الرئيسية/المقالات صبري محمد علي (العيكورة) يكتب: ليتك سكت يا الدقير ! يونيو 28, 202281 التصريح الذى وجدته متداولاً ما كان لى ان اصدقه لولا ان وجدته على صفحة المهندس عمر الدقير (بالفيسبوك)، رئيس حزب المؤتمر السوداني (الصفحة الما بتغبانى خااالس) . والتصريح كان تعقيباً على استشهاد سبعة من جنودنا البواسل قتلهم الجيش الاثيوبي غدراً وهم اسرى وللاسرى لوائح تحتم معاملتهم بالحسنى تكفلها لهم اللوائح المعمول بها عالمياً . (طيب) خلونا نجى نشوف عمنا الدقير بتاع (حمى النفاس الثوري) والوكيل الحصري ل(المجد للساتك والمتاريس والمجد لمن اشعل اللساتك ناراً واشتعل) قال شنو؟ الدقير حشد ناسو وقال ليهم من كان يؤمن بالله واليوم الاخر فليصلين العصر فى (الفشقة) ؟ الدقير (آآيابا) جمع اخوات نسيبة بتاعت حزبه وقال ياللا يا بنات جبل الدهب لصالح القوات المسلحة ؟ الدقير رقد على ضهرو وكفكف قميصوا و ابتدر حملة للتبرع بالدم لصالح القوات المسلحة ؟ الدقير (آآيابا) شحن لواريهو قمح وخرفان وقال الى الحدود الشرقية يا بني (عبس) ؟ الدقير لبس الكاكي ده (ساااكت) كده و وقف قدام مايكرفون وقال ندعم قواتنا المسلحة، كلام ساكت كده قالوا ! طيب رئيس الحزب (الفلتة ده) عمل شنو يا عب باسط ؟ اقول ليك انا ... تصور (اووول) حاجة قال (الخبر الذى اعلنه الناطق الرسمي باسم القوات المسلحة ..) يعني (مستر) الدقير وكأنه يشكك ضمنياً فى صحة الخبر والا فالبيان طلع من جهة سيادية بموقعها الرسمى وتداولته وسائل الاعلام المحلية والاقليمية والدولية . طيب تانى لزوم كلمة (الخبر) دى شنو؟ (الباشمهندس) قال فى ثنايا (تعاطفه) . اااي ياخ الكلام الني ده خلينا نسميهو تعاطف ! ما ياهو العندو يا جماعة يجيب ليكم كلام نجيض من وين ؟ قال ان خبر (اعدام) سبعة جنود سودانيين .... !! يعني حتى كلمة (شهيد) صعبت عليه يكتبها ! طيب ياخ اضف ليها (البواسل ) على الاقل . ثم تابع (المستر) قائلاً انه (خبر صادم و مؤلم) يعنى فى عقل الدقير ما زال خبراً لم يتحقق كحدث وقع فعلياً فوصفه بانه عمل (غادر) يأباه الوجدان السليم ويتنافى مع القانون الدولي والاعراف الانسانية ! (يا سلام على برودك ياخ) ! طيب (يا هندسة) الكلام ده بقولو اى واحد مهتم بقضايا الاسرى عبر التلفزيون او الراديو . إنت إنت رايك شنو ك(ود) بلد ورئيس حزب(يهز ويوز) كان يفترض ان تكون بالصفوف الامامية تؤازر جيشك طيب تعالوا نشوف (الطامة الكبرى) الوردت فى اخر البيان . الدقير قال [خلى بالك ياسطى] قال : إن الحكومة الاثيوبية مطالبة بتوضيح ملابسات هذه الجريمة البشعة ! اهااا وتانى شنو يا المبروك قال ليك وعلى الاممالمتحدة والاتحاد الافريقى التحقيق والمحاسبة . ثم ترحم على (الشهداء) هى المرة الوحيدة التى ذكر فيها كلمة (شهداء) وفى ختام مدونته و واسى ذويهم . (انتهى كلامه قدس الله سره) يا جماعة ده كلام رئيس حزب سوداني يفترض ان يكون الان لو قريييب [فات القضارف] فى طريقه للفشقة يقول لينا (على الحكومة الاثيوبية ان توضح وبتاع)؟ ومش عارف على الاممالمتحدة والاتحاد الافريقي ان يحققا فى الموضوع ! تحقيق ايه يا ابني ده كلام رجال القوات المسلحة وكان تخليه للرجال حاجة (ما ليك فيها) خليك ساكت ياخ ارجوك . يا عالم انا لغاية هسى ما سألتكم عن العمالة (دي) لونها كيف؟ ما عشان نعرف ديل الناس لابسين شنو وبتكلمو لصالح منو وبلسان منو؟ (يخسسي) على الوطنية و(يخسسي) على الكلام المايع والله جني جن الراجل البحك دومة بى وراء لمن تقع مصيبة كالتى حدثت . يا ناس المؤتمر السوداني اذا كان قادتكم كلهم من نوع (الاستايل) ده وعاوزين تحكمونا (على الطلاق) قطركم صفر و كان راجين زي الدقير وسلك واطاتكم اصبحت . تقبل الله جنودنا مع الصديقين والشهداء و حسن اولئك رفيقاً. وعاشت قواتنا المسلحة صخرة عصية تتكسر تحت اقدامها مدعومة بشعبها احلام العملاء وارزقية السفارات . قبل ما أنسى : —- عب باسط ! بصراحة من الاخر كده اقول ليك ياخ ... (الرجالة تطير)
