محمد الطيب الأمين النهود .. اتلمو عليها الخريف والعيد والهلال !!
* عند الناس عناصر الجمال تلاتة : (الخدرة والماء والوجه الحسن). * وفي رواية أخرى (الخدرة والماء والوجه الحسن والبرادو). * البرادو برضو من عناصر الجمال. * العندو (برادو) زي العندو (وجنات). * وعند مدينة النهود عناصر الجمال تلاتة : (الخريف والعيد والهلال). * النهود في هذه الأيام ينطبق عليها ما غناها الراحل خليل إسماعيل : (يوم الأشوفك ببقى عيد والدنيا تبقى معيدة). * وأنا بيك سعادتي مؤكدة وبلاك حياتي منكدة. * والهلال في حد ذاته عيد ، والنهود في ذات نفسها عيد. * يبقى (العيد لاقى العيد) . * كل الأعياد الآن اتجمعت في (غرب كردفان). * الخريف والاضحي والهلال. * زحمة أعياد تعيشها النهود الجميلة. * كل الطيبات الآن في حضرة النهود. * كابلي صدح : و(اتجمعت كل الطِباع وقالوا ليك طبعك براك هاك أعزلو) . * أمام النهود اتجمعت كل الطِباع وقالوا ليها (اعزلي) فاختارت (الخريف والهلال). * الهلال في النهود هي ليس زيارة من أجل أداء مباراة في كرة القدم أمام حيدوب. * دي ما كرة قدم. * ولا كأس السودان. * دي حياة وحب ومشاعر. * دموع واحضان وابتسام. * زغاريد وكواريك. * (ضبحت) النهود أول يوم وتاني يوم وتالت يوم بمناسبة (العيد) . * و(ستضبح) النهود رابع يوم وخامس يوم وسادس يوم بمناسبة (الهلال) . * نفس الناس المرقت تبارك العيد في الساحات ولسان حالها يقول : (عيد مبارك والقابلة في عرفات). * برضو ح يمرقوا ويباركوا قدوم الهلال ولسان الحال يقول : (كل سنة وانتو طبيبن وكل عام والهلال بخير) . * كل البيوت في النهود هلالاب إلا من أبى. * ومن أبى هو ذاتو هلالابي لكن زعلان. * جبل حيدوب هلالابي ، الفولة هلالابية بالميلاد. * الفولة لما الهلال يغلب في أم درمان بتلقاها (راقت) . * جبال الكِرم والمسجد العتيق وحي النصر والثورة وأبو جلوف والرديف وحي بخيت والدباغين وأبو سنون والطويشة والزبال وأبو رنات والعشر. * دي النهود . * النهود عاصمة العلم والعلماء والتعايش السلمي. * آل جحا والحدربي وعبد الستار وآل حمد النيل وآل رشوان والخليفة أحمد يحي والبروف محمد أحمد حاج ودكتور عوض ابراهيم عوض وآل الدخري وآل مراد وآل الزاكي وآل محمد حسن العركي. * النهود تاريخ وعزة. * نادي السلام والسماك والوطن والنضال وحيدوب والهلال والمريخ. * تأسفت جدا عندما علمت أن هذه هي زيارة الهلال الأولى للنهود. * عيب والله وتقصير كبير من الهلال. * النهود جزء عزيز من أرض الوطن ولها حق على الهلال. * من حق الرجال والنساء والأطفال يشاهدون الهلال (عيان بيان). * شوف العين. * مثل هذه الزيارات يبقي أثرها الإجتماعي أكبر من الأثر الرياضي. * ولذلك يجب أن يزور محمد عبد الرحمن مستشفى النهود فزيارته فيها تخفيف للمرضى . * ويجب أن يذهب عبد الرؤوف وفارس والشعلة إلى البيوت الفقيرة. * وقطعاً سيكون إبن المنطقة المحترم السموأل ميرغنى دليل لهذه الزيارة التاريخية. * سيعلم الخواجي البرتغالي ريكاردو أن الهلال ليس فريق كرة. * سيعرف حجم الهلال. * وسيدرك أن الأزرق في القلوب ووجوده في أم درمان لا يعني إلا (محل إقامة فقط). * الهلال : محل الإنشاء أم درمان ، محل الإقامة قلوب الناس. * نحن على ثقة بأن النهود ستبالغ في إكرام الهلال لأن الناس في غرب كردفان (الفيهم مشهودة). * الكرم والطيبة في النهود (طبعة). * نبارك للنهود العيد ونبارك لها الهلال. * ومؤكد أن الزيارة ستؤدي غرضها حتى وإن خسر الهلال وودع البطولة. * ولا ننسى هلالاب الخوي الذين بالغوا في استقبال الهلال. * الهلال وطن داخل وطن والحمدلله. * ونركب صافنات ونجيبة (كردفانية) واصلو الزول بيموت والذكرى تفضل حية. * و.. و.. * ومكتول هواك أنا من زمااااان.