرة القراية السودانية وحسناء الإعلام "تغريد الخواض" تفاجئ متابعيها ببناتها والجمهور: (أول مرة نعرف إنك كنتي متزوجة) حملة مشتركة ببحري الكبرى تسفر عن توقيف (216) أجنبي وتسليمهم لإدارة مراقبة الأجانب عزمي عبد الرازق يكتب: عودة لنظام (ACD).. محاولة اختراق السودان مستمرة! ضبط أخطر تجار الحشيش وبحوزته كمية كبيرة من البنقو البرهان يصل الرياض ترامب يعلن: الجيش الأمريكي سيبدأ بشن غارات على الأراضي الفنزويلية قوات الجمارك بكسلا تحبط تهريب (10) آلاف حبة كبتاجون مسيّرتان انتحاريتان للميليشيا في الخرطوم والقبض على المتّهمين إسحق أحمد فضل الله يكتب: (حديث نفس...) مياه الخرطوم تكشف تفاصيل بشأن محطة سوبا وتنويه للمواطنين الصحة الاتحادية تُشدد الرقابة بمطار بورتسودان لمواجهة خطر ماربورغ القادم من إثيوبيا مقترح برلماني بريطاني: توفير مسار آمن لدخول السودانيين إلى بريطانيا بسهولة الشتاء واكتئاب حواء الموسمي عثمان ميرغني يكتب: تصريحات ترامب المفاجئة .. "كرتي والكلاب".. ومأساة شعب! ما الحكم الشرعى فى زوجة قالت لزوجها: "من اليوم أنا حرام عليك"؟ حسين خوجلي: (إن أردت أن تنظر لرجل من أهل النار فأنظر لعبد الرحيم دقلو) حسين خوجلي يكتب: عبد الرجيم دقلو.. إن أردت أن تنظر لرجل من أهل النار!!

شكرا على الإبلاغ!

سيتم حجب هذه الصورة تلقائيا عندما يتم الإبلاغ عنها من طرف عدة أشخاص.

نظرية الباب البعمل صوت

قوون نشر في قوون يوم 20 - 07 - 2013

البلد دي فيها (نظريات) كتيرة..اي واحد فينا عامل ليه (75) نظرية وشغال بيها.

نظرياتنا اكتر من شغلنا.

المكتب تلقى فيه (4) موظفين و(121) نظرية.

واي زول فينا مقتنع بي نظريتو ..وبعتبرها هى الصحيحة...عشان كدا اي تضارب في (النظريات) بحصل ترجيح ذاتي للنظريات.

اي زول بعتبر نظريتو هى الصحيحة...وهى ما فيها اي كلام ..(مية المية).

واختلاف النظريات هو الذي يظهر هذه الاختلافات وذلك التباين في الاراء ...باعتبار ان اي زول شايف نظريتو فل.

هسع يا جماعة عليكم الله ...(وبدون مقاطعة) كدا ما شفتوا النظريات البتقع (هبطرش) دي لمن يكونوا عاوزين يركبوا ليهم (صيوان).

البلد كلها تقعد تنظر ليك.

النظريات البكبوها في (الصيوان)...تعمل (السد العالي).

والله نحن لو بنأكل (نظريات)..كان قطر ما يرمينا.

كان بقينا حاجة تانية ...والسودان ذاتو ...كان بقى بي قدرة قادر كدا (دولة اوروبية).

اي واحد يشوف ليه (صيوان) بركبو فيه ...بقوم يشيل ليه (كوتة) نظريات ويطلع على الاولاد عشان ينظر ليهم.

لا يا ولد ...الشمس بتجي من هنا مفروض الباب بتاع الصيوان دا يكون فاتح جنوب.

انتوا عاوزين تعملوا كم غرفة؟.

تسع غرف يا حاج.

تسع غرف ليه؟..تمانية كفاية.

اصلو ما في داعي ل (9) غرف.

بعدين اهم حاجة في الصيوان الغسالات عليكم الله طلعوها برة ..وجيبوا ليكم صابون.

جني وجن الغسالة الما بكون فيها (صابونة).

كل واحد يقعد ينظر ليك في جهة ...وكل زول نظريتو هي الصحيحة.

الحبيب (نميري شلبي) كان قبل سنوات قد سن نظرياته الساخرة عبر (حاج نظرية) السلسلة الشهيرة التى كان ينشرها في صحيفة (نبض الكاريكاتير).

وقد عاد نميري شلبي بصحبة الانس الجميلة سفيان الهادي ومجدي حسين الي (نبض الكاريكاتير)...وعاد شلبي الي كتابة (حاج نظرية) من جديد.

وقد برع فيها نميري شلبي في نقد المجتمع السوداني ..وابدع في تقديم (نظريات) واقعية من الحياة السودانية.

انا الليلة ...وعلى هذه المساحة ...عاوز ابحث لي عن نظريات ثابتة في حياتنا.

وهى نظريات واقعية ...كلنا شفناها وعايشناها ...لكن دون ان نسجل تلك (النظريات) علميا او اكاديميا في المصنفات لحفظ حقوقنا الفكرية وحقوق الابتكار لهذه النظريات ...(الواقعة هبطرش).

سوف اقدم لكم نماذج من (النظريات) الواقعية ...كمثال ..من بعد فان اي زول ممكن يطلع ليه تسع عشرة نظريات من جنبو.

النظريات راقدة بس نحن ما شغالين بيها كتير.

اديكم نظرية ما عندها علاقة بالرياضة ..لكن اكيد كلكم مرت بيكم.

النظرية دي اسمها نظرية (الزيادة)...وهى الباب البعمل صوت.

موش مرات في باب خشب ..بيزيد حجمو في الخريف بسبب ان (الموية) بتخلى الخشب يتفتح ويزيد ...يقوم يطلع (صوت) من الباب وقت تفتح الباب او تقفلو.

طبعا اسحاق الحلنقى عندو في حكاية الاصوات دي ..(اصوات الباب)...(لو وشوش صوت الريح في الباب يسبقنا الشوق قبل العينين).

غير ان الصوت او الوشوشة هنا بسبب الريح ...وهذا غير الصوت الذي اقصده في النظرية اعلاها لأن الصوت هناك بضرس ..وهو ناتج من احتكاك ادى الي صدور هذا الصوت.

طبعا بعيدا عن الاصوات تلك ..هنالك ثقافة خاصة للابواب ...وقد عرضت الكثير من العواطف والمساجلات للتوثيق للابواب ..وقدمت نماذجا شعرية وغنائية كثيرة عن (الباب).

محمد الحسن سالم حميد...عندو في (الرجعة للبيت القديم).

أنا ماشي راجع لي بيوت تفتح لي دق أو ما أدق

من غير تقول الزول منو ولا حتى عل الداعي خير

بيوت بجيهن في أي يوم إن جيتا ليل إن جيت دغش

طوال دفر الباب وأخش

شوف هنا (دفرة) الباب والدخول في البيت دليل الفة ومودة ...والحالة واحدة.

كلام حميد دا ممكن يسوقنا بيعيد ...وممكن يطلعنا من (النظرية) ذاتها ..خاصة واني احفل هنا ان اتي بنماذج ليس إلا.

ما عاوز اشبكم كتير.

على العموم يا جماعة (الباب البجيب الريح سدو واستريح).

وقبل ما اسد هذا الباب اقول عن تلك النظرية ...ان الابواب التى تصدر صوت عادة هي ابواب القرى ...وبيوتها بيوت طين ..وسقاطاتها واقعة ...وعاوزة ليها (رزة) كمان.

سكسكة الباب فيها شيء من الحنية ...والاعلان غير المباشر ان هناك زول داخل البيت.

اتجاوز هذه النظرية ...واحدثكم عن نظرية تانية ...(نظرية قاطعها من رأسي دا).

هذه النظرية هى نظرية (الفرانة).

النظرية دي بتقول (الفرن الما فيه عيش بتعرفو من اول زبون طالع من الفرن تقابلو..تلقى صارو وشيه زي المشجع البكون طالع من الاستاد مغلوب في اخر دقيقة من عمر المباراة).

الغريبة بعد (الصرة) دي ...الزول الطالع من الفرن دا ..ما بقول ليك (عيش) ما في ان سألتو ما بشتغل بيك ...لمن تدخل الفرن جوة وتجي طالع بي نفس الصرة.

نظرية ثالثة ..بتقول (صاحب الكورة بعزلوه اول زول في الدافوري).

الشرح.

في الحلة ..في ناس الله خصاهم بان يكون عندهم (كورة).

يكونوا مسيطرين تماما على الو ضع ..يحددوا ساعة بداية الدافوري ...ويوم يكون ما في دافوري ...ومتين الدافوري ذاتو ينتهي ..ومنو يلعب مع منو...ومين يقعد برة.

سيد الكورة بكون بحدد اي حاجة الكورة دي ضربة جزاء وإلا ما ضربة جزاء.

والكورة دي قون وإلا ما قون.

عادة سيد الكورة هو البحكم ليك الدافوري ...وما في زول طبعا بزعلو وإلا بقول ليه حاجة ...وإلا بشيل (كورتو) ويطلع.

نخلى دا وندخل ليكم على متن النظرية.

النظرية بتقول ان صاحب الكورة حتى لو ما كان عندو شيء وكان كيشة ساكت ..وزول اضينة ..في الدافوري بعزلوه اول زول في (التقسيمة).

الشيء البتغيظ الزول الاشتر دا بكون لابس (10)...وما في اي زول بقدر يقول حاجة.

وعندو شنكارات كمان.

ما سيد الكورة وكدا.

النظرية الرابعة بتقول ...(بيت العزابة دائما بتكون قدامو موية مدفقة).

نفسي امشى لي بيت عزابة ...وما القي قدام الباب في موية غسيل مدفقة.

العزابة ديل يكونوا اتفقوا على ان يدفقوا الموية قدام الباب عشان كدا اي موية تكون مدفقة قدام الباب ...اعرف طوالي ان الباب دا باب عزابة.

دي (نظرية) ما عاوزة نقاش.

نظرية خامسة ..(الزول الشليق براقب العب زول في الفريق التاني).

نحن زمان وقت تكون عندنا مباراة ويكون الفريق الذي سوف نلعب ضدو فيه لاعب خطير ..يستحق المراقبة ...كان اكتر واحد فينا (شلاقة) بقول انا بس خلوا لي اللاعب دا.

ح اراقبوا ليكم ...المباراة كلها نفس ما ح اديهو ليه ...والله لو طلع برة يشرب ليه (جك) موية ...اطلع معاه اشرب (جردل).

اها النظرية دي ثبتت عندنا بي انو (الشليق) طوالي براقب الزول اللاعب.

مرة مشينا المباراة ..المباراة بدأت ..زولنا الشليق قال انا خلوا لي نمرة (10) دا.

والله كورة ما يهبشها.

زولنا الشليق نجح نجاح منقطع النظير في الحد من خطورة ذلك اللاعب قطع منو الموية والنور.

الشوط التاني ..مدربنا طلع الزول الشليق دا ..عشان الجمهور قال الزول دا لازم يطلع ...نحن جينا عشان نستمتع بمهارات اللاعب رقم (10)..ما جينا نتفرج على اللاعب رقم (13) دا.

الغريبة اي لاعب شليق بكون بيلبس فانلة رقم (13).

نخلى النظرية دي وندخل لينا على نظرية سادسة الي ان نعود لاحقا ان شاءالله للحديث عن (نظريات) عندها علاقة بالكورة والهلال والمريخ والمنتخب الوطني.

النظرية السادسة بتقول (الزول الما بدورك بجيب ليك موية سخنة).

شفت يا جماعة عشان اكون واضح معاكم ..اي جماعة تمشوا ليهم ويجيبوا ليكم (موية حارة)...اعرفوا طوالي ان الجماعة ديل طردوك ..وانهم ما عاوزين معاك اي تفاهم.

كذلك الفول البكون (ما فيه ملح)..او مسيخ ملح ...ذلك يعني بالمختصر كدا ..(قوموا يا شباب اتخارجو).

والشاي البارد ...دليل كراهية ...والعدس لمن يقدموه ليك في اكتر من وجبة ...اعرف طوالي (الحالة صعبة).

دي نظريات معروفة يا جماعة ...ما عاوزة ليها (حرفنة).

بعدين الزول وقت تضرب ليه يقول ليك بعد (15) دقيقة ...بطارية التلفون نزلت ..اعرف طوالي انو عاوز ينهي المكالمة.

الحاجات دي واضحة ...وصريحة كمان.

قالوا ليك (بمناسبة النظريات دي)...واحد مشى يخطب.

يخطب عديل كدا.

الخطوبة دي فيها شيء.

الزول مشى يخطب ليه بنت عندها (6) اخوات.

زولكم مشى ..جابوا ليه (الليمون)...النوع البكون ساخن داك ..وفيها (حبات ليمون) مطفحات.

شغل استعجال كدا ..وعدم ترحيب.

موش مرات بتمشي تخطب ..يقولوا ليك الحاج في الحمام ...يجيك طالع بعد ساعة ونص بي البشكير.

اها الحكاية دي حصلت للزول دا.

صاحبكم قعد ..جابو ليه الليمون (الساخن) داك ..قطعو ليك قبل ما يصلو.

انتهى ليك من حاجة اسمها (ليمون).

الحاج جاهو طالع من جوة قال ليه ان شاءالله خير (حركة الليمون ما عجبتو).

قال ليه : خير.

في شنو يا ولد ...انا داخل عندي (نومة) زي الوقت دا.

ابدا يا حاج ...بس انا عاوز بنتك.

عاوز بنتي تشغلها في بنك.

لا عاوزها اتزوجها.

طيب وين اهلك ..عليك الله هسع البطعموا (الشفع) ضد السعال الديكي ..بجوا بي حالتك دي ...(وين ابوك).

ابوي بجي يا حاج انا عاوز اخد الضو الاخضر بس.

والضو الاخضر عاوز بيه شنو؟...انت عاوز تخطب وإلا عاوز تقطع ليك (استوب)..انتوا يا ولاد الزمن دا مالكم بتعلموا كدا حيرتونا والله...عاوز ياتو بنت ..انا عندي (7) بنات ..كلهن بقن للعرس.

عاوز البنت الصغيرة يا حاج ...(اصغر واحدة فيهن).

يعني عاوزني افط ليك (6) بنات ..واعرس ليك اصغر واحدة ...يا ولد انت عاوز ليك بنت وإلا عاوز ليك (بطيخة).

نحن شغل (العزل) دا ما عندنا.

لو عاوز الكبيرة ..هسع بنعقد ليك ..(ابوك ما تجيبو)..لكن لو عاوزة الصغيرة ..خلينا نشاور اعمامها وخالاتها ...انت قايل الحكاية سايبة كدا.

الولد اتخارج ...لكن بعد ما عرف ليك (نظرية جديدة).

ملحوظة : هسع وينها النظرية هنا.

هوامش

كمال شداد ماشي تمام مية المية لكن خايفين من التداخلات.

ناس معتصم جعفر ومجدي شمس الدين ديل ما مضمونين.

مجدي شمس الدين دا انتخب (60) مرة ..يعني عارف اي حاجة ...وهو اصبح خبير انتخابات.

من كرسي لي كرسي.

اما محمد سيد احمد فسوف يتمها ليكم تصريحات.

طبعا مزانية مجموعة معتصم ..لا تقارن بمزانية مجموعة شداد.

شداد شغال بالقناعات فقط.

عاوزين شداد ...ما عشان نجيب لينا كاسات او بطولات ...هذه الاشياء هى مسؤولية الدولة...ولكن عاوزين شداد عشان الانضباط والالتزام ..وعشان الحكاية ما تفك اكتر من كدا.

لو لقينا (الانضباط) كفاية.

الذين يتحدثون عن الجديد ...والتجديد ..وعن ايجاد فرص للشباب ..وللوجوه الجديدة ..يتحدثون عن دولة اخرى غير السودان.

انتوا النظريات دي عاوزين تطبوقها في شداد بس.

طبقوها في الترابي ..وفي الميرغني وفي الصادق ..وفي ...وفي.

شداد من ناس التجديد ...لأن افكاره جديدة ..وروحه شبابية ..انتوا قايلين الحكاية بالسن.

لو بالسن ..والله البلد دي ..مسؤول واحد ما يكون قاعد فيها.

عشان كدا..ما تقعدوا تشطروا لينا على الدكتور كمال شداد.

لا خيار للكورة السودانية غير الدكتور كمال شداد.

وما في اي وجوه جديدة او شباب متطلعة وعندها افق ..عشان نقول ادوها الفرصة.

عاوزين تدوا الفرصة تانية لي مجدي.

مجدي دا عمل في الاتحاد العام في اكثر من (5) دورات.

اخير شداد ..بمشي ويرجع بي افكار جديدة.

نسأل الله ان يوفق كمال شداد ...من اجل الكرة السودانية ...وحتى يعود الانضباط لكرة القدم بعد ان فقدناه في السنوات الاخيرة.

عاجل : البرير الناس ديل ناويين عليه.

انقر هنا لقراءة الخبر من مصدره.