محمد الطيب الأمين *بالعربى الكسيح* *بعد الطبع!!* * مدرب الهلال باترك (عصبي) حسب ما قال اعلام المريخ.. * ومدرب المريخ غارزيتو (ما بشوف) حسب ما قال علاء الدين يوسف.. * يبقى السؤال ايهما افضل: الزول العصبي ولا الزول الما بيشوف وعامل فيها بيشوف؟؟ * يكمل غزال الهلال الاسمر مهند الطاهر نصف دينه غدا.. * وللامانة كنا نتمنى ان يتزوج الغزال وهو بشعار الهلال ولكن قدر الله وما شاء فعل.. * الغريبة يا مهند اى لاعب اول ما يدخل كشف الهلال بتزوج تقوم انت اول ما تمرق من كشف الهلال تتزوج؟؟ * في الحتة دى برضو مهند قلب الهوبا.. * عموما من القلب نرجو للغزال السعادة والمال والبنين.. * وان شاء الله يا مهند محل ما تقبل تلقاها (لبن ابيض) في دربك.. * عاقب المريخ النجم الصاعد ابراهومة (ولدنا) وحرمه من السفر مع البعثة لمجرد ان اللاعب جلس مع الهلال..* حرم المريخ (ولدنا) من هذه الفترة الاعدادية.. * نحن نطلب من مجلس ادارة نادى الهلال ان يتعاقد مع مدرب خاص ل(ولدنا) ابراهومة وولدنا محمد شمس الفلاح لكى يواصلو تدريباتهم بالداخل.. * تخيل المريخ يعاقب لاعب لانه جلس مع الهلال؟؟ * المريخ!!* المريخ الذى استباحه الحضرى وعلاء يوسف وهيثم مصطفى يتحدث الآن عن معاقبة لاعب جلس مع الهلال!! * سبحان الله.. * لماذا يعاقب المريخ (ولدنا) ولا يعاقب علاء الدين الذى اتهم المريخ بالتزوير و(البصمة) بل ان علاء فعل ما فعل بالمريخ؟؟ * الحضرى الذى قال: (جمال الوالى ما كان بيحلم يسلم على في يدي)؟؟ * نطلب من ولدنا ابراهومة ان يصبر فكل المتبقى خمسة اشهر ويأتي ليشكل الثنائية التى يحلم بها مع رفيقه وليد علاء الدين.. * هلال النصف الثانى من (2015) سيقوده ابراهومة وشمس الفلاح ووليد واطهر.. * اصبر يا ولدنا.. * اجانب الهلال وصلوا في مواعيدهم بالظبط.. * نحمدالله إنو اجانب الهلال (امهاتهم ما بيمرضن قبل الاعداد).. * سادومبا وكلتشي قبل الاعداد الواحد فيهم (امو بتمرض).. * لو أمو ما مرضت عندو خالتو بتموت قبل الاعداد.. * كلتشي ده معانا ومع المريخ (كتل خالاتو كلهن).. * مع اهلى شندى ده كلتشي لن يجد (خالة مريضة) يتعلل بها قبل الاعداد.. * زمان في لغز بيقول: (دخل القش وما قال كش).. * طبعا في حاجتين بتدخل القش وما بتقول كش..* الحاجة الاولى: (الدخان).. * والحاجة التانية: (الضل).. * هسه ضلك ده لو مر على الحيطة ولا مر على القش بيقول كش؟؟ * لا صوت للضل.. * المريخ دخل القاهرة وما قال كش.. * وبعد ايام سيدخل الهلال الامارات وسيولعها نار عديل.. * وده عيب الضل.. * الضل دائما (كاتم صوت).. * على طريقة الاندية الكبيرة جاء مؤتمر القطاع الرياضى بنادى الهلال.. * من خلال المؤتمر عرف الشارع الرياضي مستوى تفكير المجموعة النيرة التى تقود العمل الاداري الميداني بفريق الهلال.. * كل المؤشرات تبشر بهلال مختلف في العام القادم.. * فقط نرجو من مجلس الهلال ان لا يرمى منديل البرازيلي كروز.. * إذا عقد مجلس شورى المريخ اجتماعه القادم بمنزل جمال الوالى نتمنى ان تقوم قناة النيل الازرق بتقديم برنامج (صحة وعافية) من منزل جمال على نحو ما فعلت الخميس الماضى وهى تقدم (البحث عن هدف) من إحدى غرف منزل الوالى. * انا عندي اقتراح للجنرال حسن فضل المولى.. * بقترح يا حسن فضل المولى تقدمو (مساء جديد) من بيت ناس النفيدى وتكملو الناقصة.. * (البحث عن هدف) من بيت جمال، و(صحة وعافية) من بيت آدم سوداكال، و(مساء جديد) من بيت عبدالصمد، و(بعد الطبع) من بيت ناس محمد الياس محجوب.. * الاستديو خلوهو للسر قدور و(اغانى واغانى) بس.. * غايتو جنس غايتو؟؟ * محترف المريخ النيجيري سلمون قال في تصريح له: (عرفت الكرة السودانية عن طريق الهلال).. * ودى زي قصة (البت) تقوم تحبها انت وتلقاها (مُكسره) في اخوك.. * عندنا ولد في حلتنا (مرطب رطوبة جد) وبيحب ليهو واحدة حب خرافي.. * البت دى حبت الولد ده عشان هو مرطب لكن كانت بتحب اخو بشكل تلقائي.. * هسه المريخ بيحب سلمون وسلمون بيحب الهلال.. * إحنا قلنا ليكم اللعب في التمهيدي ما بيأكلكم عيش.. * يا هو المريخ طلع نكرة.. * حتى محترفنكم الجبتوهم عشان يلبسو شعاركم طلعو بيعرفو الهلال وما بيعرفو المريخ.. * يعى سيكافا الشلتوها دى ما في زول سمع بيها.. * انا اتوقع إنو المريخ سيعاقب محترفه سلمون عشان قال عرف الكرة السودانية عبر الهلال.. * سلمون قال هذا الحديث في حواره مع صحيفة (قوون) امس.. * إتخيل.. محترف المريخ دفع له الدولار الحار ويجى ببساطة يقول ليك انا عرفت الكرة السودانية عن طريق الهلال.. * فعلا الكبير كبير.. * حاليا وحسب ما قال لي مصدر مقرب ان هنالك (12) لاعب في كشف المريخ بيحبو الهلال.. * 12 لاعب يا مولانا.. * يعنى تشكيلة كاملة زائد واحد.. * واحد ب(الخاء).. * وتسيبني في عز الجمر وانت من حولي… (بتأكل في المخبازة)؟؟.