دق الدلجة محمد عبد الماجد هدف منقوض وكمان ح تعيدوا برة البلد دي (شقاوة) شنو دي؟ المريخاب مع هدف (شيبون) العملو لينا بيه (جوطة) ح يعيدوا برة البلد. ح يعيدوا في (الجزائر). شقاوة شديدة. تستاهلو. عشان طولة لسان مزمل وسلك ومعاوية الجاك. تستاهلو. تتفاصحوا ساكت ..وما عندكم غير تلاتة نقاط تحصلتوا عليها من فريق (درجة تانية). عجبنا ليكم. بسطنا عيدكم برة الخرطوم. المواصلات ح تكون فاضية الايامات دي. والسكر ح يرخص. والغاز ح يتوفر في جميع مقار التوزيع. الجماعة ح يعيدوا برة البلد. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). لمن يجيكم ضيف للعيد عشان يعيّد عليكم ..وان كان معاهو (شافع) شليق كدا وهباش ..وبخاطف في (موبايلك). عمو موبايلك دا فيه (لعبة) حلوة؟؟. عمو صورني؟؟. عمو دي صورة منو الفي موبايلك دا؟. الشافع يخلي اي شيء ويعلق في موبايلك – رغم ان ابوه شايل نفس الموبايل. لكن ابوه هناك ..عامل ليه تلفونو (خط احمر)..وفاكي ليك الولد بي جاي عشان يلعب بي موبايلك. ما بخليه يهبش موبايلو. الشافع لاقى موبايلك الهملة دا. شفتوا عشان (لداحة) الشفع ديل ..الواحد يعمل ليه تلفون (ربيكا). ويرتاح من موضوع (الالعاب) بتاعة الهواتف الذكية دي. جلاكسي ما تعملوه مع شفع الزمن ديل. يعذبوك فيه ساكت. لو جاكم زول بي شافعو – افتحوا ليه علبة الحلاوة ..وقدموا ليه العلبة اكتر من مرة. ان شاءالله سبع مرات…ناس المريخ برة البلد. ح يعيدوا برة. اخدوا راحتكم في الحلاوة. الشافع ما تحرموه – ما تنهروه ..خلوه يرعى عديل كدا في (الكعك). يعمل اي شيء في علبة الحلاوة ..ابوه ما يقعد يصرصر ليه بي تحت. ما يقرصو. المريخ برة. انا هسع قلت برة المجموعات. براكم بتتخيلوا ليكم مواضيع من رأسكم. المريخ برة البلد. لمن يجيبوا ليكم (عصير) في العيد ..الشافع بعد ما يقطع عصيرو ما تحرموه لو خرم على الكباية التانية. اصلها زايدة – وما عندها زول. قاعدة زي. خلوه يشربها ما بتعمل ليه حاجة. موية ساي. خلوا الشافع يشربها…الدنيا عيد ..وناس المريخ برة البلد. شقاوتكم شقاوة. هدفكم ما يحسبوه ليكم..وكمان تعيدوا برة البلد. نحن حقارة زي دي عمرنا ما شفناها. عمر بخيت ذنبو شنو عشان يعيد برة البلد. تلاتل زي دي عمر بخيت في الهلال ما كان متعود عليها. كلو من مجدي شمس الدين..عمل ليه (قرعة) غريبة – موش مجدي مسؤول برضو من القرعة. لا ابدا ..مجدي مسؤول من (الحكام). القرعة مسؤول منها (شطة). بقى عليكم مجدي وشطة. في داعي (شطة) يخليكم تعيدوا برة البلد. ناس ضفر ديل ذنبهم شنو عشان يتغربوا في العيد؟. الجماعة ديل ما تشوفوا (العنف) بتاعهم دا – الجماعة ديل قلوبهم كعبة. ودمعتهم قريبة. امير كمال ما بيستحمل ليكم (الغربة) دي. وعلاءالدين يوسف ما بعيد يقول ليكم عندي (برجم). و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). لكن ناس السر ود سلوكة …(حيطتهم) القدام الحوش وقعت من غير مطر – رمضان ظهر فيها. ظهر في (الحيطة). العطش شديد. والسخانة حاصلة. الحيطة ما بتقدر على الكلام دا. المريخ سوف يبقى في الجزائر اكثر اسبوعين..ونقطة ما برجع بيها. ولا نقطة. ولا هدف. المشكلة العيد. لو ما العيد ما في زول بيسألكم. المريخاب ديل فلسوا للدرجة دي. فلسوا لدرجة (حق الرجعة) بقى ما عندهم. الجماعة ديل قروش الرجعة ما عندهم. ما تسمعوا الكلام البقولوا فيه عن المعسكر والاجواء. الشغل دا شغل (فلس). نحن كمان ما بنعرف (الفلس). اعذار الفلس ظاهرة. واضحة ..اصلو ما عاوزة ليها (عبدالصمد). رئيس بعثة المريخ في الجزائر هو متوكل أحمد علي. متوكل أحمد علي يعني يجيب ليكم حق الرجعة من وين؟. رئيس البعثة لو كان عبدالصمد كان ممكن المريخ يرجع. لكن متوكل أحمد علي دا لو عيد بيكم في (فلسطين) ما برجع. انتوا عارفين التذكرة بي كم؟. التذكرة للجزائر بي اكتر من اربعة مليون جنيه. يعني لو في بعثة المريخ (30) فرد – عاوزين ليهم 120 مليون جنيه. 120 مليون يجيبوها من وين؟. وناس جمال الوالي بيجمعوا في قروش امير كمال وحافز تسجيله. ح تقولوا لي المريخ ح يصرف ضعف هذا المبلغ على الاقل في معسكر الجزائر. ح اقول ليكم يعني لو رجعوا ما ح يصرفوا تلات اضعاف المبلغ في المعسكر الذي سوف يكون في السودان. الهلال الآن سوف يعسكر داخليا لمباراة التطواني وح يصرف اضعاف هذا المبلغ في المعسكر الداخلي. المريخاب حسبوه – لقوا نفسهم بدل ما يخسروا مرتين – احسن يخسروا مرة واحدة. كفاية الخسارة من الاتحاد. والخسارة من وفاق سطيف. قالوا بدل ما يخسروا مرتين …احسن يضحوا لي ناس ضفر وامير كمال. اتغربوا بيهم في الجزائر. خلوهم يعيدوا في بلد المليون شهيد. انتوا حالتكم طلعت اخطر من المليون شهيد. العيد برة صعب. المريخاب ذكروني ليك بي الزول البكون شغال في الخرطوم ويكونوا اهلو في البلد منتظرين جيتو في العيد. يرسلو في الجوابات ..ويضربوا في التلفونات. اهلو ما خلوا ليه شيء في الطلبات. البتقول ليه جيب لي معاك موبايل. والبتقول ليه عاوزة لي ملايات جديدة للصالون ملايتنا القديمة (اتهردن). والبتقول ليه ..جيب لي معاك (نضارة). واقل واحدة بتطلب منو (شاحن موبايل). انت شاحن الموبايل الشابكنا بيها الايامات دي شنو؟. المهم زولكم الطلبات كترت عليه. ودخلو ما بيسمح. مرتبو ما بجيب الحاجات دي. كرتونة العيد على الاقل عاوزة ليها مليون ونص. هو يجيبها ليكم من وين؟. عشان كدا زولكم قرر يعيد قبلو في الخرطوم. ويرسل البقدر عليها للوالدة في البلد ..ويقول ليهم (شغالين). والله العيد دا ما عندنا اي طريقة. الاجازة ذاتها قصيرة من الجمعة لي يوم الاتنين..الواحد لو مشى البلد قبل ما يغسل وشيّه بجي راجع. معقولة اجازة العيد يومين بس. يعني لو مرقت تعيد على الجيران لمن ترجع بتلقى الاجازة انتهت. العيد دا بي اجازتو دي ولا تشتروا ليه (حلاوة). ولا تخبزوا. قاطعوا الخبيز ..اجازة يومين بس. الواحد لو طقتو (ملاريا) بيأخد ليه اسبوع. يومين بس. المهم يا جماعة زولكم الاتقطع دا – وقرر ما يسافر العيد عشان ظروفو ما بتسمح – حالتو زي ناس المريخ. قالوا يعيدوا في جزائرهم. عليكم الله بلد اتغلبتوا فيها صفر / 1 ح تقدروا تعيدوا فيها كيف؟. ولسه راجيكم (وفاق سطيف). العيد ح يكون ليكم مسيخ. وبعد دا – نقطة ما بترجعو بيها. ………… و الحمدلله ان تم تأجيل مباراة الهلال مع هلال كادوقلي. الارهاق بدأ واضخ على لاعبي الهلال. لكن لا بد من ان نقول مع هذا ..فان شكل الهلال البدني ممتاز. اي مباراة الهلال بقى يحسمها في الشوط التاني. ما في فريق بقدر يقيف قدام الهلال في الشوط التاني. وهذا امر مرده يرجع للجهاز الفني للهلال. خاصة مدرب الاحمال. مكسيم يتسحق تكريم خاص. هذا الحارس – حارس البطولة ذاتها. حارس يشبه البطولات. ……….. السيدة (ل) الكعك ما عندو ذنب لو طعمو اتغير ..طول ما اي حاجة اتغيرت. وقرّض على كدا.