حوار: محاسن احمد عبدالله / تصوير: أحمد طلب الإعلامي والشاعر والممثل المخضرم السر محمد قدور من مواليد قرية (ام قوري) التي تقع شمال الدامر، درس القرآن بخلوة اولاد خالد البخيت وبعدها واصل دراسته بالمدرسة الاهلية بالدامرثم انتقل لخلوة الشيخ عبدالله مختاريونس وكانت فترة مهمة جدا في حياته قبل انصرافه للتحصيل عبر القراءة الذاتية والجمعيات الادبية والفنية وغيرها، التقته (السوداني) في حوار قبيل اطلاقه مساء اليوم لاولى حلقات برنامجه الجماهيري اغاني واغاني...فماذا قال..؟ *من هم الفنانون العمالقة الذين عاصرتهم.؟ أنا عاصرت الجيل كلو، بديت سنة 1954 ولما دخلت الاذاعة لقيت الفنان عثمان حسين بيغني (الفراش الحائر) ولازلت اذكر جلساتي مع الموسيقار عبدالله عربي والخواض ومحمد ابو شنب ولأني سكنت حي البوستة اصبحت لي صلة قوية بالاستاذ التاج مصطفى والعاقب محمد حسن وبقت في شلة صغيرة. *وبداياتك مع المسرح.؟ أنا جيت المسرح ولقيت الفكي الطاهر وشبيكة عبد الرحمن وابو الروس وأحمد عاطف وهو اول من اعطانا محاضرة عن المسرح وعلم النفس (السايكو دراما) وكان ذلك في العام 1955 وابو الروس درسنا القواعد العامة، و في القاهرة اتيح لي أن اقضي فترة في المسرح القومي احضر مع كبار المخرجين. *لماذا لا تمثل..مع أنك لازلت قادراً على العطاء.؟ أنا الآن في سن لا تسمح لي بأن اؤدي اي مهام غير الكتابة او النقد، وآخر تجربة مسرحية قدمتها كانت (الليالي السعيدة) كان في مهرجان الخرطوم عاصمة للثقافة. *ماهي علاقتك بكل من الفنانين حسن عطية..والكاشف..واحمد المصطفى.؟ طبعا كان معانا في الحي عمنا خضرالحاوي وطبعا هو علامة فنية كبيرة وخطيرة واشهر عازف اكورديون في عصرو، يعني عبداللطيف ورث الاوكورديون من ابوهو عمنا خضر رحمة الله الشهير ب(الحاوي)، بعدها كانت نقابة الفنانين وراء السينما الوطنية امدرمان وهناك اتعرفت على الكاشف واحمد المصطفى الذى كان نقيب الفنانين وقتها وكان راجل عظيم وعندو عناية بالناس وما متكبر ويحتضن الشعراء الصغار، وعثمان حسين برضو اتعرفت عليه في سنة 1953 قبل ما اصل الخرطوم. *يتردد أنك طالبت هذا العام بمبلغ خرافي لتقديم أغاني وأغاني.؟ (عيب الكلام ده). زمان اساتذتنا ابو الروس واحمد عاطف اسماعيل خورشيد يقولوا لي: (امشي ياقدور مثل معانا.. بمشي معاهم مدني وما بسأل تدوني كم). ولما نرجع يدوني عشرة جنيهات وبسكت. الكلام البتقال دا ماصاح. وبعدين انا ما بايع لي بضاعة.! *لكن الكثيرين يقولون إنك تهتم بالمسائل المالية جداً في أي عمل تقدمه.؟ اذا كتبت مقال عندكم بقول ليكم حتدوني كم.؟ طبعاً لو عجبكم المقال يمكن تدوني اكتر من الحاجة الخاتيها، وبي كدا اكون ظلمت نفسي لو قلت انا داير كدا، وبعدين نحنا جيل دخل الفن من باب الوطنية يعني ماجينا للفن عشان المكاسب، وانا اطلاقا ما بفكر انو الفن يدخل لي قروش، انا بشوف ان الفن مفروض يدخل المتعة. *بصراحة ماهو رأيك في الأصوات الجديدة التى انضمت للبرنامج هذا الموسم.؟ شوفي...الفنان قدرتو الاساسية الاستيعاب. وكتيرين ما بستوعبوا. لكن حسين الصادق استوعب واستفاد من فن المديح وبرضو المديح فيهو قواعد كتيرة، اما بالنسبة للفنان عمر جعفر عندو قدرات هايلة وانصاف فتحي فاهمة سر الغنا كويس. *هل يمكن أن يصبح أي شخص صوته جميل فناناً.؟ ياجماعة... الواحد لما يكون عندو خشب كتير بمشي بجيب ليهو نجار عشان يشتغلو ليهو يعني مابشتغلو براهو.. وعشان كدا ممكن نلاقي واحد صوتو جميل، لكن مابيعرف يغني. لأن الغنا عندو قواعد، واستاذنا الفنان حسن عطية (صوتو مامنغم) لكن من احسن المطربين في السودان ولو دايرة تفهمي فن غنا اسمعي شريط لحسن عطية. *متى ستعتزل تقديم أغاني وأغاني.؟ هي مسألة متروكة للزمن. لكن طالما انني قادر اقدم حأواصل لأن البرنامج للجمهور وأنا ببقى سعيد لما الجمهور يكون مبسوط مني، وبتذكر اني زمان قلت للاستاذ علي شمو - ربنا يديهو الصحة- في اجتماع بالتلفزيون انو حقوقنا كفنانين في عيون الناس وليس من خزائن التلفزيون ومازلت مؤمنا بهذا الكلام.! *أخيراً..ألا تعتقد أن أغاني وأغاني صار حكراً على فنانين بعينهم.؟ النيل الازرق كمنتج للبرنامج تبدأ العمل جديا في يناير وتضع التصورات وفي فبراير يكون اقتراح الاسماء وفي مارس وابريل تبدأ البروفات، في ناس بجوا قبل التسجيل يقترحوا ليك فلان وعلان، مع انو في مجموعة اصلاً متواجدة وقطعت شوط، فبيبقى من الصعب انك تطلع واحد منها، لكن ممكن تضيف عليها.
