محطات صغيرة الحاج "على كيفو" عثمان عابدين [email protected] عندما تريد ان تزرع بصلا يجب الا تجلب تقاوى شمار .. هذه قاعدة بديهية جدا يعرفها اى "شافع" فى السودان وينسحب ذلك على انا الحاج " على كيفو" ومما يلينى من المساعدين ... وبالتالى اردت " انا الذى ارفع اصبعى " دائما بالتهليل والتكبير فى اى ملف ان اكون حكومة فى جزيرة "كايمان" التى اشتريتها من مالكها الاصلى بعد ان بعت حلالى بالكامل فى "نخلة دبى " التى اشتريتها باموال كوشت عليها باحتيال وفى غفلة من اصحابها وحللتها بشوية زكاة وصدقة وصلة رحم " الاقربون اولى بالمعروف" وجيهت مرتى واخوانى واخواتى وخالى وكل العائلة الكريمة وانشات لى جمعية خيرية " بعنوان " لا يمنعون الماعون"...وبعد ان اكون قد اطماننت تماما ان زرعى فى الدنيا سوف يثمر فى الاخرة وكل ما اقوم به " لوجه الله سبحانه وتعالى" وهذا ما قاله " خطيب جمعة " مسجدى وهو يزكينى " استغفر الله انا بحاول ادس الصدقات والقربات وهو بفضحنى""دا شنو المرض دا" لقد افاض الخطيب فى ذكر محاسنى وتهجدى ونخيجى بالليل من خشية الله وخوفى منه ومن عذاب جهنم واقسم برب البيت ان كل قرش حصلت عليه مما اتولدت وحتى هذه اللحظة حلال وجاء بالتعب والمشقة "واللاواء" لا تشوبه اى شائبة وكل من يتهمنى بالتربح من منصبى او استغلاله او تكوين شركات من اموال الدولة او الاستيلاء على مقدراتها كلام فاضى من حاقدين وشوية يساريين وعلمانيين وخارجين من الاجماع والصف حتى لو كانو اسلاميين يصلون فى الجامع وقال بالحرف الواحد " يا جماعة ايام الرسول صلى الله عليه وسلم ما كان فى منافقين بصلوا فى المسجد وبرضوا بتامروا على الاسلام ويبهتوا المسلمين " وانا استمع لهذه الكلمات الطيبات من الخطيب .. كنت احمد الله على وجوده وامثاله من المنافحين وطالما انهم راكزين على الحق فلا خوف على وعلى امثالى" مهما اكلت او بلعت .. لانو ادانى شهادة براءة" لقد اشتريت الجزيرة الكايمان وجعلتها منتجعا لى احوم فيها بسروالى البلدى على الشاطئ اللازوردى وكل مرة اجيب واحد من ناسى عشان "يتمردغ فى الرملة وياكل سمك مشوى على الحطب " ولكى اجمع التراث مع المعاصرة السرة مرتى تعمل لى قهوة على الشاطى تشممنى البن وانا مسترخى اشرب فنجان وراء فنجان والخطيب هناك يتحدث عن ورعى وعدم فسادى واننى "صالح" وتقى ورجل بر واحسان وارعى الان يتامى فى قرية لو ربطو فيها كلب يجرى منها " واضحك " هههههههههههههههههه" ما مبسوط .. ما جاءنى المال بسهولة .. ما يجب على ان اظهر نعمة الله بعد ان " تمكنت ". كانت خطتى ان اكون حكومة فى الكايمان .. لكن صرفت النظر عنها .. الجزيرة حقتى ليه اجيب اخرين لكى يتمتعوا بمقدراتها .. انا عوير ... انا كيشة ... لا لا انا مفتح .. لذلك عليهم ان يشتروا جزرا صغيرة محيطة بجزيرتى " ويمكن" اسمسر فيها .. هو المال دا تعبوا فيهو .. ما لغفوا واكلو لمن شبعو... وبعد ان حجزت لهم طائرة كاملة عشان يجوا الغيت السفرية وحظرت القدوم الى جزيرة الكايمان واى واحد يجى بقطع كراعو بس خطيب المسجد اديتو اذن يطل مرة مرة عشان يحي الايمان فى قلبى بخطبه البليغة .... انا الحاج على كيفو .. الان فى جزيرتى ... ما فى زول يزعجنى ولا يقل ادبو .. واى زول يكتب عنى حرف واحد وما عندو دليل بطلع روحو وبعذبوا عذاب قبورة وقدامنا المحاكم بعد ما ادى " بتنة" شديدة والخبت وشو يا وهم .. "كدى النقوم اعمل لى عمرة "
