مشهد تخيلي للفريق عبود وبعض الضباط وهم يحضرون لإنقلاب 17/فبراير/1958 وعلي القرب منهم تظهر آلة.. عبود : دي شنو يا جماعه؟؟ .. احد الضباط : دي آلة الزمن يا سعادتك عبود : آلة الزمن!! يعني بتعمل شنو ؟؟ احد الضباط : الآله دي إخترعها عالم سوفيتي ، بتقدر تخليك تسافر (للمستقبل) وتعرف شنو ممكن يحصل في المستقبل ! عبود : طيب ياجماعه ما تشوفوا لينا كده شنو الممكن يحصل بعد 6 سنين من الانقلاب العايزين نعملوا علي حكومة (عبدالله خليل) دي ؟؟ الضابط يشغل آلة الزمن فيخرج صوت من الآله : "اكتوبر 1964 " ثم اصوات لمظاهرات تهتف احتجاجا علي مقتل الطالب (احمد القرشي ) وهتافات شعبية تردد (الي القصر حتى النصر ) ثم صوت مغني قائلا: أصبح الصبح فلا السجن ولا السجان باق وإذا الفجر جناحان يرفان عليك وإذا الحزن الذي كحَّل هاتيك المآقي والذي شد وثاقا لوثاق والذي بعثرنا في كل واد فرحة نابعة من كل قلب يا بلادي الضابط يخاطب عبود : ده شنو يا سعادتك ؟! شكلها كده (انتفاضه شعبيه) ح تحصل علي حكمنا و انت شكلك كده ح تتنحى من الحكم !! عبود : أعوذ بالله منك ومن (فالك) مستحيل ده يحصل ، سيبك من الحاجات (الخياليه) دي وشوف لينا كده شنو ح يحصل بعد 11سنة ؟؟ الضابط يشغل الآلة فيخرج منها صوت موسيقى عسكريه يعقبها صوت جهور قائلا (ايها الشعب السوداني في صبيحة هذا اليوم الموافق 25 مايو 1969 نجحت قواتكم المسلحه بقيادة اللواء جعفر نميري من الاستيلاء علي مقاليد الحكم في البلاد )!! الضابط : بداية حكم عسكري الجديد !! لا حول و لا قوة الا بالله إلحق ياسعادتك ، ده رئيس السودان بعد 11 سنه ح يكون (عسكري) وثورتة اسمها (ثورة مايو)وشكلها مغلفه بورق(فويل) شيوعي !! عبود : ياساترررررررررررر !!! إنت متأكد إن الجهاز ده سوفيتي ، موش تايواني ولا صيني ؟؟ طيب أنا عندي فضول أعرف الضابط ده ح يحكم قدر شنو ؟ يخرج صوت مغني من الآله يردد"بلاء و انجلى حمد الله الف علي السلامه انهد كتف المقصه "!! عبود : الله !! ده ما صوت نفس المغني الظهر في فترتي !! الضابط ده شكلو حكمو (اتلجن) بالله شوف لي الحصل ليه شنو ؟؟ صوت يخرج من الآلة قائلا " مغادرة النميري الي الولاياتالمتحده للعلاج و الآلآف من الجماهير تحتشد في مظاهرات شعبيه تعم كل انحاء البلاد و تستمر من 27 مارس الي 6 ابريل 1985 طالبت فيها الجماهير بإنهاء حكم النميري . والجيش بقيادة رئيس الأركان المشير حسن عبد الرحمن سوار الذهب ينحاز للشعب و يعلن نجاح ثورة 6 أبريل 1985الشعبيه . عبود : يعني بعد 16 سنه كامله حتى حصلت ثورة شعبيه !! يا عسكري مشي الاله دي (3 سنه ) و وريني (الثوره الشعبيه) دي ح تثبت حكم الديمقراطيه والاحزاب في البلد ؟؟ غايتو انا ما اظن (العساكر) يخلو البلد دي (للاحزاب) !! البلد دي من يومها خلقوها للعساكر !! الضابط يحرك الآله لمدة 3 سنين و الآله تُخرج صوت قائلا " حدوث انقلاب في 30 يونيو 1989 بقيادة العميد عمر حسن البشير وبمشاركة الجبهة الإسلامية القومية بزعامة حسن الترابي" !!! ثم تصدر الآلة مجموعه من الاصوات تتحدث قائلة: " اذهب الي القصر حاكما و ساذهب الي السجن حبيسا " !!!! "لو ما كنا جينا كان الدولار حصل 20 جنيه "!!!! "ما دايرين دقيق فينا قمحنا كتير بكفينا" !!! "لو شفتونا ركبنا العربات وبنينا العمارات أعرفونا فسدنا !!!!!!! "بيوتنا القاعدين فيها دي من قبل الثورة ما سايبنها ، وأنحنا ما ناس سلطة ودنيا "!!! " هي لله ..هي لله ".. لا للسلطه ولا للجاه ..!!! "هي لله .. هي لله" لا للسلطه ولا للجاه !!! ثم اصوات تامر (بالتكبير) ثم اشخاص يرددون الله اكبر.. الله اكبر الضابط يندهش من البيسمع فيه فيجر الزمن 25 سنه فتظهر علي شاشة الآلة تاريخ "يونيو 2014 " ثم تصدر مجموعة اصوات قائله ... " الزارعنا غير الله يجي يقلعنا"!!! " احنا استلمناها بدبابة و ما بنخليها الا بدبابة "!!! "لن نسمح بربيع عربي في السودان فقط صيف حارق يشوي الاعداء " !!! " المتظاهرين ديل شذاذ افاق و ليحمدوا الله اني لم اطلق عليهم المجاهدون"!!! " و الماعاجبو يلحس كوعو"!!! ثم تظهر الآلة السودان وقد انفصل (جنوبه) و اشتعلت الحروب الاهليه في (غربه) ونزح لسكان الغرب و (دارفور) الي المعسكرات . ثم هجرة 75% من الشعب وتفرقه في كل بقاع الارض نتيجه للاوضاع المعيشية السيئة التي يعيشها و الانهيار الكامل للبنية التحتيه !! اما ال25% المتبقيه من الشعب فقد اظهرت الآلة انهم قد توسدوا (ود الاحد) !! ولم يتبقى في البلد الا بني كوز !!! عبود يصيح : لا حول ولا قوة الا بالله ... لا حول ولا قوة الا بالله ياجماعة معقوله ده كله ح يحصل للشعب السوداني بعد انقلاب 1989 ؟؟ السودان ده ما خلاص كده ح يتقفل !! الشعب ده ما خلاص ح يراح في الرجلين!! و (وزر) البلد و (الشعب) ح نتحمله احنا (بانقلابنا) ده !! عشان كده يا جماعه اسمعوني كويس ! احنا اسه في سنة (1958) يعني الاستقلال ليه سنتين فقط !! فشنوووووووو؟؟ اهلنا بيقولوا المال تلتو ولا كتلتو !!! و الجاتك في استقلالك سامحتك !!! فانا شايف انه ننسى انقلابنا ده و نقوم نرجع البلد دي تاني للانجليز !!! : : : * هذا الالمقال ساخر، هزلي، غير حقيقي وغير محايد، والأحداث الواردة به خيالية ولا تمت للواقع بصلة، وأي تشابه بينه وبين الواقع يتحمل مسؤوليته من شوهوا هذا الواقع وليس من كتب سيناريو المقال!!! موده عزالدين ... [email protected]
