هل تقومين بصناعة الطواقي لوحدك أم لديك مساعدون؟ أنا بشتغل من أنا صغيرة، وبديت بالطواقي دي واتعلمت كل حاجات الخياطة اليدوية والتطريز والشغلانية دي محتاجة فنيات وخيال واسع ورغبة وأنا شغالة فيها براي من زمان. أي أنواع الخيوط تقومين باستخدامها في الحياكة؟ كل أنواع الخيوط مثل خيط الإبرة العادي أو خيط الماكينة وخيط (الاستوبا) والخيط القطني الذي أقوم بتلوينه وصناعة مختلف الألوان منه. ماهي الألوان التي تكثرين من صناعتها وعليها الطلب؟ الأخضر وبشيلوهو الدراويش والبرتقالي كمان وفي الأحمر والأسود والأبيض والبني، وبصورة عامة أنا بصنع كل الألوان ومرات حسب طلب الزبون. الملاحظ وجود صناعات جاهزة مع تلك التي تقومي بصناعتها؟ نعم، في البتجي جاهزة وبنشتريها من سوق ليبيا وبنبيعها وبتمشى طبعاً. الطلب الأكثر على الجاهز أم المصنع يدوياً؟ حسب الزبائن والمصنع ماشي وعندو ناسو واليدوي كمان عندو ناسو. حدثينا عن المسميات؟ كثيرة...هناك طواقي الأنصار ودي بتأخد شكل القبة وفي الطواقي الكنغولية ودي ملونة وأشكالها مختلفة وبشيلوها الشباب أكثر وفي حقت الدراويش وفي العمانية وفي الطواقي البنغالية وفي المطرزة بالخيوط الملونة وغيرها. ما هي أكثر الفئات إقبالاً على الشراء؟ الشباب بشيلوا والشياب كمان لكن أكتر طبعاً الشياب ديل لانو الجلابية عندهم شي ضروري، أما الشباب ديل ناس على الله ساكت وأكثر حاجة بشيلوها الكنغوليات والبنغاليات وطواقي البوب مارلي. ماذا عن جزئية الأسعار؟ تختلف باختلاف النوعية والجودة والأسعار تبدأ من 20 جنيهاً حتى 100 جنيه. هل تحتاج المهنة لرأس مال كبير؟ ما شديد، بس حق الخيط وأدوات الحياكة لكن رأس المال ما بزيد عن الخمسة آلاف إلا إذا بتجيب طواقي مصنعة جاهزة كثيرة. هل بالمهنة عائد مادي كبير؟ في اليوم بطلع 260 أو 150 جنيهاً، وغايتو بتشيل الأسرة الصغيرة. هل تعلم مهنة الحياكة يحتاج لمجهود ووقت؟ لا على الإطلاق ساهل جداً، وأضافت ممازحة : (إنتِ بس قولي دايرة تتعلمي الشغل دا يوم واحد بس بتعرفيهو)!
