زمان زيدان ابراهيم بغني (بين الزهور متصور)...هسع الناس بقوا يقولوا (بين الجكوك متصور) """"""""""""""""""""""" زمان يشهد الله (الحلومر) كان بقعد في البيت د لي رمضان القادم """""""""""""""""""""""""" يتفقه طه حسين في اللغة الفرنسية فيسبق فيها اهلها (الفرنسيين) ويصبح اكثر دراية منهم فيها """""""""""""""""""""""""""""""" عوض احمودي هنا يجلس (اصابعه) على اوتار عوده ..فيسكرك عزفه بلا خمر ..وينطبق علينا قول العقاد (واعجب كيف بي سكرا) """""""""""""""""""""""""""""""""" · لا تحتاج الى ان تبسط القول هنا – فهو مبسوط تلقائيا...تستمد الاشياء قوتها من الماضي لا المستقبل. · الغيبيات في كنهها ذلك (السر) الذي مازال الجدل دائرا فيه بغير هدى. · وحاجات تانية حاميني. · انتوا البرازيليين ديل جنوا؟. · في القصص القصيرة التى كانت تسقط مننا بين الحصة والحصة – كانت في (5) دقائق بين الحصة والحصة ..نسرح فيها ونمرح ونطرح مثل تلك الاقوال. · ونطلع من علبنا. · احلى خمس دقائق– هي البتكون بين حصة الانجليزي وحصة الجغرافيا. · بتكون طلعت من الانجليزي (الصعب)..وداخل على (الجغرافيا) الهينة ...ما شايل اي هم. · وبالك رايق. · ربما كنا نستفيد من تلك (الفسحة) اكثر من استفادتنا من (الحصة) نفسها. · انتوا البرازيليين ديل جنوا؟. · كنا نكتب : · كان الرجل ينتعل اشواقه وهو يقف على مدخل الهامش حافيا – كنا نراقبه من (شبابيك الفصل) بتقصد ، وتعمد (وعدم شغلة) حتى اذا انتصف النهار اخرج الرجل (كيس) التمباك ..ودردم ليه سفه ..وذهب على كدا. · هسع الموضوع دا عليكم الله عاوز ليه (سفة تمباك). · هذه قصة نهايتها غير منطقية (وما معقولة) ...مثل الرجل الذي عنده (7) اولاد اصغر واحد فيهم عندو (مغلق) في سوق السجانة ..قام بعد عشر سنوات من نزوله المعاش عرّس في ام الاولاد السبعة. · الطبع الكعب بظهر بعد النزول للمعاش. · او نهاية القصة مثل نهاية الزول القطع ليه (21) رغيفة في صحن (طشت) وعمل فيها ربع بصل و(12) عجورة وكيس دكوة وصفيحة موية جبنة ..و قعد يضرب ليك الحكاية دي. · يلهط على قول الزعيم. · وعلى قول عصام الشوالي في احد مباريات كأس العالم. · شغال نسف صاح في (البوش)– تقول محلية. · انتوا البرازيليين ديل جنوا؟. · بعد ما نسف (القرية) دي .. قرية الاكل– قال لبتاع الدكان اعمل لي (5) كيلو طحنية ، و(7) علب زبادي كبيرة وافتح لي صندوق بيبسي. · بتاع الدكان قال ليه عندكم الليلة مناسبة وإلّا شنو؟. · قال ليه : والله ما عندنا اي حاجة – بس رمضان دخل (العضم). · عاوزين نرمم (العضام) شوية – الواحد بقى ما شايل حيلو. · انتوا البرازيليين ديل جنوا؟. · لكن دا كلو ما بحلكم. · ولا بمرقكم مني. · الليلة معاكم للصباح. · ادخل لينا في الموضوع. · ما تبقى لينا زي الموظف البتمشي ليه عشان تصدق ليك حاجة – يكون ما شغال بيك...يعاين تحت ويرفع رأسو كل (10) دقايق ويقول ليك : (نعم). · نعم في حلقك. · مشينا يا ابوالشباب. · الايامات دي في موضة (شفقة) حايمة.. ح اقولها ليكم قبل ما ادخل ليكم في الموضوع. · انتوا البرازيليين ديل جنوا؟. · احكي ليكم عن (الشفقة). · شفقة شنو؟...انا قلت (شفقة) هنا. · كدا نراجع السطور الفوق ..النشوف انا جبت لي سيرة (شفقة) في كلامي دا. · عداكم العيب ....طلعت جايب سيرة (الشفقة). · حقكم عليّ. · ما تقعدوا تتشفقوا فينا. · في شفقة (حلو مر) حايمة. · زمان زيدان ابراهيم بغني (بين الزهور متصور)...هسع الناس بقوا يقولوا (بين الجكوك متصور). · الواحد يقعد يمينو جك حلومر ..وشمالو جك حلومر. · وهو فرحان بالوضع دا ..تقول في حقل بترول. · تقول في هجليج. · انتوا البرازيليين ديل جنوا؟. · الشفقة القاصدة ليكم هنا. · قالوا ليك الحلو مر قرب (ينتهي). · في شفقة بتاعة (انتهاء). · رمضان يا دوب في اليوم العاشر ...والحلو مر انتهى. · الزمن دا غريب – الحلومر يكمل في اول عشرة ايام ...ورمضان ذاتو بقى يدخل من اول يوم في رمضان. · زمان يشهد الله (الحلومر) كان بقعد في البيت د لي رمضان القادم. · الشفقة الدخلت على (الحلومر) شنو؟. · شفقة الزول بتظهر في حلومرو. · انتوا البرازيليين ديل جنوا؟. · عند حاج عمر برندة وصالون ..وشجرة نيمة (ظليلة) نبادلها الظلال (انسا). · فيها (جك) عصير ليمون – حاجة ما تخلص. · حاجة ما تتخيلوها. · كانت قريتنا تلتقي كلها في ذلك الضل ..لتناقش امور الدنيا كلها ولا تترك نصيبها من الاخرة وهى تحمد الله وتثني عليه صباحا مساء. · ونشرب الليمون. · لكنا دا ما موضوعنا. · انتوا البرازيليين ديل جنوا؟. · نصّب طه حسين عميدا للادب العربي وهو (اعمى)..كان يصول في غرفته الصغيرة في قريته الصغيرة وهو (اعمى) كما لا يفعل البصير. · يقلب غرفتهم الصغيرة في بيتهم بصورة اعرض من اخوته المبصرين...فيتفقه في اللغة والقرآن فيسبق الاولين والآخرين في مصر وهو طفلا. · ثم يهاجر من اجل العلم الي فرنسا فيحوم في بلد العجم تلك وهو اعمى كما كان يحوم في غرفته الصغيرة وهو في بيتهم في قريتهم الحالكة السكون. · يتفقه طه حسين في اللغة الفرنسية فيسبق فيها اهلها (الفرنسيين) ويصبح اكثر دراية منهم فيها. · انتوا البرازيليين ديل جنوا؟. · وبتهوفن يحدث اعجازا في الموسيقي بروية محجوبة عنها الصورة – لكن مع ذلك يحدث (صوتا) الى الان مازال (المفتحين) يبحثون عن سره الاخاذ. · وعوض احمودي هنا يجلس (اصابعه) على اوتار عوده ..فيسكرك عزفه بلا خمر ..وينطبق علينا قول العقاد (واعجب كيف بي سكر). · حاسة (الشوف) عند عوض احمودي اعظم منّا نحن الحايمين في زحم الدنيا بفردة عيون ..ربما تحتاج عيوننا الي (عمرة) وبعض من رتق الحال. · الشوف عند عوض احمودي ربما هو اعظم من شوف زرقاء اليمامة. · اقول دائما في مذكراتي الداخلية اننا نملك (عينين) ..اما عوض احمودي فيملك (5) اوتار كل وتر بي عين. · انتوا البرازيليين ديل جنوا؟. · عوض احمودي الذي سكّن فينا عزفه الجميل ..بطريقته المميزة في العزف ..(بمسك الاوتار من تحت)..ويأتي لها من حيث لا تحتسب. · فيخرج اللحن مثل (الدعاش). · وهذا اثبات ان لالحان عوض احمودي التى يعزفها لها رايحة ..وفيها طيب ..وهي بهذا تخرج من حدود السكنة الي رحاب الطبيعة ..فينعشنا (دعاشها). · ثم يحرك احمودي كتوفه في تبادل رقمي بين الكتف الايمن والكتف الشمال في حركة تناسب انسياب النسيم. · انتوا البرازيليين ديل جنوا؟. · عوض احمودي ...جاء من الهلالية فنانا ..بصوت (مخملي)..واجاز صوته من الاذاعة ..لكن (العود) عرف ان يختطفه من كمينة الصوت الى بهو العزف. · ليتفرد احمودي في العزف تفردا ..ويقدم لنا ذلك الانسياب العجيب في اللحن والعزف. · احمودي وضع شخصيته (النموذجية) في غرف القلوب ..وكان له (بريق) يضاهي بريق الفنان الذي يعزف معه. · عبر الاوتار تلك – خلق احمودي نجومية ...فكان (بصيرنا) الذي اهدانا كل هذه الالحان المنغمة. · انتوا البرازيليين ديل جنوا؟. · احمودي شخصيته فيها ذلك الطرب الجميل ...إلتقيت به في اكثر من مناسبة ..فكان في كل مرة يوصف الحالة التى اكون فيها (لبسا) ..ويمضي ابعد من ذلك وهو يصف لي المشهد كاملا بتفاصيل (مجهر) ما يجيبها. · حتى انه يلتقط اشياء لم اكن انتبه اليها. · عوض احمودي مع محمد النصري في حلقات (مع النصري) التى تقدمها قناة الشروق في روعة كاملة هذه الايام قدم حلقة في منتهى الدهشة. · كنت متابعا كواليس الحلقة مع فريق العمل ..وتابعت امس الحلقة التى قدمتها القناة ..فكان ذلك الائتلاف الذي حدث بين العود والطنبور. · احساس احمودي وهو الموسيقار الحديث بالنصري كان كبيرا واندهاشه به كان عريضا..فكان ذلك السحر الاخاذ الذي كان بين الطنبور والعود. · عوض احمودي بشوف بي (عودو)..من خلال تلك الاوتار يخلق احمودي لنفسه الرؤية والشوف ..ويجعلنا نحن (المستمعين) له في نشوة تحلق بنا بعيدا. · حلقة رائعة قدمتها قناة الشروق وهي تجمع بين النصري واحمودي في امسية رمضانية مدهشة. · مع النصري ..مازالت فيه حلقات عظيمة الادهاش. · فانتظروا..وترقبوا. · انتوا البرازيليين ديل جنوا؟. · ... · ملحوظة : هو في شنو؟. هوامش · كنت عاوز اكتب العمود بتركيز اعلي ..لكن (المانيا) لخبطت لي الموضوع. · لا عرفت اكتب ..ولا عرفت احضر المباراة. · عبدالماجد ذاتو سايطة الدنيا سواطة. · زولكم طلع (برازيلي). · وضح ان البرازيل هي نيمار. · الخميس انتخابات الهلال. · الاعضاء امام اختبار حقيقي يوم الخميس. · المشكلة ان الارباب والكاردينال فيهم الكثير من الشبه. · بتشابهوا حتى في الطعون. · ما في فرق كبير بين الارباب والكاردينال وان كان الاول صاحب خبرة في المجال الرياضي ..لكن برضو ما في فرق كبير. · لذلك على الاعضاء التركيز على بقية اعضاء المجلس. · المهم المجلس يأتي قويا. · وبعدين ما في مشكلة كبيرة يكون المجلس بقيادة صلاح ادريس او اشرف الكاردينال. · وان كنت اتفق مع الاخ حسن فاروق ان الانتخابات مرسومة. · وان (المرشحين) مثل (العرائس) تحركهم السلطة كما تريد. · العاوزنو ببقي. · نحن تعبانين ساكت. · انتخابات شنو؟...المسرحية مكتملة الفصول. · والله يكون في عون الهلال. · وان شاءالله الهلال محمي بجماهيره ..وشعبه. · محمد عبدالرحمن اثبت انه مهاجم المستقبل ..والحاضر. · بل هو مهاجم الوقت الحالي. · يجب ان يضع محمد عبدالرحمن اولا في تشكيلة الهلال من ثم يضع بقية اللاعبين. · محمد عبدالرحمن الان هو المهاجم الاول في الهلال. · انتوا البرازيليين ديل جنوا؟. · .... · عاجل : ما في شاحن هنا؟.
