في التسعينات اي زول كان ساكن في آخر محطة..اي زول عاوز يوصف ليك بيتو يقول ليك (آخر محطة) وقت تمشي على الزول الواقف في باب الجالوص يدخل بيك في غرفة ..بي (سلبة) ما تعرف تطلع منها سلك بقى وقت يجيبوا ليه سيرة استاد المريخ ..بقعد يطنطن ..زي الجابو ليه سيرة استاد التحرير حلة العزابة كل ما يجيهم زول يوم الجمعة اضافي ..بزيدوا ليك الحلة (كوز)..لمن الواطة تعصر الحلة كلها بتبقى (كيزان) """"""""""""""""""" • سلك امس لقى حكاية (الطابق التاني) مع (الجوهرة الزرقاء) بتحرجو ساكت...بتعمل ليهم (حساسية). • ما في (قلاب) بينافس مع (همر). • بقوا ما بجيبوا سيرة (الطابق التاني)...وقت تجيب ليهم سيرتو ..يقعدوا يتخجلوا. • ويتلفتوا زي السايقين ليهم (ركشة) في شارع داخلي في الحلة. • عاد يقولوا شنو؟ ..والجوهرة الزرقاء طابقها الثالث يسد عين الشمس. • قالوا ليك في واحد ساكن ليه في بيت جالوص ..(باب) ما فيه. • البيت كلو فيه مروحة واحدة ..والباقى تامنها (حوش). • الزول دا وقت يكون عاوز يوصف بيتو لي زول ..بقول ليه تنزل اخر محطة. • الزول بقول ليه اخر محطة بنزل ليك فيها. • طبعا في التسعينات اي زول كان ساكن في اخر محطة. • اي زول عاوز يوصف ليك بيتو يقول ليك (اخر محطة). • والزول بوصف للزول التاني ..بقول ليه تنزل اخر محطة. • الزول يقول ليه بعد اخر محطة. • الزول بقول ليه تمشي شرق. • اي زول بوصف ليك بقول ليك تمشي شرق. • الناس دي كلها ساكنة شرق. • الزول التاني يقول ليه بعد ما امشي شرق. • الزول البوصف بقول ليك في (طرمبة) شمالك. • واي وصف ..فيه (الطرمبة) دي. • شفت الطرمبة دي تقيف فيها ...وراها في عمارة من 7 طوابق. • الزول بقول ليه العمارة دي بعرفها ..ساكن فيها؟؟. • الزول بقول ليه ..العمارة دي جوارها في (بيت جالوص)...بتلقاني واقف في بابو ..منتظرك. • طبعا الزول لغاية ما يصل للزول دا بفتكر لمن يصل باب بيت الجالوص دا.. بقوم الزول يطلع بيه عبر (المصعد) للطابق السابع في العمارة المجاورة بيت الجالص. • وقت تمشي على الزول الواقف في باب الجالوص يدخل بيك في غرفة ..بي (سلبة) ما تعرف تطلع منها. • في التمانينات اي زول بكونوا عاوزين يشكروه بقولوا ليك خالو دكتور. • او عمو اختصاصي نساء وتوليد. • وممكن يصلوا معاك لغاية عندهم قريبو طبيب. • في التسعينات الشكر بقى بي ..الزول دا ابوه برة البلد. • او اخوه في السعودية. • وخالو في الكويت. • في الالفينات بقوا يقولوا ليك ...عندهم سوبر ماركت في الرياض. • او شغال مع صلاح ادريس. • هسع بقوا يكتفوا بي (هلالابي). • وخلاص ما في اكتر من كدا. • سلك خلى (الطابق الثاني). • وطابق شاخور. • والغزل في سور الدقير. • سلك بقى وقت يجيبوا ليه سيرة استاد المريخ ..بقعد يطنطن ..زي الجابو ليه سيرة استاد التحرير. • تقول جابوا ليه خبر وفاة. • سلك ..خلى (البطولات المحمولة جوا). • البطولات التامنها ضربات جزاء. • وسيكافا. • وقروش حكومة. • ولجنة تحكيم. • بطولات طاسنها (موية). • حلة العزابة كل ما يجيهم زول يوم الجمعة اضافي ..بزيدوا ليك الحلة (كوز). • لمن الواطة تعصر الحلة كلها بتبقى (كيزان). • كل ما الباب يدق ..يجروا يكبوا ليك في الحلة (كوز). • الحلة فيها (بصلة) واحدة و17 كوز. • الحلة تبدأ ب (بامية) ..وتنتهي ليك بي (رشوشة) ساكت – ما عندها اي علاقة بالبامية. • زي الزول الكان ضابح ليه (جدادة)...الناس كتروا عليه. • كل مرة الباب يدق ويدخلو ليك سبعة اشخاص. • الزول يجري على المطبخ ويكب ليه (كوز) في الحلة. • المهم الزول دا وقت جاب ليه (الجدادة) في الغداء ..قال ليهم ...تتخيلوا الحلة دي كان فيها شنو؟. • ناس تاكل وتتكلم. • البقول ليه عدس. • والبقول ليه فاصوليا. • والبقول ليه بامية مفروكة. • الزول قال ليهم تتصوروا الحلة دي كان فيها (جدادة). • واحد منهم قال ليه إلّا (جدادة) زينة ..والله حلتك دي اثر (سوسيوه) ساكت ما بنعرفها. • كمان نحن لو بنعرف (الجداد)..ما بنعرف مرقتو. • ناس المريخ نفس الشيء...شغالين بنفس النظرية. • كل ما نعصرهم ليك في الممتاز..بقعدوا يكلمونا عن (البطولات المحمولة جوا). • بصلة و17 كوز. • هسع حنك (البطولات المحمولة جوا) مع السيشال ميديا بقى ما مقنع. • ولا بقنع ليه زول. • الناس بقت عارفة واتثقفت ..وبقت كاشفة اي حاجة. • يعني حكاية تجيبوا ليكم (كاس) من البجراوية وتقولوا لينا الكاس دا محمول (جوا) بقى ما بتمشي ليها على زول. • الجنيد مشجع المريخ العتيق ..البطولات المحمولة جوا بقى ما بقتنع بيها. • قالوا ليك مزمل ابوالقاسم لمن يكون عاوز يكتب ليه عمود ..بشغل المروحة في 3 ..وبقول يا ربي الليلة اكتب عن شنو؟. • البطولات المحولة جوا. • وإلّا طابق شاخور. • وإلّا نشوف لينا (شكوى) جديدة. • بابكر سلك ..امس (الطابق التاني)...رسوب. • البطولات المحمولة جوا ..رسوب. • سلك قال احسن يكتب عن الهدف الذي سجله مريخ كوستي في الهلال. • دا انجاز المريخ الوحيد في السنة دي. • بالله انتوا كنتوا ممكونين كدا. • صابرين لغاية الاسبوع السابع. • حلمكم. • وبطولاتكم. • وطابقكم التاني بقى تشوفوا ليكم (قون) في شباك الهلال. • شوفوا الناس ديل اتواضعوا كيف؟. • نحن لو عارفنكم كدا ..الموضوع دا مساهر بيكم ..وقاطع نفسكم ..كان من الاسبوع التاني قلنا لي مكسيم فكها. • احسن يفكها ..من تحرسونا كدا. • الشباك العذراء ذاتها بتجيب الكلام. • بتجيب العين. • وانتوا كلامكم كتير. • وعينكم حارة. • احسن نتخلص من الموضوع دا – عشان تشوفوا ليكم موضوع تاني. • زادوا ليكم (الغاز)...300% ما قلتوا حاجة. • زادوا ليكم الموية 100%. • هسع بعد (الضيق) دا كلو – والهجرة الحاصلة في البلد ..والازمة القريبة من الخبز ..فرحانين لي بهدف مريخ كوستي في الهلال. • المريخ بمشي الولايات بخسر. • او بتعادل. • وبرجع. • وبقدم شكوي ..بعيدوا ليه المباراة. • الهلال بمشي الولايات ..بفوز عديل كدا. • وقت يجيبوا فيه هدف ..المريخاب بهللوا بالموضوع دا. • بفرحوا بيه. • بشوفوا هدف في شباك الهلال ...انتصار ليهم. • عليكم الله قابلكم تواضع زي دا. • الهلال دا كبير. • عظيم. • وما في زول قدرو في البلد دي. • مسكيم دخلنا في حتة صعبة. • خلى ليك الهدف في شباك الهلال (فرحة) للمريخاب. • ........ هوامش • مباريات الهلال الودية ..بعد المباراة الرسمية يجب ان تستمر. • العشري يحتاج الى ان يكتشف قدرات لاعبي الهلال. • مريخ كوستي ..اخر فريق في الدنيا مفروض يشتكي. • لاعب من الجنوب ولاعب من يوغندا ..وبيشتكوا في ولاءالدين. • عاوزين تعملوا لينا لجنة استئنافات السنة دي بصورة معكوسة. • بي حيلة جديدة. • خالد النعسان مع العمر ..بيلعب في الباوقة وفي الامير في نفس الوقت. • والشكوى دخل فيها الامل عطبرة. • الامل عطبرة لو شعر كدا وإلّاى كدا – ممكن ينسحب من الممتاز. • ولو الامل انسحب الموضوع بجر. • اهلي شندي امس عاد بعد ان كان متأخر امام الرابطة كوستي. • استمرار ريكاردو وحمد كمال رغم هزائم الاهلي الاخيرة ..امس يحسب لصلاح ادريس. • ريكاردو خسر ثلاثة مباريات ..مع ذلك استمر. • الاهلي شندي سوف يجني فوائد استمرار مدربه قريبا. • الاهلي خاض مباريات كثيرة خارج ارضه وامام اندية صعبة ..لذلك فقد الكثير. • المباريات القادمة للاهلي سوف تكون اسهل. • خاصة ان من بينها مباراة امام المريخ في شندي. • كرنقو سجل هدف جميل. • ومقدم عيد سجل اصعب اهداف الممتاز. • ما في مهاجم بسجل بهذه الطريقة لو ما كان عندو امكانيات كبيرة. • الرابطة كوستي من الاندية المحترمة ..نتمنى ان تعود. • الاطاحة بعمر ملكية ليس هو الحل. • خاصة ان الرابطة كان عندو شكل ..واسلوب في الاداء. • لكن الرابطة لم تكن موفقة. • الرابطة لعبت امام الهلال والمريخ واهلي شندي والخرطوم الوطني وهلال الابيض ..وكان من الطبيعي ان تخسر هذه النقاط. • قرعة الممتاز او البرمجة هذا الموسم وضعت بصورة ظالمة. • الهلال امام النسور سوف يشهدها حضور جماهيري كبير. • مباريات الهلال العصرية اصبحت في منتهى الروعة. • الشيخ موكورو سوف يرفع دخل مباريات الهلال. • كما ان الجمهور لا بد ان يكون قريبا من فريقه قبل مواجهة الاهلي الليبي المرتقبة. • قمة الفاشر تعادلية. • اخشى على اندية الفاشر هذا الموسم من الهبوط. • الامير البحراوي عليه ان يتذكر انه يمثل مدينة بحري العريقة. • لا يعقل ان تكون بحري في مؤخرة الترتيب. • ........... • عاجل : ناس مريخ كوستي مرة (ديكور) ومرة (سيناريو).